سۋرەت ①: 7 - ايدىڭ 29 - كۇنى جاڭ يۇيفي جارىستا. □ سۋرەتتى شينحۋا اگەنتتىگىنىڭ ءتىلشىسى دۋ يۇي تۇسىرگەن

　سۋرەت ②: 7 - ايدىڭ 29 - كۇنى چىن مىڭ (سولدا) جانە سۇن يىڭشا جارىستان كەيىن مەملەكەت تۋىن الدىلارىنا كەرىپ كورسەتۋدە.□ سۋرەتتى شينحۋا اگەنتتىگىنىڭ ءتىلشىسى ۋاڭ دۇڭجىن تۇسىرگەن

سۋرەت ③: 7 - ايدىڭ 29 - كۇنى جۇڭگو قۇراماسىنىڭ ساڭلاقتارى ايەلدەر 200 × 4 مەترلىك ەركىن ءجۇزۋ ۇتىلامالى جارىسىنداعى اعا جۇلدەگەرلىگىن قۇتتىقتاۋدا. □ سۋرەتتى شينحۋا اگەنتتىگىنىڭ ءتىلشىسى چىن جيانلي تۇسىرگەن

شينحۋا اگەنتتىگىنىڭ 7 - ايدىڭ 29 - كۇنى توكيودان بەرگەن حابارى (ۋاڭ چين - وۋ، ۋاڭ حىڭجى، ۋاڭ زىجياڭ). جۇڭگو قۇراماسى 7 - ايدىڭ 29 - كۇنى كۇيزەلىس پەن شاتتىقتى بىردەي باستان كەشىردى، ءجۇزۋ مەن مەملەكەتتىك ۇستەل دوپ قۇراماسىنىڭ التىن گۇلدەرى تاعى دا 3 التىن مەدال الىپ، جۇڭگو التىن مەدال تاقتاسىندا جاپونيادان اسىپ، ءبىرىنشى ورىنعا شىقتى. ال جۇڭگو ايەلدەر ۆولەيبول قۇراماسىنىڭ 3 رەت جەڭىلۋى ادامدى الاڭداتادى، جارالانۋدىڭ ىقپالىنا ۇشىراعان جۋ تيڭنىڭ جالعاستى سايىسقا شىعۋ - شىقپاۋى بەلگىسىز بولىپ تۇر، قالعان 2 رەتكى شايقاستا جۇڭگو ايەلدەر ۆولەيبول قۇراماسى، ءسوز جوق، بار كۇشپەن جەڭگەندە عانا، گرۋپپادان شىعا الادى.

7 - ايدىڭ 29 - كۇنى تۇستەن بۇرىن جۇڭگو ءجۇزۋ قۇراماسى كۇشتى ەكپىن كورسەتتى. جاڭ يۇيفي ايەلدەردىڭ 200 مەترگە كەۋدەمەن ءجۇزۋ جارىسىندا ارمانداعانىنداي وسى كەزەكتى وليمپيادا سپورت جارىسىنداعى ءجۇزۋ جارىستارىنىڭ العاشقى التىن مەدالىن الدى ءارى وليمپيادا سپورت جارىسىنىڭ رەكوردىن جاڭالاپ، اتى زاتىنا ساي ”كەۋدەمەن ءجۇزۋ پاتشايىمىنا“ اينالدى. نەبارى ءبىر ساعاتتان استام ۋاقىتتان كەيىن، ياڭ جۇنشۋان، تاڭ مۋحان، جاڭ يۇيفي جانە لي بيڭجيەلەردەن قۇرالعان جۇڭگو قۇراماسى ايەلدەردىڭ 200 × 4 مەترلىك ەركىن ءجۇزۋ ۇتىلامالى جارىسىندا دۇنيە جۇزىلىك رەكوردتى جاڭالاپ، 5 كەزەك وليمپيادا سپورت جارىسىنداعى التىن مەدالدىڭ يەگەرى امەريكا قۇراماسىن كۇشپەن باسىپ وزىپ، قاراماققا ”مۇمكىندىگى جوق“ التىن مەدالدى ويلاماعان جەردەن الدى. 4 ساڭلاقتىڭ اتىنىڭ ءبارى سۋمەن قاتىستى بولعاندىقتان، ىقىلاسپەن ”سۋ بويجەتكەندەر“ قۇراماسى دەپ اتالدى.

ۇستەل دوپتىڭ كەشكە وتكەن ايەلدەر جەكە جارىسىنىڭ شەشۋشى جارىسى جۇڭگو قۇراماسىنىڭ ”ىشكى سايىسى“ بولدى، وليمپيادا سپورت جارىسى ساحناسىنا العاش شىققان چىن مىڭ، سۇن يىڭشا جەكە - جەكە 0: 4 ۇپايمەن سينگاپۋردىڭ 31 جاستاعى ساقا ساڭلاعى يۇي مىڭيۇي مەن جاپونيانىڭ نەبارى 20 جاستاعى ەر - ايەل ارالاسپالى جارىسى التىن مەدالىنىڭ يەگەرى يتىڭ ميچىڭدى جەڭگەن سوڭ، شەشۋشى جارىستا كەزدەستى. ەڭ سوڭىندا چىن مىڭ 2 : 4 ۇپايمەن سۇن يىڭشانى جەڭىپ، جۇڭگو قۇراماسىنا 15 - التىن مەدالدى الىپ بەردى.

جۇڭگونىڭ تاعى ءبىر باسىمدىققا يە سپورت ءتۇرى قاۋىرسىن دوپتان سول كۇنى جاقسى حابار كەلدى. ەر - ايەل ارالاسپا جارىسىنىڭ قاس شەبەرلەرى جىڭ سىۋي / حۋاڭ ياچيۇڭ مەن قۇرامالاستارى ۋاڭ يىڭلۇي / حۋاڭ دۇڭپيڭ سول كۇنى تۇگەلدەي جارتىلاي شەشۋشى جارىستا جەڭىسكە جەتىپ، شەشۋشى جارىستا كەزدەسەتىن بولدى؛ ەرلەر قوس ادامدىق جارىسىنىڭ، ايەلدەر قوس ادامدىق جارىسىنىڭ 4 مىقتىسى شىقتى، جۇڭگو قۇراماسى ءارقايسىسىنان ءبىر ورىن يەلەدى؛ ايەلدەر جەكە جارىس ءتۇرىنىڭ الدىڭعى سەگىزدىگىنە الدىڭعى 8 قاس شەبەر كىردى. جۇڭگو قۇراماسىنداعى چىن يۇيفي، حى بيڭجياۋ كەلەسى جارىسقا ءوتتى؛ ەرلەر جەكە جارىس تۇرىندەگى چىن لۇڭ، شى يۇيچي 8 مىقتىنىڭ قاتارىنا ءوتتى. قاۋىرسىن دوپ تۇرىندە اۋسەلەسىن كورسەتپەك بولعان جاپونيا قۇراماسى ەرلەر جەكە جارىس تۇرىندە، ەر - ايەل ارالاسپا جارىس تۇرىندە تۇگەلدەي جەڭىلىس تاۋىپ، تەك ايەلدەر جەكە جارىس تۇرىندە عانا التىن مەدال الۋ ورايىن ساقتاپ قالدى.

سول كۇنى جۇڭگو كورەرمەندەرى تاعى 3 رەتكى ”جۇرەك دۇرسىلدەتەر“ ءساتتى باستان كەشىردى. تۇستەن كەيىن وتكىزىلگەن ۇستەل دوپ ەرلەر جەكە جارىسىنىڭ جارتىلاي شەشۋشى جارىسىندا جارىستىڭ 1 -، 2 - شەبەرى فان جىندۇڭ مەن ما لۇڭ جەكە - جەكە قارسىلاستارىمەن شەشۋشى شايقاسقا دەيىن بەلدەستى. ەڭ سوڭىندا فان جىندۇڭ، ما لۇڭ ەكەۋى دە 3: 4 ۇپايمەن جۇڭگو تايبەي قۇراماسىنداعى لين يۇنرۋدى جانە گەرمانيادان كەلگەن 7 - ءنومىرلى شەبەر وچاروۆتى جەڭىپ، ءساتتى تۇردە شەشۋشى جارىسقا كىرىپ، وسى ءتۇردىڭ التىن مەدالى مەن كۇمىس مەدالىن الدىن الا تۇراقتاندىردى.

ال ەل نازارىن اۋدارعان جۇڭگو ايەلدەر ۆولەيبول قۇراماسى گرۋپپا جارىسىنىڭ 3 - شايقاسىندا شەشۋشى شايقاسقا دەيىن قاتتى ايقاسسا دا، ناتيجەسى وكىنىشتى بولدى.

جۇڭگو ايەلدەر ۆولەيبول قۇراماسى 7 - ايدىڭ 31 - كۇنى قازىرگە دەيىنگى 3 رەتكى شايقاستا تۇگەل جەڭگەن يتاليا قۇراماسىمەن كەزدەسەدى، سوڭىنان تاعى ارگەنتينا قۇراماسىمەن شايقاسادى. قازىر جۇڭگو ايەلدەر ۆولەيبول قۇراماسى مەن ارگەنتينا قۇراماسى 3 رەتكى شايقاستا تۇگەلدەي جەڭىلىپ، گرۋپپانىڭ ەڭ سوڭعى 2 ورنىندا تۇر، جۇڭگو تەك تازا جەڭىس رەتىمەن ارگەنتينانىڭ الدىندا تۇر.

3 ۇلكەن دوپ جارىسىنىڭ سول كۇنگى تاعى ءبىر ءتۇيىندى جارىسى يسپانيا ەرلەر باسكەتبول قۇراماسى مەن ارگەنتينا اراسىنداعى دۇنيە جۇزىلىك ەرلەر باسكەتبول جارىسى شەشۋشى جارىسىنىڭ ”قايتالانۋى“. C گرۋپپانىڭ گرۋپپا جارىسىندا ۇلكەن - كىشى گاسولدار مەن رۇبيو باستاعان يسپانيا قۇراماسى 71 : 81 ۇپايمەن ساقا ساڭلاق سكولا باستاعان ارگەنتينانى جەڭىپ، قارسىلاسىنا ەسە قايىرار وراي بەرمەدى.

7 - ايدىڭ 29 - كۇنىنەن كەيىن، جۇڭگو 15 التىن، 7 كۇمىس، 9 قولا مەدالدىق شايقاس ناتيجەسىمەن داياشى ەل جاپونيانىڭ 15 التىن، 4 كۇمىس، 6 قولا ناتيجەسىنەن وزىپ ءبىرىنشى ورىنعا جايعاستى. جۇڭگو ساڭلاقتارى ۇستەل دوپ، قاۋىرسىن دوپ 2 تۇردەگى شەشۋشى جارىستا الدىن الا كەزدەسىپ، 7 - ايدىڭ 30 - كۇنى الاتىن 2 التىن مەدالدى الدىن الا تۇراقتاندىردى. امەريكا كۇنىنە 3 التىن مەدال الىپ 3 - ورىنعا جايعاستى، جۇڭگو، امەريكا، جاپونيا 3 ەلدىڭ التىن مەدال تاقتاسىنداعى بەلدەسۋى ءالى دە جالعاسادى. ال امەريكانىڭ التىن مەدال الاتىن ۇلكەن ءتۇرى جەڭىل اتلەتيكا 7 - ايدىڭ 30 - كۇنى جارىس باستايدى.

7 - ايدىڭ 29 - كۇنى وليمپيادا سپورت جارىسى اشىلعاننان كەيىنگى 6 - جارىس كۇنى، گولف، كىشكەنە دوڭگەلەكتى ۆەلوسيپەدپەن جارىسۋ سول كۇنى جارىس باستادى، جۇڭگو ساڭلاقتارى گولف تۇرىندە مەدالعا سايىس جاريالايدى.

7 - ايدىڭ 30 - كۇنى جەڭىل اتلەتيكا، ءجۇزۋ، جارىس قايىعى، نىسانا اتۋ، ۆەلوسيپەد، تور دوپ سياقتى تۇرلەردە جيىنى 21 التىن مەدال جارىققا شىعادى ءارى ايەلدەر فۋتبول جارىسىنىڭ 4 مىقتىسى سارالانادى. جۇڭگو ايەلدەر باسكەتبول قۇراماسى وسى كەزەكتى وليمپيادا سپورت جارىسىنداعى 2 - رەتكى جارىستى قارسى الادى، قارسىلاسى دۇنيە جۇزىندە 2 - ورىندا تۇرعان اۆستراليا قۇراماسى. ايەلدەر باسكەتبول قۇراماسى 3 ادامدىق باسكەتبول جارىسىنان كەيىن تاعى تاماشا ناتيجەگە جەتە مە، كۇتۋگە تاتيدى.