شينحۋا اگەنتتىگىنىڭ 8 - ايدىڭ 8 - كۇنى چىڭدۋدان بەرگەن حابارى. 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ اياقتالۋ سالتى 8 - ايدىڭ 8 - كۇنى كەشتە سىچۋان ولكەسىنىڭ چىڭدۋ قالاسىندا سالتاناتپەن ءوتتى. مەملەكەت كەڭەستىڭ مۇشەسى شىن يچين اياقتالۋ سالتىنا قاتىناستى.

”چىڭدۋ ارماندى ورىندادى“. وتكەن 12 كۇننىڭ ىشىندە 113 مەملەكەت پەن رايوننان كەلگەن 6500 سپورتشىلار جاستىقتىڭ جالىندى كۇشىن ايگىلەپ، جاستىقتىڭ نۇر - شۇعىلاسىن قاۋلاتىپ، تاسقىنداعان ىنتا جانە ۇزدىك كۇيمەن جاستىقتىڭ، ىنتىماقتىڭ، دوستىقتىڭ جاڭا تاراۋىن جازدى. جۇڭگو قاراپايىم، حاۋىپسىز، تارتىمدى بولۋ سىندى جارىس وتكىزۋ ۇستانىمىنان جازباي، ايبىندى سەرتىن مۇقيات ورىنداپ، جوعارى مەكتەپ وقۋشىلارى دەنە تاربيە بىرلەسىتىگى ۇلى شاڭىراعىنىڭ جانە حالىقارالىق قوعامنىڭ جاپپاي جاقسى باعاسىن الدى. جۇڭگو دەنە تاربيە ۋاكىلدەر ۇيىرمەسى 103 التىن مەدال، 178 مەدالمەن التىن مەدال تاقتاسى مەن مەدال تاقتاسىندا بىردەي ءبىرىنشى ورىندى يەلەدى.

ءتۇن پەردەسىن جامىلعان چىڭدۋ لۋتيان مۋزيكالى باقشاسىندا ءتۇرلى ءتۇستى شام - شىراقتار جايناپ، جاستىقتىڭ جالىندى كۇشى جالىنداپ، قوشتاسۋعا قيماعان دوستىق سەزىمى تاسقىندادى.

«ارمان · بولاشاقتى نۇرلاندىرادى» اتتى مۋزيكا اۋەنىندە مەملەكەتتىك كەڭەستىڭ مۇشەسى شىن يچين حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ ۋاقىتشا ءتوراعاسى ەدەر قاتارلىلارمەن بىرگە ءتوراعالار مىنبەسىنە شىقتى. بۇكىل الاڭنان دۋ قول شاپالاق ءۇنى كوتەرىلدى.

وت - شاشۋى كوكتە كەرى شەگەرىپ ساناۋ سيفرلارىن كەسكىندەگەندە، بۇكىل الاڭداعى كورەرمەندەر سيفرعا ىلەسىپ الاقايلادى، ”كۇن سامۇرىعى“ اياقتالۋ سالتى الاڭىنا ۇشىپ كىردى. چىڭدۋ جوعارى مەكتەپ وقۋشىلارى جازعى سپورت جارىسىنىڭ اياقتالۋ سالتى رەسمي باستالدى.

اسەم مۋزيكانىڭ سۇيەمەلىمەن جاپىراعى جايقالعان الىپ ”داۆيديا اعاشى“ ساحنادا بوي كوتەرىپ، ونىڭ ىشىندە بەيبىتشىلىكتىڭ سيمۆولى بولعان ”كەپتەر گۇلدەر“ جايقالا اشىلدى. جارىسقا قاتىناسقان ۋاكىلدەر ۇيىرمەلەرىنىڭ تۋى مەن بەلگى تاقتاسى الاڭعا كىرىپ، ساحنانى مىڭ بوياۋلى تۇسكە ەنگىزدى.

بارلىق ادام ورىندارىنان تۇردى. ايبىندى جۇڭحۋا حالىق رەسپۋبليكاسىنىڭ مەملەكەت ءانى اۋەنىمەن بەس جۇلدىزدى قىزىل تۋ باياۋ كوتەرىلدى.

چىڭدۋ جوعارى مەكتەپ وقۋشىلارى جازعى سپورت جارىسى ۇيىمداستىرۋ القاسىنىڭ اتقارۋشى ءتوراعاسى حۋاڭ چياڭ ارناۋ سوزىندە جوعارى مەكتەپ وقۋشىلارى جازعى سپورت جارىسىنىڭ تابىسپەن اياقتالۋىنا ۇلەس قوسقان بارلىق قىزمەتكەرلەرگە العىس ايتتى.

حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ ۋاقىتشا ءتوراعاسى ەدەر ارناۋ سوزىندە چىڭدۋ جوعارى مەكتەپ وقۋشىلارى جازعى سپورت جارىسىنىڭ ۇيىمداستىرۋ قىزمەتىن جوعارى باعالادى. ول بىلاي دەدى: دۇنيە ءجۇزى جوعارى مەكتەپ وقۋشىلارى جازعى سپورت جارىسىنا قاتىناسۋداعى ماقسات سپورت جارىسىنىڭ ناتيجەسى عانا ەمەس، قايتا ءتول كەشىرمەگە، ءومىر بويى جالعاساتىن دوستىققا قول جەتكىزۋ. ەڭ سوڭىندا ەدەر چىڭدۋ 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ اياقتالعاندىعىن جاريالادى.

«ارمان · بولاشاقتى نۇرلاندىرادى» اتتى ادەبيەت - كوركەمونەر كونسەرتى قويىلدى. كونسەرت «ارمان · تىكە تاراتۋ» اتتى بەتاشاردان، سونداي - اق «ارمان · ومىرگە ءتان»، «ارمان · جاستىققا ءتان»، «ارمان · بولاشاققا ءتان» سىندى 3 تاراۋدان قۇرالعان. «ارمان · تىكە تاراتۋ»دا تىكە تاراتۋدىڭ ءبىرىنشى تۇرعىسى ارقىلى كورەرمەندەردى چىڭدۋدىڭ اسەم كورىنىستەرىنەن ءلاززات الۋعا باستاپ، جوعارى مەكتەپ وقۋشىلارى سپورت جارىسىنىڭ كەلبەتى ايگىلەندى؛ «ارمان · ومىرگە ءتان»دە جارىس الاڭىنداعى سپورت ساڭلاقتارىنىڭ تەر توگىپ ايانباي ايقاسۋ ارقىلى جاستىق جالىنىن ايگىلەگەندىگى كورسەتىلدى؛ «ارمان · جاستىققا ءتان»دە ەرىكتىلەردىڭ جالپى بارىستىق ەرىكتى قىزمەت وتەۋ ارقىلى جاستىقتىڭ ءمانىن ارتتىرعاندىعى كورسەتىلدى؛ «ارمان · بولاشاققا ءتان»دە جاڭا داۋىردەگى جاستاردىڭ بولاشاقپەن اراداعى جاستىق ۋادەسى باياندالىپ، اشىق، سيىسىمدى، تاعدىرى ءبىر كورىكتى دۇنيە قۇرۋ تىلەگى بەينەلەندى.

حالىقارالىق جوعارى مەكتەپ وقۋشىلارى دەنە تاربيە بىرلەستىگى ءانىنىڭ سۇيەمەلىمەن حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ تۋى باياۋ ءتۇسىرىلدى.

حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ تۋىن تاپسىرىپ الۋ سالتى باستالدى. چىڭدۋ قالاسىنىڭ باستىعى ۋاڭ فىڭچاۋ تۋ ۇستاۋشى سىچۋاندىق وليمپيادا اعا جۇلدەگەرى گاۋ مين مەن چىڭدۋ دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ تۇڭعىش التىن مەدال يەگەرى ساۋ ماۋيۋاننىڭ قولىنان تۋدى تاپسىرىپ الىپ، بۇكىل الاڭداعى كورەرمەندەرگە قاراي بۇلعادى، ونان سوڭ حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ ۋاقىتشا ءتوراعاسى ەدەرگە جانە حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ باس حاتشىسى سىن چاۋعا تاپسىردى. ەدەر مەن سىن چاۋ بىرلەستىكتىڭ تۋىن كەلەسى كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىن وتكىزەتىن جەردىڭ ۋاكىلى گەرمانيا فەدەراتسياسىنىڭ ىشكى ىستەر جانە مەملەكەت تەرريتورياسى مينيسترلىگى پارلامەنت مەملەكەتتىك ىستەر حاتشىسى وزدەمىر مەن حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ باس اتقارۋشى مۇشەسى بوكقا وتكىزىپ بەردى.

گەرمانيا فەدەراتسياسىنىڭ ىشكى ىستەر جانە مەملەكەت تەرريتورياسى مينيسترلىگى پارلامەنت مەملەكەتتىك ىستەر حاتشىسى وزدەمىر ارناۋ سوزىندە چىڭدۋ دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ تابىسقا جەتكەندىگىن قۇتتىقتاپ، بۇكىل دۇنيە ءجۇزىن كەلەسى كەزەكتەگى جوعارى مەكتەپ وقۋشىلارى جازعى سپورت جارىسىنا قاتىناسۋعا ىستىق ىقىلاسپەن شاقىردى.

ىلە - شالا رەين - رۋحر دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ ۇيىمداستىرۋ القاسى كورەرمەندەرگە 5 مينۋتتىق تارتىمدى كونسەرت ۇسىنىپ، گەرمانيا جاستارىنىڭ كەلبەتى مەن جەرگىلىكتى مادەنيەتتىڭ ەرەكشەلىگىن جاندى ايگىلەدى.

ساعات 21دەن 06 مينۋت وتكەندە، وزگەشە الاۋدى ءسوندىرۋ سالتى باستالدى. ساحنانىڭ ورتاسىنداعى ەكراندا دۇڭانحۋ كولىنىڭ جاعاسىندا كوككە بوي سوزىپ تۇرعان جوعارى مەكتەپ وقۋشىلارى جازعى سپورت جارىسىنىڭ نەگىزگى الاۋ مۇناراسى كورسەتىلدى، الاۋ باياۋ ءسوندىرىلىپ، جارقىراعان ۇشقىنعا اينالدى. كوككە ورلەپ ۇشقان ”كۇن سامۇرىعى“ الاۋ ۇرىعىن الىپ ءبىر جاسقا جەتكىزىپ بەرىپ، شىر اينالعان سوڭ الىسقا ۇشا جونەلدى.

مامىرلاعان مۋزيكا ءۇنى كوتەرىلىپ، شىعىستىڭ سىچۋان اعىمىنداعى گۋچين مەن باتىستىڭ سكريپكاسى «اسقار تاۋ، اعىن سۋدى» جانە «ماڭگىلىك دوستىقتى» بىرگە ورىندادى. ەكراندا چىڭدۋ دۇنيە ءجۇزى جوعارى مەكتەپ وقۋشىلارى جازعى سپورت جارىسىنداعى ۇمىتىلماس ساتتەرى جارىققا شىعىپ، چىڭدۋ مەن دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ قۇندى ەستەلىكتەرى قايتا كورسەتىلىپ، جۇڭگو مەن دۇنيە ءجۇزىنىڭ تەرەڭ سۇيىسپەنشىلىگى كوكەيدە قالدى.

حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ اتقارۋشى مۇشەلەرى دە اياقتالۋ سالتىنا قاتىناستى.