ەركىن تۇنياز باستالعاندىعىن جاريالادى

انار بۇلت \ شينجياڭ گازەتىنىڭ ءتىلشىسى جاڭ يۇنمەي 8 - ايدىڭ 8 - كۇنى كورلادان حابارلايدى. اۆتونوميالى رايوندىق 14 - كەزەكتى سپورت جارىسىنىڭ باستالۋ سالتى 8 - ايدىڭ 8 - كۇنى كەشتە بايىنعولين موڭعۇل اۆتونوميالى وبلىسى كورلا قالاسى بايىن دەنە تاربيە الاڭىندا وتكىزىلدى. اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز وسى كەزەكتى سپورت جارىسىنىڭ باستالعاندىعىن جاريالادى. مەملەكەتتىك دەنە تاربيە باس مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى ليۋ گويۇڭ قۇتتىقتاۋ ءسوزىن سويلەدى.

ءتۇن شىمىلدىعى جامىلعان بايىن دەنە تاربيە الاڭى شىراقتار سامالاداي جارقىراپ، كوركى كوز ءسۇرىندىرىپ، ادامدار قايشالىسىپ، جۇرت كوڭىلى تاسقىنداپ، شاتتىق لەبى مەن اسقاق ومىرشەڭدىككە تولدى. باستالۋ سالتى باستالعان كەزدە جۇڭحۋا حالىق رەسپۋبليكاسىنىڭ مەملەكەت تۋى مەن اۆتونوميالى رايوندىق 14 - كەزەكتى سپورت جارىسىنىڭ جارىس تۋىن بەتكە الىپ، 17 شارشى توپ رەتىمەن الاڭعا كىردى. وسىدان كەيىن بارلىق ادام ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن ورىندادى، سونداي - اق مەملەكەت تۋى شىعارىلدى.

اۆتونوميالى رايوننىڭ ورىنباسار ءتوراعاسى سۇن حۇڭمەي ارناۋ سوزىندە بىلاي دەپ اتاپ كورسەتتى: وسى كەزەكتى سپورت جارىسىنىڭ ءساتتى وتكىزىلۋى جوعارى دەڭگەيلى سپورتشىلاردىڭ توپ جارىپ العا شىعۋىنا تۇعىر ازىرلەپ، رايونىمىزدىڭ باسەكەلىك سپورتىنىڭ جالپىلىق قۋاتىن جوعارىلاتۋعا دەم بەرىپ، جالپى حالىقتىق دەنە شىنىقتىرۋ مەن جالپى حالىقتىڭ سالاماتتىعىن ىشكەرىلەي توعىستىرۋدى بەلسەنە جەبەپ، جالپى حالىقتىق دەنە شىنىقتىرۋدىڭ اناعۇرلىم كەمەلدى الەۋمەتتىك قىزمەت وتەۋ جۇيەسىن قالىپتاستىرۋدى جەدەلدەتىپ، دەنە تاربيە ىستەرىندە جاڭا جاعداي اشۋدى جانە تىڭ ساتىعا كوتەرىلۋدى پارمەندى ىلگەرىلەتەدى.

ليۋ گويۇڭ قۇتتىقتاۋ سوزىندە بىلاي دەدى: سوڭعى جىلدارى اۆتونوميالى رايوندىق پارتكومنىڭ، ۇكىمەتتىڭ پارمەندى باسشىلىعىندا، شينجياڭنىڭ دەنە تاربيە ىستەرى جەدەل دامىپ، دەنە تاربيە بىرتىندەپ شينجياڭنىڭ وسى زامانعى وركەنيەتتى تۇرمىسىنىڭ ماڭىزدى قۇرامداس بولىگىنە اينالىپ، شينجياڭدى مادەنيەتپەن نارلەندىرۋدى ىشكەرىلەي ورىستەتۋدە بارعان سايىن ماڭىزدى رول اتقارۋدا. مەملەكەتتىك دەنە تاربيە باس مەكەمەسى شينجياڭنىڭ دەنە تاربيە ىستەرىنىڭ جوعارى ساپالى دامۋىن ءباز - باياعىسىنداي قولداپ، دەنە تاربيە ارقىلى شينجياڭعا كومەكتەسۋ قىزمەتىنىڭ سەرپىنىن ۇزدىكسىز ارتتىرىپ، دەنە تاربيەنىڭ شينجياڭنىڭ قوعام ورنىقتىلىعىن، ۇلتتار ىنتىماعىن جانە ەكونوميكانىڭ جوعارى ساپالى دامۋىن جەبەۋ بارىسىندا اناعۇرلىم زور رول اتقارۋىنا مۇمكىندىك جاسايدى.

ساعات 22دەن 30 مينۋت وتكەندە ەركىن تۇنياز: شينجياڭ ۇيعۇر اۆتونوميالى رايوندىق 14 - كەزەكتى سپورت جارىسى باستالدى! - دەپ جاريالادى. سول ساتتە بۇكىل الاڭ شاتتىققا شومىپ، شاپالاق ءۇنى، الاقايلاعان ءۇن كوپكە دەيىن تولاستامادى.

پارتيا 18 - قۇرىلتايىنان بەرى رايونىمىز دەنە تاربيە ىستەرىن دامىتۋدى شينجياڭدى مادەنيەتپەن نارلەندىرۋدى ىشكەرىلەي ورىستەتۋدىڭ ماڭىزدى شاراسى ەتۋگە تاباندى بولىپ، دەنە تاربيەدە قۋاتتى رايون قۇرۋ نىساناسىن كوزدەپ، بۇقارالىق دەنە تاربيەنىڭ، باسەكەلىك دەنە تاربيەنىڭ، دەنە تاربيە كاسىبى سالاسىنىڭ سايكەستى توعىسا دامۋىن جاپپاي ىلگەرىلەتتى، بۇكىل رايونىمىزداعى ءار ۇلت بۇقاراسىنىڭ دەنە تاربيەنى قىزۋ سۇيەتىن، دەنە تاربيەگە ات سالىساتىن رايى بۇرىن بولماعان دارەجەدە قويۋلاپ، سپورت ىنتاسى بۇرىن بولماعان دارەجەدە جوعارىلاپ، شينجياڭنىڭ دەنە تاربيە ىستەرى دامۋدىڭ جاڭا مەزگىلىنە ءوتتى. اۆتونوميالى رايوندىق دەنە تاربيە جارىسى بۇكىل شينجياڭداعى ەڭ جوعارى دەڭگەيدەگى امبەباپ جارىس رەتىندە، بۇقارالىق دەنە تاربيە مەن باسەكەلىك دەنە تاربيەنىڭ جاپپاي دامۋىن جەبەۋ، دەنە تاربيەدە قۋاتتى رايون قۇرىلىسىن جانە سالاماتتى شينجياڭ قۇرىلىسىن ىلگەرىلەتۋ، رايونىمىزدىڭ دەنە تاربيە زاپاس دارىندىلارىن تاڭداپ باۋلۋ، جالپى حالىقتىڭ دەنە ساپاسى مەن دەنساۋلىق دەڭگەيىن جوعارىلاتۋ بۇكىل رايونىمىزدىڭ ەكونوميكاسىنىڭ، قوعامىنىڭ جاپپاي دامۋىن ىلگەرىلەتۋ جونىنەن ماڭىزدى ءمان الادى.

وسى كەزەكتى سپورت جارىسىنا قاتىناساتىن كوماندالار 14 ايماق، وبلىس، قالادان كەلگەن، سونداي - اق شىحىزى قالاسى شينجياڭ ءوندىرىس - قۇرىلىس بيڭتۋانى اتىنان جارىسقا قاتىناسۋعا ەرەكشە ۇسىنىس ەتىلدى. سپورت جارىسىندا باسەكەلىك دەنە تاربيە جارىسى مەن بۇقارالىق دەنە تاربيە جارىسى قيمىلى ورنالاستىرىلىپ، گرۋپپالاردىڭ ۇيىمداستىرىلۋى ەڭ كەمەلدى، تۇرلەردىڭ ورنالاستىرىلۋى ەڭ تولىق ، قاتىناسقان ادام سانى ەڭ كوپ بولعان ءبىر كەزەكتى سپورت جارىسى بولدى. مۇنىڭ ىشىندە باسەكەلىك دەنە تاربيە جارىسى بويىنشا 20 ۇلكەن ءتۇر، 687 كىشى ءتۇر ورنالاستىرىلدى، بۇقارالىق دەنە تاربيە جارىس قيمىلى بويىنشا 38 ۇلكەن ءتۇر، 195 كىشى ءتۇر ورنالاستىرىلدى ءارى سۋدا ءجۇزۋ، مارافون، تاس جولدا ۆەلوسيپەد ءمىنۋ سىندى 3 ءتۇرلى جارىس وتكىزىلەدى.

ەلزات احمەتجان باستالۋ سالتىنا قاتىناستى.