ما شيڭرۇي باستالعاندىعىن جاريالادى، ەركىن تۇنياز ارناۋ ٴسوز سويلەدى

9 - ايدىڭ 13 - كۇنى از ۇلتتاردىڭ اۆتونوميالى رايوندىق 10 - كەزەكتى ٴداستۇرلى سپورت جارىسى بۇراتالا قالاسىنىڭ بايگە الاڭىندا باستالدى.            سۋرەتتى شينجياڭ گازەتىنىڭ ٴتىلشىسى حان لياڭ تۇسىرگەن 

شينجياڭ گازەتىنىڭ حابارى (ٴتىلشى لي ياڭ). از ۇلتتاردىڭ اۆتونوميالى رايوندىق 10 - كەزەكتى ٴداستۇرلى سپورت جارىسى 9 - ايدىڭ 13 - كۇنى بۇراتالا قالاسىنىڭ بايگە الاڭىندا باستالدى. اۆتونوميالى رايوندىق پارتكومنىڭ شۋجيى ما شيڭرۇي باستالۋ سالتىنا قاتىناستى ٴارى باستالعاندىعىن جاريالادى، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز باستالۋ ٴسوزىن سويلەدى.

تۇستەن بۇرىن ساعات 11 دە باستالۋ سالتى رەسمي باستالدى. «وتاندى جىرلايمىز» ٴانىنىڭ اسقاق اۋەنىمەن قۇرمەت قاراۋىلى الاۋلاعان بەس جۇلدىزدى قىزىل تۋدى قورعاپ نىق قاداممەن سپورت الاڭىنا كىردى. الاڭدا ەكپىندى «سپورتشىلار مارشى» شىرقالدى، از ۇلتتاردىڭ اۆتونوميالى رايوندىق 10 - كەزەكتى ٴداستۇرلى سپورت جارىسىنىڭ جارىس تۋى جانە جارىس تۋى شارشى توبى، تورەشىلەر ۋاكىلدەرى شارشى توبى ٴتوراعالار مىنبەسى الدىنان ٴجۇرىپ ٴوتتى. رايونىمىزدىڭ 14 ايماق، وبلىس، قالاسىنان جانە شينجياڭ ٴوندىرىس - قۇرىلىس بيڭتۋانىنان كەلگەن 15 سپورت ۋاكىلدەر ۇيىرمەسىنىڭ سپورت ساڭلاقتارى كوتەرىڭكى رۋحپەن رەتتى ساپ تۇزەپ تۇردى.

الاڭعا كىرۋ سالتى اياقتاعاندا بۇكىل الاڭداعىلار ورىندارىنان تۇردى، جۇڭحۋا حالىق رەسپۋبليكاسىنىڭ ايبىندى مەملەكەت انىمەن بىرگە بەس جۇلدىزدى قىزىل تۋ باياۋ كوتەرىلدى. ونان سوڭ از ۇلتتاردىڭ اۆتونوميالى رايوندىق 10 - كەزەكتى ٴداستۇرلى سپورت جارىسىنىڭ جارىس ٴانىنىڭ اۋەنىمەن جارىس تۋى باياۋ كوتەرىلدى.

ساعات 11 دەن 20 مينۋت وتە بەرە، ما شيڭرۇي: «از ۇلتتاردىڭ شينجياڭ ۇيعۇر اۆتونوميالى رايوندىق 10 - كەزەكتى ٴداستۇرلى سپورت جارىسى باستالدى!»، - دەپ جاريالادى، جارىس الاڭىن قىزۋ قول شاپالاق ٴۇنى مەن الاقايلاعان ۇندەر كەرنەدى.

باستالۋ سالتىنداعى ارناۋ سوزىندە، ەركىن تۇنياز اۆتونوميالى رايوندىق پارتكوم، اۆتونوميالى رايوندىق حالىق ۇكىمەتى اتىنان بارلىق سپورتشىلاردى، باپكەرلەردى، تورەشىلەردى قارسى الاتىندىعىن، وسى كەزەكتى از ۇلتتاردىڭ ٴداستۇرلى سپورت جارىسىنىڭ وتكىزىلۋىن قۇتتىقتايتىندىعىن ٴبىلدىردى. ول بىلاي دەپ اتاپ كورسەتتى: پارتيا 18 - قۇرىلتايىنان بەرى باس شۋجي شي جينپيڭ مەن پارتيا ورتالىق كوميتەتى شينجياڭ قىزمەتىنە ايرىقشا ٴمان بەردى، اسىرەسە، بيىل 7 - ايدا، باس شۋجي شي جينپيڭ تاعى دا كەلىپ شينجياڭدى كوزدەن كەشىرىپ، ٴار ۇلت كادر - بۇقاراسىنا امانداسىپ، ولاردان حال سۇراپ، ماڭىزدى ٴسوز سويلەپ، ماڭىزدى نۇسقاۋ بەرىپ، جاڭا جاعدايداعى شينجياڭ قىزمەتىن ويداعىداي ىستەۋگە قۋاتتى ساياسي قوزعاۋشى كۇش، رۋحاني قوزعاۋشى كۇش جانە قىزمەت قوزعاۋشى كۇشىن ۇستەدى. از ۇلتتاردىڭ اۆتونوميالى رايوندىق 10 - كەزەكتى ٴداستۇرلى سپورت جارىسىن وتكىزۋ باس شۋجي شي جينپيڭنىڭ شينجياڭدى كوزدەن كەشىرگەندەگى ماڭىزدى ٴسوزىنىڭ، ماڭىزدى نۇسقاۋىنىڭ رۋحىن دايەكتىلەندىرۋدىڭ، تياناقتاندىرۋدىڭ ماڭىزدى شاراسى، جۇڭحۋا ۇلتى ۇلى ىنتىماعىنىڭ جاندى بەينەسى، جۇڭحۋا ۇلتىنىڭ تاڭداۋلى ٴداستۇرلى مادەنيەتىن جالعاستىرۋدىڭ جانە جالپى حالىقتىق دەنە شىنىقتىرۋ مەملەكەت ستراتەگياسىن اتقارۋدىڭ ناقتى ارەكەتى. ٴبىز وسى كەزەكتى از ۇلتتاردىڭ ٴداستۇرلى سپورت جارىسىن جۇڭحۋا ۇلتى ورتاق تۇلعا تانىمىن بەرىك ورناتۋدىڭ سالتاناتتى جينالىسى، ۇلتتاردىڭ ارالاسۋىن، ىشتەسۋىن، توعىسۋىن جەبەۋدىڭ سالتاناتتى جينالىسى، شينجياڭنىڭ رەفورما، دامۋ، ورنىقتىلىق جەتىستىكتەرىن جاپپاي ايگىلەۋدىڭ سالتاناتتى جينالىسى ەتىپ وتكىزىپ، پارتيا 20 - قۇرىلتايىنىڭ جەڭىسپەن اشىلۋىن ٴىس جۇزىندىك ارەكەتپەن شاتتانا قارسى الۋىمىز كەرەك.

اشىلۋ سالتىندا «بۇراتالا ٴسىزدى قارسى الادى» اتتى تارتىمدى ادەبيەت - كوركەمونەر كونسەرتى قويىلدى. دارا ەرەكشەلىككە يە بيلەر، قۇلاقتان كىرىپ بويدى الار اسەم اندەر دوستىقتىڭ دانەكەرى بولىپ، اسقاقتىق پەن اسەرلى سەزىمدى بەينەلەدى.

وسىدان كەيىن وتكىزىلگەن 2000 مەترلىك ات بايگەسىندە، شاباندوزدار جۇيرىكتەرىنە قامشى ۇيىرە قۇيعىتتى. تۇيە جارىسى، قىزقۋار، اتپەن شاۋىپ كەلىپ حادا ٴىلۋ سياقتى ويىندار ٴداستۇرلى دەنە تاربيەنىڭ وزگەشە تارتىمدىلىعىن تولىق ايگىلەپ، ٴار ۇلت پەرزەنتتەرىنىڭ ٴبىر نيەتپەن ىنتىماقتاسىپ، كوركەم شينجياڭدى بىرگە قۇراتىن اسقاق ارمانىن بەينەلەدى.

وسى كەزەكتى از ۇلتتاردىڭ ٴداستۇرلى سپورت جارىسى «ىنتىماقتاسۋ، العا باسۋ، جاراسىمدىلىق، ەكپىندەي ىلگەرىلەۋدى» نەگىزگى تاقىرىپ ەتىپ، «ينتەرنەت جەلىسىندە + ينتەرنەت جەلىسىنەن تىس» جارىس ۇلگىسىنەن پايدالانىپ، جيىنى 16 ۇلكەن جارىس ٴتۇرىن، 10 ويىن كورسەتۋ ٴتۇرىن ورنالاستىردى. مۇنىڭ ىشىندە، ٴداستۇرلى ات بايگەسى، كوكپار تارتۋ سياقتى بۇقارا ۇناتىپ كورەتىن تۇرلەرمەن بىرگە، جاڭادان قوسىلعان حىچيۋ، توعىزقۇمالاق سياقتى تاماشالاۋ سيپاتتى جانە باسەكەلىك سيپاتتى تۇرلەر دە بار. جيىنى 1752 سپورتشى جارىسقا قاتىناستى.

ٴزۇمىرات وبۇل، سۇن حۇڭمەي، ٴمۇتالىپ ٴماتتوحتى قاتارلىلار اشىلۋ سالتىنا قاتىناستى.