بەيجيڭ قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىنىڭ دايىندىق قىزمەتى اياقتادى

قىسقى وليمپيادا قىستاعى 2022 - جىلى 1 - ايدىڭ 27 - كۇنى اشىلادى

شينحۋا اگەنتتىگىنىڭ 10 - ايدىڭ 27 - كۇنى بەيجيڭنەن بەرگەن حابارى (تىلشىلەر جاڭ يۋەشان، جاۋ شۋەتۇڭ). ءتىلشىنىڭ 10 - ايدىڭ 27 - كۇنى بەيجيڭدە اشىلعان مەملەكەتتىك كەڭەس اقپارات كەڭسەسىنىڭ اقپار جاريالاۋ ماجىلىسىنەن ۇعىسۋىنشا، قازىر 2022 - جىلعى بەيجيڭ قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىنىڭ ءتۇرلى دايىندىق قىزمەتى اياقتاعان، قىسقى وليمپيادا قىستاعى 2022 - جىلى 1 - ايدىڭ 27 - كۇنى اشىلادى ەكەن.

بەيجيڭ قىسقى وليمپيادا سپورت جارىسىن ۇيىمداستىرۋ القاسىنىڭ اتقارۋشى ورىنباسار ءتوراعاسى، بەيجيڭ قالاسىنىڭ ورىنباسار باستىعى جاڭ جياندۇڭ الاڭ - سارايلاردىڭ نەگىزدىك قۇرىلعىلارى، الاڭ - سارايلاردىڭ جۇمىس جۇرگىزۋى، جارىسقا قىزمەت وتەۋ جانە ونى قامتاماسىز ەتۋ، جاڭا تيپتى ايدارشا ۆيرۋس وكپە قابىنۋ ىندەتىنىڭ حاۋىپ - قاتەرىنە توتەپ بەرۋ، ۇگىتتەۋ - جالپىلاستىرۋ جانە مادەني قيمىلدار، باياندى ۇلاستىرۋ جانە مۇرا قىزمەتى سىندى 6 جاقتان بەيجيڭ قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسىن وتكىزۋ جاعدايىن تانىستىردى.

”كەلەر جىلى 1 - ايدىڭ 27 - كۇنى قىسقى وليمپيادا قىستاعى رەسمي اشىلىپ، دۇنيە ءجۇزىنىڭ جەر - جەرىنەن كەلەتىن سپورتشىلاردى قابىلداي باستايدى. ءبىز پارتيا ورتالىق كوميتەتىنىڭ پارمەندى باسشىلىعىندا، بۇكىل ەل حالقى مەن حالىقارالىق قوعامنىڭ زور كۇشپەن قولداۋ كورسەتۋىندە، ءسوز جوق، ءتۇرلى قيىندىقتار مەن سىن - سايىستاردى جەڭىپ، جارىس وتكىزۋدىڭ ءتۇرلى مىندەتتەرىن تولىق تابىسپەن ورىنداپ، دۇنيە جۇزىنە قاراپايىم، حاۋىپسىز، تارتىمدى قىسقى وليمپيادا سپورت جارىسىن تارتۋ ەتەتىندىگىمىزگە كامىل سەنەمىز“، - دەدى جاڭ جياندۇڭ.

10 - ايدىڭ 25 - كۇنى جاريالانعان «بەيجيڭ 2022 - جىلعى قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسى كارانتين قولدانباسى» 1 - نۇسقاسى (تومەندە قىسقاشا «كارانتين قولدانباسى» دەلىندى) جونىندە دە جاڭ جياندۇڭ تۇسىنىك جاسادى. ول بىلاي دەدى: دۇنيە جۇزىندە ىندەت جاعدايى ءالى دە قاتاڭ، كۇردەلى بولىپ وتىر، «كارانتين قولدانباسىندا» ايتىلعان كەيبىر شارالاردىڭ بارلىعىندا ەڭ جاڭا عىلمي زەرتتەۋ ناتيجەلەرى، مامانداردىڭ پىكىرلەرى نەگىز ەتىلگەن، باسقا حالىقارالىق جارىستاردىڭ تاجىريبەلەرى دە پايدالانىلعان، وليمپيادا سپورت جارىسىنا قاتىستى بارلىق ادامنىڭ بار كۇشپەن بەلگىلەمەگە سايكەسۋىن، بويسۇنۋىن جانە ونى اتقارۋىن ءۇمىت ەتەمىن. سونىمەن بىرگە، قاتىستى جازالاۋ بەلگىلەمەلەرى دە قاتاڭ اتقارىلادى، كەيبىر ناقتى جۇمىس جونىندە حالىقارالىق وليمپيادا كوميتەتىمەن پىكىرلەسىپ جاتىرمىز. «كارانتين قولدانباسىنداعى» بەلگىلەمەلەرگە بويسۇنباعاندار، ەسكەرتۋ، تىركەۋ تولىمدىلىعىن ۋاقىتشا نەمەسە ماڭگى كۇشىنەن قالدىرۋ، جارىسقا قاتىناسۋ تولىمدىلىعىن ۋاقىتشا نەمەسە ماڭگى كۇشىنەن قالدىرۋ، جارىستان شىعارۋ، قاتىستى تولىمدىلىعىن كۇشىنەن قالدىرۋ سياقتى اۋىر زارداپتارعا دۋشار بولۋى مۇمكىن.

كەزەكتە، بەيجيڭ قىسقى وليمپيادا سپورت جارىسىنىڭ دايىندىق قىزمەتى سوڭعى كەزەڭگە وتكەن، مەملەكەتتىك دەنە تاربيە باس مەكەمەسىنىڭ ورىنباسار باستىعى لي يىڭچۋان جۇڭگو سپورتشىلارىنىڭ جارىسقا دايىندالۋ جاعدايىن تانىستىردى. ”بەيجيڭ قىسقى وليمپيادا سپورت جارىسى جۇڭگو قار - مۇز سپورتىنىڭ باسەكەلىك دەنە تاربيە دەڭگەيىنىڭ جوعارىلاۋىن پارمەندى جەبەدى. قازىرگە دەيىن جۇڭگودا قار - مۇز تۇرىنەن مەملەكەتتىك 29 توپتىق جاتتىعۋ قۇراماسى، 480 سپورتشى بەيجيڭ قىسقى وليمپيادا سپورت جارىسىنا بار كۇشپەن دايىندالۋدا. 2015 - جىلى بەيجيڭ 2022 - جىلعى قىسقى وليمپيادا سپورت جارىسىن وتكىزۋ ۇقىعىنا يە بولعان كەزدە، جۇڭگو 109 كىشى ءتۇردىڭ 3/1دەي ءتۇرىن ەشقاشان وتكىزىپ كورمەگەن ەدى؛ پيڭچاڭ قىسقى وليمپيادا سپورت جارىسىندا، جۇڭگو قۇراماسى قاتىناسقان جارىس ءتۇرى جالپى ءتۇر سانىنىڭ جارتىسىنا جۋىعىن يەلەدى. دەگەنمەن، وسى كەزەكتى قىسقى وليمپيادا سپورت جارىسىن وتكىزۋشى ەل رەتىندە، ءبىز بارلىق تۇردەن جارىسقا قاتىناسۋ نىساناسىن جۇزەگە اسىرۋعا قۇلشىنامىز، بۇل ءبىر تاريحي سەرپىلىس بولماق“.

لي يىڭچۋان جۇڭگو قۇراماسىنىڭ قازىرگە دەيىن جولىققان باستى ماسەلەلەرىن دە اۋىزعا الدى، جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى مەملەكەتتىك توپتىق جاتتىعۋ قۇرامالارى قالىپتى تۇردە شەتەلگە شىعىپ جارىسقا قاتىناسۋعا جانە شەتەلگە شىعىپ جاتتىعۋعا امالسىز قالىپ، ءبىر ءبولىم ۇپاي سانىنان ايرىلدى. باسىم كوپ قۇرامالار ۇزاق ۋاقىت حالىقارالىق جارىستارعا قاتىناسا المادى، ولاردا باستى قارسىلاستارىمەن ءبىر الاڭدا ونەر سىناسۋ ورايى كەمشىل بولدى.

بۇل جونىندە، مەملەكەتتىك قار - مۇز سپورت قۇراماسى ەل ىشىندە جالپى تۇردە جاتتىعۋدىڭ شارت - جاعدايىنان تولىق پايدالانىپ، جاتتىعۋدىڭ عىلمي دەڭگەيىن ۇزدىكسىز جوعارىلاتقان. لي يىڭچۋان بىلاي دەدى: جۇڭگو قۇراماسى قازىر بەيجيڭ قىسقى وليمپيادا سپورت جارىسىنا دايىندىقتىڭ ەڭ سوڭعى ۇمتىلىسىن جاساپ جاتىر، سپورتشىلار بەيجيڭ قىسقى وليمپيادا سپورت جارىسىندا وزدەرىنىڭ ەڭ جاقسى باسەكەلىك كۇيلەرىن كورسەتۋگە ات سالىسادى.

جۇڭگو مۇگەدەكتەر بىرلەستىگىنىڭ ورىنباسار القا باستىعى ۋاڭ مەيمەي مىنالاردى ءبىلدىردى: توكيو مۇگەدەكتەر وليمپيادا سپورت جارىسىندا جۇڭگو دەنە تاربيە ۋاكىلدەر ۇيىرمەسى مۇگەدەك سپورتشىلاردىڭ دەنساۋلىعىنىڭ سالاماتتىعى مەن باس اماندىعىن قامتاماسىز ەتۋگە ايرىقشا ءمان بەرىپ، ىندەتتەن ساقتانۋ - تىزگىندەۋ قىزمەتى جوباسىن جانە الدىن الۋ جوباسىن جاساپ، توكيو وليمپيادا سپورت جارىسىن ۇيىمداستىرۋ القاسىنىڭ جانە ۋاكىلدەر ۇيىرمەسىنىڭ ىندەتتەن ساقتانۋ - تىزگىندەۋ جونىندەگى ءتۇرلى تالاپتارىن قاتاڭ تياناقتاندىرىپ، بىردە - ءبىر ادامنىڭ جۇعىمدالماۋىن جۇزەگە اسىردى. ”ءبىز بۇل تاجىريبەلەردى بەيجيڭ مۇگەدەكتەر قىسقى وليمپيادا سپورت جارىسىنا دايىندالۋ جانە جارىسقا قاتىناسۋ قىزمەتىنە قولدانۋىمىز، اسىرەسە، الداعى 3 ايدان استام ۋاقىتتا، ەلىمىزدىڭ مۇگەدەكتەر قىسقى وليمپيادا سپورت جارىسى ۋاكىلدەر ۇيىرمەسىنىڭ جارىسقا قاتىناسۋىنا كەيبىر تاجىريبەلەر جانە ۇلگىلەر ۇسىنۋىمىز كەرەك“.

”ءبىر جاعىنان، ىندەتتەن ساقتانۋ - تىزگىندەۋدى مىقتى يگەرىپ، ەندى ءبىر جاعىنان، جاتتىعۋدى، جارىسقا دايىندالۋدى مىقتى ۇستاپ جاتىرمىز“. ۋاڭ مەيمەي بىلاي دەدى: جۇڭگو مۇگەدەكتەر قىسقى وليمپيادا سپورت جارىسى ۋاكىلدەر ۇيىرمەسى جارىسقا دايىندالۋدىڭ ەڭ سوڭعى بىرنەشە ايىندا حالىقارالىق جارىستارعا كوپتەپ قاتىناسۋعا تىرىسىپ، سپورتشىلاردى قامتاماسىز ەتۋ شارالارىن ونان ارى كەمەلدەندىرىپ، جاتتىعۋ بازاسىنىڭ قامتاماسىز ەتۋ جانە قىزمەت وتەۋ دەڭگەيىن جاپپاي جوعارىلاتادى.