تىلشىلەرىمىز ليۋ چۇنشيڭ، جاڭ چيڭحۋا تەكەستەن حابارلايدى. اۋىل - قىستاق سالتاناتى ساحارانى دۋمانعا بولەدى. 12 - ايدىڭ 23 - كۇنى تۇستەن بۇرىن «10 - كەزەكتى مەملەكەتتىك بۇقارالىق قار - مۇز ماۋسىمى. قاردا كوزتارتقان تيانشان» جانە ىلە قازاق اۆتونوميالى وبلىسىنىڭ تۇڭعىش كەزەكتى قارلى القاپتاعى كوكپار جارىسى تەكەس اۋدانى شيلوزەك قالاشىعى قامىستىبۇلاق قىستاعىنىڭ بايگە الاڭىندا باستالدى. ىلە وبلىستىق پارتكومنىڭ ورىنباسار شۋجيى، ۇگىت ٴبولىمىنىڭ باستىعى، وقۋ - اعارتۋ قىزمەت كوميتەتىنىڭ شۋجيى كۇلان سەيپىلقان قىزى قيمىلعا قاتىناستى ٴارى جارىستىڭ باستالعانىن جاريالادى.

وسى كەزەكتى جارىستى ىلە وبلىستىق دەنە تاربيە مەكەمەسى، تەكەس اۋداندىق حالىق ۇكىمەتى ۇيىمداستىرىپ، تەكەس اۋداندىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى، تەكەس اۋدانى شيلوزەك قالاشىق حالىق ۇكىمەتى جانە ىلە وبلىستىق دەنە تاربيە سارايى ۇستىنە العان. جارىس 12 -ايدىڭ 23 - كۇننەن 24 - كۇنىنە دەيىن  ەكى كۇنگە جالعاسىپ، بۇعان موڭعۇلكۇرە، كۇنەس، نىلقى، توعىزتاراۋ، تەكەس اۋداندارىنان جانە بيڭتۋان 4 - ديۆيزياسى كوكدالا قالاسىنان 6 كوماندا 66 ادام (كوكپارشى، تورەشى، جاتتىقتىرۋشىلاردى قامتيدى) جارىسقا قاتىناستى.

 اشىلۋ سالتىنداعى ويناقى مۋزيكامەن الاڭعا كىرگەن اتتى شەرۋدىڭ سالتاناتى، كوكپارشىلاردىڭ ايباتتى بەينەسى تاماشالاي كەلگەن كورەرمەندەرگە ساليقالى ٴلاززات سيلادى. قازاق مالشىلارىنىڭ كوشى - قون مادەنيەتىن، ٴداستۇرلى توي سالتى مادەنيەتىن، ىلە اسىل تۇقىمدى جىلقىسىن مەنمۇندالاتقان شارشى توپتىڭ تارتىمدى ويىندارىمەن اشىلۋ سالتى ٴتىپتى دە دۋمانعا بولەنىپ، قار - مۇز سپورتىنىڭ باۋراعىشتىعى مەن ومىرشەڭدىك كۇشىن ايگىلەدى.

 ىلە - شالا كورەرمەن تاقاتسىزدانا كۇتكەن كوكپار جارىسى دا باستالىپ، نىلقى اۋدانى كومانداسى مەن كۇنەس اۋدانى كومانداسى باق سىنادى. ەڭ سوڭىندا، ٴار بىرىنە تەك 20 مينۋتتان ۋاقىت بەرىلەتىن ەكى مايدان جارىستا تاقىمدارىن تالدىرعان قيان - كەسكى دودامەن نىلقى اۋدانى كومانداسى 0 گە قارسى 1 ۇپايمەن كۇنەس اۋدانى كومانداسىن جەڭدى. 

كۇنەس اۋدانى كومانداسىنىڭ كوكپارشىسى زاڭعار قاسىمبەك ۇلى بىلاي دەدى: ”بۇگىن ىلە وبلىسىنىڭ تۇڭعىش كەزەكتى كوكپار جارىسىنا قاتىناسىپ، جارىس بارىسىندا كوپتەگەن تاجىريبەلەرگە يە بولدىم، كەيىنگى جارىستاردا جاقسى ناتيجەلەرگە قول جەتكىزۋگە قۇلشىنامىن“.

 تۇستەن بۇرىن باستالعان كوكپار جارىسىنىڭ سوڭى ات بايگەسىنە ۇلاستى. 4 كيلومەترلىك، 8 كيلومەترلىك ەكى مايدان ات بايگەسىندە كورەرمەندەر قار ۇستىندە قۇيعىتقان جەلقابىز جۇيرىكتەردىڭ جۇرىسىنە ٴتانتى بولىپ، كوپتەگەن فوتو سۋرەت اۋەسكەرلەرى قاس - قاعىم ساتتەردى قالت جىبەرمەي اپپارات كوزىنە ٴتۇسىردى. ”ٴبىز قولىمىزداعى فوتو اپپارات ارقىلى وسى تاماشا ساتتەردى ەستەلىككە الىپ، كوركەم ىلەنى، كورىكتى تەكەستى، اسىرەسە، شيلوزەك قالاشىعى سىندى ’شينجياڭداعى كوكپار مەكەنىنىڭ‘ كوكپار تارتۋ قيمىلىنىڭ ۇزىلمەي جالعاساتىندىعىن ۇگىتتەمەكشىمىز“ دەدى فوتو سۋرەت اۋەسكەرى ليۋ يۇيپيڭ.

داياشى ورىن شيلوزەك قالاشىعى بيىل 5 - ايدا اۆتونوميالى رايوندىق جىلقى شارۋاشىلىعى قوعامى جاعىنان ”شينجياڭداعى كوكپار مەكەنى“ اتاعىن العان. بۇعان اتالعان قالاشىقتىڭ كەڭ - بايتاق ساحاراسى، وزگەشە جىلقى شارۋاشىلىعى بايلىعى، تامىرى تەرەڭدە جاتقان كوكپار تارتۋ مادەنيەتى، كوكپار تارتۋ قيمىلىنا ات سالىساتىن بۇقارا سانىنىڭ ىلە وبلىسى كولەمىندە ەڭ شوعىرلى ورنالاسۋداي ەرەكشەلىكتەرى سەبەپ بولعان. قازىر شيلوزەك قالاشىعىندا ۇلكەندى - كىشىلى 40 قا تارتا كوكپار تارتۋ كومانداسى بار، تەكەس اۋدانى كوكپار تارتۋ قوسىنىن كاسىپتىك جاقتان جەتىلدىرۋگە ٴمان بەرىپ، كوكپار سپورتىنىڭ جول - جوسىنى، تاكتيكاسى سياقتى جاقتاردان جۇيەلى تاربيەلەپ، وسى قالاشىقتىڭ كوكپار كومانداسىن شينجياڭنىڭ ٴىشى - سىرتىنداعى جارىستارعا قاتىناستىرىپ، كوكپار جارىسى ارقىلى تەكەس ساياحاتىن ۇگىتتەۋدىڭ ”مادەنيەت + دەنە تاربيە“، ”دەنە تاربيە + ساياحات“ ۇلگىسىن قالىپتاستىرۋىنا مۇمكىندىك جاراتىپ، تەكەس اۋدانى ساياحاتىنىڭ دامۋىنا وزىندىك جەبەۋ رولىن اتقارىپ كەلگەن.

 شيلوزەك قالاشىعى اقشي قىستاعىنىڭ تۇرعىنى جانار اسقاربەك ۇلى بىلاي دەدى: ”كوكپار جارىسى مەن ات بايگەسىن جاقىننان تاماشالادىم، وتە تارتىمدى، دۋماندى بولدى. بۇدان كەيىن وسىنداي قيمىلداردىڭ كوبىرەك وتكىزىلۋىن، ٴتىپتى دە كوپ بۇقارانىڭ قاتىناسۋىن ٴۇمىت ەتەمىن“.

 تەكەس اۋداندىق مادەنيەت - ساياحات مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى شاكەنالى ماناش ۇلى بىلاي دەدى: ”ٴبىز وسى ارادا ىلە وبلىسىنىڭ تۇڭعىش كەزەكتى قارلى القاپتاعى كوكپار جارىسىن وتكىزۋدەمىز، وسىنداي جارىس قيمىلى ارقىلى ’سۋىق بايلىقتى‘ ’ىستىق ەكونوميكاعا‘ اينالدىرىپ، تەكەس اۋدانىنىڭ قىسقى ساياحات كاسىبىنىڭ دامۋىن جەبەيمىز“. 

ەكى كۇنگە جالعاسقان جارىس 12 - ايدىڭ 24 - كۇنى تۇستەن كەيىن تەكەس اۋدانى شيلوزەك قالاشىعى قامىستىبۇلاق قىستاعىنىڭ بايگە الاڭىندا تابىسپەن اياقتادى. اعا جۇلدەگەرلىككە تالاسۋ جارىسىندا وتاعاسى ورىن تەكەس اۋدانىنىڭ كوكپار كومانداسى ايقىن باسىمدىلىق تانىتىپ، 1 گە قارسى 3 ۇپايمەن موڭعۇلكۇرە اۋدانى كوكپار كومانداسىن جەڭىپ، اعا جۇلدەگەر بولسا، موڭعۇلكۇرە اۋدانىنىڭ كوكپار كومانداسى جۇلدەگەر بولدى. بۇل ەكى كوماندانىڭ قۋاتى ەڭ كۇشتى بولعاندىقتان، جارىس قيان -كەسكى جالعاسىپ، جارىس تاماشالاعان كورەرمەن وتە كوپ بولدى. تەكەس اۋداندىق كوكپار كومانداسى 2022 - جىلى 9 - ايدا ىلە وبلىسى اتىنان اۆتونوميالى رايوندىق 10 - كەزەكتى از ۇلتتاردىڭ ٴداستۇرلى دەنە تاربيە جارىسىنا قاتىناسىپ، كوكپار جارىسىنىڭ اعا جۇلدەگەرلىگىن ەنشىلەسە، وسى جولعى جارىستا دا اعا جۇلدەگەر بولۋعا سەنىم بايلاعان بولاتىن.

شيلوزەك قالاشىعى پارتكومىنىڭ ورىنباسار شۋجيى، قالاشىق باستىعى سايدىراحىم ياسىنجان ۇلى تانىستىرىپ بىلاي دەدى: ”شينجياڭداعى كوكپار مەكەنى“ اتاعى بار اۋىلىمىزدا كوكپار دەسە ىشكەن اسىن جەرگە قوياتىنداردىڭ قاتارى مول، بۇقارا قۇمارتا كورىپ، قىزىعا تاماشالايتىن دەنە تاربيە قيمىلدارىنىڭ ٴبىرى سانالادى، بۇگىن مايدان شەتىندەگى ورىنداردا ينە شانشار جەر قالمادى، ٴتىپتى، ساحنانىڭ تۋ سىرتىنداعى تاۋ بەتكەيىنە شىعىپ جارىستى تاماشالاعاندار دا مول بولدى. بۇگىنگى جارىستى تاماشالاعانداردىڭ سانى 5000 ادامنان اسىپ، بەرىسى تەكەس اۋدانىنىڭ اۋىل - قالاشىق، فەرمالارىنان، ارىسى قۇلجا قالاسىنان كەلدى.

 سيلىق تاراتۋ سالتىندا نىلقى اۋدانىنان كەلگەن سامەن سەرقازى ۇلى، موڭعۇلكۇرە اۋدانىنان ەلەۋ ساعىنتاي ۇلى، توعىزتاراۋ اۋدانىنان اقيقات ىنتماق ۇلى، كوكدالا قالاسىنان جۇماكەلدى ىرىسكەلدى ۇلى، كۇنەس اۋدانىنان قايسار قاسىمبەك ۇلى، تەكەس اۋدانىنان ازاتبەك قۇرمانقان ۇلى ەڭ ۇزدىك كوكپار سپورتشىسى بولىپ باعالانسا؛ نۇرشات ساۋلەت ۇلى، قوجا امەتجان، نۇربەرگەن نۇراقىمان ۇلى، ەرعازى جۇماعازى ۇلى، جەڭىس وسپان ۇلى، سابىرجان زەينەلقان ۇلى، نۇربول زينابىل ۇلى، ما ليتاۋ ەڭ ۇزدىك تورەشى بولىپ باعالاندى؛ توعىزتاراۋ اۋدانى كومانداسى ٴۇشىنشى دارەجەلى سيلىقتى، كۇنەس اۋدانى، كوكدالا قالالىق كوكپار كومانداسى جەكە - جەكە ەڭ ۇزدىك ۇيىمداستىرۋ سيلىعىن، نىلقى اۋداندىق كوكپار كومانداسى ەڭ ۇزدىك سالت - سانا سيلىعىن الدى. ات بايگەسى مەن جورعا جارىسىنىڭ جۇلدەگەرلەرىن زاتتاي سيلاپ، شارۋلارعا شابىت بەردى.

 ”ەڭ ۇزدىك كوكپار سپورتشىسى“ اتاعىن العان تەكەس اۋداندىق كوكپار كومانداسىنىڭ باستىعى ازاتبەك قۇرمانقان ۇلى تىلشىگە بىلاي دەدى: ”بۇدان كەيىن ساپتاستارىممەن بىرگە ٴتىپتى دە كوپ كولەمدى كوكپار تارتۋ جارىستارىنا  قاتىناسىپ، اۋىلىما داڭق اپەرەمىن“.

 اشىلۋ سالتىنان كورىنىس      جاڭ چيڭحۋا فوتوسى 

 لاقتى دوپشا ويناتقان ازاماتتار      جاڭ چيڭحۋا فوتوسى 

سيلىق تاراتۋ سالتىنان كورىنىس        ليۋ چۇنشيڭ فوتوسى 

 قيان - كەسكى كوكپار تارتۋ جارىسى      جاڭ چيڭحۋا فوتوسى 

اعا جۇلدەگەر بولعان تەكەس اۋداندىق كوكپار كومانداسى      ليۋ چۇنشيڭ فوتوسى