گازەتىمىزدىڭ 7 – ايدىڭ 14 – كۇنى ۇرىمجىدەن بەرگەن حابارى. انار بۇلت / شينجياڭ گازەتىنىڭ ٴتىلشىسى حۋاڭ شيڭ حابارلايدى. 7 – ايدىڭ 14 – كۇنى توكيو وليمپيادا سپورت جارىسىنا قاتىناساتىن جۇڭگو دەنە تاربيە ۋاكىلدەر ۇيىرمەسىنىڭ ەسىمدىگى جاريالاندى. بالۋان رۇڭ نيڭنيڭ، ۋاليقان سەرىك، بوكسشى توقتاربەك تاڭاتقان، باسكەتبول سپورتشىسى حان شۇي، ۋاڭ ليلي، قايراڭ سپورتشىسى شيا شين – ي قاتارلى شينجياڭدىق 6 سپورتشى تاڭدالدى.

رۇڭ نيڭنيڭ لوپ اۋدانىنان، بيىل 24 جاستا. 2018 – جىلى 10 – ايدىڭ 25 – كۇنى پۋداپەشتتە وتكىزىلگەن 2018 – جىلعى دۇنيە جۇزىلىك بالۋانعا ٴتۇسۋ جۇلدەلى جارىسى ايەلدەردىڭ 57 كيلوگرامدىق شەشۋشى جارىسىندا رۇڭ نيڭنيڭ اعا جۇلدەگەر بولدى، سونداي-اق بۇل شينجياڭ بالۋاندارىنىڭ تۇڭعىش رەت دۇنيە جۇزىلىك اعا جۇلدەگەرلىككە يە بولۋى. 2019 – جىلى 9 – ايدىڭ 20 – كۇنى دۇنيە جۇزىلىك بالۋانعا ٴتۇسۋ جۇلدەلى جارىسى ايەلدەردىڭ 57 كيلوگرامدىق شەشۋشى جارىسىندا رۇڭ نيڭنيڭ جۇلدەگەر بولدى، سونىمەن توكيو وليمپيادا سپورت جارىسى الاڭىنا كىرۋ بەلەتىن الدى.

”شينجياڭ كومانداسىنان مەملەكەت كومانداسىنا دەيىن، كوپشىلىك ماعان وسىنشاما تاماشا تۇعىر ازىرلەپ، ەڭ جوعارى سيلىق ساحنالارىنان دۇركىن – دۇركىن بوي كورسەتتىم، بۇعان ىشتەي العىس ايتامىن. وليمپيادا سپورت جارىسىندا ەڭ تاماشا بەينە كورسەتۋ ٴاربىرىمىزدىڭ ەڭ زور نىسانامىز جانە ارمانىمىز. مەن جاتتىقتىرۋشىعا ىلەسىپ، ٴار كۇندى ويداعىداي يگەرىپ، قۇلشىنا جاتتىعىپ، قايسارلىقپەن كۇرەس جاساپ، وليمپيادا جارىس الاڭىنداعى ەڭ جوعارى سيلىق تۇعىرىنان بوي كورسەتۋدى ٴۇمىت ەتەمىن“، - دەدى رۇڭ نيڭنيڭ تىلشىگە.

ۋاليقان سەرىك ٴدوربىلجىن اۋدانىنان، بيىل 29 جاستا. 2021 – جىلى 4 – ايدىڭ 9 – كۇنى الماتىدا وتكىزىلگەن ازيا رايونىنىڭ وليمپيادا كۇرەسۋ تولىمدىلىق جارىسىندا، ول كلاسسيكالىق كۇرەستىڭ 60 كيلوگرامدىق جارىسىندا ەكىنشى جۇلدەگەر بولدى، سونىمەن توكيو وليمپيادا سپورت جارىسى الاڭىنا كىرۋ بەلەتىنە يە بولدى.

”بۇل مەنىڭ وليمپيادا سپورت جارىسىنا تۇڭعىش رەت قاتىناسۋىم، بار كۇشىمدى سالامىن“ . جۋىق ارادا وتكىزىلەتىن ماڭىزدى جارىس الدىندا، ۋاليقان سەرىكتىڭ سوزدەرىنەن تولىق سەنىمدى ەكەنى بايقالدى.

2020 – جىلى 3 – ايدىڭ 8 – كۇنى يوردانيانىڭ استاناسى اماندا وتكىزىلگەن 2020 – جىلعى توكيو وليمپيادا بوكس سپورت جارىسى ازيا، وكەانيا رايوندارىنىڭ تولىمدىلىق جارىسى ەرلەردىڭ 75 كيلوگرامدىق جارىسىندا التاي ايماعىنان كەلگەن 25 جاستاعى توقتاربەك تاڭاتقان يران شەبەرى مۇساۋيدى جەڭىپ، 4 مىقتى قاتارىنا ەنىپ، توكيو وليمپيادا سپورت جارىسىنا قاتىناسۋ ورنىنا يە بولدى.

”وليمپيادا سپورت جارىسىنىڭ كەشەۋىلدەتىلۋى ٴوزىمنىڭ ولقىلىقتارىمدى تولىقتاۋىما ٴبىر جىلدىق ۋاقىت بەردى. مەن وليمپيادا سپورت جارىسىنىڭ سيلىق تۇعىرىنان بوي كورسەتۋدى ٴۇمىت ەتەمىن“، - دەدى كوپ رەت جۇڭگونىڭ 75 كيلوگرامدىق بوكس پاتشاسى بولعان توقتاربەك تاڭاتقان تاياۋدا شوعىرلى جاتتىعۋ جاساعان كەزدە تىلشىگە.

شيا شين – ي ۇرىمجىدە تۋىلعان، قازىر 24 جاستاعى ول ازيا سپورت جارىسىنىڭ 2 التىن مەدالىنىڭ يەگەرى. وسى رەتكى توكيوعا ساپار ونىڭ وليمپيادا سپورت جارىسىنا تۇڭعىش رەت قاتىناسۋى، ول ٴارى بەيجيڭ وليمپيادا سپورت جارىسىنىڭ كۇمىس مەدال يەگەرى ۋاڭ جيەدەن كەيىن، وليمپيادا سپورت جارىسىنا قاتىناسۋ تولىمدىلىعىنا يە بولعان شينجياڭدىق ەكىنشى قايراڭ ۆاليبول سپورتشىسى.

3 ايدان كەيىن 22 جاسقا تولاتىن حان شۇيدىڭ بويىنىڭ بيىكتىگى 2.07 مەتر، ورتاڭعى شابۋىلشى مىندەتىن وتەيدى، ارەكەتى جەڭىل، دوپ زەيىنى مەن پسيحيكالىق ساپاسى ەلدەن ەرەك، دوپ لاقتىرۋى تەز. ورتا مەكتەپ تاۋىسقان سوڭ، حان شۇي شينجياڭ ايەلدەر باسكەتبول كومانداسىنا قاتىناسىپ، قازىرگە دەيىن تەر توگىپ كەلەدى.

جۇڭگو باسكەتبول 3 ادامدىق ايەلدەر مەملەكەتتىك كومانداسىنا تاڭدالعان 29 جاستاعى سپورتشى ۋاڭ ليلي شينجياڭ ايەلدەر باسكەتبول كومانداسىنىڭ باستىعى. بويىنىڭ بيىكتىگى 1.70 مەتر كەلەتىن ونىڭ قارسىلاسۋ قابىلەتى كۇشتى، ستيلى قايسار، تەحنيكاسى جان – جاقتىلى، قيان – كەسكى شايقاس جاساۋعا شەبەر، توپتىڭ ارتقى قورعاۋشىسى، ۇپاي الۋ ارتقى قورعاۋشىسى جانە كىشى اتويشىسى بولا الادى. جۇڭگو ايەلدەر باسكەتبول كومانداسى 2019 – جىلعى 3 ادامدىق دۇنيە جۇزىلىك جۇلدەلى جارىسىنىڭ اعا جۇلدەگەرى بولعان، سونداي – اق وسى كەزەكتى وليمپيادا سپورت جارىسىنداعى وسى تۇردەن اعا جۇلدەگەرلىكتى ەنشىلەيتىن ٴتۇيىندى كوماندا.

جوعارىداعى سپورتشىلاردان سىرت، بۇرىنعى شينجياڭ ساداق اتۋ سپورتشىسى شۋە حايفىڭ جۇڭگو ساداق اتۋ كومانداسىنىڭ جاتتىقتىرۋشىسى، بۇرىنعى شينجياڭ فيحۋ باسكەتبول كومانداسىنىڭ دوپشىسى مۇرات ٴادىلجان جۇڭگو ايەلدەر باسكەتبول كومانداسىنىڭ جاتتىقتىرۋشىسى رەتىندە دە وسى كەزەكتى توكيو وليمپيادا سپورت جارىسىنا قاتىناساتىن جۇڭگو دەنە تاربيە ۋاكىلدەر ۇيىرمەسىنىڭ ەسىمدىگىنە ەنگىزىلدى.

اۋدارعان: قادىر ماقان