سۋرەتتە: قاۋلا (وڭدا) كەستەلەگەن پارتيا تۋىن قىستاق پارتيا ياچەيكاسىنا تارتۋ ەتۋدە.
جاڭ جينفىڭ فوتوسى
ٴتىلشىمىز جاڭ جينفىڭ تەكەستەن حابارلايدى. 6 ـ ايدىڭ 25 ـ كۇنى تەكەس اۋدانى قارادالا قالاشىعى جارقورا قىستاعىنىڭ تۇرعىنى قاۋلا داۋىتبەك قىزى ٴوزى كەستەلەگەن پارتيا تۋىن قىستاق پارتيا ياچەيكاسىنا سيلاپ، وزگەشە تاسىلمەن پارتياعا العىسىن ٴبىلدىردى.
قولمەن كەستەلەنگەن بۇل پارتيا تۋىن قاۋلا ٴۇش كۇن ۇستەمەلەي ىستەپ كەستەلەپ شىعىپتى. قاۋلا: «قىستاعىمىزدىڭ تۇرعىندارى بۇكىلدەي كەدەيلىكتەن ارىلدى، كەيبىرەۋى اۋقاتتانۋ باستاماشىسىنا اينالدى. <سۋ ىشكەندە قۇدىق قازۋشىنى ۇمىتپا> دەگەن، جۇڭگو كوممۋنيستىك پارتياسى باقىتتى تۇرمىسقا جەتۋىمىزگە باسشىلىق ەتتى، سوندىقتان پارتيا تۋىن كەستەلەپ پارتياعا العىس ايتقىم كەلدى» دەدى.
قاۋلانىڭ بالا كەزىندە وتباسى كەدەي ەدى، ٴبىر وتباسىنداعى 7 جان تام ۇيدە قىسىلىپ ـ قىمتىرىلىپ، قىستا جەل گۋلەپ، جازدا تامشى ٴوتىپ، ۇلكەندەر وزەننەن سۋ تاسىپ ىشەتىن. 2008 ـ جىلى تۇتاس قىستاققا سۋ قۇبىرى جاتقىزىلىپ، قىستاقتىڭ توپىراق جولى اسفالتتانعان، ۇكىمەت قىستاق تۇرعىندارىنا اقىسىز داۋال تۇرعىزىپ، توعان جاساپ، قاقپا جانە جول شىراقتارىن ٴبىر تۇتاس ورناتقان، قىستاق تۇرعىندارى اۋلالارىنا گۇل ـ ٴشوپ ەگىپ، كوشە تازالىعى جاقسارىپ، قىستاقتىڭ بەت ـ بەينەسىندە وراسان زور وزگەرىستەر تۋىلعان.
قازىر قاۋلانىڭ كۇيەۋى قۇرىلىس ورنىندا جۇمىسكەر، ٴوزى ۇيىندە سەلبەستىك كووپەراتيۆىنىڭ كەستەسىن تىگەدى، ەكەۋىنىڭ ايلىق كىرىسى 11 مىڭ يۋاننان اسادى، تۇتاس وتباسىنداعىلار 110 شارشى مەترلىك جاڭا ۇيگە كىرىپ قانا قويماي تەلەۆيزور، توڭازىتقىش، كىر جۋعىش، سۋ جىلىتقىش سياقتى ەلەكتر اسپاپتارعا دا قولى جەتكەن. قاۋلا مەن كۇيەۋى اۆتوموبيل الۋ ٴۇشىن الدىڭعى ايدا شوفەرلىك مەكتەپكە بارىپ، شوفەرلىك كۋالىگىن الۋعا تىزىمدەلگەن.
قاۋلانىڭ ايتۋىنشا، قايىن اتاسى 30 جىلدىق پارتيا ستاجىنا يە ساقا پارتيا مۇشەسى ەكەن، اتاسى ۇنەمى ولاردى پارتياعا العىس ايتۋعا، بۇگىنگى باقىتتى تۇرمىستى قاستەرلەۋگە تاربيەلەپ، قىستاقتاعى ٴار ۇلت جۇرتشىلىعىنا ۇنەمى بار پەيىلىمەن كومەكتەسىپ، وتباسىنداعىلارعا ۇلگى بولعان.
جارقورا قىستاعى اۋدان ورتالىعىنان 27 كيلومەتر قاشىقتىقتا، قىستاق پارتيا ياچەيكاسىنىڭ باستاماشىلىعىندا كوپتەگەن قىستاق تۇرعىنى قىستاقتان شىعىپ، جاقىن ماڭداعى كاسىپورىنداردا جۇمىستانىپ، كاسىپورىن جۇمىسكەرىنە اينالعان، بىلتىر تۇتاس قىستاقتاعىلاردىڭ ورتاشا كىرىسى 15 مىڭ يۋانعا جەتكەن.