ماراپات تورىندە

شينجياڭ گازەتىنىڭ حابارى (ٴتىلشى دۇڭ لياڭ). اۆتونوميالى رايوندىق دەنە تاربيە مەكەمەسىنەن ۇعىسۋىمىزشا، جەرگىلىكتى ۋاقىت 3 ـ ايدىڭ 16 ـ كۇنى شاڭعىمەن تاۋعا شىعۋ تۇرىندە جاستار دۇنيە ساۋىتىنا تالاسۋ جارىسىنىڭ نورۆەگيانىڭ مورد بەكەتى جارىسىندا شينجياڭنىڭ 18 جاستاعى جاس ساڭلاعى بۇلۇر ەرلەر U20 گرۋپپاسىنداعى جەكەلەر دالالىق جارىسىنىڭ التىن مەدالىن الىپ، ەرلەر شاڭعىمەن تاۋعا شىعۋ تۇرىندە جۇڭگوعا تۇڭعىش دۇنيە اعا جۇلدەگەرلىگىن الىپ بەرگەن.

وسى بەكەتتەگى جاستار دۇنيە جۇزىلىك ساۋىتىنا تالاسۋ جارىسى 17 مەملەكەت پەن رايوننان كەلگەن شاڭعىمەن تاۋعا شىعاتىن 106 جاس ساڭلاقتى باۋرادى. سول كۇنى وتكىزىلگەن ەرلەر U20 گرۋپپاسىنداعى جەكەلەر دالالىق جارىسىندا جيىنى 5 رەت تاۋعا شىعۋ جانە 5 رەت بيىكتەن سىرعاناۋ ورنالاستىرىلدى، تەڭىز دەڭگەيىنەن بيىكتىك پارقى 1141 مەتر، جارىس بولەگىنىڭ جالپى ۇزىندىعى 10 كيلومەترگە تايايدى، جيىنى 28 ادام جارىسقا قاتىناستى، بۇلۇر ەڭ سوڭىندا 59 مينۋت 15 سەكۋندتىق ناتيجەمەن جارىستى الدىمەن ورىنداپ، اعا جۇلدەگەر بولدى.

وسى رەتكى جارىستا بۇلۇر 4 تۇردەگى جارىسىقا قاتىناستى. جەكەلەر دالالىق جارىسىندا اعا جۇلدەگەر بولۋدان بۇرىن، ول ىلگەرىندى ـ كەيىندى ۆەرتيكال جىلدامدىق جانە قىسقا ارالىق جارىسىنا قاتىناسىپ، جەكە ـ جەكە 9 ـ جانە 7 ـ بولدى.

”ٴبىز 3 ـ ايدىڭ 12 ـ كۇنى ەل ىشىنەن نورۆەگياعا ۇشىپ جەتتىك، سوندىقتان الدىڭعى 2 رەتكى جارىستا جاعدايىم تىم شىركىن ـ اي بولمادى“. بۇلۇر قازىر ۋاقىت پارقىنا بۇكىلدەي ۇيلەسكەندىگىن، جاعدايىنىڭ جاقسى ەكەندىگىن ٴبىلدىردى.

جەرگىلىكتى ۋاقىت 3 ـ ايدىڭ 17 ـ كۇنى بۇلۇر مەملەكەتتىك قۇراماداعى سەرىگى سىدان يۇيجىنمەن بىرگە ارالاس ۇتىلامالى جارىسقا قاتىناسادى. سىدان يۇيجىن وسى بەكەتتەگى جاستار دۇنيە ٴجۇزى ساۋىتىنا تالاسۋ جارىسىندا ىلگەرىندى ـ كەيىندى ايەلدەر U18 گرۋپپاسىنىڭ ۆەرتيكال جىلدامدىق جانە جەكەلەر دالالىق جارىسىندا ەكى تۇردە اعا جۇلدەگەر بولدى. ”ارالاس ۇتىلامالى جارىستا ٴبىز بار كۇشىمىزدى سالىپ، ەڭ جاقسى ناتيجەگە قول جەتكىزۋگە قۇلشىنامىز“، ـ دەدى بۇلۇر.

بۇلۇر 2005 ـ جىلى 12 ـ ايدىڭ 21 ـ كۇنى بۋىرشىن اۋدانىندا تۋعان، وتباسىنداعىلاردىڭ ىقپالىمەن كىشكەنتايىنان شاڭعى تەبۋگە اۋەس بولدى. 2021 ـ جىلى 12 ـ ايدا شينجياڭ شاڭعىمەن تاۋعا شىعۋ قۇراماسى قۇرىلعاندا، 16 جاستاعى ول ٴبىرىنشى توپتاعى قۇراما مۇشەسى بولدى، 2022 ـ جىلى 5 ـ ايدا تاڭداۋ ارقىلى شاڭعىمەن تاۋعا شىعۋ مەملەكەتتىك شوعىرلى جاتتىعۋ قۇراماسىنا كىردى.

2023 ـ جىلى 3 ـ ايدا وتكىزىلگەن شاڭعىمەن تاۋعا شىعۋ دۇنيە جۇزىلىك جۇلدەلى جارىسىندا، تۇڭعىش رەت دۇنيە جۇزىلىك جارىسقا قاتىناسقان بۇلۇر ەرلەردىڭ U18 گرۋپپاسىنىڭ ۆەرتيكال جىلدامدىق جانە قىسقا ارالىق جارىسىندا جەكە ـ جەكە 6 ـ جانە 10 ـ بولدى. وسى ايدىڭ باسىندا جيلين قالاسىندا وتكىزىلگەن 2024 ـ جىلعى ازيا شاڭعىمەن تاۋعا شىعۋ جۇلدەلى جارىسىندا جۇڭگو قۇراماسى 7 التىن مەدالدىڭ بارلىعىن الدى. مۇنىڭ ىشىندە بۇلۇر ۆەرتيكال جىلدامدىق، جەكەلەر دالالىق جارىسى جانە ارالاس ۇتىلامالى جارىس تۇرلەرىندە 3 التىن مەدال الدى، ارالاس ۇتىلامالى جارىستاعى سەرىگى ٴدال وسى سىدان يۇيجىن ەدى.