باس بەتكە قايتۋ | 中文 ىلە اقپارات تورابىنا حوش كەلدىڭىزدەر!
قىس كۇنىندەگى لاۋلاعان جالىن
2022-02-04 18:36:01     كورىلىم:رەت كەلۋ قاينارى:تيانشان تورى  جاۋاپتى رەداكتور:بەرىك وقاباي ۇلى

− قار - مۇز سپورتىنا قىزۋ ىنتا جۇڭحۋانىڭ بايتاق دالاسىن جالىنداتتى

شينحۋا اگەنتتىگىنىڭ ءتىلشىسى ما كاي


2 - ايدىڭ 1 - كۇنى شاڭعى اۋەسكەرلەرى ءۇرىمجىنىڭ نانشان تاۋى باۋرايىنداعى جىبەك جولى حالىقارالىق دەمالىس وڭىرىندەگى قار شاڭعى الاڭىندا شاڭعى تەبۋدە.

□ سۋرەتتى جاڭ شيۋكى تۇسىرگەن


2 - ايدىڭ 1 - كۇنى مەملەكەتتىك تاۋ شاڭعى ورتالىعىندا سىرعاناپ سىناپ كورۋشى ءبىر شاڭعىشى جاتتىعۋ جاساۋدا. سول كۇنى ەسكىشە كالەندار بويىنشا كوكتەم مەرەكەسىنىڭ ءبىرىنشى كۇنى، بەيجيڭ قىسقى وليمپيادا سپورت جارىسى يانچيڭ جارىس رايونىنداعى مەملەكەتتىك تاۋ شاڭعى ورتالىعىندا تولىق فاكتورلى جاتتىعۋ وتكىزىلدى. قىزمەتكەرلەر جارىس ۋاقىتى ۇلگىسى بويىنشا جالعاپ تاراتۋ، سيلىق تاراتۋ سالتى، اقپار جاريالاۋ ءماجىلىسى سياقتى بۋىندار بويىنشا الدىن الا ماشىق جاسادى.

□ سۋرەتتى شينحۋا اگەنتتىگىنىڭ ءتىلشىسى چىن بين تۇسىرگەن


بارىس جىلعى كوكتەم مەرەكەسى كەلىپ جەتتى، بەيجيڭ قىسقى وليمپيادا سپورت جارىسى اشىلۋ الدىندا تۇر، جۇڭگولىقتار ”قۋانىشقا قۋانىش قوسىلعان“ قۇتتى جىلدى، وليمپيادا سپورت جارىسى جىلىن قارسى الدى.

سوناۋ جىلدىڭ الدىنداعى كوكتەم مەرەكەسى ساۋىق كەشىندە ”سەن بەينە قىستا جانعان الاۋ وتسىڭ، لاپىلداپ جالىنىڭمەن ورتەپ كەتتىڭ“ دەگەن ءان ايتىلعان بولاتىن. ال بۇگىنگى تاڭدا، بەيجيڭ قىسقى وليمپيادا سپورت جارىسى بەينە لاۋلاعان جالىن سياقتى جۇڭگولىقتاردىڭ قار - مۇز سپورتىنا قاتىناسۋ ىنتاسىن قوزعادى، قار - مۇز ەكونوميكاسىنىڭ تەز قارقىنمەن دامۋىنىڭ قوزعالتقىشىن قوزعادى، سونداي - اق دەنە تاربيەدە قۋاتتى ەل قۇرۋ نىساناسىن جۇزەگە اسىرۋعا تاعى دا پارمەندى قوزعاۋشى كۇش قوستى.

قىستا بالمۇزداق ساتسا مۇزداتقىش قاجەت ەتپەيتىن شىعىس سولتۇستىكتەن قار گۇلىن كورۋ قيىنعا سوعاتىن حاينانعا دەيىن، حۋاڭپۋجياڭ وزەنى بويىنداعى ءتۇنسىز قالا شاڭحايدان شينجياڭنىڭ التاي تاۋى ەتەگىندەگى بايىرعى قىستاق قومعا دەيىن، قار - مۇز سپورتى اۋەسكەرلەرىن كەز كەلگەن جەردەن كورۋگە بولادى. مەملەكەتتىك ساناق مەكەمەسىنىڭ ساندى مالىمەتىندە كورسەتىلۋىنشە، 2021 - جىلى 10 - ايعا دەيىن، جۇڭگونىڭ قار - مۇز سپورتىنا قاتىناسقان ادام سانى 346 ميلليونعا جەتىپ، ”300 ميلليون ادامدى قار - مۇز سپورتىنا قاتىناسۋعا باستاۋ“ سىندى جۇڭگونىڭ قىسقى وليمپيادا سپورت جارىسىن وتكىزۋدى ءوتىنىش ەتۋ بارىسىندا بەرگەن ۋادەسى ورىندالىپ بولدى.

قىس كەشىندەگى جيلين قالاسى ۋانكى سۇڭحۋاحۋ كولى قار شاڭعى الاڭىندا شىراقتار جارقىراپ، شاڭعىشى جاڭ تيان شاڭعى جولىنان جوعارى قارقىنمەن سىرعاناپ ءتۇسىپ كەلەدى، جالت بەرىپ ارەكەت جاساعاندا، قاردى ۇشقىنداتىپ جىبەرەدى. ”شاڭعى تەبۋ قىسىمدى جەڭىلدەتۋگە وتە ۇيلەسەدى، تۇرمىسىمدا كەم بولسا بولمايدى، اپتا سايىن 3 − 4 رەت كەلىپ شاڭعى تەبەمىن“، - دەدى ول.

9 جىلدىڭ الدىندا 5 جاستاعى قىز بالا جاڭ بەيبەي شەشەسىنىڭ ىنتالاندىرۋىمەن مۇز الاڭعا شىقتى، بۇل ناننيڭ قالاسىنداعى تۇڭعىش ساۋدالىق جاساندى مۇز الاڭى ەدى. جىل سايىن جاتتىققاننان كەيىن، قازىر ول مۇز ۇستىندە بۇرالا بيگە باسقان، ءجۇرىس - تۇرىسى كوركەم، جوعارى دەڭگەيلى مانەرلەپ سىرعاناۋ شەبەرىنە اينالدى. جاڭ بەيبەي: ”مەنىڭ ارمانىم مەملەكەتتىك، ءتىپتى، دۇنيە جۇزىلىك دەڭگەيدەگى مانەرلەپ سىرعاناۋ جارىسىنىڭ اعا جۇلدەگەرى بولۋ“، - دەيدى.

سالىستىرا ايتقاندا، 71 جاستاعى جۋ شۋجۇن مۇز الاڭىنا جاڭادان كەلۋشى ادام، ءبىر جىلدىڭ الدىندا عانا تەز سىرعاناۋعا جاتتىعۋدى باستاعان بولاتىن. تاڭشان قالاسىندا تۇراتىن ول الدەقاشان زەينەتكە شىققان، ءار كۇنى دەرلىك ۇيىنە تاياۋ جەردەگى مۇز الاڭىنا بارىپ بىرنەشە رەت اينالىپ سىرعاناپ تۇرادى، قار - مۇز سپورتىن وزىندەي جاقسى كورەتىن كوپتەگەن دوستارمەن تانىسىپ تا الدى. ”قازىر جالپى حالىق قار - مۇزدا جۇرەتىن ءداۋىر، ءبىز قارتتار دا قاتاردان قالۋىمىزعا بولمايدى“.

”سولتۇستىكتە عانا ەمەس، قىستا عانا ەمەس، جاستار عانا ەمەس“، تۇرمىس تۇرىندەگى APP شاعىن قىزىل كىتاپتا جاريالانعان «2022 - جىلعى 10 ءىرى تۇرمىستىق بەتالىستا» ءدال وسىلاي جازىلعان. قار - مۇز سپورتىنىڭ وت جالىنى كەڭىستىك، ماۋسىم جانە جاس شەكتەمەسىنەن اسىپ، بىرتىندەپ جالپىلىق قيمىلعا اينالىپ ۇلگىردى. سونىمەن بىرگە قار - مۇز ەكونوميكاسىنىڭ ومىرشەڭدىگى مەن كومەسكى كۇشى دە ۇزدىكسىز جارىققا شىقتى.

”ءبىر قالادا 12 شاڭعى الاڭى بارىن كىم ويلاعان!“، - دەدى جاڭا زەلانديالىق ساياحاتشى ۋايت تەبىرەنە. ونىڭ وسىدان بۇرىن جيلين قالاسىنا بارىپ قار شاڭعى تەبۋى 2008 - جىلعى ءىس، ول كەزدە جول كەدىر - بۇدىر، بار - جوعى جالعىز شاڭعى الاڭىنىڭ قۇرىلعىلارى قاراپايىم، جاقىن ماڭداعى جاتىن ورىن مەن اس - تاعام دا شەكتى ەدى، ال قازىر جۇلدىز دارەجەلى مەيمانسارايلار، ەرەكشە حالىقتىق تۇسەلحانالار مەن ءتۇرلى ءدامدى تاعامدار شاڭعى الاڭىنىڭ توڭىرەگىنە تارالا ورنالاسقان.

ەل ىشىندەگى شاڭعى اۋەسكەرلەرىنىڭ اراسىندا اي - ۋىن داڭعىلىندا شاڭعى تەۋىپ كورمەسەڭ، شاڭعىشىلىق تۇرمىسىڭ كەمەلسىز دەگەن ءسوز بار. ءور، قيىندىعىمەن اتى ايگىلى وسى قار شاڭعى جولى شينجياڭ جىبەك جولى حالىقارالىق شاڭعى الاڭىنا ورنالاسقان، تالعات سانتاي وسى قار شاڭعى جولىنداعى تاۋ شاڭعى قۇتقارۋ - قورعاۋ اترەتىنىڭ باستىعى. مالشى وتباسىندا دۇنيەگە كەلگەن ول اكەسىمەن جانە اكەسى قۇرالىپتاستارمەن بىرگە تيانشان اڭعارى اراسىنداعى مال فەرماسىندا سيىر مەن قويدىڭ سوڭىندا، سۋدىڭ تۇنىعىن، ءشوپتىڭ سونىسىن قۋالاعان تۇرمىس كەشىردى. 16 جىلدىڭ الدىندا ول ۇيىنە جاقىن قار شاڭعى الاڭىنا كەلىپ جۇمىستانىپ، كاسىپتىك شەبەرلىكتى قۇلشىنا ۇيرەنىپ، قۇتقارۋ - قورعاۋ اترەتىنىڭ باستىعى بولىپ، قار شاڭعىشىلاردىڭ اماندىعىن قورعادى.

تالعات سانتايدىڭ اۋىلىندا تاعى كوپتەگەن مالشى قار شاڭعى تەبۋ جاتتىقتىرۋشىسىنا، قار شاڭعى الاڭىنىڭ قۇتقارۋشى - قورعاۋشى قىزمەتكەرىنە اينالدى. جۇمىستانۋدى جەبەۋدەن سىرت، قار - مۇز سپورتىنىڭ قىزۋ ورلەۋى جەرگىلىكتى ورىننىڭ اس - سۋ، جاتار ورىن جانە قار شاڭعى تەبۋگە باۋلۋ سياقتى كاسىپ سالالارىنىڭ جەدەل دامۋىن ىلگەرىلەتتى. تاياۋدا مادەنيەت جانە ساياحات مينيسترلىگى، مەملەكەتتىك دەنە تاربيە باس مەكەمەسى تۇڭعىش توپتاعى مەملەكەت دارەجەلى 12 قار شاڭعى ساياحات دەمالىس ورنىنىڭ تىزىمدىگىن جاريالادى، شينجياڭنىڭ ءۇرىمجى نانشانى دا سول قاتاردان كورىندى.

كەرەك دەسەڭىز، كليماتى جىلى چاڭجياڭ ءدارياسىنىڭ تۇستىگىندە دە كاسىبي مۇز الاڭدارى از ەمەس. لي نيڭ نيڭبو قالاسى حۋانچيۋ يىنتاي مۇز الاڭىندا جاستار مەن ورەندەردىڭ مانەرلەپ سىرعاناۋ جاتتىقتىرۋشىسى بولىپ جۇمىس ىستەيدى، كەزىندە كاسىبي سپورتشى بولعان ول كاسىپتىك قابىلەتى كۇشتى بولعاندىقتان اتا - انالاردىڭ ۇناتۋىنا بولەنگەن. سپورتتان شەگىنگەن سوڭ، ول شاڭحايدا 11 جىل تۇرىپ، وڭتۇستىك جاقتاعى قار - مۇز سپورتىنىڭ سامارقاۋلىقتان دۋماندى كۇيگە وتكەن تاريحي ۇردىسىنە كۋا بولىپتى. ”بەيجيڭ قىسقى وليمپيادا سپورت جارىسىن وتكىزۋ ءوتىنىشى تابىستى بولعاننان كەيىن، وڭتۇستىك جاقتا قار - مۇز سپورتىنا قاتىناساتىن ادامدار بارعان سايىن مولايىپ، كاسىبي جاتتىقتىرۋشىلارعا سۇرانىس تا ارتا تۇسۋدە“، - دەيدى ول.

ءومىر بويى قار - مۇز سپورتىن سەرىك ەتكەن لي نيڭ ءۇشىن، قار - مۇز سپورتىنا جاستار مەن ورەندەردى باۋلۋدىڭ شالقار ءورىستى بازارى، ارينە، قۋانتادى، ايتسە قار - مۇز سپورتىنىڭ بالالارعا سيلايتىن وزگەرىسى ونى تىپتەن باقىت سەزىمىنە بولەيدى. ونىڭ تىكەلەي تاربيە - ونەگەسىنىڭ ارقاسىندا، مۇز سپورتىمەن اينالىسقانىنا 6 جىل بولعان 11 جاسار قىز بالا حۋاڭ شوحان 5 ءتۇر بويىنشا 2 اينالىپ سەكىرۋدى ەش قينالماي ورىنداي الاتىن بولدى. ”بالانىڭ ءوزى ۇناتىپ، اتا - اناسى قولداۋ كورسەتسە عانا، جۇڭگونىڭ قار - مۇز سپورتىنىڭ بولاشاعى بولادى“.

بولاشاق ۇمىتكە تولى! بەيجيڭ قىسقى وليمپيادا سپورت جارىسىنىڭ جۇڭگو قوعامىنا ۇستەگەن قوزعاۋشى كۇشى مەن جالىندى ومىرشەڭدىگى جاستار مەن ورەندەر اراسىندا تىپتەن ايقىن كورىنىس تابۋدا. ”قوس وليمپيادا سپورت جارىسىن وتكىزگەن قالا“ بولۋ الدىندا تۇرعان بەيجيڭ جاستار مەن ورەندەرگە قار - مۇز سپورتىن جالپىلاستىرۋ جاعىندا جەتكىلىكتى كۇش سالدى، قاتارىنان 6 جىل وتكىزگەن ورتا، باستاۋىش مەكتەپ وقۋشىلارىنىڭ قىسقى سپورت جارىسىنا قاتىناسقاندار سانى تۇراقتى ءوسىپ، جارىس تۇرلەرى دە العاشىنداعى مۇز ۇستىندە سۋرەت قۇراۋ، قارلى بەتكەيگە ورمەلەۋ سياقتى قىزىقتى تۇرلەردەن قىسقا ارالىققا تەز سىرعاناۋ، مۇز دوپ، سىڭار تاقتايلى شاڭعى سياقتى كاسىپتىك سيپاتى اناعۇرلىم كۇشتى تۇرلەرگە دامىدى، بۇكىل قالادا جالپى 200 مەكتەپكە قار - مۇز سپورتى ەرەكشەلىگى بەرىلىپ، 16 رايون، اۋداننىڭ بارلىعىندا جاستار مەن ورەندەردىڭ قىسقى سپورت تۇرلەرى قۇراماسى قۇرىلدى.

”ادامزاتتىڭ قار شاڭعى مەكەنى“ اتالعان شينجياڭ التاي ايماعىندا ورتا، باستاۋىش مەكتەپ وقۋشىلارىنىڭ قىس مەزگىلىندەگى دەنە تاربيە ساباعى بىردەن قار شاڭعى الاڭىنا ەنگىزىلدى. تەرى شاڭعى سياقتى داستۇرلەرمەن تانىسۋدان شاڭعىمەن، سىڭار تاقتايلى شاڭعىمەن جازىق جەردە سىرعاناپ كورۋگە، ونان بيىك تاۋدان تومەن سىرعاناۋعا، دالالىق قار شاڭعى تەبۋگە دەيىنگى جوعارى دەڭگەيلىك ساباقتارعا دەيىن، جەرگىلىكتى ورتا، باستاۋىش مەكتەپ وقۋشىلارى ءۇشىن تۇرلىشە جاس كەزەڭدەرىنە قاراي ەرەكشەلىككە يە ساباقتار ورنالاستىرىلىپ، ءار بالانىڭ قار - مۇز سپورتىمەن قاۋىشۋىنا مۇمكىندىك جاسالدى.

جەر - جەر زور كۇشپەن كەڭەيتۋدەن، جالپىلاستىرۋدان سىرت، جۇڭگونىڭ جاس بۋىن قىسقى وليمپيادا سپورتشىلارى دا جاستار مەن ورەندەردى قار - مۇز سپورتىنا قاتىناسۋعا شابىتتاندىرۋدا. گۋ ايليڭ، نيڭ جۇڭيان، سۋ يميڭ قاتارلى الىمدى، جاڭا جاس ساڭلاقتار حالىقارالىق جارىس الاڭدارىندا تولاسسىز جاقسى ناتيجەگە جەتىپ، اناعۇرلىم كوپ جاستار مەن ورەندەردىڭ جۇرەگىنە قار - مۇز سپورتىنىڭ تۇقىمىن سەپتى.

مانەرلەپ سىرعاناۋشى ورەن حۋاڭ شۋحاننىڭ شەشەسى چىن شيڭشيڭ بىلاي دەيدى: ”ءجۇز رەت، مىڭ رەت جىعىلۋدان، سۇلكىنى تۇسۋدەن، نازالانۋدان جانە مازاسىزدانۋدان كەيىن عانا ءبىر رەت ساتىمەن تولىق اينالا سەكىرىپ ءتۇسۋى مۇمكىن. الاڭ سىرتىندا تۇرعان مەنىڭ دە شىدامىم ءجۇز رەت، مىڭ رەت تاۋسىلا جازداپ، قايتادان ءجۇز رەت، مىڭ رەت تاعات ەتىپ وزىمە باسۋ ايتامىن، سوندا مەن ونىڭ وسى بارىستان تاباندىلىقتىڭ ءمانىن ۇعىنۋىن ماقسات تۇتتىم“.

قىسقى وليمپيادانى وراي ەتىپ، جۇڭگونىڭ بايتاق دالاسىندا قىسقى كۇننىڭ لاۋلاعان جالىنى تۇتاندى، جۇڭگونىڭ قار - مۇز سپورتىنا ءتان جوبا دۇنيە ءجۇزىنىڭ الدىنا جايىلدى.

(شينحۋا اگەنتتىگىنىڭ 2 - ايدىڭ 1 - كۇنى بەيجيڭنەن بەرگەن حابارى)