باس بەتكە قايتۋ | 中文 ىلە اقپارات تورابىنا حوش كەلدىڭىزدەر!
​ارمان ”مۇز جىبەك باۋدان“ قاناتتاندى
2022-02-08 17:54:11     كورىلىم:رەت كەلۋ قاينارى:تيانشان تورى  جاۋاپتى رەداكتور:گۇلدەن ماقسات قىزى

قۇتىبيلىق بويجەتكەن اقنار اداق:

ارمان ”مۇز جىبەك باۋدان“ قاناتتاندى

انار بۇلت / شينجياڭ گازەتىنىڭ ءتىلشىسى حۋاڭ شيڭ


2 - ايدىڭ 5 - كۇنى تۇستەن كەيىن 22 جاستاعى قۇتىبيلىق بويجەتكەن اقنار اداق مەملەكەتتىك تەز سىرعاناۋ سارايىنىڭ ”مۇز جىبەك باۋىندا“ جۇڭگو قۇراماسى اتىنان ايەلدەردىڭ 3000 مەترلىك ارالىقتا مۇزدا تەز سىرعاناۋ جارىسىنا قاتىناسىپ، 4 مينۋت 12 سەكۋند 28 تاقىلدىق ناتيجەمەن 17 - ورىندى يەلەدى. ”جاتتىعۋ كەزىندەگى قالىپتى ورەمدى ساۋلەلەندىردىم دەپ سانايمىن، كەيىنگى جارىستاردا ءتىپتى دە كوپ سەرپىلىس جاساپ، مۇنان دا جاقسى ناتيجەگە قول جەتكىزۋگە كۇش سالامىن“، - دەدى اقنار جارىستان سوڭ.

اقنار جونىنەن العاندا، بۇل ءومىرىنىڭ ءبىر ۇلى قادامى؛ قۇتىبي اۋدانى جونىنەن العاندا، بۇل بۇرىنعىعا مۇراگەر بولعاندىق. 30 جىلدىڭ الدىندا قۇتىبي اۋدانىنان كەلگەن تەز سىرعاناۋ سپورتشىسى داي جۇن جۇڭگو دەنە تاربيە ۋاكىلدەر ۇيىرمەسىنىڭ ءبىر مۇشەسى رەتىندە، فرانسيانىڭ البەرتۆيل قىسقى وليمپيادا سپورت جارىسىنا قاتىناسقان بولاتىن.

دوڭگەلەكتى كونكيمەن سىرعاناۋدى جانى قۇلاي سۇيگەن ءبۇلدىرشىن قىز

1999 - جىلى اقنار قۇتىبي اۋدانىنداعى تاسباسپالداق قازاق اۋىلىندا دۇنيەگە كەلگەن. 5 جاسىندا باسقا كىشكەنتاي دوستارىنىڭ دوڭگەلەكتى كونكي ويناعانىن كورىپ قاتتى قىزىعاتىن، اكە - شەشەسىنەن وزىنە دە ءبىر جۇبىن الىپ بەرۋدى سۇراناتىن، الايدا ول كەزدە وتباسىنىڭ ەكونوميكالىق شارت - جاعدايى ءماز ەمەس بولاتىن دا، بالا اقناردىڭ ارمانى ىسكە اسپاعان ەدى.

كەيىن كەلە اقناردىڭ ناعاشى جەزدەسى ءبىر جۇپ دوڭگەلەكتى كونكي ساتىپ الىپ وعان سيعا تارتادى. ”دوڭگەلەكتى كونكيدى قولىنا العان كەزىندە اقنار قۋانعانىنان جىلاپ جىبەردى“، - دەدى اقناردىڭ شەشەسى قاينۇر ەلەمەس ەسىنە الىپ.

وسى دوڭگەلەكتى كونكيمەن بىرگە اقناردىڭ ومىرىندە تەز سىرعاناۋ جولى اشىلدى. ”قىس ماۋسىمىنداعى ۇزاققا جۇگىرۋدە ول ۇنەمى جىلدىقتار بويىنشا بىرىنشىلىكتى بەرمەيتىن، ماڭىزدىسى، ول مۇزدا سىرعاناۋدى جاقسى كوردى، جاتتىعۋ بارىسىندا جاپاعا شىداي ءبىلدى، كىشكەنە كەزىنەن باستاپ بويىندا جەڭىلۋگە مويىنسال بولمايتىن رۋح بولدى.“ اقناردىڭ بەتاشار ساۋاتىن اشقان باپكەرى زوۋ گۋاڭلەي بولار بالانى، جاقسى وركەندى تاني ءبىلدى.

2009 - جىلدان باستاپ ءار كۇنى تۇستەن كەيىن ساباعىن ورىنداپ بولعاننان كەيىن اقنار جاتتىعۋعا باراتىن. قىستا مۇزدا سىرعانايدى، جازدا جۇگىرەدى، تاۋعا شىعادى، ۆەلوسيپەد مىنەدى... اقنار تەز ارادا بۇكىل شينجياڭداعى ءوزى قۇرالىپتاس بالالار اراسىنان قارا ءۇزىپ العا شىقتى.

”بەيجيڭ قىسقى وليمپيادا سپورت جارىسىنا قاتىناساتىندار ەسىمدىگىنە كىرگىزىلگەنى تۇراقتانعان ساتتە، اقنار قۋانىشتى حاباردى ماعان دەرەۋ جەتكىزدى، مەن قاتتى اسەرلەندىم“، - دەدى زوۋ گۋاڭلەي.

اكەسى سۇيگەن ىسىڭە تاباندى بول دەپ قاداعالادى

2009 - جىلدان باستاپ، بۇكىل شينجياڭدا مۇز ءۇستى سپورتى ەرەكشەلىگىنە يە 100 مەكتەپ قۇرىلدى، شينجياڭدا مۇز ءۇستى سپورت ورتالىعى قۇرىلدى، مەملەكەتتىك 13 - كەزەكتى قىسقى سپورت جارىسى شينجياڭدا وتكىزىلدى... اقنار شينجياڭ قار - مۇز سپورتىنىڭ قاۋىرت دامىعان داۋىرىنە كەز كەلدى.

2012 - جىلى اقناردىڭ اكەسى اۋىر ناۋقاسقا شالدىعادى، شەشەسىنە كومەكتەسىپ، اكەسىنە قارايلاسۋ ءۇشىن، اقنار جاتتىعۋدان قول ۇزەدى.

اكەسى قايتىس بولاردان ىلگەرى اقنارعا: ”ءسوز جوق، ءوزىڭ قىزۋ سۇيەتىن ىسكە تاباندى بول، سەنىڭ مەملەكەت قۇراماسىنا قابىلدانىپ، ەڭ ۇزدىك سپورتشى بولا الاتىنىڭا سەنەمىن“ دەپ قاداعالادى.

جاتتىعۋدى قالپىنا كەلتىرگەننەن كەيىن، اقنار وزىنە ءتىپتى دە جوعارى تالاپ قويدى. 2014 - جىلى اۆتونوميالى رايوننىڭ مەملەكەتتىك سپورت جارىسىندا 15 جاستاعى اقنار ايەلدەر B گرۋپپاسىندا 5 اعا جۇلدەگەرلىكتى بىردەي جەڭىپ الىپ، شينجياڭ قىسقا ارالىققا تەز سىرعاناۋ قۇراماسىنا كىردى.

2016 - جىلى 17 جاستاعى اقنار مەملەكەتتىك 13 - كەزەكتى قىسقى سپورت جارىسىنا قاتىناستى، مەدال الماعانىمەن، مەملەكەتتىك قىسقا ارالىققا تەز سىرعاناۋ قۇراماسى جاعىنان تاڭدالىپ، ايتۋلى جاتتىقتىرۋشى شين چيڭشانعا شاكىرت بولادى.

ايتۋلى جاتتىقتىرۋشىنىڭ تاربيەلەۋىمەن سامۇرىق سامعاي ۇشتى

جۇڭگونىڭ قىسقا ارالىقتا تەز سىرعاناۋى دۇنيە ءجۇزى بويىنشا ەڭ وزىق ورەدە، قۇراما ىشىندەگى باسەكە ەرەكشە قيان - كەسكى ەدى. 2018 - جىلى جازدا تەز سىرعاناۋ تۇرىنە اۋىسقان اقنار دۇنيە جۇزىلىك جارىسقا سايلانۋ ورايىنا يە بولدى.

2019 - جىلى 1 - ايدىڭ 7 - كۇنى 2018 − 2019 - جىلدىق بۇكىل مەملەكەتتىك مۇزدا تەز سىرعاناۋ جۇلدەلى جارىسى جانە دۇنيە جۇزىلىك باسەكەلى جارىسىنا قاتىناسۋ تولىمدىلىعىنا تاڭداۋ جارىسىندا اقنار 4 مينۋت 21 سەكۋند 34 تاقىلدىق ناتيجەمەن ايەلدەردىڭ جالپى قابىلەت بويىنشا 3000 مەترگە سىرعاناۋ جارىسىنىڭ جۇلدەگەرى بولدى. سول جىلى 1 - ايدىڭ 27 - كۇنى 2018 − 2019 جارىس ماۋسىمىندا حالىقارالىق مۇزدا سىرعاناۋ بىرلەستىگى مۇزدا تەز سىرعاناۋ جاستار دۇنيە جۇزىلىك ساۋىتىنا تالاسۋ جارىسىنىڭ حەلسينكي بەكەتىندە ول ايەلدەردىڭ 1500 مەترگە سىرعاناۋ جارىسىندا كۇمىس مەدالعا يە بولسا، ايەلدەردىڭ توپتىق اتتانۋ تۇرىندە قولا مەدالعا قول جەتكىزدى.

2019 - جىلى 3 - ايدا 2018 − 2019 جارىس ماۋسىمىنداعى مۇزدا تەز سىرعاناۋ جارىسى بويىنشا بۇكىل مەملەكەتتىك جۇلدەگەرلىك جارىسىندا 20 جاسقا تولا قويماعان اقنار ەرەسەكتەر گرۋپپاسىنداعى ايەلدەردىڭ 5000 مەترگە سىرعاناۋ جارىسىنىڭ اعا جۇلدەگەرى جانە ايەلدەردىڭ 3000 مەترگە سىرعاناۋ جارىسى، توپتىق اتتانۋ سىندى 2 ءتۇردىڭ جۇلدەگەرى بولدى. وسىدان جارتى جىلدىڭ الدىندا عانا ول قىسقا ارالىقتا تەز سىرعاناۋ سپورتشىسى بولاتىن، ءتۇر اتتاپ بارىپ مۇزدا تەز سىرعاناۋ جارىسىنا قاتىناسقان ول تىڭنان قوسىلعان كۇشكە اينالدى.

اقنار وسىنىڭ بارلىعىن شين چيڭشان جاتتىقتىرۋشىنىڭ ەڭبەگىنە بالادى: ”شين مۇعالىمنىڭ جاتتىقتىرۋىندا بولعانىم مەرەي بولدى، وسى 2 جىلدا مەن ىلعي وزىمە سەرپىلىس جاسادىم، ءوزىمدى بارعان سايىن ۇلكەن جولعا (مۇزدا تەز سىرعاناۋعا) ۇيلەسىپ بارا جاتقانداي سەزىندىم“.

حالىقارالىق جارىس الاڭىندا قاناتىن كەڭ جايدى

2019 - جىلى 11 - ايدىڭ 16 - كۇنى 2019 − 2020 جارىس ماۋسىمىنداعى مۇزدا تەز سىرعاناۋ ءتۇرى بويىنشا جاستاردىڭ دۇنيە جۇزىلىك ساۋىتىنا تالاسۋ جارىسىنىڭ نورۆەگيا بەكەتىندەگى ايەلدەردىڭ 3000 مەترگە سىرعاناۋ جارىس تۇرىندە 20 جاستاعى اقنار تۇڭعىش رەت حالىقارالىق جارىستاردىڭ ەڭ جوعارى سيلىق مىنبەسىنە كوتەرىلدى.

”قىزىمنىڭ جۇلدەلى بولعاندىعىنان حابار تاپقاندا، بۋلىعىپ كەتتىم“. قىزىنىڭ تۇڭعىش رەت دۇنيە جۇزىلىك جارىستا جۇلدەگەر بولعان كورىنىسىن ەسكە العاندا، قاينۇر بارلىعىن كەشە بولعانداي ايتىپ ءوتتى.

2021 - جىلعى دۇنيە جۇزىلىك ساۋىتقا تالاسۋ جارىسىندا اقنار ىركەس - تىركەس ءوزىنىڭ ەڭ تاماشا ناتيجەسىنە قول جەتكىزدى. 2021 - جىلى 12 - ايدىڭ 12 - كۇنى ايەلدەردىڭ توپتىق قۋالاي سىرعاناۋ جارىسىندا حان مەي، لي چيشى، اقنارلاردان قۇرالعان جۇڭگو قۇراماسى 2 مينۋت 58 سەكۋند 428 تاقىلدىق ناتيجەمەن قولا مەدالعا قول جەتكىزدى.

بيىل 1 - ايداعى بەيجيڭ قىسقى وليمپيادا سپورت جارىسىنا قاتىناسۋ تولىمدىلىعىنا تاڭداۋ جارىسىندا اقنار ىلگەرىندى - كەيىندى 3000 مەترگە، 5000 مەترگە سىرعاناۋ جارىسىنىڭ اعا جۇلدەگەرى بولىپ، بەيجيڭ قىسقى وليمپيادا سپورت جارىسىنىڭ قىمباتتى ”ەسىك بەلەتىنە“ قول جەتكىزدى.

”وسى بىرنەشە جىلدا ول تەز قارقىنمەن تولىسىپ جەتىلدى، ونىڭ بەيجيڭ قىسقى وليمپيادا سپورت جارىسىندا وزىنە تاعى ءبىر رەت سەرپىلىس جاسايتىدىعىنا سەنەمىز، اقنار قازىر 22 جاستا عانا، ونىڭ بولاشاعى شەكسىز مۇمكىندىككە تولى“، - دەدى زوۋ گۋاڭلەي نىق سەنىممەن.