باح سپورتشىلاردىڭ وليمپياداعا رۋح ۇستەگەندىگىن القادى

8 - ايدىڭ 6 - كۇنى جۇڭگو كومانداسىنىڭ ساڭلاقتارى ما لۇڭ (وڭنان 1 - )، شۇي شين (وڭنان 2 -)، فان جىندۇڭ (سولدان 1 -) جاتتىقتىرۋشىلارى چين جىجيانمەن بىرگە اعا جۇلدەگەرلىكتەرىن قۇتتىقتاۋدا.  سۋرەتتى شينحۋا اگەنتتىگىنىڭ ءتىلشىسى ۋاڭ دۇڭجىن تۇسىرگەن

8 - ايدىڭ 6 - كۇنى ليۋ شىيىڭ جارىستا.  سۋرەتتى شينحۋا اگەنتتىگىنىڭ ءتىلشىسى لي ميڭ تۇسىرگەن

　　شينحۋا اگەنتتىگىنىڭ 8 - ايدىڭ 6 - كۇنى توكيودان بەرگەن حابارى (تىلشىلەر ۋاڭ چين - وۋ، ديڭ ۋىنشيان، ۋاڭ زىجياڭ). 8 - ايدىڭ 6 - كۇنى جۇڭگو ەرلەر ۇستەل دوپ كومانداسى توپتىق جارىستا التىن مەدال الىپ، ۇستەل دوپ ويىن تۇرلەرى تابىسپەن اياقتالدى. جەڭىل اتلەتيكا جارىس الاڭىندا دۋماندى ورلەۋ كوتەرىلدى، ليۋ شىيىڭ ايەلدەردىڭ نايزا لاقتىرۋىنان التىن مەدال الدى، سپورتتىق ءجۇرىس، كۇش جالعاۋ جارىس ويىن تۇرلەرىندە اتتەگەن - اي دا، تابىس تا بولدى، تىڭنان قوسىلعان يتاليا 100 مەترلىك جارىس جولىندا جۇرتتى تاعى تاڭداي قاقتىردى. توكيو وليمپياداسى اياقتالۋعا تايادى، 3 ۇلكەن دوپ سياقتى نازار اۋدارتىپ وتىرعان ويىن تۇرلەرى مەدالعا تالاسۋ كەزەڭىنە ءوتتى، حالىقارالىق وليمپيادا كوميتەتىنىڭ ءتوراعاسى باح 8 - ايدىڭ 6 - كۇنى سپورتشىلار وليمپياداعا رۋح ۇستەدى دەپ القادى.

　　تۇستەن كەيىن اياقتالعان ايەلدەردىڭ 20 كيلومەترلىك سپورتتىق ءجۇرىس جارىسىندا، جۇڭگو ياڭ جيايۇي، ليۋ حۇڭ جانە چيەياڭ شىجيە ۇشەۋىن جارىسقا قاتىناستىرعان بولاتىن، الايدا يتاليالىق پالميسانو ايقىن باسىمدىقپەن جۇلدەگەرلىكتى الدى. دۇنيە جۇزىلىك رەكوردتى ساقتاۋشى ياڭ جيايۇي اتويلاۋ كەزەڭىندە 2 مينۋتقا جازالانىپ، اقىرىندا 12 - ورىندى مىسە تۇتتى. 4 كەزەك وليمپيادانىڭ ساقا ساڭلاعى، اعا جۇلدەگەرلىگىن قورعاۋشى ليۋ حۇڭ قولا مەدالعا يە بولدى. وليمپياداعا 3 - رەت قاتىناسىپ وتىرعان چيەياڭ شىجيە 7 - بولىپ كەلدى.

　　جەڭىل اتلەتيكا جارىس الاڭىندا سول كۇنى جيىنى 8 التىن مەدالدىڭ تاعدىرى شەشىلدى. جۇڭگولىق سپورتشى ليۋ شىيىڭ گۇڭ ليجياۋدان كەيىن جۇڭگو اتلەتيكاسى ءۇشىن تاعى تىڭ ناتيجە جاراتىپ، ايەلدەردىڭ نايزا لاقتىرۋ شەشۋشى جارىسىندا 1 - رەتتە - اق 66 مەتر 34 سانتيمەترگە لاقتىردى ءارى ءوزىنىڭ جارىس ماۋسىمىنداعى وسى ەڭ جاقسى ناتيجەسىمەن اعا جۇلدەگەرلىكتى قانجىعالادى. ەرلەردىڭ، ايەلدەردىڭ 100 × 4 مەترگە كۇش جالعاپ جۇگىرۋ جارىسىندا، لياڭ شياۋجيڭ، گى مانچي، حۋاڭ گۇيفىن، ۋي يۇڭليلەردەن قۇرالعان جۇڭگو ايەلدەر كومانداسى 6 - ورىندى يەلەپ، 42 سەكۋند 71 تاقىلدىق ناتيجەمەن كوماندانىڭ جارىس ماۋسىمىنداعى ەڭ جاقسى ناتيجەسىن جاراتتى. تاڭ شيڭچياڭ، شيە جىنيە، سۋ بيڭتيان جانە ۋ جىچياڭنان قۇرالعان ەرلەر كومانداسى 37 سەكۋند 79 تاقىلدىق مەملەكەتتىك رەكوردى جاراتتى، ءداستۇرلى قۋاتتى كوماندا يامايكانىڭ الدىندا كەلگەنىمەن، 0.09 سەكۋندتىق پارىقپەن سيلىق ساحناسىنا شىعا الماي، ريو - دە جانەيرو وليمپياداسىنداعى تورتىنشىلىكتى جالعاستىردى. داياشى ەل جاپونيا ەرەجەگە قايشىلىق جاساعانى ءۇشىن ناتيجەدەن قۇر الاقان قالدى.

　　يتاليالىقتاردىڭ ەرلەردىڭ 100 مەترگە جۇگىرۋ جارىسىندا مىقتىلىق كورسەتكەننەن كەيىن، ەرلەردىڭ 100 × 4 مەترگە كۇش جالعاپ جۇگىرۋ جارىسىندا جۇلدەگەرلىكتى تاعى الىپ، امەريكانىڭ، يامايكانىڭ قىسقا ارالىقتا جۇگىرۋ ويىن تۇرلەرىندەگى مونوپولدىعىن بۇزۋى توسىن وقيعا بولدى. مۇنان سىرت، يتاليا ەرلەردىڭ، ايەلدەردىڭ 20 كيلومەترلىك سپورتتىق ءجۇرىس جارىسىنىڭ التىن مەدالدارىن تۇگەل ءوز قورجىندارىنا سالدى ءارى ەرلەردىڭ بيىكتەن سەكىرۋىنىڭ التىن مەدالىن دا يەلەدى، يتاليا قازىر جەڭىل اتلەتيكا ويىن تۇرلەرىنىڭ التىن مەدال تاقتاسىندا 5 التىن مەدالمەن امەريكامەن يىق تەڭەستىرىپ تۇر.

　　ۇستەل دوپ ويىن تۇرلەرى 8 - ايدىڭ 6 - كۇنى اياقتالدى، فان جىندۇڭ، شۇي شين جانە ما لۇڭ ەرلەردىڭ ۇستەل دوپ توپتىق جارىسىندا گەرمانيانى جەڭىپ جۇڭگونىڭ اعا جۇلدەگەرلىك ورنىن ءساتتى قورعاپ، جۇڭگونىڭ وسى ويىن تۇرىندەگى ءۇرتىس 4 رەتكى اعا جۇلدەگەرلىگىن جۇزەگە اسىردى.

　　بەلدەسۋ تۇرىندەگى جارىستاردا دا تابىس بار. كۇرەس جارىس الاڭىندا، پاڭ چيانيۇي 53 كيلوگرامدىق سالماقتاعى ايەلدەردىڭ ەركىن كۇرەسىنەن شەشۋشى جارىستىڭ ەڭ سوڭعى ساتىندە 5: 4 ۇپايمەن ەكى كەزەك دۇنيە جۇزىلىك جۇلدەلى جارىستىڭ اعا جۇلدەگەرى، جاپونيا ساڭلاعى شياڭتيان جىنيوۋعا توتەپ بەرە الماي، كۇمىس مەدال الدى؛ العاش رەت وليمپياداعا ەنگىزىلگەن كاراتە ويىنىندا، يىن شياۋيان سەربيا ساڭلاعىنان قاپىدا جەڭىلىپ، ايەلدەر گرۋپپاسى 61 كيلوگرامدىق جارىس ءتۇرىنىڭ كۇمىس مەدالىن الدى. ال لي چيان 75 كيلوگرامدىق سالماقتاعى ايەلدەر بوكسىنىڭ شەشۋشى جارىسىنا كىردى، ول جانە گۋ حۇڭنىڭ بوكس ويىندارىنىڭ ەڭ سوڭعى 2 جارىس كۇنىندە جۇڭگوعا تاعى توسىن سي ۇسىنۋىنان ءۇمىت بار.

　　وسى كەزەكتى وليمپيادا سپورت جارىسىنا جاڭادان قوسىلعان ويىن ءتۇرى جارتاسقا ورمەلەۋ جارىسى 8 - ايدىڭ 6 - كۇنى اياقتادى، وليمپيادا سپورت جارىسىنىڭ العاشقى جارىسى دۇنيە جۇزىلىك رەكوردتىڭ جارىققا شىعۋىنا كۋا بولدى. پولشا ساڭلاعى ميلوسلاۆ 6 سەكۋند 84 تاقىلدىق ناتيجەمەن ايەلدەردىڭ جارتاسقا جىلدام ورمەلەۋ جارىسىنىڭ دۇنيە جۇزىلىك رەكوردىن جاڭالادى، الايدا قيىندىعى مەن جارتاسقا ورمەلەۋ ەكى تۇردە دۇنيە جۇزىندە ءبىرىنشى ورىندا تۇرعان سلوۆەنيا ساڭلاعى گارنبلات جالپى قاتارىنا سۇيەنىپ، ەڭ سوڭىندا اعا جۇلدەگەرلىكتى قانجىعاسىنا بايلادى.

　　ايەلدەر باسكەتبول، ايەلدەر ۆولەيبول جارىسىنىڭ جارتىلاي شەشۋشى جارىسى سول كۇنى اياقتادى. برازيليا مەن امەريكا ايەلدەر ۆولەيبولىنىڭ شەشۋشى جارىسىندا كەزدەسەتىن بولدى. ايەلدەر باسكەتبولى جارىسىندا امەريكا كومانداسى ويلاعانداي شەشۋشى جارىسقا كىردى، ال جاپونيا ايەلدەر باسكەتبول كومانداسى ەۆروپاداعى مىقتى كوماندا فرانسيانى جەڭىپ، 87:71 ۇپايلىق زور سالىستىرمامەن ازيا باسكەتبولىنىڭ ناقتى قۋاتىن ايگىلەدى، بۇل، سونداي - اق جاپونيا ايەلدەر باسكەتبول كومانداسى تاريحىندا العاش رەت وليمپيادا سپورت جارىسىنىڭ شەشۋشى جارىسىنا كىرۋى بولىپ تابىلادى.

　　الايدا داياشى ەل ەرلەر فۋتبولىنىڭ قولا مەدال شايقاسىندا 3: 1 ۇپايمەن مەكسيكا قۇراماسىنان جەڭىلىپ قالدى. ايەلدەر فۋتبولىنىڭ شەشۋشى جارىسى جازا دوپ شايقاسىنىڭ 6 - كەزەگىنە دەيىن جالعاسىپ، شۆەتسيانىڭ جازا دوبىن قارسى جاقتىڭ قاقپاشىسى قاعىپ جىبەرگەندە، كانادا دوپ كىرگىزىپ، كانادا ايەلدەر فۋتبول كومانداسى كوماندا تاريحىندا العاشقى وليمپيادا اعا جۇلدەگەرلىگىنە يە بولدى. ايەلدەر حوككەي جارىسىنىڭ التىن مەدالىن ايتۋلى مىقتى كوماندا نيدەرلاند الىپ كەتتى.

　　8 - ايدىڭ 6 - كۇنىنە دەيىن جۇڭگو 36 التىن، 26 كۇمىس، 17 قولا مەدالمەن التىن مەدال تاقتاسىنىڭ الدىنا شىقتى، امەريكا 31 التىن، 36 كۇمىس، 31 قولا مەدالمەن 2 - بولدى، جاپونيا 24 التىن، 11 كۇمىس، 16 قولا مەدالمەن 3 - ورىنعا جايعاستى.

　　وليمپيادا سپورت جارىسى اياقتايىن دەپ قالدى، حالىقارالىق وليمپيادا كوميتەتىنىڭ ءتوراعاسى باح 8 - ايدىڭ 6 - كۇنى جابىلۋ بويىنشا قورىتىندىلاۋدى جاريالاۋ ماجىلىسىندە ءوزىنىڭ كورەرمەنسىز جارىستىڭ جانسىز بولىپ قالاتىندىعىنان الاڭداعانىمەن، فاكتتەر سپورتشىلاردىڭ وليمپيادا سپورت جارىسىنا رۋح ۇستەگەندىگىن ايتتى.

　　باح بىلاي دەدى: جارىس كەزىندە جاڭا تيپتى ايدارشا ۆيرۋستىڭ تەكسەرۋ مولشەرى 600 مىڭ رەتتەن استى، مۇنىڭ ىشىندە وليمپياداشىلار جاپونياعا جەتكەننەن كەيىن جاسالعان 42 مىڭ 500 رەتكى تەكسەرۋ بارىسىندا، بولىمدى ناۋقاستاردىڭ انىقتالىپ شىعۋ سالىستىرماسى نەبارى وتە تومەن ％0.08، ال باسقا 571 مىڭ رەتكى ءبىر - بىرلەي تەكسەرۋ بارىسىندا، تەكسەرىپ انىقتالۋ سالىستىرماسى ءتىپتى ％0.02كە دەيىن تومەن بولدى.

　　قازىرگە دەيىن توكيو وليمپيادا سپورت جارىسى كەزىندەگى جارىس ءىشى قوزدىرعىشىن تەكسەرۋدە الى دە بولىمدى ناتيجە انىقتالعان جوق. باحتىڭ قاراۋىنشا، بۇل دۇنيە جۇزىلىك قوزدىرعىشقا قارسى تۇرۋ قۇرىلىمى مەن حالىقارالىق قوزدىرعىش تەكسەرۋ قۇرىلىمىنىڭ وسى كەزەكتى جارىستان بۇرىن جۇرگىزگەن قىرۋار جارىستان تىس تەكسەرۋىنىڭ ارقاسى ەكەن، مۇندا بايقالعان قاعيداعا قايشى ىستەر جارىستان بۇرىن وليمپيادا سپورت جارىسى تىزىمىنەن شىعارىلعان.

　　8 - ايدىڭ 6 - كۇنى ايەلدەر ۆولەيبولى جارتىلاي شەشۋشى جارىسىنان بۇرىنعى وقيعا باحتىڭ سوزىنە كۋا بولدى. برازيليا كومانداسىنىڭ مىقتى ويىنشىسى تاندالا قوزدىرعىش تەكسەرۋ ۇلگىسىندە بولىمدى ناتيجە كورسەتكەندىكتەن شۇعىل جارىستان توقتاتىلدى، ونىڭ بولىمدى بولىپ شىققان ۇلگىسى ءبىر ايدىڭ الدىندا الىنعان بولاتىن.

　　8 - ايدىڭ 7 - كۇنى كوپتەگەن ويىن تۇرلەرىندە سىرگە جيار شايقاس وتكىزىلىپ، جيىنى 34 التىن مەدال تابىستالادى، جۇڭگو كومانداسىنىڭ سۋعا سەكىرۋ، بوكس، رەزينا قايىق سياقتى ويىن تۇرلەردىڭ بارىندە التىن مەدال الۋ مۇمكىندىگى بار.