سۋرەتتە: ىلە وزەنى 5 - كوپىرىنە اسفالت جاتقىزىلۋدا.        لي يافىڭ فوتوسى

ٴتىلشىمىز لي يافىڭ، ەرىكتى ٴتىلشى چي شياۋۋەي حابارلايدى. 5 - ايدىڭ 26 - كۇنى اسفالت جاتقىزۋ ماشينالارىنىڭ گۇرىلدەگەن ٴۇنى ىشىندە ىلە وزەنى 5 - كوپىرىنە اسفالت جاتقىزۋ جۇمىسى جاپپاي اياقتادى، بۇل نىسان قۇرىلىسىنىڭ ەڭ سوڭعى شەشۋشى كەزەڭگە وتكەندىگىنىڭ، اۆتوكولىك قاتىناۋ نىساناسىنا تاعى ٴبىر قادام جاقىنداعاندىعىنىڭ بەلگىسى.

ىلە وزەنىن ەندەي وتەتىن 5 - كوپىر − G218 لەنياسىنىڭ قۇلجا قالاسىنان وتەتىن 1 - دارەجەلى تاس جول نىسانىنداعى مەڭگەرۋ سيپاتتى ينجەنەريا، جالپى ۇزىندىعى 1761 مەتر، قۇلجا قالاسى ىلە وزەنى مەملەكەتتىك سازدىق باقشاسىنان باستالىپ، چاپچال سىبە اۆتونوميالى اۋدانى ىلە وزەنى مەملەكەتتىك سازدىق باقشاسىنا تىرەلەدى. سالىنىپ بولعاننان كەيىن ىلە وزەنىنىڭ وڭتۇستىك، سولتۇستىك ەكى جاعالاۋىن تۇتاستىراتىن ٴارى قۇلجا قالاسىن چاپچال اۋدانىمەن، كوكدالا قالاسىمەن جانە دۋلات وتكەلىمەن تۇتاستىراتىن ماڭىزدى ارنا بولىپ، جەرگىلىكتى ورىننىڭ قاتىناس - تاسىمال قىسىمىن جەڭىلدەتۋمەن بىرگە، قۇلجا قالاسىنىڭ، چاپچال اۋدانىنىڭ بولاشاقتاعى دامۋىنا ٴورىس اشىپ، ىلە وزەنىنىڭ تاعى ٴبىر كوركەم كورىنىسىنە اينالادى.

سوڭعى رەت اسفالت جاتقىزۋ جول بەتى قۇرىلىسىن جۇرگىزۋدەگى ەڭ سوڭعى جۇمىس ٴتارتىبى، جول بەتىن اسفالتتاندىرۋداعى ساپا تالابى ەڭ جوعارى، تەحنولوگيالىق تالابى ەڭ قاتاڭ ينجەنەريا، ول تىكەلەي جول قاتىناسىنىڭ حاۋىپسىزدىگىنە، جايلىلىعىنا جانە جول بەتىنىڭ پايدالانىلۋ مەرزىمىنە سايادى.

جۇڭگو تەمىر جول 5 ـ مەكەمەسى G218 لەنياسى قۇلجا قالاسىنان وتەتىن تاس جول ينجەنەرياسى قولباسشىلىق شتابىنىڭ 1 ـ بولىمشەسى ىلە وزەنى 5 ـ كوپىرىنىڭ تەحنيكالىق جاۋاپتىسى ليۋ انجياڭنىڭ تانىستىرۋىنا قاراعاندا، وسى رەت 5 - كوپىردىڭ بەتىنە جاتقىزىلعان

اسفالتتىڭ قالىڭدىعى 5 سانتيمەتر، ەنى 11.75 مەتر، اسفالتتاندىرىلعان كولەمى 20691.75 شارشى مەتر، بۇعان قۇسىلعان قوسپا ماتەريال شامامەن 2380 توننا بولعان. جايمالاۋ ماشيناسىنىڭ تەمپەراتۋراسى، اسفالت جاتقىزۋ قارقىنى، كەڭدىگى، اۆتوماتتى شارشىلاۋ سياقتى جۇمىس تەحنيكاسى ارقىلى بۇكىلدەي ٴساتتى جاسالىپ، 9 - ايدىڭ 30 - كۇنى اۆتوموبيل قاتىناۋىنا نەگىز قالاندى.

ساناققا قاراعاندا، G218 لەنياسىنىڭ قۇلجا قالاسىنان وتەتىن 1 ـ دارەجەلى تاس جول نىسانىنىڭ قازىرگە دەيىن جول تاعانىنىڭ %99.5 ى، قالتقى قورعانىنىڭ %92.6 ى ورىندالىپ، ٴۇي قۇرىلىسى ينجەنەرياسى نەگىزىنەن اياقتالىپ، 66 ـ تۋان اقى الۋ پۋنكتىنىڭ ماشينا ـ ەلەكتر، قۇرىلىس ينجەنەرياسى ورىندالىپ، جابدىق ورناتۋ قارقىنى %85 كە جەتكەن، ەندى تەك ماشينا جابدىقتاردى جەكەلەي ىسكە قوسىپ، سىناپ كورۋ قىزمەتى عانا قالعان.

جۇڭگو تەمىر جول 5 ـ مەكەمەسى G218 لەنياسى قۇلجا قالاسىنان وتەتىن تاس جول ينجەنەرياسى قولباسشىلىق شتابىنىڭ ورىنباسار ديرەكتورى حۋاڭ حۇڭلياڭ مىنانى ٴبىلدىردى: نىساندا ساپا حاۋىپسىزدىگىنە كەپىلدىك ەتۋ العى شارتىندا جۇمىس جۇرگىزىلىپ، ٴوندىرىس تارتىپپەن ىلگەرىلەتىلدى. سالىنىپ بولعان سوڭ بۇل نىسان ىلە اڭعارى وڭىرىندەگى تاس جول تورابىنىڭ ورنالاسۋىن كەمەلدەندىرىپ، وڭىرلىك قاتىناۋ شارت ـ جاعدايىن جاقسارتىپ، قالانىڭ كەڭىستىگى مەن جۇلگەسىن كەڭەيتىپ، تاس جولدىڭ قاتىناۋ قۋاتى مەن قىزمەت وتەۋ دەڭگەيىن جوعارىلاتادى، ”ەكى قورعاس، ەكى قۇلجانى“ ٴبىر تۇلعالاندىرىپ دامىتۋ ستراتەگياسىن ىشكەرىلەي اتقارۋدا ماڭىزدى مانگە يە.