ٴتىلشىمىز حان شاشا، سۇن ي - نان، ەرىكتى ٴتىلشى ۋاڭ شىڭساي حابارلايدى. 4 - ايدىڭ 14 - كۇنى تۇستەن بۇرىن ”كاسىپ ارقىلى بولاشاققا جول نۇسقاۋ“ 2023 - جىلعى بۇكىل ەلدەگى ٴىرى، ورتا قالالاردى ارالاپ قىزمەتكەر قابىلداۋدىڭ ”شينجياڭ بەكەتى“ قىزمەتكەر قابىلداۋ جينالىسى جانە اۆتونوميالى رايوننىڭ حالىقتىق كاسىپورىندارعا قىزمەت وتەۋ ايى قيمىلىنىڭ باستالۋ سالتى ىلە شىفان داشۋەسىندە سالتاناتپەن وتكىزىلدى.

ٴتىلشى قيمىل ورنىنان كاسىپورىنداردىڭ قىزمەتكەر قابىلداۋ تەكشەسى الدىندا ادامدار ٴيىن تىرەسكەنىن، قىزمەت ىزدەۋشىلەر قىسقاشا تانىستىرۋىن تاپسىرۋ ٴۇشىن ۇزىن سونار كەزەككە تۇرعانىن، الاڭنىڭ دۋمانعا بولەنگەنىن كوردى.

”قانداي ماماندىق وقىدىڭىز؟“، ”اعىلشىن ٴتىلىنىڭ 4 -، 6 - دارەجەلەرىنەن ٴوتتىڭىز بە؟“، ”بەس ٴتۇرلى قامسىزداندىرۋ مەن تۇرعىن ٴۇي الەۋمەتتىك قورى بار ما؟“ جۇڭگو ەنەرگيا قۇرىلىس توبى شينجياڭ ەلەكتر جوبالاۋ مەكەمەسى شەكتى سەرىكتەستىگىنىڭ جۇمىسقا قابىلداۋ تەكشەسى الدىندا، قىزمەت ىزدەۋشىلەر مەن ادام ىستەتۋشى ورىن ٴوزارا پىكىرلەستى.

”ٴبىز ەلەكتر، قۇرىلىس جانە ينجەنەريا باسقارۋ ماماندىقتارى بويىنشا وقۋ تاۋىسقان وقۋشىلاردى قابىلدايمىز، قىزمەت ىزدەۋشىلەردىڭ تانىستىرۋ جاعدايىنا نەگىزدەلىپ، تاعى دا جان - جاقتى تالداۋ جاساپ، ولاردىڭ اراسىنان جالپىلىق ساپاسى جوعارى وقۋشىلاردى تاڭدايمىز“ دەدى جۇڭگو ەنەرگيا قۇرىلىس توبى شينجياڭ ەلەكتر ەنەرگياسى جوبالاۋ مەكەمەسى شەكتى سەرىكتەستىگى ادام كۇشى بايلىعى ٴبولىمىنىڭ ورىنباسار مەڭگەرۋشىسى جاي يۇڭ.

”كاسىپتىك شەكتەمە بولعاندىقتان، جۇمىسقا قابىلداۋ وڭاي جۇمىس ەمەس، كوپشىلىكتىڭ بۇگىن ٴبىزدىڭ ۇسىنعان قىزمەت ورىنعا ايرىقشا قىزىعاتىنىن ويلاماپپىز“. قۇلجا قالالىق قوعام حاۋىپسىزدىگى مەكەمەسى پارتيا قۇرىلىسى كەڭسەسىنىڭ ورىنباسار مەڭگەرۋشىسى فان شياۋلۋ تانىستىرىپ بىلاي دەدى: ”قۇلجا قالالىق قوعام حاۋىپسىزدىگى مەكەمەسى ساقشى كوركەمونەر ۇيىرمەسىنە نەگىزىنەن كوركەمونەر كاسىبىن وقىعاندار قابىلدانادى. كوركەمونەر وقۋشىلارى كاسىپتىك ەرەكشەلىگىن ساۋلەلەندىرىپ، نەگىزگى ساتىدا حال سۇراۋ قيمىلدارىن ورىستەتىپ، ۇزدىك مادەنيەتتى نەگىزگى ساتىعا جەتكىزەدى جانە ٴتۇرلى كونسەرت جانە جارىس قيمىلدارىنا قاتىناسادى“.

بۇل رەتكى قيمىل 2023 - جىلدىڭ ٴبىرىنشى توقسانىنداعى بۇكىل رايونىمىزدىڭ الەۋمەتتىك جۇمىستانۋعا قىزمەت وتەۋ قىزمەتىنىڭ ماڭىزدى جالعاسى بولىپ، ”100 قالا، 10 مىڭ كاسىپورىن“ حالىقتىق كاسىپورىندار مەن جوعارى مەكتەپتەردىڭ جۇمىستانۋدى قول ۇستاسا جەبەۋ ارەكەتى، الەۋمەتتىك جۇمىستانۋعا قىزمەت وتەۋدى مەكتەپكە ەنگىزۋدى ىشكەرىلەي ورىستەتۋدىڭ ناقتى شاراسى. اۆتونوميالى رايوندىق الەۋمەتتىك جۇمىستانۋعا قىزمەت وتەۋ ورتالىعى، ىلە وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسى باستاماشىلدىق رولدارىن ساۋلەلەندىرىپ، باسقا دا ۇكىمەت تاراۋلارىمەن، قوعامدىق كۇشتەرمەن سايكەسىپ، نازاردى اۆتونوميالى رايوننىڭ «8 ٴىرى كاسىپ سالاسى شوعىرىنا» شوعىرلاندىرىپ، جەرگىلىكتى ورىنداعى ٴتۇيىندى كاسىپورىندار، ۇكىمەت قارجى قوسقان نىساندار، ونەركاسىپ باقشاسى سياقتىلارمەن ىرىقتىلىقپەن ۇشتاسىپ، ساپالى جۇمىس ورىندارىن شوعىرلى جيناقتادى ٴارى كورشى قالالارداعى كاسىپورىنداردى رايون اتتاپ قىزمەتكەر قابىلداۋعا ۇسىنىس ەتتى، ىلە شىفان داشۋەسىنىڭ، ىلە وبلىسىنىڭ اۋدان - قالالارىنداعى تەحنيك جۇمىسشى مەكتەپتەرىنىڭ وقۋشىلارى، قوسىننان شەگىنگەن اسكەريلەر سياقتى ٴتۇرلى قىزمەت ىزدەۋشىلەردى قيمىلعا قاتىناسۋعا ۇيىمداستىردى.

قيمىلدا ينتەرنەت جەلىسى جانە جەلىدەن تىس ٴتاسىل ٴوزارا ۇشتاستىرىلدى، قىزمەتكەر قابىلداۋ جينالىسى ورنىندا جالپىلىق قىزمەت وتەۋ رايونىن، ساياساتتان كەڭەس بەرۋ رايونىن، قىزمەتكەر قابىلداۋ، كەڭەسۋ رايونىن قۇرىپ، ادام ىستەتەتىن ورىندار مەن قىزمەت ىزدەۋشىلەردىڭ كوپ نەگىزدى قىزمەت وتەۋ قاجەتى قاناعاتتاندىرىلدى. سونىمەن بىرگە، قيمىلدا ”شينجياڭدا قىزمەت ىستەۋ“ تىكە تاراتىلىمى ارقىلى ”قىزمەت ورنىن“ تانىستىرۋ قيمىلىن ٴبىر ۋاقىتتا ورىستەتتى، 24 كاسىپورىننىڭ ادام كۇشى بايلىعى ارناۋلى قىزمەتكەرى تىكە تاراتۋدا كاسىپورىنداردىڭ قىزمەتكەر قابىلداۋ جاعدايىن تانىستىردى ٴارى ىلە وبلىسىنا توتە قاراستى 3 جوعارى مەكتەپتىڭ شۋەيۋاندارىن جانە كاسىپتەرىن تانىستىردى. ىلە وبلىستىق جۇمىستانۋعا قىزمەت وتەۋ تورابى، ىلە شىفان داشۋەسىنىڭ رەسمي سايتى سياقتى توراپ بەكەتتەرى قىزمەتكەر قابىلداۋ جينالىسىنىڭ قىزمەت ورنى ينفورماتسياسىن ٴبىر ۋاقىتتا جاريالاپ، ينتەرنەت جەلىسىندە جۇمىس ىزدەۋشىلەر مەن كاسىپورىنداردىڭ قىزمەتكەر قابىلداۋىنا بۇلتتىق كوپىر سالدى.

ساناققا قاراعاندا، قىزمەتكەر قابىلداۋ جينالىسىنا 240 تان استام جۇمىسشى ىستەتۋشى كاسىپورىن قاتىناسىپ، 7300 دەن استام جۇمىس ورنىن ۇسىنىپ، جينالىسقا كەلىپ جۇمىس ىزدەۋشىلەر 8000 نان، العاشقى ادىمدا جۇمىستانۋ نيەتىنە كەلگەندەر 3900 ادام - رەتتەن، ساياساتتىق كەڭەس بەرۋ جانە جاۋاپ قايتارۋ مولشەرى 5000 ادام - رەتتەن اسقان.

ۇعىسۋعا قاراعاندا، ”حالىقتىق كاسىپورىندارعا قىزمەت وتەپ، دامۋدى جەبەپ، جۇمىستاندىرۋدى، حالىق تۇرمىسىنا تيىمدىلىك جاساۋدى كەڭەيتۋدى“ نەگىزگى تاقىرىپ ەتكەن حالىقتىق كاسىپورىندارعا قىزمەت وتەۋ ايى قيمىلى 4 - ايدىڭ 30 - كۇنىنە دەيىن جالعاسادى ەكەن. قيمىل كەزىندە ٴار دارەجەلى ادام كۇشى بايلىعى جانە قوعامدىق قامتاماسىزداندىرۋ تاراۋلارى ”ادام كۇشى بايلىعى جانە قوعامدىق قامتاماسىزداندىرۋ مەكەمەسىنىڭ باستىعى حالىقتىق كاسىپورىنداردى ارالاۋ قيمىلىن“ كەڭ كولەمدە ورىستەتىپ، ىشكەرىلەي تەكسەرۋ - زەرتتەۋ جۇرگىزىپ، ساياساتتى تياناقتاندىرۋمەن، جۇمىسشى ىستەتۋگە جەتەكشىلىك ەتۋ قىزمەت وتەۋىمەن قامداپ، حالىقتىق كاسىپورىنداردىڭ قىزمەتكەر قابىلداۋى، جۇمىسشى ىستەتۋى قيىن بولۋ ماسەلەسىن شەشۋىنە كومەكتەسەدى. سونىمەن بىرگە، حالىقتىق كاسىپورىنداردى مەكتەپتەرگە، الەۋمەتتىك اۋماقتارعا، اۋىل - قىستاقتارعا بارىپ، قىزمەتكەر قابىلداۋدى دالمە - ٴدال ۇشتاستىرۋ قيمىلىن ورىستەتۋگە ۇيىمداستىرىپ، كاسىپورىنداردىڭ دامۋىنا دەم بەرەتىن، جۇمىستانۋ، شارۋاشىلىق قۇرۋعا تاماشا قوعامدىق ورتا ازىرلەيدى.

سۋرەتتە: قىزمەتكەر قابىلداۋ جينالىسى.

ۋاڭ شىڭساي فوتوسى