ىلە جيۋچىڭ فۋتبول كلۋبىنىڭ شەبەرلەرى جارىس مايدانىندا

ٴتىلشىمىز ليۋ چۇنشيڭ حابارلايدى. 5 - ايدىڭ 5 - كۇنى 2023 ـ جىلعى جۇڭگو فۋتبول قوعامى ساۋىتىنا تالاسۋعا جەرەبە تارتۋ سالتى بەيجيڭدە وتكىزىلىپ، 64 كوماندا جارىسقا قاتىناستى، وندا جۇڭگو ەرەن دارەجەلى، جۇڭگو A دارەجەلى، جۇڭگو B دارەجەلى سىندى 3 دارەجەلى كاسىپتىك بىرلەسپە جارىستىڭ كوماندالارى جانە ٴارقايسى مۇشە قوعامدارداعى كاسىپتەن سىرتقى كوماندالار بار. كاسىپتەن سىرتقى شينجياڭنان بىردەن - ٴبىر جارىسقا قاتىناساتىن كوماندا رەتىندە ىلە جيۋچىڭ فۋتبول كلۋبى 5 - ايدىڭ 17 - كۇنى كۇيتۇن قالاسىندا جۇڭگو B دارەجەلى بىرلەسپە جارىس كومانداسى − جىجياڭ شاۋشيڭ شاڭ - ي يۇيلۇڭ كومانداسىمەن سايىسادى.

بۇل رەتكى جارىس 7 كەزەك بويىنشا وتكىزىلەدى. جارىس 5 - ايدىڭ 17 - كۇنى باستالىپ، 25 - كۇنى اياقتايدى. 1 - كەزەكتى جارىستان 4 - كەزەكتى جارىسقا دەيىن ەكى كوماندانىڭ 90 مينۋتتىق (داعدىلى جارىس ۋاقىتى) جارىسىندا ەگەر تەڭ ٴتۇسىپ قالسا، 11 قادامنان دوپ تەبۋ ارقىلى جەڭگەن جاق بەلگىلەنەدى. 5 - كەزەكتى جارىستان 7 - كەزەكتى جارىسقا دەيىن ەكى كوماندا 90 مينۋتتىق جارىستا ەگەر تەڭ ٴتۇسىپ قالسا، جارىس ۋاقىتى ۇزارتىلادى، تاعى دا تەڭ شىقسا، وندا 11 قادامنان دوپ تەۋىپ جارىس ناتيجەسى شىعارىلادى. 1 - كەزەكتە جەڭىپ شىققان 16 كوماندا 2 - كەزەكتە جۇڭگو A دارەجەلى بىرلەسپە جارىسىنىڭ 16 كومانداسىمەن جارىسقا تۇسەدى.

ىلە جيۋچىڭ فۋتبول كلۋبى 2023 ـ جىلى 2 ـ ايدىڭ 3 ـ كۇنى قۇرىلعان، وسىدان بۇرىن تۇرپاندا وتكىزىلگەن 2023 ـ جىلعى جارىس ماۋسىمىنداعى جۇڭگو اعا جۇلدەگەرلىككە تالاسۋ بىرلەسپە جارىسىندا (شينجياڭ جارىس رايونىنداعى ىرىكتەۋ جارىسىندا) جۇلدەگەر بولىپ، 7 ـ ايدىڭ 17 ـ كۇنىنەن 26 ـ كۇنىنە دەيىن وتكىزىلەتىن جۇڭگو اعا جۇلدەگەرلىككە تالاسۋ بىرلەسپە جارىسىنا قاتىناسۋعا جولداما الدى.

”ىلەنىڭ فۋتبولىندا جاڭا تاريحي وراي جاراتا الساق بولعانى، ٴبىز مۇنى مۇلدە قولدان بەرمەيمىز. ٴبىز ٴارقانداي قارسىلاسىمىزبەن بەتپە - بەت كەلۋگە دايىنبىز، ىلەنىڭ فۋتبول جانكۇيەرلەرى بىزگە سايىسقا قاتىناساتىن باتىلدىق پەن سەنىم سيلادى“ دەدى قۇلجا قالالىق دەنە تاربيە كاسىبى بىرلەستىگىنىڭ باس حاتشىسى، ىلە جيۋچىڭ فۋتبول كلۋبىنىڭ جەتەكشىسى چىن گۋانلين تىلشىگە. 

”5 - ايدىڭ 17 - كۇنى ٴبىز كۇيتۇندە جارىسقا قاتىناسامىز، بارشا فۋتبول اۋەسكەرلەرىنىڭ بىزگە دەم بەرۋىن قارسى الامىز“ دەدى چىن گۋانلين.

جاتتىقتىرۋشىنىڭ تاكتيكالىق ورنالاستىرۋىنان كورىنىس.

 (ىلە جيۋچىڭ فۋتبول كلۋبى سۋرەتپەن قامدادى)