شينجياڭ گازەتىنىڭ حابارى (ٴتىلشى حۋاڭ شيڭ). ”وسىدان بۇرىن مەن جاراقاتىممەن الىسىپ، 3 ايدان استام ۋاقىت توسەك تارتىپ جاتىپ قالدىم. ٴوزىمنىڭ توسەكتە جاتا بەرىپ سەمىرگەنىمدى كورىپ، مارافون جارىس الاڭىنا قايتا ورالا الماسپىن دەپ ويلادىم. 20 كۇندە 5 كيلوگرامنان استام سالماق تاستاپ، بۇگىن اعا جۇلدەگەر بولدىم. ادام ومىرىندە تەك العان بەتىنەن قايتپاسا بولعانى كەرەمەت ىستەر جاراتۋعا بولادى ەكەن“ دەدى 5 - ايدىڭ 20 - كۇنى 2 - كەزەكتى ماناس مەملەكەتتىك سازدىق باقشاسى جارتىلاي مارافون جارىسىنىڭ اعا جۇلدەگەرى باعدار ورازالى ۇلى تىلشىگە. بۇل رەتكى جارىس قاتىناساتىن ساڭلاقتار از ٴارى ايتۋلى جارىس سانالماعانىمەن، 26 جاستاعى ىلەلىك جىگىت باعدار جونىنەن ٴبىر رەتكى ۇمىتىلماس كەشىرمە بولدى. جارىس باستالۋدان 20 كۇن بۇرىن ول شاشىن التىن مەدالدىڭ رەڭىنە بويايدى، الايدا ارمانىنىڭ شىندىققا اينالاتىنىن ويلاماعان بولاتىن.

توعىزتاراۋ اۋدانى ٴدوڭمالى قالاشىعىندا تۋىلعان باعدار كەزىندە شينجياڭ جەڭىل اتلەتيكا كومانداسىنا قابىلدانادى. 2018 - جىلدان باستاپ ول 1 - تامىز جەڭىل اتلەتيكا كومانداسىنىڭ ساقا جاتتىقتىرۋشىسى جۋ شيڭيوۋدى ۇستاز تۇتىپ، ورتا، ۇزاق ارالىققا جۇگىرۋ تۇرىنەن مارافون تۇرىنە بۇرىلىس جاساپ، ەل ىشىندەگى ٴتۇرلى مارافون جارىسىنا قاتىناسا باستايدى.

2019 - جىلى 6 - ايدا جەمسارى تيانشان مارافون جارىسىندا باعدار 2 ساعات 32 مينۋت 43 سەكۋندتىق ناتيجەمەن تۇتاس بارىستىق مارافون ەرلەر گرۋپپاسىنىڭ اعا جۇلدەگەرى بولىپ، ونىڭ جىگەرى مەن سەنىمى تاسقىندايدى. ول بىلاي دەدى: ”ۇزاق ۋاقىتتان بەرى وزىمدە سەنىم بولماي، تالانتىم باسقالارعا جەتپەيدى دەپ ويلادىم. وسى رەتكى چەمپيون بولۋ ماعان تۋما تالانتتىڭ ماڭىزدى ەمەس ەكەنىن، تەك باسقالار توزە المايتىن قيىنشىلىققا توزە السا بولعانى، باسقالار جەتە المايتىن ناتيجەلەرگە قول جەتكىزە الاتىندىعىن ۇعىندىردى“.

2019 - جىلعى بەيجيڭدە مارافون جارىسىنىڭ ساڭلاقتارى جينالعاندا باعدار سەگىزىنشى بولدى، ول دا شينجياڭداعى 2 ساعات 20 مينۋت كولەمىندە جۇگىرەتىن 3 - مارافون ساڭلاعىنا اينالدى. 2021 - جىلى حىڭشۇي كولىندەگى مارافون جارىسىندا باعدار تاعى دا تىڭ قامال الىپ، جەكەلەر بويىنشا 2 ساعات 17 مينۋت 05 سەكۋندتىق ەڭ تاماشا ناتيجەگە قول جەتكىزدى. 2022 - جىلى 11 - ايدىڭ 20 - كۇنى حاڭجوۋداعى مارافون جارىسىندا باعدار بولماشى پارىقپەن 2 - ورىندى يەلەدى. ”مەنىڭ نىسانام - حالىقارالىق دەڭگەيدەگى ساڭلاق بولۋ“ دەدى تىلشىلەردىڭ سۇحباتىن قابىلداعاندا باعدار تولىق سەنىممەن. حالىقارالىق دەڭگەيدەگى ساڭلاقتىڭ ولشەمى 2 ساعات 13 مينۋت. الايدا جىگەرى اسقاق ول ومىرىندەگى ەڭ ۇلكەن قيىنشىلىققا جولىقتى. بىلتىر جىل سوڭىندا باعدار سالماقتى ناۋقاسقا شالدىعىپ، 3 ايدان استام ۋاقىت اۋرۋ ازابىن اياماي تارتتى. ”جاتتىعۋدى بىلاي قويعاندا، ٴبىر مەزگىل توسەكتەن تۇسە الماي قالدىم. قاتتى قينالعان كەزىمدە، جارىس مايدانىنا قايتا ورالۋىم مۇمكىن ەمەس شىعار دەپ ويلادىم“. باعدار وسى كەشىرمەلەرىن تىلگە تيەك ەتكەندە داۋىسى قۇمىعا بەردى، ارماندارى ٴالى جۇزەگە اسا قويماعاندىقتان، ول وعان مويىنسال بولماي، توسەكتەن بىرتىندەپ ٴتۇسىپ، اقىرىنداپ جۇگىرە باستادى. ول ٴوز ٴۇنحاتىنا بىلاي دەپ جازىپ قويدى: تاعدىر وزىنە باس يگەن ادامدى كوزگە ىلمەيدى.

”ەڭ العاشقى ٴبىر ايدان اسا ۋاقىتتا از جەرگە عانا جۇگىرسەم بولدى قاتتى ەنتىگىپ كەتەتىنمىن. دەنساۋلىعىمنىڭ بىرتىندەپ قالپىنا كەلۋىنە ىلەسە، ىشكى دۇنيەم دە اناعۇرلىم بەكەمدەلە ٴتۇستى، مەنى جەڭە المايتىندار، ٴسوزجوق، مەنى نەعۇرلىم قۇدىرەتتەندىرە تۇسەدى“. 5 - ايدىڭ 1 - كۇنىنەن باستاپ، باعدار قالپىنا كەلۋ جاتتىعۋىن باستادى، جاعدايى كۇننەن - كۇنگە جاقسارا ٴتۇستى، دەنە سالماعى دا اۋەلگى 65 كيلوگرامنان 59 كيلوگرامعا ٴتۇسىپ، بارعان سايىن تەز جۇگىرە الاتىن بولدى، ”مەنىڭ نىسانام − جىل سوڭىنداعى بىرنەشە رەتكى مەملەكەتتىك جارىستا تاعى دا اناعۇرلىم جاقسى ناتيجەگە قول جەتكىزۋ. بۇدان بۇرىنعى جارىستارىمنىڭ بارلىعى ماشىق ەسەبىندە بولسىن“.

”جاقىنعى جىلداردان بەرى ٴبىزدىڭ شينجياڭدا ٴبىر توپ تاڭداۋلى مارافون سپورتشىلارى جارىققا شىقتى، مەملەكەت دارەجەلى ساڭلاق ولشەمىنە جەتكەن سپورتشىلار 10 عا تايادى، بۇل وڭاي - وسپاق قولعا كەلەتىن ناتيجە ەمەس. الايدا، تاياۋ جىلداردان بەرى ەل ىشىندەگى مارافون  جارىسىنىڭ جالپى تۇلعالىق ورەسى تەز قارقىنمەن جوعارىلادى، ٴبىز ٴالى دە قۋىپ جەتۋشىلەردىڭ رولىندا تۇرمىز. ٴبىز قازىر ەل ىشىندەگى تاڭداۋلى جاتتىقتىرۋشىلارمەن سەلبەسىپ، ٴتىپتى دە كوپ جاقسى جەتكىنشەكتەردى جەتىلدىرۋدى بەلسەنە قاراستىرىپ جاتىرمىز“ دەدى اۆتونوميالى رايوندىق دەنەتاربيە مەكەمەسى دەنەتاربيەگە جاتتىقتىرۋ 1 ـ ۇلكەن اترەتىنىڭ ورىنباسار باستىعى شياۋ يۋەگۇي تىلشىگە.

سۋرەتتە: باعدار جارىس ۇستىندە.

ٴۇرىمجى قالالىق مارافون قوعامى سۋرەتپەن قامدادى