2 - ايدىڭ 21 - كۇنى شينجياڭ قۇراماسىنىڭ ساڭلاعى دينار تالداۋبەك قىزى (الدىڭعى قاتاردا) جارىستا. سۋرەتتى شينحۋا اگەنتتىگىنىڭ ٴتىلشىسى ليۋ لەي تۇسىرگەن.

2 - ايدىڭ 21 - كۇنى شينجياڭ قۇراماسىنىڭ ساڭلاعى ەرنار ٴابدىلقان ۇلى كومبەدە ناتيجەسىن قۇتتىقتاۋدا. سۋرەتتى شينحۋا اگەنتتىگىنىڭ ٴتىلشىسى جاۋ زى - شۋو تۇسىرگەن.

ٴتىلشىمىز ليۋ چۇنشيڭ حابارلايدى. 2 - ايدىڭ 21 - كۇنى ىشكى موڭعۇل اۆتونوميالى رايونى ۇلانچاب قالاسى لياڭچىڭ جارىس رايونىندا ٴوتىپ جاتقان 14 - كەزەكتى مەملەكەتتىك قىسقى سپورت جارىسىنان قۋانىشتى حابار تارالدى، شينجياڭ كومانداسى اتىنان جارىسقا قاتىناسقان ىلەلىك ەكى ساڭلاق 2 قولا مەدال الدى، بۇل ىلە ساڭلاقتارىنىڭ مەملەكەتتىك قىسقى سپورت جارىسىنا قاتىناسۋدا قول جەتكىزگەن ەڭ جاقسى ناتيجەسى.

دالالىق شاڭعى كۇش جالعاپ سىرعاناۋ جارىسىنىڭ قاعيداسىندا ٴار كوماندادان 4 سپورتشى قاتىناسادى، الدىڭعى ەكى سپورتشى ٴداستۇرلى تەحنيكا بويىنشا سىرعانايدى دا، سوڭعى ەكەۋى ەركىن تەحنيكا بويىنشا سىرعانايدى. جارىس توپتىق اتتانۋ قاعيداسى بويىنشا جۇرگىزىلەدى، ول كۇش جالعاپ جۇگىرۋ جارىسى مەن توپتىق جىلدامدىق باسەكەسىنە ۇقسايدى، قۇرامانىڭ ورتاشا ناتيجەسىنە قاراي قاتارعا تۇرعىزىلادى. ساڭلاقتار ٴداستۇرلى تەحنيكا مەن ەركىن تەحنيكا جونىندەگى بەلگىلەمەلەرگە بويسۇنادى، مۇنىڭ ىشىندە ەركىن تەحنيكالىق سىرعاناۋ شەكتەمەگە ۇشىرامايدى.

سول كۇنى وتكىزىلگەن دالالىق شاڭعى جاريالى جارىس گرۋپپاسىنىڭ ايەلدەردىڭ 5 × 4 كيلومەترلىك كۇش جالعاۋ (2 ٴداستۇرلى تەحنيكا + 2 ەركىن تەحنيكا) جارىسىندا، دينار تالداۋبەك قىزى، بايان جالىن قىزى، كۇڭ ۋيجيا، دىلنيگار يىلھامجان شينجياڭ قۇراماسى اتىنان جارىسقا قاتىناستى، بۇل تورتەۋى ونەرلەرىن ويداعىداي ساۋلەلەندىرىپ، تۇگەلدەي ٴۇشىنشى بولدى.

مۇنىڭ ىشىندە، بيىل 24 جاستاعى دينار تالداۋبەك قىزى  موڭعۇلكۇرە اۋدانىنىڭ سارقوبى اۋىلىنان كەلگەن، جۇڭگونىڭ دالالىق شاڭعى سپورتشىسى رەتىندە، 2 - ايدىڭ 16 - كۇنى وسى كەزەكتى جارىسقا قاتىناسقان دالالىق شاڭعى جاريا گرۋپپاسىنىڭ ايەلدەر 10 كيلومەترلىك (ارالىق تاستاپ سىرعاناۋ ەركىن تەحنيكا) جارىسىندا، ول 14 ـ ورىندى يەلەدى؛ بىلتىر 12 ـ ايدىڭ 27 ـ كۇنى وتكىزىلگەن 2023 ـ جىلدان 2024 ـ جىلعا دەيىنگى جارىس ماۋسىمىنداعى مەملەكەتتىك دالالىق شاڭعى جۇلدەلى جارىسى مەن مەملەكەتتىك 14 ـ كەزەكتى قىسقى سپورت جارىسى دالالىق شاڭعى تولىمدىلىق جارىسىنىڭ 4 ٴتۇرلى كۇش جالعاپ جۇگىرۋ جارىسىندا، ول ساپتاستارىمەن بىرگە جاريا گرۋپپاداعى ايەلدەردىڭ 5 × 4 كيلومەترلىك كۇش جالعاۋ (2 ٴداستۇرلى تەحنيكا + 2 ەركىن تەحنيكا) نىسانىنىڭ اعا جۇلدەگەرى بولعان؛ 2022 ـ جىلدان 2023 ـ جىلعا دەيىنگى جارىس ماۋسىمىنداعى مەملەكەتتىك دالالىق شاڭعى جۇلدەلى جارىسىندا، ول ساپتاستارىمەن بىرگە ايەلدەردىڭ 5 × 4 كيلومەترلىك كۇش جالعاپ جۇگىرۋ جارىسىنىڭ كۇمىس مەدالىن يەلەگەن.

سول كۇنى وتكىزىلگەن دالالىق شاڭعى جاريالى جارىس گرۋپپاسىنىڭ ەرلەر 10 × 4 كيلومەترلىك كۇش جالعاۋ (2 ٴداستۇرلى تەحنيكا + 2 ەركىن تەحنيكا) جارىسىندا، باسەكە ايرىقشا قيانكەسكى بولدى. شينجياڭ قۇراماسىنىڭ ەڭ سوڭعى سپورتشىسى ەرنار ٴابدىلقان ۇلى وراسان زور قىسىمعا ٴدۇپ كەلىپ، 1 مينۋت 29 سەكۋند 2 تاكتتىك پارىقپەن 7 ورىننان قوزعالدى. ول ەكپىندەي اتويلاپ، مۇلدەم باسىمدىقپەن كومبەگە ۇمتىلىپ، ەڭ سوڭعى گرۋپپاداعىلاردىڭ الدى بولدى، ەڭ سوڭىندا شينجياڭ قۇراماسى جالپىلىق ناتيجە جاعىنان ٴۇشىنشى بولدى. 

 ەرنار ٴابدىلقان ۇلى تەلەفوندا تىلشىگە بىلاي دەدى: ”بۇگىنگى جارىستاعى بەينەمە ٴدان ريزامىن. 9 - ايدىڭ 24 - كۇنى اشىق گرۋپپاداعى ەرلەردىڭ 50 كيلومەترلىك توپتىق قوزعالۋ (ٴداستۇرلى تەحنيكا) جارىسىنا قاتىناسامىن، رولىمدى ٴتىپتى دە جاقسى ساۋلەلەندىرسەم دەيمىن“.

ەرنار ٴابدىلقان ۇلى بيىل 24 جاستا، كۇنەس اۋدانى نارات قالاشىعى تاياسۋ قىستاعىنىڭ تۋماسى، جۇڭگونىڭ دالالىق شاڭعى سپورتشىسى رەتىندە، 2 - ايدىڭ 14 - كۇنى وسى كەزەكتى جارىسقا قاتىناسقان دالالىق شاڭعى جاريا گرۋپپاسىنىڭ ەرلەر قوس قۋالاۋ (15 كيلومەترلىك ٴداستۇرلى تەحنيكا + 15 كيلومەترلىك ەركىن تەحنيكا) جارىسىندا ەرنار ٴابدىلقان ۇلى 5 - ورىندى يەلەدى؛ 2021 - جىلى 5 - ايدىڭ 9 - كۇنى وتكىزىلگەن 2021 - جىلدان 2022 - جىلعا دەيىنگى حالىقارالىق شاڭعى بىرلەستىگىنىڭ دالالىق قار شاڭعى FIS ٴنومىر جيناۋ جەلىلەس جارىسىندا (التاي بەكەتى) ول ەرلەردىڭ 15 كيلومەتر ارالىق تاستاپ شىعۋ (ەركىن تەحنيكا) جارىسىندا 46 مينۋت 16 سەكۋند 6 تاكتتىك ناتيجەمەن اعا جۇلدەگەر بولعان؛ ول 2022 - جىلعى بەيجيڭ قىسقى وليمپيادا سپورت جارىسىنا زاپاس سپورتشى رەتىندە قاتىناستى، وكىنىشتىسى، جارىسقا تۇسە المادى.

دينار تالداۋبەك قىزى، ەرنار ٴابدىلقان ۇلىنان سىرت، 20 جاستاعى، توعىزتاراۋ اۋدانىنىڭ تۋماسى باعاشار قۇمىلبەك ۇلى دا شينجياڭ قۇراماسى اتىنان 14 - كەزەكتى مەملەكەتتىك قىسقى سپورت جارىسىنىڭ دالالىق شاڭعى ەرلەر جاستار گرۋپپاسىنىڭ جارىسىنا قاتىناسادى.