حابارىن جازىپ، سۋرەتىن تۇسىرگەن ٴتىلشىمىز ليۋ چۇنشيڭ

سۋرەتتە : ساياحاتشىلار نارات قار شاڭعى الاڭىندا شاڭعى تەبۋدە.

بەيجيڭ قىسقى وليمپيادا سپورت جارىسىنىڭ جابىلۋىنا ىلەسە، بيىلعى قار شاڭعى تەبۋمەزگىلى دە اياقتاۋ الدىندا تۇر، ەندەشە، ىلە اڭعارىنداعى قايسى قار شاڭعى الاڭدارىندا ٴالى دە شاڭعى تەبۋگە بولادى؟ ٴتىلشى قار شاڭعى الاڭدارىنىڭ جۇمىسىن توقتاتۋ ۋاقىت كەستەسىن رەتتەپ شىققان، قالعان ۋاقىتتى قولدان بەرمەي شاڭعى تەبۋگە بارماقشى بولعان دوستاردىڭ دەرەۋ ساقتاپ الۋىن ٴۇمىت ەتەمىز.

 قۇلجا قالاسىنداعى بىردەن ـ ٴبىر تيجارات جۇرگىزگەن قار شاڭعى الاڭى كۋايلىشيڭ قار شاڭعى الاڭى وسى اپتانىڭ سوڭىندا جۇمىسىن توقتاتادى ەكەن. وسى قار شاڭعى الاڭىنىڭ قاتىستى جاۋاپتىسى لي چۇنۋي تىلشىگە بىلاي دەدى: «بيىل قار از بولدى، ونىڭ ۇستىنە قار جاي جاۋدى، تيجارات ۋاقىتىمىز بۇرىنعى جىلدارداعىدان ٴبىر اپتا شاماسىندا كەشەۋىلدەدى». ىلە اڭعارىنداعى دارەجەسى ەڭ جوعارى، قۇرىلعىلارى ەڭ كەمەلدى قار شاڭعى الاڭى نارات حالىقارالىق قار شاڭعى الاڭى 2 - ايدىڭ 28 - كۇنى جۇمىسىن توقتاتتى. وسىمەن ٴبىر ۋاقىتتا توعىزتاراۋ اۋدانىنىڭ ىلگىداي حالىقارالىق قار شاڭعى الاڭى دا جۇمىسىن توقتاتتى.

تاۋ قويناۋىنا ورنالاسقان قورعاس اۋدانى جۇڭحۋا فۋشوۋشان قار شاڭعى الاڭى، نىلقى اۋدانىنىڭ قاسقىر ساي قار شاڭعى الاڭى 3 ـ ايدىڭ باسىندا جۇمىس توقتاتادى ەكەن. «ٴبىز جاعدايعا قاراپ بەلگىلەيمىز، قازىر قار ٴالى قالىڭ، 10 كۇن شاماسىندا شاڭعى تەبۋگە بولادى» دەدى قاسقىر ساي قار شاڭعى الاڭىنىڭ قاتىستى جاۋاپتىسى تىلشىگە. 

شاڭعى تەبۋ ۋاقىتىنىڭ كەشەۋىلدەيتىنى بار ما؟ ٴتىلشىنىڭ ۇعىسۋىنا قاراعاندا، چاپچال اۋدانىنىڭ نۇراقىن قار شاڭعى الاڭىنىڭ، تەكەس اۋدانىنىڭ قاراجون قار شاڭعى الاڭىنىڭ تيجارات مەزگىلى 3 - ايدىڭ سوڭىنا دەيىن جالعاسادى ەكەن. نۇراقىن قار شاڭعى الاڭىنىڭ ديرەكتورى ۋاڭ كۇي تىلشىگە بىلاي دەدى: «ٴبىزدىڭ قار شاڭعى الاڭىمىز ٴۇيسىن تاۋىنىڭ ەتەگىنە ورنالاسقان، قازىر قار ٴالى قالىڭ، قاردىڭ قالىڭدىعى 50 - 60 سانتيمەتر، شاڭعى تەبۋدى 3 ـ ايدىڭ سوڭىنا دەيىن، ٴتىپتى، 4 ـ ايدىڭ باسىنا دەيىن جالعاستىرۋعا بولادى» دەدى.