2 - ايدىڭ 6 - كۇنى جۇڭگو قۇراماسى سيلىق تاراتۋ سالتىندا جەڭىستەرىن قۇتتىقتاۋدا. سول كۇنى ءۇندىستاننىڭ بومبەيىندە وتكىزىلگەن 2022 - جىلعى ايەلدەر فۋتبول ازيا ساۋىتىنا تالاسۋ شەشۋشى جارىسىندا جۇڭگو قۇراماسى 2گە قارسى 3 ۇپايمەن كورەيا قۇراماسىن جەڭىپ، اعا جۇلدەگەر بولدى.

　　□ سۋرەتتى شينحۋا اگەنتتىگى تاراتقان (سۋرەتتى گارۆيد دار تۇسىرگەن)

شينحۋا اگەنتتىگىنىڭ 2 - ايدىڭ 6 - كۇنى بومبەيدەن بەرگەن حابارى (ءتىلشى جاڭ شۇي، جاڭ يادۇڭ). جويقىن بۇرىلىس، جارىس سوڭىنداعى زور جەڭىس! جۇڭگو ايەلدەر فۋتبول قۇراماسى 2 - ايدىڭ 6 - كۇنى ءۇندىستاندا وتكىزىلگەن 2022 - جىلعى ازيا فۋتبول ساۋىتىنا تالاسۋ شەشۋشى جارىسىندا 2 : 3 مەن كورەيا قۇراماسىن جەڭىپ، قايسارلىقپەن سايىسۋ، ماڭگى باز كەشپەۋ سىندى ايەلدەر فۋتبول قۇراماسى رۋحىن تاعى ءبىر رەت ايگىلەدى.

بۇل جۇڭگو ايەلدەر فۋتبول قۇراماسىنىڭ ازيا ساۋىتىنا تالاسۋ جارىسىندا اعا جۇلدەگەرلىكتى 9 - رەت جەڭىپ الۋى، سونداي - اق ولاردىڭ اراعا 16 جىل سالىپ، ازيانىڭ شىڭىنا قايتا شىعۋى.

جۇڭگو ايەلدەر فۋتبول قۇراماسى جارتىلاي شەشۋشى جارىستا جاپونيا قۇراماسىنىڭ بەتىن قايتارعان بولاتىن، شەشۋشى جارىستا جانە دە جويقىن بۇرىلىس جاساپ، ونان بەتەر قيان - كەسكى دە جان سۇيىنەر تەبىن كورسەتتى − الدىڭعى جارتى مايداندا 2 دوپپەن ارتتا قالعان جاعدايدا، ارت - ارتىنان 3 دوپ ەنگىزىپ جەڭىسكە جەتتى.

وسى مايدان جارىستىڭ اتويشىسى ۋاڭ شۋاڭ جاراقاتتانعان بولسا دا الاڭعا شىقتى، قۇراما باستىعى ۋاڭ شانشان ورتاڭعى ارتقى قورعاۋشىلىقتى ۇزدىكسىز ۇستىنە الدى. جۇڭگو ايەلدەر فۋتبول قۇراماسى جارىس باستالعاندا - اق ءبىرشاما بەلسەندىلىك كورسەتىپ، 20 نەشە سەكۋندتا قاقپاعا تۇڭعىش دوپ كىرگىزۋدى ورىندادى. دەسە دە جارتىلاي شەشۋشى جارىستا اۆستراليا قۇراماسىن شاڭ قاپتىرعان كورەيا قۇراماسى دا وسالدىق تانىتا قويمادى. 26 مينۋتتا كورەيا قۇراماسى ورتا مايداننان باستاپ شابۋىل جاساپ، وڭ جاقتان توپ جارىپ العا شىعىپ، دوپتى جەر باۋىرلاتا شەكتەلگەن اۋماققا جەتكىزگەندە، ورتادان سۇعىنىپ كىرگەن سۇي يوۋلي دوپتى قاقپاعا تۋرالاپ تەۋىپ ەنگىزدى دە، تەكە - تىرەس جاعدايدى بۇزدى.

الدىڭعى جارتى مايدان جارىس اياقتاۋدان بۇرىن كورەيا قۇراماسى ىرىقتى باسىمدىعىن كۇشەيتە ءتۇستى. تولىقتاما ۋاقىت كەزەڭىندە جۇڭگو قۇراماسىنىڭ دوپشىسى قورعانىس بارىسىندا شەكتەلگەن اۋماقتا قولىنا دوپ ءتيىپ، اۆستراليادان كەلگەن باس تورەشى كەسكىن ارقىلى تۇراقتاندىرعاننان كەيىن وعان جازا دوپ بەردى. كورەيا قۇراماسىنىڭ دوپشىسى چى شياۋران جازا دوپتى ەنگىزىپ، ۇپاي سانى 0: 2 گە وزگەردى.

جۇڭگو قۇراماسى ورتا مايداندا شياۋ يۇي - ي مەن جاڭ رۇيدى اۋىستىردى. سوڭعى جارتى مايدان جارىس باستالعاننان كەيىن، جۇڭگو قۇراماسى دوپتان ايرىلعاننان كەيىن قايتا تارتىپ الۋدى كۇشەيتتى، جويقىن بۇرىلىس باستالدى!

66 مينۋتتا جۇڭگو قۇراماسى سول جاقتان دوپ جەتكىزگەندە، دوپ كورەيا قۇراماسى دوپشىسىنىڭ قولىنا ءتيىپ، تورەشى باتىل تۇردە وعان جازا دوپ بەردى. انگليا فۋتبول كلۋپتارىنا ارنالعان كاسىپتىك فۋتبول جارىسىنا قاتىناسقان تاڭ جيالي جازا دوپتى ءدال سوقتى، ۇپاي سانى 2: 1 بولدى.

4 مينۋتتان كەيىن تاڭ جيالي وڭ جاقتان دوپتى العاننان كەيىن، 2 دوپشىنىڭ قورشاۋىندا توپ جارىپ ورتادان دوپ جەتكىزگەندە، جاڭا عانا ۋاڭ شۋاڭنىڭ ورنىنا شىققان جاڭ لينيان كۇشتى تەبىنمەن كەلىپ باسپەن ءسۇزىپ، كورەيا قۇراماسىنىڭ قاقپاسىنا ەنگىزدى، ۇپاي سانى 2 : 2 بولدى! جۇڭگو قۇراماسى ءۇرتىس ءۇش مايدان ارتتا قالعان جاعدايدا، قارسىلاسىن قۋىپ جەتىپ تەڭ ۇپاي الدى.

ەڭ تارتىمدى ءسات بۇكىل مايداننىڭ ۋاقىت تولىقتاۋ كەزەڭىندە جارىققا شىقتى. 91 مينۋتتا جۇڭگو قۇراماسىنىڭ شەكتەلگەن اۋماقتاعى قورشاۋدى بۇزۋ اعاتتىعىنان دوپ ءدال كورەيا قۇراماسى اتويشىسىنىڭ اياق استىنا ءتۇسىپ، قاقپاعا تاقاپ كەلىپ دوپ ۇرارعا جاقىنداعاندا، جۇڭگو قۇراماسىنىڭ قاقپاشىسى جۋ يۇي تاعى ءبىر رەت كەرەمەت ۇمتىلىس كورسەتىپ، قوس قولىمەن كورەيا قۇراماسىنىڭ سوڭعى تەبىنىنىڭ بەتىن قايتاردى. مىنە ءدال وسى ۇمتىلىس جۇڭگو قۇراماسىنىڭ جارىس سوڭىنداعى زور جەڭىسىن قولعا كەلتىردى.

93 مينۋتتا ۋاڭ شانشان ورتا جولدا تۋ سىرتتان كەلىپ دوپ العاننان كەيىن، بۇرىلا بەرىپ تۋرالاپ دوپ جەتكىزىپ ەدى، شەكتەلگەن اۋماققا تۇتقيىل وتكەن شياۋ يۇي - يدىڭ بار كۇشپەن تەبۋىمەن دوپ قاقپاعا كىردى دە كەتتى، ۇپاي سانى 2 : 3 بولدى!

”قايسار روزا گۇلى“ دۇنيەنى ءدۇر سىلكىندىرگەن جويقىن بۇرىلىس جاساپ، ازيا ساۋىتىنا تالاسۋ جارىسىندا اعا جۇلدەگەرلىكتى 9 - رەت جەڭىپ الدى.

جۇڭگو ايەلدەر فۋتبول قۇراماسىنىڭ وسى كەزەكتى ازيا ساۋىتىنا تالاسۋ جارىسىن مۇلتىكسىز ءوتتى دەۋگە بولادى، گرۋپپالار جارىسى كەزەڭىندە 11 دوپ كىرگىزدى ءارى قارسىلاستارى ءنول جارعان جوق، ال سوڭىنداعى تورتتەن ءبىر شەشۋشى جارىس پەن جارتىلاي شەشۋشى جارىستا جانە دە ارت - ارتىنان ءتيىمسىز كۇيدى وزگەرتكەن كەرەمەت ويىندارمەن كورىنىس بەردى. اسىرەسە، جارتىلاي شەشۋشى جارىستا كونە قارسىلاسى جاپونيا قۇراماسىنا ءدوپ كەلگەندە، ايەلدەر فۋتبول قۇراماسىنىڭ بويجەتكەندەرى قارسىلاسىمەن 120 مينۋت قيان - كەسكى سايىسىپ، ەڭ سوڭىندا ۇپاي دوپ ارقىلى جەڭىسكە جەتتى.

ازيا فۋتبول قوعامىنىڭ جارىستان كەيىن سيلىق تاراتۋى دا جۇڭگو قۇراماسىنىڭ وسى كەزەكتى فۋتبول ساۋىتىنا تالاسۋ جارىسىنداعى ەرەكشە بەينەسىن قايتالاي دالەلدەدى. جۋ يۇي ”التىن قولعاپ سيلىعىن“ الدى، شابۋىل مەن قورعانىستىڭ ەكەۋىنە دە ىسىلعان ۋاڭ شانشان ”ەڭ ۇزدىك فۋتبولشى“ اتاعىنا يە بولدى.