ماقالاسىن جازىپ، سۋرەتىن تارتقان لاي يۇينيڭ، جاڭ چيڭحۋا (ٴوز تىلشىلەرىمىز)
3 - ايدىڭ 26 - كۇنى كوكتەمنىڭ ەڭ سوڭعى قارىنان كەيىن اۋارايى بىرتىندەپ جىلىنا باستادى. قۇلجا اۋداندىق دەنەتاربيە ورتالىعىنىڭ فۋتبول الاڭىندا ٴبىر توپ جەتكىنشەك ارلى - بەرلى جۇگىرىپ، دوپقا تالاسۋ، دوپ الىپ ٴجۇرۋ، كەدەرگىدەن ٴوتۋ، قاقپاعا دوپ ۇرۋ سياقتى فۋتبول ونەرىنىڭ ٴاربىر بۋىندارىنا مۇقيات جاتتىقتى. 200 گە جۋىق ۇل - قىز ارالاس جەتكىنشەك دوپشى جاسىنا قاراي ۇقساماعان گرۋپپالارعا بولىنگەن. مۇنىڭ ىشىندەگى قىزدار فۋتبول كومانداسى كوپتىڭ نازارىن اۋداردى.
«بۇل اۋدانىمىزدا جاڭادان قۇرىلعان قىزدار فۋتبول كومانداسى» دەدى قۇلجا اۋداندىق دەنەتاربيە ورتالىعىنىڭ جاۋاپتىسى ۋ حايتاۋ ٴبىر جاعىنان جاتتىعۋدى باقىلاسا، ەندى ٴبىر جاعىنان اۋساي كەتكەن دوپتاردى جيناي ٴجۇرىپ. «2 - ايدان باستاپ اۋدانىمىزدا ارت - ارتىنان ۇلدار، قىزدار فۋتبول كومانداسى، بالۋاندار كومانداسى، جەڭىل اتلەتيكا مەن باسكەتبولعا جاتتىعۋ كومانداسى قۇرىلدى. وسىلاردىڭ بارلىعى تۇتاس اۋدانداعى جاستار مەن وسپىرىمدەردىڭ باسەكەلىك دەنەتاربيە قيمىلىن دامىتۋ ٴۇشىن بولىپ وتىر» دەدى ۋ حايتاۋ. فۋتبولعا قىزىققان قىز وقۋشىلاردىڭ سانىنىڭ مەجەدەگىدەن كوپ بولۋى ادامداردى تاڭعالدىردى. «قىزدار فۋتبول كومانداسى قۇرىلعان كەزدەگى 11 ادامنان قازىر 35 كە كوبەيدى، 6 دا 13 جاس ارالىعىندا. مۇندا تىزىمدەلەتىن وقۋشىلاردىڭ سانىنىڭ تاعى دا ارتاتىندىعى ٴشۇباسىز. كومانداعا ادام تاڭداۋدا وقۋشىلاردىڭ قىزىعۋشىلىعى، اتا - اناسىنىڭ قولداۋى، دەنە ساپاسىنىڭ جوعارى بولۋى العى شارت ەتىلەدى» دەدى ۋ حايتاۋ تانىستىرىپ.
قۇلجا اۋداندىق مادەنيەت - دەنەتاربيە، راديو - تەلەۆيزيا جانە ساياحات مەكەمەسى، وقۋ - اعارتۋ مەكەمەسى سياقتى ورىندار جاس - وسپىرىمدەردىڭ باسەكەلىك دەنەتاربيە قيمىلىنىڭ ورىستەتىلۋىنە بارىنشا قولداۋ كورسەتتى ٴارى كاسىپتىك وقىتۋشىلاردى قوس دەمالىس كۇنىنەن پايدالانىپ وقۋشىلارعا تەگىن ساباق بەرۋگە ورنالاستىردى. قىزدار فۋتبول كومانداسىنىڭ جاتتىقتىرۋشىسى اينۇر ومەرجان شينجياڭ ايەلدەر فۋتبول كومانداسىنان شەگىنگەننەن كەيىن قۇلجا اۋدانىنداعى ٴبىر مەكتەپتە دەنەتاربيە وقىتۋشىسى بولىپ قىزمەت ىستەگەن. قۇلجا اۋدانىندا قىزدار فۋتبول كومانداسى قۇرىلعاننان كەيىن ول وسى كوماندانىڭ جاتتىقتىرۋشىسى مىندەتىن اتقارىپ، ٴار اپتانىڭ سەنبىسى تولىق كۇن، جەكسەنبى جارىم كۇن وقۋشىلاردى جاتتىقتىردى. «2 اي ۋاقىت جاتتىعۋ ارقىلى بالالاردا كوپ ىلگەرىلەۋشىلىكتەر بولدى. ونىڭ ۇستىنە فۋتبول ونەرىن يگەرۋلەرى دە تەز. ساپالى فۋتبول كومانداسىن قۇرىپ، تۇتاس اۋداننىڭ جاس - وسپىرىمدەر باسەكەلىك دەنەتاربيە قيمىلىنىڭ دامۋىنا ٴبىر كىسىلىك ۇلەسىمدى قوسۋعا دايىنمىن» دەدى اينۇر.
قىزدار فۋتبول كومانداسىنا تاڭدالعاننان كەيىن قۇلجا اۋداندىق 3 - باستاۋىش مەكتەپتىڭ وقۋشىسى سايدام ابدۇجيليلدىڭ ۇيرەنۋگە دەگەن ىنتاسى بۇرىنعىدان دا كۇشەيدى. «ۇيرەنۋىمە ىقپال جەتكىزبەۋ ٴۇشىن ٴار رەت جاتتىعۋدان بۇرىن ٴۇي تاپسىرماسىن تولىق ورىنداپ بولامىن. فۋتبول كومانداسىنا قاتىناسقاننان كەيىن دەنە ساپام بارعان سايىن جاقساردى، ۇيرەنۋ ناتيجەم دە جوعارىلادى. ەرجەتكەندە كاسىپتىك فۋتبولشى بولىپ، ەلىمىزدىڭ فۋتبول ىستەرىنىڭ دامۋىنا ۇلەس قوسامىن» دەدى سايدام.
«قازىر جاتتىعۋدىڭ ونىمدىلىگى ايتارلىقتاي جاقسى، وقۋشىلاردىڭ اتا - انالارى دا قولداۋ كورسەتتى، وقۋشىلار دا فۋتبول ونەرىنىڭ قىرى مەن سىرىنا بارىنشا قانىق بولا باستادى» دەدى قۇلجا اۋداندىق مادەنيەت - ساياحات مەكەمەسىنىڭ دەنەتاربيە قىزمەتىنە جاۋاپتى كادرى ٴجۇرات ابدۇريىم. ول قازىر اۋداندىق ۇلدار فۋتبول كومانداسىنىڭ جاتتىقتىرۋشىسى.
«تۇتاس اۋداننىڭ جاس - وسپىرىمدەر باسەكەلىك دەنەتاربيە قيمىلىنىڭ ٴۇرتىس دامۋىن جەبەۋ ارقىلى سپورت ونەرىنە قانىق تاڭداۋلى سپورتشىلار زاپاس دارىندىلارىن باۋلىپ، ەلىمىزگە كوپتەپ تاڭداۋلى دەنەتاربيە دارىندىلارىن تاربيەلەپ بەرۋگە قۇلشىنامىز» دەدى ۋ حايتاۋ.
دوپ لاقتىرۋ
جالعىز اياقتاپ جاتتىعۋ
كەدەرگىدەن ٴوتۋ جاتتىعۋى
دۋماندى فۋتبول الاڭى
قاقپاعا دوپ ۇرۋ
دوپ الىپ ٴجۇرۋ
جالىقپاي ۇيرەتۋ
دوپ قارماۋ