بەيجيڭ قىسقى وليمپيادا سپورت جارىسىنىڭ الاۋىن جالعاۋ باستالدى

مامەتجان ءومار الاۋگەر بولدى

2 - ايدىڭ 2 - كۇنى الاۋگەر مامەتجان ءومار (سولدا) مەن يە پيجيان الاۋدى جالعادى.

□ سۋرەتتى 2022 - جىلعى بەيجيڭ قىسقى وليمپيادا سپورت جارىسى اقپارات ورتالىعى بەرگەن

انار بۇلت / شينجياڭ گازەتىنىڭ تىلشىلەرى تاڭ كاندۇڭ، جازيرا نەسىپبەك 2 - ايدىڭ 2 - كۇنى بەيجيڭنەن حابارلايدى. 2 - ايدىڭ 2 - كۇنى بەيجيڭ قىسقى وليمپيادا سپورت جارىسىنىڭ الاۋى بەيجيڭ وليمپيادا ورمان باقشاسى، بەيجيڭ قىسقى وليمپيادا باقشاسى جانە شوۋگاڭ باقشاسى سىندى 3 وڭىردە جەتكىزىلە باستالدى، الاۋ جالعاۋ 2 - ايدىڭ 4 - كۇنىنە دەيىن جالعاسىپ، بەيجيڭ، يانچيڭ، جاڭجياكوۋ سىندى 3 جارىس وڭىرىندە جۇرىلەدى.

باستالدى، قايراتتان!

بەيجيڭ قىسقى وليمپيادا باقشاسىنىڭ الاۋ جەتكىزۋ باستالاتىن تۇيىندە الاۋگەر ۋاڭ مىڭ العاشقى الاۋ تاياقشاسىن الىپ ءجۇردى، ول 2006 - جىلعى دۋليڭ قىسقى وليمپيادا سپورت جارىسىنىڭ، 2010 - جىلعى ۆانكۋۆەر قىسقى وليمپيادا سپورت جارىسىنىڭ قىسقا ارالىققا جىلدام سىرعاناۋ وليمپيادا سپورت جارىسىنىڭ اعا جۇلدەگەرى، سونداي - اق بەيجيڭ سىندى وسى ”قوس وليمپيادا سپورت جارىسى قالاسىنىڭ“ ”قوس وليمپيادا سپورت جارىسى الاۋگەرى“.

ۋاڭ مىڭ بىلاي دەدى: ”الاۋ جەتكىزە الۋدىڭ ءوزى ءبىر داڭق، قۇنى زور، قولىما العاندا - اق بورىشىم دەپ ءبىلدىم، قىسقى وليمپيادا سپورت جارىسىنداعى جۇڭگو ساڭلاقتارىنىڭ ۇزدىك ناتيجەگە قول جەتكىزۋىن تىلەيمىن. كوپشىلىكتىڭ قار اربا، قار شانا سىندى باسقا دا تىڭ سالاداعى جارىس تۇرلەرىنە نازار اۋدارۋىن ەرەكشە ءۇمىت ەتەمىن، ويتكەنى بىرنەشە جىلدان بەرى ءبىزدىڭ العا باسۋىمىز توتەنشە تەز بولدى“.

ءبىرىنشى الاۋگەردەن باستاپ ءاربىر الاۋگەر ءبىر مينۋت جۇگىرىپ، ورتا ەسەپپەن 52 مەترگە جەتكىزەدى. قىسقى وليمپيادا باقشاسىنداعى الاۋ جەتكىزۋ جولى باقشانى ءبىر اينالادى، جالپى ارالىعى 19.5 كيلومەتر، جەتكىزۋشىلەر 370 ادامنان اسادى، ۋاقىتى شامامەن 6 جارىم ساعاتقا جالعاسادى. بۇل وسى رەتكى الاۋ جەتكىزۋ جولى ەڭ ۇزىن، الاۋگەرلەرى ەڭ كوپ، ۋاقىتى ەڭ ۇزاق بەكەت سانالادى.

بەيجيڭ قىسقى وليمپيادا سپورت جارىسىنىڭ الاۋ جەتكىزۋى 11 تۇيىق اينالىم سىرتىنداعى جابىق جەتكىزۋ ءوڭىرى مەن ءبىر تۇيىق اينالىم ىشىندەگى دەربەس جەتكىزۋ ءوڭىرىن قامتيدى، جالپى 1200 الاۋگەر بار، ولار ءار سالا، ءار كاسىپتەن كەلگەن، دەنى ءوز جۇيەسى مەن سالاسىندا كورنەكتى ناتيجەگە قول جەتكىزگەندەر نەمەسە ەلەۋلى ۇلەس قوسقاندار، كەڭ ۋاكىلدىك سيپاتقا يە.

قۇلجا اۋدانى ونيار اۋىلى بولەكەي قىستاعىنان كەلگەن مامەتجان ءومار 4 - الاۋگەر رەتىندە ساعات 13 اينالاسىندا الاۋ جالعاۋعا قاتىناستى. ”2021 - جىلى مەن ’1 - شىلدە وردەنىنىڭ‘ يەگەرى رەتىندە بەيجيڭگە كەلگەن ەدىم. 2022 - جىلى بەيجيڭ قىسقى وليمپيادا سپورت جارىسىنىڭ الاۋگەرى رەتىندە استاناعا تاعى كەلدىم. قىسقى وليمپيادا سپورت جارىسى دۇنيە جۇزىنىكى، بۇگىن الاۋدى قولىما الىپ جۇگىرگەن ساتتە جولدىڭ ەكى جاعالاۋىنداعى قىرۋار ادامدار دەرلىك بىزگە ماداق جاۋدىردى، قىسقى وليمپيادا سپورت جارىسى جالعاعان دەنە تاربيە رۋحىن بىزبەن ورتاقتاستى. وسىنداي ۇمىتىلماس قيمىلعا ات سالىسقاندىعىمدى توتەنشە ماقتانىش سانايمىن“، - دەدى مامەتجان ءومار.