ىلەنىڭ تۇڭعىش كەزەكتى مارافون جارىسى ٴساتتى وتكىزىلدى
7391 ادام قاتىناسىپ، جارىسقا قاتىناسقان ادام سانى جاعىنان رەكورد جاراتتى
ماقالاسىن جازىپ، سۋرەتىن تۇسىرگەن تىلشىلەرىمىز ليۋ چۇنشيڭ، لي شين - ان
10 - ايدىڭ 29 - كۇنى ساعات 10 دا ”قۇلجاعا ماحاببات“ اتىنداعى 2023 - جىلعى ىلە وزەنى مارافون جارىسى قۇلجا قالاسىنىڭ چيساي الاڭىندا باستالدى. 7391 جەلاياق ٴبىر ارادا باس قوسىپ، قازاننىڭ التىن كۇزىندە سالتاناتتى مارافون جارىسىن وتكىزدى.
بۇل رەتكى جارىستى جۇڭگو جەڭىل اتلەتيكا قوعامى تەحنيكالىق جاقتان كۋالاندىرىپ، شينجياڭ مارافون جارىسى قوعامى جەتەكشىلىك ەتىپ، قۇلجا قالالىق حالىق ۇكىمەتى، ىلە وبلىستىق دەنە تاربيە مەكەمەسى ۇيىمداستىرىپ، قۇلجا قالالىق مادەنيەت، دەنە تاربيە، راديو - ساياحات مەكەمەسى مىندەتىنە الىپ وتكىزدى، نانجيڭ شانپاۋ دەنە تاربيە عىلىم - تەحنيكا شەكتى سەرىكتەستىگى جۇمىس جۇرگىزدى.
ۇعىسۋعا قاراعاندا، بۇل − ىلە وبلىسىنىڭ تۇڭعىش كەزەكتى تۇتاس بارىستىق مارافون جارىسى، سونداي - اق 3 جىلدان استام ۋاقىتتان بەرى ىلە وبلىسىندا وتكىزىلگەن قاتىناسقان ادام سانى ەڭ كوپ، ەڭ كولەمدى، كورىنەۋ تۇيىندەرى ەڭ كوپ ٴىرى جارىس بولعان، قۇلجا قالاسىنىڭ بيىل وتكىزگەن 2 - رەتكى مارافون جارىسى ٴارى تۇڭعىش رەت تۇتاس بارىستىق مارافون دارەجەسىنە كوتەرىلگەن.
جارىس دارەجەسىن جوعارىلاتىپ، قۇلجانىڭ كۇزگى كوركەم كورىنىسىنە كۋا بولدى
ىلە وبلىسى جۇڭگو جەڭىل اتلەتيكا قوعامى كۋالاندىرعان A دارەجەلى مارافون جارىسى رەتىندە، 2023 - جىلعى ىلە وزەنى مارافون جارىسىن وتكىزۋدى جاريالاعاننان باستاپ، دايىندىق جۇمىستارى جۇرت نازارىن اۋداردى.
وسى رەتكى تۇتاس بارىستىق مارافون جارىس جولىنىڭ جوبالانۋى وزگەشە بولىپ، قۇلجانىڭ كوركەمدىگىن تولىق ايگىلەدى. لەنيانىڭ باستالۋ ٴتۇيىنى چيساي الاڭى، جول - جونەكەي تاس الما جولى، باتىس اينالما جولى، ازاتتىق باتىس جولى، يىنبين جولى، ىلە وزەنى جولى سياقتى قالانىڭ نەگىزگى جولدارىن باسىپ ٴوتىپ، قۇلجا بايىرعى قالاسى قازانشى ۇلتتىق سالت - سانا ساياحات رايونى، التىشۋار كوشەسى كورىنىس رايونى، ىلە وزەنى كورىنىس رايونى سياقتى ساياحات كورىنىس رايوندارى مەن شينماۋيە حالىقارالىق زات ساتىپ الۋ ورتالىعى، حۋاچىڭ جولى قيىلىسى، كوك كوپىر، حالىق الاڭى سياقتى قالانىڭ جەر بەلگىلەرىن تۇتاستىردى.
وسى مەزگىلدە كوپتەگەن قالا تۇرعىنى جارىس جولىنىڭ ەكى جاعالاۋىنا جينالىپ، شاباندوزدارعا دەم بەردى، جارىس دۋمانعا بولەندى، شاباندوزدار كورەرمەندەرگە قول بۇلعاپ، ٴوزارا ىقپالداسىپ، «جىبەك جولىنداعى ورتالىق قالا، مىڭ بوياۋلى قۇلجا» سىندى قالا وبرازىن تولىق ايگىلەدى.
شەبەرلەر سايىسقا ٴتۇستى
ىلەلىك جىگىتتەر تۇتاس بارىستىق مارافون جارىسىنىڭ التىن، كۇمىس، قولا مەدالدارىن ەنشىلەدى
وسى رەتكى جارىستا تۇتاس بارىستىق مارافون (42.195 كيلومەتر)، جارتىلاي ارالىقتى مارافون (21.0975 كيلومەتر)، سالاماتتىق جۇگىرۋ (4.8 كيلومەتر) سىندى 3 گرۋپپا قۇرىلىپ، بۇكىل ەلدىڭ جەر - جەرىنەن جانە شەتەلدەن (ەفيوپيا، كەنيانىڭ ٴارقايسىسىنان 3 ادام) 7391 جەلاياق جارىسقا قاتىناستى. مۇنىڭ ىشىندە تۇتاس بارىستىق مارافونعا 327 ادام، جارتىلاي ارالىقتى مارافونعا 974 ادام، سالاماتتىق جۇگىرۋ جارىسىنا 6090 ادام قاتىناستى.
قيان - كەسكى سايىس ارقىلى جارتىلاي ارالىقتى مارافوندا ەفيوپيادان كەلگەن شاباندوز BEDANIE CHALA NEGUSSIE ٴبىر ساعات 06 مينۋت 06 سەكۋندتىق ناتيجەمەن ەرلەر گرۋپپاسىنىڭ اعا جۇلدەگەرى بولدى، كەنيالىق شاباندوز WANJIRU JULIUS MAINA ٴبىر ساعات 07 مينۋت 58 سەكۋندتىق ناتيجەمەن جۇلدەگەر بولدى، ىلەلىك ازامات شالقار نۇرجۇما ۇلى ٴبىر ساعات 08 مينۋت 19 سەكۋندتىق ناتيجەمەن كىشى جۇلدەگەر بولدى؛ ەفيوپيادان كەلگەن شاباندوز D E M E S O L I Y A N A E S H E T U ٴبىر ساعات 17 مينۋت 33 سەكۋندتىق ناتيجەمەن ايەلدەر گرۋپپاسىنىڭ اعا جۇلدەگەرى بولدى، كورلالىق شاباندوزدار حى جيڭ، سۋنالار جەكە - جەكە ٴبىر ساعات 24 مينۋت 52 سەكۋندتىق، ٴبىر ساعات 28 مينۋت 25 سەكۋندتىق ناتيجەمەن جۇلدەگەر، كىشى جۇلدەگەر بولدى.
تۇتاس بارىستىق مارافوندا ىلە شاباندوزدارىنىڭ باسىمدىعى ايرىقشا كورنەكتى بولدى، ولار ارالارىندا افريكالىق شاباندوزدار بولعانىنا قاراماستان، اعا جۇلدەگەرلىكتى، جۇلدەگەرلىكتى جانە كىشى جۇلدەگەرلىكتى جەڭىپ الدى. ىلەلىك ازامات دوسبول قابىلجان ۇلى 2 ساعات 21 مينۋت 22 سەكۋندتىق ناتيجەمەن ەرلەر گرۋپپاسىنىڭ اعا جۇلدەگەرى، باعدار ورازالى ۇلى 2 ساعات 22 مينۋت 46 سەكۋندتىق ناتيجەمەن جۇلدەگەر، شاتتىق ورلەۋ ۇلى 2 ساعات 28 مينۋت 41 سەكۋندتىق ناتيجەمەن كىشى جۇلدەگەر بولدى؛ ەفيوپيادان كەلگەن شاباندوز F A T U M A U S E N T A Y R 2 ساعات 42 مينۋت 36 سەكۋندتىق ناتيجەمەن ايەلدەر گرۋپپاسىنىڭ اعا جۇلدەگەرى بولدى، ۇرىمجىلىك شاباندوز كان تيڭ 3 ساعات 14 مينۋت 14 سەكۋندتىق ناتيجەمەن جۇلدەگەر بولدى، سانجىلىق شاباندوز ۋاڭ شياڭ 3 ساعات 18 مينۋت 47 سەكۋندتىق ناتيجەمەن كىشى جۇلدەگەر بولدى.
ىلە وزەنى مارافون جارىسى باستالعان ٴسات
دوسبول قابىلجان ۇلى تۇتاس بارىستىق مارافون جارىسى ەرلەر گرۋپپاسىنىڭ اعا جۇلدەگەرى بولدى
ەفيوپيا شاباندوزى تۇتاس بارىستىق مارافون جارىسى ايەلدەر گرۋپپاسىنىڭ اعا جۇلدەگەرى بولدى
تاماشا ٴساتتى ەستەلىككە الۋ
ىلەلىك جىگىتتەر تۇتاس بارىستىق مارافون جارىسىنىڭ التىن، كۇمىس، قولا مەدالدارىن ەنشىلەدى
وزىندىك ەرەكشەلىككە يە مەدال
بىرگە جۇگىرىپ، جارىستىڭ قىزىعىنا شومۋ
مارافون جاس تالعامايدى
مارافون جارىسىندا
جىگەرلەنە جۇگىرۋ