جينالسا − مازداعان جالىن، تاراسا − سامسىعان جۇلدىز

　　− شينجياڭ تۇڭعىش كەزەكتى قىسقى سپورت جارىسىنىڭ 1 - كەزەڭدىك جارىسىنان ەستەلىك

　　□ انار بۇلت \ شينجياڭ گازەتىنىڭ ءتىلشىسى دۇڭ لياڭ

1 - ايدىڭ 4 - كۇنى قالىڭ قار قاپالاقتاپ تۇرعان التاي قالاسى بۇكىل مەملەكەتتىڭ جەر - جەرىنەن كەلگەن شاڭعىشىلاردى قارسى الدى، ال جياڭجۇن تاۋى حالىقارالىق شاڭعى دەمالىس اۋماعى مەن چۋانجي دەنە تاربيە باقشاسىندا ايىرىلىسۋدىڭ قيماستىق كۇيى مەن مۇندالادى، ياعني بۇل ارا الگىندە عانا ءبىر توپ جالىندى دا جىگەرلى قار - مۇز ساڭلاقتارىن اتتاندىرىپ سالدى.

شينجياڭ تۇڭعىش كەزەكتى قىسقى سپورت جارىسى 1 - ايدىڭ 3 - كۇنى 1 - كەزەڭدىك تاۋ شاڭعى، سىڭار تاقتايلى شاڭعىمەن سىرعاناۋ جانە مۇزدا تەز سىرعاناۋ سىندى 3 جارىس ءتۇرىنىڭ جارىسىن اياقتاتقاننان كەيىن، ۋاقىتشا شىمىلدىعىن جاپتى. 2 - كەزەڭدىك جارىس تۇرلەرى 2 - ايدا قايتا باستالادى، سول كەزدە بۇكىل شينجياڭنىڭ قار - مۇز ساڭلاقتارى تاعى دا قيان - كەسكى بەلدەسەتىن بولادى.

قىسقا عانا 5 جارىس كۇنىندە قار - مۇز ساڭلاقتارىنىڭ قار بەتىندە ۇيتقي ۇشىرتىپ، مۇز بەتىندە زىمىراعان ايبىندى تۇلعاسى التاي قالاسىنداعى 14 جاستاعى شاڭعى اۋەسكەرى جۇپار ەركىننىڭ ويىنان كەتپەي، ۇزاققا دەيىن ەسىنەن شىقپادى. ”ءدال سولارداي بولۋدى ەرەكشە ارماندايمىن، جارىس الاڭىندا اناداي اسا كۇردەلى ارەكەتتەردى جاساي الادى ەكەن، كەلەر ايدا مەن تاعى كەلىپ جارىس كورەمىن“، - دەدى جۇپار.

وسى كەزەكتى قىسقى سپورت جارىسىنا قاتىناسقان ساڭلاقتار تۇگەلدەي رايونىمىزدىڭ جەر - جەرىندەگى ورتا، باستاۋىش مەكتەپتەردەن تاڭداپ العان جاس ءوسپىرىم قار - مۇز اۋەسكەرلەرى ەدى، ولاردىڭ ەڭ ۇلكەنى 18 جاستا، ەڭ كىشكەنەسى 10 جاسقا دا تولماعان.

1300 مەتر ۇزىندىقتاعى تاۋ شاڭعى جولىندا قار - مۇز ساڭلاقتارى ءاربىر جالاۋلى ەسىكتەن ەندەي ءوتىپ، تەك ءبىر مينۋت شاماسىندا كومبەگە جەتىپ كەلگەندە، ءبىر مەزەت قار ۇشقىندارى بوراپ قويا بەرەدى؛ بوگەتى مول سىڭار تاقتايلى شاڭعىمەن سىرعاناۋ جولىندا ولار جوعارى - تومەن ۇيتقي ۇشىرتىپ بارا جاتىپ تاقتايدى ۇستاپ ءتۇرلى ارەكەتتەر جاسايدى، جىعىلىپ تۇسۋدەن، دەنەسىن اۋىرتىپ الۋدان قورىقپاستان، كومبەگە قاراي زىمىرايدى؛ تەپ - تەگىس، جالتىراعان مۇز ايدىنىندا ولار جىگەرلەنە بار قايراتىن جيا ۇمتىلىپ، ءوز - ءوزىنىڭ ەڭ جوعارى شەگىنە ۇزدىكسىز سايىس جاريالايدى. دەنەلەرىن كونكي ءتىلىپ جارالاسا دا، اۋەلگىسىندەي تاباندىلىقپەن جارىستى اياقتاتادى.

”شينجياڭدىق بالالار توتەنشە باقىتتى ەكەن، وسىنشاما جاقسى شاڭعى مايدانى بار بولىپ عانا قالماستان، بالالار مەكتەپتە دە قار - مۇز سپورت تەحنيكاسىن ۇيرەنەدى ەكەن“. جاڭا جىل دەمالىسى كەزىندە شاڭحايدان كەلگەن ۋ يۇيلين مەن شىنجىننان كەلگەن لي يانليڭ ۋادە بويىنشا التايعا شاڭعى تەبۋگە كەلگەن، وسى كەزەكتى قىسقى سپورت جارىسى ساڭلاقتارىنىڭ بەينەسىن كورگەن ولار شىن جۇرەكتەن تەبىرەندى. وسىناۋ تارتىمدى جارىس بارىسىندا، كوز تارتاتىن جاڭا جۇلدىزدار جارقىراي كوزگە ءتۇستى.

تارباعاتاي ايماقتىق ۋاكىلدەر ۇيىرمەسىندەگى 18 جاستاعى دىڭ تيانشين تۇڭعىش التىندى يەلەگەننەن كەيىن جارالانعانىنا قاراماستان تاباندىلىقپەن جارىسقا قاتىناسىپ، ەڭ اقىرىندا مۇزدا تەز سىرعاناۋ جارىسى ايەلدەر A گرۋپپاسىنىڭ 5 التىن مەدالىن ەرلىكپەن قولعا كەلتىردى؛ سانجى حۇيزۋ اۆتونوميالى وبلىستىق ۋاكىلدەر ۇيىرمەسىندەگى 15 جاستاعى چىن چىن مۇزدا تەز سىرعاناۋ جارىسى ەرلەر B گرۋپپاسىنىڭ 4 التىن مەدالىن قانجىعاسىنا بايلادى؛ التاي ايماقتىق ۋاكىلدەر ۇيىرمەسىندەگى 16 جاستاعى شا شا تاۋ شاڭعى جارىسى ايەلدەر A گرۋپپاسىنىڭ تۇتاس 3 التىن مەدالىن ءبىر ءوزى يەلەدى؛ ءۇرىمجى قالالىق ۋاكىلدەر ۇيىرمەسىندەگى 14 جاستاعى جاۋ مينشي تاۋ شاڭعى جارىسى ايەلدەر B گرۋپپاسىنىڭ 2 التىن مەدالىن ىركەس - تىركەس قولعا كەلتىردى.

سيلىق تاراتۋ سالتىندا ولار جارىس مايدانىنداعى سالماقتى بەينەلەرىنەن مۇلدە وزگەرىپ، كوز جاۋىن الار جايدارمان بەينەلەرىن كورسەتتى، ”ءتىپتى دە بيىك سيلىق ساحنالارىنان كورىنۋ“ − ولاردىڭ ورتاق ارمانى ەدى.

”وسى كەزەكتى قىسقى سپورت جارىسىنىڭ وتكىزىلۋى رايونىمىزدىڭ 14 - كەزەكتى مەملەكەتتىك قىسقى سپورت جارىسى مەن ميلان قىسقى وليمپياداسىنا دايىندالۋىنا، قار - مۇز سپورتىنىڭ زاپاس دارىندىلارىن زاپاس ساقتاۋعا جانە ىرىكتەۋگە نەگىز قالادى. سونىمەن بىرگە ’300 ميلليون ادام قار - مۇز سپورتىنا قاتىناسۋدىڭ‘ جەتىستىگىن اناعۇرلىم بەكەمدەپ جانە كەڭەيتىپ، ءتىپتى دە كوپ جاس وسپىرىمدەردى قار - مۇز سپورتىنا باۋرادى“، - دەپ تانىستىردى اۆتونوميالى رايوندىق دەنە تاربيە مەكەمەسى جاس وسپىرىمدەر دەنە تاربيەسى باسقارماسىنىڭ باستىعى جاۋ يۇيحۋ.

”بالالاردىڭ ۇزدىك بەينەسى ءبىزدىڭ ’قار - مۇز سپورتىن مەكتەپ اۋلاسىنا ەنگىزۋ‘ قيمىلىن ۇزدىكسىز ويداعىداي ىستەۋ سەنىمىمىزدى بەكەمدەدى“. ءۇرىمجى قالالىق دەنە تاربيە مەكەمەسىنىڭ ورىنباسار باستىعى ۋاڭ تاۋ مىنالاردى ءبىلدىردى: ءۇرىمجى قالاسى وسى رەتكى ورايدى مىقتى يگەرىپ، جاس ءوسپىرىم سپورتشىلاردىڭ ساتىلىق قۇرىلىسى مەن باپكەرلەر قوسىنى قۇرىلىسىن ۇزدىكسىز كۇشەيتىپ، بالالاردى ءتىپتى دە جاقسى جاتتىعۋ ورتاسىمەن قامدايمىز.

تارباعاتاي ايماقتىق مۇزدا تەز سىرعاناۋ كومانداسىنىڭ باپكەرى فۋ ۋي تىلشىگە سوڭعى جىلدارى جەرگىلىكتى ورىننىڭ ”قار - مۇز سپورتىن مەكتەپ اۋلاسىنا ەنگىزۋ“ قيمىلىن زور كۇشپەن ورىستەتىپ، 10 جاستان تومەن ءبىر توپ ۇزدىك ورەندى دايىنداعاندىعىن ايتتى. دىڭ تيانشين سياقتىلاردىڭ بەينەسى ولاردىڭ زاپاس دارىندىلاردى جەتىلدىرۋ سەنىمىن بەكەمدەپتى. ”كەلەر كەزەكتى قىسقى سپورت جارىسىندا ءتىپتى دە كوپ جاڭا ادامداردىڭ مولىنان شىعاتىندىعىنا سەنەمىن“، - دەيدى فۋ ۋي.

قىزىقتى جارىس ۋاقىتشا مارەسىنە جەتتى، بۇكىل شينجياڭنىڭ ءارقايسى ايماق، وبلىس، قالالارىنان كەلگەن قار - مۇز ساڭلاقتارى اۋىلدارىنا قايتىپ جالعاستى سايىسقا دايىندالادى.

”جينالسا − مازداعان جالىن، تاراسا − سامسىعان جۇلدىز“. قىسقى سپورت جارىسىنىڭ 2 - كەزەڭدىك جارىسى 2 - ايدىڭ 8 - كۇنى قايتا باستالادى، بۇكىل شينجياڭنىڭ قار - مۇز ساڭلاقتارى تاعى دا دالالىق شاڭعى، شاڭعىمەن تاۋعا شىعۋ، دوڭگەلەكتى كونكيمەن تەز سىرعاناۋ سياقتى 7 ۇلكەن تۇردە جالعاستى تاماشا سايىس وتكىزەدى.