تىلشىلەرىمىز ۋاڭ جىحۋا، ليۋ چىڭگاڭ حابارلايدى. مادەنيەت - ساياحات بۇلت تەكشەسىنىڭ ٴبىر تۇلعالى اپپاراتى، كىتاپ وقۋ ماشيناسى، حاتكەرلىك ماشيناسى، مانەرلەپ وقۋ بولمەسى جانە بالالارعا ۇيلەسەتىن كارتون ۇلگىسىندەگى اۆتوماتتى كىتاپ قارىز الۋ - قايتارۋ ماشيناسى...... توعىزتاراۋ اۋداندىق جاڭا كىتاپحاناعا بارعان ٴاربىر وقىرماندى وسى ارانىڭ جانعا جايلى كىتاپ وقۋ ورتاسىنا قىزىقتىرىپ قالماستان، عىلىم ـ تەحنيكالى سيفرلانعان جابدىقتارى ٴتىپتى دە تاڭ قالدىردى.

4 ـ ايدىڭ 13 ـ كۇنى ٴتىلشى توعىزتاراۋ اۋداندىق جاڭا كىتاپحاناعا بارعاندا، زەردەلى قابىرعاداعى ەكراننان كىتاپحانادا ساقتالعان كىتاپ مولشەرى، سول كۇنى كىتاپحاناعا كەلگەن، كىتاپ وقىعان ادام سانى جانە كىتاپ قارىز العان رەت سانى سياقتى ينفورماتسيالاردى كورۋگە بولاتىنىن ٴبىلدى.

توعىزتاراۋ اۋداندىق كىتاپحانانىڭ باستىعى ۋاڭ دانداننىڭ تانىستىرۋىنشا توعىزتاراۋ اۋداندىق جاڭا كىتاپحانا بىلتىر 6 - ايدىڭ سوڭىندا پايدالانۋعا بەرىلىپ، توعىزتاراۋ اۋدانىنداعى تۇڭعىش ”زەردەلى كىتاپحانا“ بولىپ، ”كىتاپحانا + زات ينتەرنەتى + بۇلتتىق ەسەپتەۋ + زەردەلىلەنگەن“ جابدىقتارعا سۇيەنىپ، زەردەلى قىزمەت وتەۋدى جانە باسقارۋدى جۇزەگە اسىرىپتى. كىتاپحانانىڭ قۇرىلىس كولەمى 1050 شارشى مەتر، ساقتالعان كىتاپ 47 مىڭنان اسادى، 22 كىتاپ ٴتۇرى بار، سونداي - اق سايكەستى كىتاپحانا سايتى مەن «سيفرلى كىتاپحانا» بار، وقىرمانداردىڭ ازاماتتىق كۋالىك جانە ٴۇنحات ارقىلى كىتاپ قارىزعا الۋىنا بولادى. مۇنان سىرت، ”زەردەلى كىتاپحاناعا“ سۇيەنىپ، كىتاپحانانىڭ جالپى بولىمشە سارايى ٴتۇزىمىن جۇزەگە اسىرىپ، بۇكىل اۋدانداعى 9 اۋىل - قالاشىقتاعى (اۋماق) 100 انار ٴدانى كىتاپ ٴۇيىن قامتىيدى، جالپى ساقتالعان كىتاپ مولشەرى 140 مىڭعا جەتەدى.

توعىزتاراۋ اۋداندىق جاڭا كىتاپحانا بالالار وقۋ رايونى، سالون قيمىل رايونى، سەيىل ـ سەرۋەن، اۋىس ـ كۇيىس رايونى، پىسىقتاۋ رايونى سياقتىلارعا ٴبولىنىپ، وقىرمانداردىڭ كىتاپ وقۋىنا ٴتىپتى دە قولايلى، ەتەنە قىزمەت وتەدى.

”جاڭا كىتاپحانا اشىلعاننان بەرى كىتاپحاناعا كىرگەندەردىڭ سانى بۇرىنعىدان 5 ەسە ارتتى، كىتاپ قارىزعا الۋ مولشەرى، كىتاپ وقۋ قيمىلىنا قاتىناسقانداردىڭ سانى دا ەسەلەپ ارتتى. جاقىننان بەرى ٴبىز مۋزيكا كىتاپحاناسى، ’كىتاپ وقۋ مەرەيىنە شومعان توعىزتاراۋ، جالپى حالىقتىق كىتاپ وقۋ‘ وتانشىلدىق تاقىرىبىنداعى مانەرلەپ وقۋ قيمىلى، ’كىتاپتى ٴسىز تاڭداڭىز، اقشاسىن مەن تولەيىن‘، مال شارۋاشىلىعى وڭىرىنە كىتاپ جەتكىزۋ سياقتى قاتىستى قيمىلداردى ورىستەتتىك، وقىرمانداردىڭ اڭىسى وتە جاقسى بولدى“ دەدى ۋاڭ داندان.

شىت جاڭا، قولايلى قاتتى بولشەك قۇرىلعىلارى، تىنىش، جانعا جايلى كىتاپ وقۋ ورتاسى، كىتاپ ساتىپ الۋعا زەردەلى قىزمەت وتەۋى كوپتەگەن بۇقارانى كىتاپحاناعا باۋراپ، كىتاپ وقۋدىڭ قىزىعىن سەزىندىردى.

سول كۇنى وسى ارادا وقىپ جاتقان تولىق ورتا 3 - جىلدىعىنىڭ وقۋشىسى ٴدىلارا سەرىك قىزى تىلشىگە: ”بۇل كىتاپحانانىڭ ورتاسى وتە جاقسى، مەن ٴار كۇنى دەرلىك وسىندا كەلىپ ۇيرەنىپ، جوعارى مەكتەپ ەمتيحانىنا دايىندالامىن. بۇل اراداعى كىتاپتاردىڭ ٴتۇرى وتە كوپ، مەيلى بالالار بولسىن، الدە ۇلكەندەر بولسىن، بارلىعى لايىقتى كىتاپ تابا الادى“ دەدى.

ۇعىسۋعا قاراعاندا ”23 - ٴساۋىر“ دۇنيە جۇزىلىك كىتاپ وقۋ كۇنىن قارسى الۋ ٴۇشىن توعىزتاراۋ اۋداندىق كىتاپحانا ينتەرنەت جەلىسىندە جانە ينتەرنەت جەلىسىنەن تىس ”كىتاپ وقۋ . عىلىم - تەحنيكا . بولاشاق“ ارناۋلى قيمىلىن ٴبىر ۋاقىتتا ورىستەتىپ، ”كىتاپ وقۋ مەرەيىنە شومعان عىلىم - تەحنيكانى مەن تانىستىرامىن“ كىتاپ تانىستىرۋ، جيناۋ، ”كىتاپ وقۋ مەرەيىنە شومعان عىلىم - تەحنيكا . كىتاپ وقۋ كوركەمدىگى“ 21 كۇن كىتاپ وقۋ، ”بۇلتتىق عىلىم - تەحنيكا جالپىلاستىرۋ سالتاناتى“ عىلمي بىلىمدەر زەيىن سىناۋ جارىسى سياقتى جەلىلەس قيمىلداردى ورىستەتىپ، وقىرمانداردىڭ عىلىم - تەحنيكانىڭ كۇشىنەن پايدالانىپ ٴبىلىم تەڭىزىنە ساپارلاۋىنا مۇمكىندىك جاسايدى.

سۋرەتتە: توعىزتاراۋ اۋداندىق جاڭا كىتاپحانا.

ليۋ چىڭگاڭ فوتوسى