6 - ايدىڭ 15 - كۇنى الاۋ جيناۋشىلار الاۋ تاياقشاسىن تۇتاندىردى.

□ سۋرەتتى شينحۋا اگەنتتىگىنىڭ ءتىلشىسى حۋاڭ زۇڭجى تۇسىرگەن

شينحۋا اگەنتتىگىنىڭ 6 - ايدىڭ 15 - كۇنى حاڭجوۋدان بەرگەن حابارى (تىلشىلەر شيا لياڭ، حۋ جيالي). 6 - ايدىڭ 15 - كۇنى تۇستەن بۇرىن حاڭجوۋ 19 - كەزەكتى ازيا سپورت جارىسىنىڭ الاۋ شوعى حاڭجوۋ لياڭجۋ بايىرعى قالاسى ەسكى جۇرتى باقشاسىنداعى داموجياۋ تاۋىندا ءساتتى جينالدى.

تۇستەن بۇرىن ساعات 8 دەن 50 مينۋت وتكەندە لياڭجۋ مادەنيەتىن ەلەمەنت ەتكەن ادەبيەت - كوركەمونەر ءنومىرى كورىنىستىك ءبيى «لياڭجۋ شۇعىلاسى» باستالدى. تامىلجىعان سىرلى اۋەنگە ىلەسە، بايىرعى ۇلگىدەگى كيىم كيگەن ونەر كورسەتۋشىلەر داموجياۋ تاۋىنىڭ جوتاسىنا جينالىپ، بيگە باستى. داموجياۋ تاۋى بەس مىڭ جىلدىڭ الدىنداعى لياڭجۋ بايىرعى قالاسىنىڭ وزەكتى رايونى. ءبي كوركەمونەر ۇلگىسىمەن جاڭا تاس قۇرالدار داۋىرىندەگى لياڭجۋ ارعى زامان ادامدارىنىڭ كۇرىش ەگۋ، ءۇي سالۋ، سۋ قۇرىلىسىن سالۋ سياقتى كورىنىستەرىن قايتا ەلەستەتتى.

تۇستەن بۇرىن ساعات 9دان 17 مينۋت وتكەندە جىجياڭ ولكەسىنىڭ ولكە باستىعى، حاڭجوۋ ازيا سپورت جارىسى ۇيىمداستىرۋ القاسىنىڭ ءتوراعاسى ۋاڭ حاۋ حاڭجوۋ ازيا سپورت جارىسىنىڭ الاۋ شوعىن جيناۋ باستالعانىن جاريالادى.

جاز باسىنداعى لياڭجۋ بايىرعى قالاسىنىڭ ەسكى جۇرتى، سۋلارى سىلدىراپ اعىپ، بۇلاعى مولدىرەپ، ۇلى تابيعاتتىڭ سيمفونياداي جاعىمدى ءۇنى ىشىندە اق ءتۇستى كيىم كيگەن 19 الاۋ شوعىن جيناۋشى باياۋ قاداممەن باسپالداققا شىقتى. ”19“ سيفرى 19 - كەزەكتى ازيا سپورت جارىسى دەگەندى بىلدىرەدى. الاۋ جيناۋشىلار قولدارىنا الاۋ تاياقشاسىن الىپ، الاۋ قوندىرعىسىنا قاراي بەتتەدى. قوندىرعىنىڭ ورتاسىنا ويىس اينا ورناتىلعان، سىرتقى شەڭبەرىنە لياڭجۋ قاس تاسى ۇلگىسىن پايدالانعان. الاۋ شوعىن جيناۋشىلار الاۋ تاياقشاسىن الاۋ قوندىرعىسىنا قاراي سوزىپ، الاۋ تاياقشاسىن ءساتتى تۇتاندىردى.

جۇڭگو كوممۋنيستىك پارتياسى جىجياڭ ولكەلىك كوميتەتىنىڭ شۋجيى ي ليانحۇڭ الاۋ شوعىن وتكىزىپ الدى ءارى كوپشىلىككە كورسەتتى، سونان سوڭ الاۋ قورابىن تۇتاتتى. الاۋ قورابىنىڭ تۇتانۋىنا ىلەسە، حاڭجوۋ ازيا سپورت جارىسى ”سيفرلى الاۋگەرلەرىنىڭ“ جەلىدە جەتكىزۋ قيمىلى ”ازيا سپورت جارىسى ءبىر بەكەتتىك تۇتاستىرۋ“ تۇعىرىندا ءبىر ۋاقىتتا باستالدى. ىلە - شالا الاۋ قورعاۋشىلار الاۋ شوعىن شىراعدانعا ەنگىزىپ، شىراعداندى قورعاپ الىپ كەتتى، سونىمەن الاۋ جيناۋ سالتى تابىسپەن اياقتالدى.

ۇعىسۋعا قاراعاندا، ازيا سپورت جارىسىنىڭ الاۋ شوعىن جيناۋ سالتى اياقتاعاننان كەيىن، 9 - ايدىڭ ورتا شەنىندە حاڭجوۋداعى شيحۋ كولىندە 19 - كەزەكتى ازيا سپورت جارىسىنىڭ الاۋىن تۇتاندىرۋ جانە الاۋ جەتكىزۋدى باستاۋ سالتى وتكىزىلەدى ەكەن. وسىدان كەيىن الاۋ جىجياڭداعى 11 قالاعا جەتكىزىلەدى. سونىمەن بىرگە ”سيفرلى الاۋگەرلەر“ دە ”ازيا سپورت جارىسى ءبىر بەكەتتىك تۇتاستىرۋ“ تۇعىرى ارقىلى الاۋدى جۇڭگونىڭ ءارقايسى قالاسىنا جانە ازياداعى ەلدەرگە، رايوندارعا جەلىدە جەتكىزەدى.