سۇي ۋىنجيڭ، حان سۇڭ اعا جۇلدەگەر بولدى

جۇڭگو 9 التىن مەدالمەن 3 - ورىنعا كوتەرىلدى

 شينحۋا اگەنتتىگىنىڭ 2 - ايدىڭ 19 - كۇنى بەيجيڭنەن بەرگەن حابارى (تىلشىلەر ديڭ ۋىنشيان، ۋاڭ حىڭجى، جاڭ زىۋي). تۇس - تۇستان دۋ قول شاپالاق ٴۇنى كوتەرىلىپ، كوزدەردەن ىستىق جاستار توگىلدى. سۇي ۋىنجيڭ، حان سۇڭ 2 - ايدىڭ 19 - كۇنى بەيجيڭ قىسقى وليمپيادا سپورت جارىسىنىڭ مانەرلەپ سىرعاناۋ قوس ادامدىق جارىسىندا كۇشتى ارىپتەسىن شاڭ قاپتىرىپ، جەڭىس شىڭىن باعىندىرىپ، جۇڭگو ۋاكىلدەر ۇيىرمەسىنە 9 - التىن مەدالدى الىپ بەردى. قىسقى وليمپيادا سپورت جارىسى «اياقتالۋ» الدىندا تۇر، قازىر جۇڭگو ۋاكىلدەر ۇيىرمەسى امەريكا ۋاكىلدەر ۇيىرمەسىن باسىپ وزىپ، 9 التىن مەدال، 4 كۇمىس مەدال، 2 قولا مەدالمەن مەدال تاقتاسىندا 3 - ورىنعا شىقتى.

  سۇي ۋىنجيڭ، حان سۇڭ قىسقا ۋاقىتتىق ونەر كورسەتۋ بويىنشا 1 - ورىنمەن ەركىن سىرعاناۋدىڭ كەلەسى اينالىمىنا ٴوتتى. سول كۇنگى كەشكى جارىستا ولار ونەرلەرىن جاقسى كورسەتىپ، 155.47 ۇپايعا يە بولىپ، 239.88 ۇپايلىق جالپى ناتيجەمەن رەسەيدىڭ 3 جۇپ گرۋپپاسىنىڭ «قورشاۋىن» بۇزىپ شىعىپ اعا جۇلدەگەر بولدى. بۇگىنگى تاڭدا جۇڭگونىڭ ەكى ادامدىق سىرعاناۋ بويىنشا ماڭداي الدى وسى گرۋپپاسى پيونچان قىسقى وليمپيادا سپورت جارىسىندا 0.43 ۇپايلىق پارىقپەن جەڭىلىس تاپقان ساتسىزدىكتى باستان كەشىرگەن بولاتىن، سوڭعى 4 جىلداعى جاراقات، اۋرۋ ازابىن جەڭىپ، ەندى مىنە كەرەمەت ناتيجە جاراتىپ وتىر. 2010 - جىلى ۆانكوۋۆەر قىسقى وليمپيادا سپورت جارىسىندا شىن شۋە، جاۋ حۇڭبو اعا جۇلدەگەر بولعاننان كەيىن، جۇڭگو مانەرلەپ سىرعاناۋ تۇرىندە وليمپيادا سپورت جارىسىنىڭ بيىك شىڭىنا تاعى تۋ قادادى.

  جانە ٴبىر جۇڭگو گرۋپپاسى پىڭ چىڭ جين ياڭ 5 - ورىندى يەلەدى.

  باسقا تۇرلەردە دە شەبەرلەر ەڭ سوڭعى ۇمتىلىسقا قايرات كورسەتتى.

  التىن مەن كۇمىس مەدال الا الماعانىمەن، ولار دا تاريح جاراتتى. قىسقى وليمپيادا سپورت جارىسىنىڭ ايەلدەر قوس ادامدىق شانا جارىسىنا تۇڭعىش رەت قاتىناسقان جۇڭگولىق شەبەر حۋاي ميڭميڭ كومانداسى مەن يىڭچيڭ كومانداسى 2 - ايدىڭ 19 - كۇنى ەڭ سوڭعى ەكى اينالىمداعى سىرعاناۋ مىندەتىن ورىنداپ، جەكە - جەكە 11 -، 14 - ورىندى يەلەدى. اعا جۇلدەگەرلىك پەن جۇلدەگەرلىكتى گەرمانيا شەبەرلەرى قورجىندارىنا سالدى.

  سول كۇنى قار ٴۇستى جارىس تۇرلەرىندە تاعى دا «تابيعاتتىڭ قاس - قاباعىن باعۋ» ورىن الدى. دالالىق شاڭعى شەبەرلەرى تومەن تەمپەراتۋرا مەن بوراننىڭ سىناعىنا ۇشىرادى، ەرلەردىڭ 50 كيلومەترگە توپتىق اتتانۋ (ەركىن شەبەرلىك) جارىسى وسى سەبەپتەن ٴبىر ساعات كەشەۋىلدەپ ٴوتتى، ونىڭ ۇستىنە جارىس ارالىعى 30 كيلومەترگە قىسقاردى. ٴبىراق قاتەرلى شارت - جاعداي رەسەيلىك الەكساندر بولشۋنوۆتىڭ التىن مەدالدى ەرلىكپەن جەڭىپ الۋىنا بوگەت بولعان جوق، 25 جاستاعى ول بەيجيڭ قىسقى وليمپيادا سپورت جارىسىندا 3 التىن مەدال، 1 كۇمىس مەدال، 1 قولا مەدال الۋداي ناتيجە قاعازىن تاپسىردى. 4 جۇڭگولىق شەبەر دە جارىستى تولىق اياقتاتتى، مۇنىڭ ىشىندە چىن دىگىن 41 - ورىندى يەلەدى.

  بوراندى اۋا رايىنىڭ ىقپالىنا ۇشىراۋ سەبەپتى، ٴاسىلى سول كۇنى تۇستەن بۇرىن باستالۋعا ٴتيىستى تاۋ شاڭعى ارالاسپا توپتىق جارىسى دا كەشەۋىلدەتىلدى، ونان سوڭ ۋاقىتى كەيىن شەگىندىرىلەتىنى جاريالاندى.

  «مۇز جىبەك باۋدا» ەڭ سوڭعى 2 التىن مەدال جارىققا شىقتى. بەلگيالىق شەبەر با سۆينس ەرلەر توپتىق اتتانۋ شەشۋشى جارىسىندا اعالاپ العا شىقتى، نيڭ جۇڭيان 12 - ورىندى يەلەدى؛ ايەلدەردىڭ توپتىق اتتانۋ شەشۋشى جارىسىندا نيدەرلاندتىڭ ايگىلى شەبەرى يرەني سحوتتەن كومبە سىزىعىنا 20 مەتر ارالىق قالعاندا وزىپ شىعىپ، جەكەلەردىڭ وسى كەزەكتى قىسقى وليمپيادا سپورت جارىسىنداعى 3 - التىن مەدالىن قانجىعاسىنا بايلادى، گو دان 13 - ورىندى يەلەدى.

  «مۇز تەكشە» اعا جۇلدەگەرلىككە تۇڭعىش رەت قول جەتكىزۋلەرگە كۋا بولدى، شۆەتسيا قۇراماسى 4 كە قارسى 5 ۇپايمەن انگليا قۇراماسىن جەڭىپ، قىسقى وليمپيادا سپورت جارىسىندا ەرلەر كەرلينگ جارىسىنىڭ التىن مەدالىنا تۇڭعىش رەت يە بولدى. قاردا ەركىن سىرعاناۋ جارىس الاڭىندا، جاڭا زەلانديالىق شەبەر نيكو پوتيوس ەرلەردىڭ U فورمالى الاڭداعى شەبەرلىك جارىسىندا اعا جۇلدەگەرلىكتى جەڭىپ الدى.

  2 - ايدىڭ 19 - كۇنى بەيجيڭ قىسقى وليمپيادا سپورت جارىسىنىڭ سوڭىنان ساناعاندا ەكىنشى جارىس كۇنى، جيىنى 7 التىن مەدال جارىققا شىقتى. قازىر نورۆەگيا ۋاكىلدەر ۇيىرمەسى 15 التىن، 8 كۇمىس، 12 قولا مەدال الىپ مەدال تاقتاسىنىڭ باسىندا تۇر. 2 - ايدىڭ 20 - كۇنى بەيجيڭ قىسقى وليمپيادا سپورت جارىسىنىڭ ەڭ سوڭعى 5 ٴتۇرى بويىنشا اعا جۇلدەگەرلىك جارىققا شىققان سوڭ، جابىلۋ سالتىنىڭ تارتىمدى كونسەرتى قويىلادى.