باس بەتكە قايتۋ | 中文 ىلە اقپارات تورابىنا حوش كەلدىڭىزدەر!
شينجياڭ ۋاكىلدەر ۇيىرمەسى 7 التىن مەدال، 7 كۇمىس مەدال، 7 قولا مەدال الدى
2021-09-30 18:12:02     كورىلىم:رەت كەلۋ قاينارى:تيانشان تورى  جاۋاپتى رەداكتور:بەرىك وقاباي ۇلى

  14 - كەزەكتى مەملەكەتتىك سپورت جارىسى شي - اندا جابىلدى

  شينجياڭ ۋاكىلدەر ۇيىرمەسى 7 التىن مەدال، 7 كۇمىس مەدال، 7 قولا مەدال الدى

  1979 - جىلعى 4 - كەزەكتى مەملەكەتتىك سپورت جارىسىنان بەرگى ەڭ تاماشا ناتيجەنى جاراتتى


انار بۇلت / شينجياڭ گازەتىنىڭ تىلشىلەرى دۇڭ لياڭ، حۋاڭ شيڭ 9 - ايدىڭ 27 - كۇنى شي - اننان حابارلايدى. 9 - ايدىڭ 27 - كۇنى كەشتە 14 - كەزەكتى مەملەكەتتىك سپورت جارىسى شي - اندا جابىلدى. شينجياڭ دەنە تاربيە ۋاكىلدەر ۇيىرمەسى وسى كەزەكتى مەملەكەتتىك سپورت جارىسىندا 7 التىن مەدال، 7 كۇمىس مەدال، 7 قولا مەدال الىپ، 1979 - جىلعى 4 - كەزەكتى مەملەكەتتىك سپورت جارىسىنان بەرگى ەڭ تاماشا ناتيجەنى جاراتتى.

وسى كەزەكتى مەملەكەتتىك سپورت جارىس الاڭىندا 125 شينجياڭدىق سپورت ساڭلاعى 16 ۇلكەن ءتۇر، 65 شاعىن تۇردەگى باسەكەنىڭ دەنە تاربيە جارىسىندا قۇندى 21 مەدال الۋدان سىرت، تاعى ءبىر تورتىنشىلىكتى، 10 بەسىنشىلىكتى، 3 التىنشىلىقتى، 2 جەتىنشىلىكتى جانە 2 سەگىزىنشىلىكتى الدى.

”شينجياڭدىق دەنە تاربيە ساڭلاقتارىنىڭ تاماشا بەينەسى سوڭعى جىلدارى، اسىرەسە، 3 - رەتكى ورتالىقتىڭ شينجياڭ قىزمەتى جونىندەگى اڭگىمە ماجىلىسىنەن بەرى، رايونىمىزدىڭ دەنە تاربيە ىستەرىنىڭ جوعارى ساپالى دامىعان تاماشا جاعدايىن جان - جاقتى ايگىلەدى“. شينجياڭ دەنە تاربيە ۋاكىلدەر ۇيىرمەسىنىڭ اقپارات مالىمدەمەشىسى جاۋ چىڭچياڭ بىلاي دەدى: ۇزدىك ناتيجەلەرگە قول جەتكىزۋمەن بىرگە، شەبەرلەر ىنتىماقتاسا سايىسىپ، مىقتى قارسىلاستارىنان جاسقانباي، ەرلىكپەن اعالاپ العا شىعۋعا قۇلشىنىپ، وليمپيك رۋحى مەن جۇڭحۋا دەنە تاربيە رۋحىن جاندى ءتۇسىندىرىپ بەردى، شينجياڭ ۋاكىلدەر ۇيىرمەسى جانە 9 ۋاكىلدەر قۇراماسى، 15 سپورتشى جەكە - جەكە دەنە تاربيە ءمورالدىق سالت سيلىعىن الىپ، جارىسقا قاتىناسۋ ناتيجەسى مەن رۋحاني وركەنيەتتە بىردەي مول ونىمگە قول جەتكىزدى.

وسى كەزەكتى مەملەكەتتىك سپورت جارىسىندا شينجياڭنىڭ 3 ۇلكەن دوپ تۇرىندەگى ناتيجەسى قوماقتى بولدى. ەرلەر U20 فۋتبول، ەرلەر قايراڭ ۆولەيبول تۇرلەرىندە تۇڭعىش رەت شەشۋشى جارىسقا كىردى، ايەلدەر قايراڭ ۆولەيبول جارىسىندا تۇڭعىش رەت اعا جۇلدەگەر بولدى. شينجياڭنان مەملەكەت باسكەتبول قۇراماسىنا بارعان حان شۇي، ۋاڭ ليلي شينجياڭ ۇيىرمەسىنە تۇڭعىش التىن مەدالدى جانە 7 - التىن مەدالدى الىپ بەردى، شينجياڭ ايەلدەر باسكەتبول قۇراماسى دا تاريحتاعى ەڭ تاماشا ناتيجەمەن تەڭەستى. ”شينجياڭنىڭ 3 ۇلكەن دوپتاعى تاماشا بەينەسىنەن بولاشاققا تولىق سەنىم ارتتىق. ءبىز مۇنى تىڭ باستاما ەتىپ، جوعارى دەڭگەيدە جوبالاۋدى كۇشەيتىپ، جاس ءوسپىرىم دارىندىلاردى تاڭداۋ جۇيەسى قۇرىلىسىن كەمەلدەندىرەمىز“، - دەدى اۆتونوميالى رايوندىق دەنە تاربيە مەكەمەسى دەنە تاربيە جاتتىقتىرۋ 1 - ۇلكەن اترەتى پارتكومىنىڭ شۋجيى كاڭ يۇڭشين.

شينجياڭنىڭ دەنە تاربيەدەگى ءداستۇرلى باسىمدىققا يە تۇرلەرى ۇزدىكسىز الدا ءجۇردى. كۇرەس، بوكس سياقتى بەلدەسۋ تۇرلەرىندە توپتىق باسىمدىق جارىققا شىقتى، تايچۋانداۋ، ات ويىنى، ساداق اتۋ سياقتى تۇرلەردە باسەكەلىك قۋاتىن ساقتادى، باسىمدىعى كومەسكى تۇرلەرى، اسىرەسە، جەڭىل اتلەتيكانىڭ لاقتىرۋ ءتۇرىنىڭ دامۋى كىسىنى قۋانتادى، 24 جاستاعى دەسكى سپورتشىسى ابدۇعيني تۇرعۇن شينجياڭنىڭ جەڭىل اتلەتيكا جارىس ءتۇرى بويىنشا مەملەكەتتىك سپورت جارىسىنداعى تۇڭعىش التىن مەدالىن الدى. ”جارىستان كەيىن تىڭ باستاما باستالادى، ءبىز عىلمي قورىتىندىلاپ، داندايسىماي، ۇشقالاقتىققا سالىنباي، ۇزدىكسىز قۇلشىنىپ، باسىمدىقتى ساقتاي تۇسەمىز“، - دەدى اۆتونوميالى رايوندىق دەنە تاربيە مەكەمەسى كۇرەس، روۋداۋ سپورتىن باسقارۋ ورتالىعى پارتكومىنىڭ شۋجيى ادىل بارات.

”ناتيجەلەردىڭ قولعا كەلۋىن ءار ۇرپاق شينجياڭدىق دەنە تاربيەشىلەردىڭ كۇش جالعاپ قالاعان مىعىم نەگىزىنەن بولە قاراۋعا بولمايدى، دەنە تاربيە ساڭلاقتارىنىڭ قۇلشىنا سايىسىپ، ەرلىكپەن اعالاپ العا شىعۋعا قۇلشىنۋىنان دا بولە قاراۋعا بولمايدى. الدا شينجياڭنىڭ دەنە تاربيە ىستەرىنىڭ جوعارى ساپالى دامۋىن بار كۇشپەن ىلگەرىلەتىپ، دەنە تاربيەدە قۋاتتى ەل، سالاماتتى جۇڭگو قۇرىلىسىن كۇشەيتۋگە شينجياڭ ۇلەسىن قوسامىز“، - دەدى جاۋ چىڭچياڭ.