شينحۋا تورابىنىڭ حابارى (ەرىكتى ٴتىلشى لين پين). 4 - ايدىڭ 13 - كۇنى ”تيانشان سالمون بالىعىن“ باعالاۋ جينالىسى شيامىندا وتكىزىلدى.

باعالاۋ جينالىسىنا فۋجياننىڭ ٴتۇيىندى اس - سۋ كاسىبى سالاسىنان، ازىق - تۇلىك حاۋىپسىزدىگى جانە ازىق - تۇلىكتى زەرتتەپ وندىرەتىن قاتىستى قۇرىلىمداردان، جوعارى دەڭگەيلى ازىق - تۇلىك جارىس ىستەرىن باس بولىپ ۇيىمداستىرۋشى ورىنداردان كەلگەن 110 سيلى قوناق قاتىناسۋعا ۇسىنىس ەتىلدى.

باعالاۋ جينالىسىندا كوپشىلىك شينجياڭنىڭ ىلە قازاق اۆتونوميالى وبلىسى نىلقى اۋدانى قاراسۋ اۋىلى سالمون بالىعىن ٴوسىرۋ بازاسىنان اكەلىنگەن سالمون بالىعىنان جاسالعان ٴتۇرلى قۋىرماشتاردان ٴدام تاتتى.

تانىستىرۋعا قاراعاندا، نىلقى اۋدانىنان اعىپ وتەتىن قاس وزەنى تيانشان تاۋىنداعى مۇزدىقتاردان باستاۋ العان، سۋ تەمپەراتۋراسى جىل بويى 20 سەلتسي گرادۋستان تومەن بولادى، سۋى تۇنىق ٴارى سالقىن بولعاندىقتان سۋىق سۋ بالىعىنىڭ ٴوسىپ - جەتىلۋىنە وتە ۇيلەسەدى ەكەن. بىرلەسكەن مەملەكەتتەر ۇيىمى استىق جانە اۋىل شارۋاشىلىعى ۇيىمىنىڭ (FAO) رەسمي سايتىندا كورسەتىلۋىنشە، سالمون بالىعى باعىمشىلىعى نەگىزىنەن اتلانت مۇحيت باعلان بالىعى، كۋمجا بالىعى، اق باعلان بالىق جانە ديۋاڭگۇي بالىعى سىندى 4 ٴتۇرلى بولادى ەكەن. كۋمجا بالىعى سۋىق سۋ تۇرىندەگى بالىققا جاتادى، ول تەڭىز سۋىندا دا، تۇششى سۋدا دا تىرشىلىك ەتەدى.

شينجياڭ وۋشان ازىق - تۇلىك شەكتى سەرىكتەستىگىنىڭ باس ديرەكتورى چىن سىحان تانىستىرىپ بىلاي دەدى: 2014 - جىلى ٴبىرىنشى توپتاعى ساپالى كۋمجا بالىعىن سولتۇستىك امەريكا، دانيا سياقتى ەلدەردەن قاراسۋ اۋىلىن−داعى سالمون بالىعىن ٴوسىرۋ بازاسىنا اكەلدىك، فۋجيان ولكەسىنىڭ شينجياڭعا كومەكتەسۋ قىزمەت اترەتىنىڭ كومەگىندە، سالمون بالىعى شينجياڭداعى تيانشان تاۋ سىلەمىنىڭ مۇزىقتارىنان باستاۋ العان سۋىق سۋداعى جاڭا تۇراققا جايعاستى.

شينجياڭنىڭ سالمون بالىعىن فۋجيان تۇرعىندارىنىڭ اس ۇستەلىنە ”جەتكىزۋ“ ٴۇشىن فۋجيان ولكەسىنىڭ شينجياڭعا كومەكتەسۋ شيامىن بولىمشە قولباسشىلىق شتابىنىڭ سايكەستىرۋىندە وسى رەتكى باعالاۋ قيمىلى شيامىندا ٴساتتى وتكىزىلدى. باعالاۋ جينالىسىندا، اس - سۋ سالاسىنداعى ٴىشىنارا ٴىرى كاسىپورىندار مەن ەرەن بازارلار دا العاشقى قادامدا ساتىپ الۋ نيەتناماسىنا قول قويىستى.

سۋرەتتە: سيلى قوناقتار شينجياڭنان اكەلىنگەن سالمون بالىعىن باعالاۋدا.

سۋرەتتە: نىلقى اۋدانى قاراسۋ اۋىلى سالمون بالىعى باعىمشىلىق بازاسىنىڭ سالمون بالىعى.

(سۋرەتتى جينالىستى ۇيىمداستىرۋشى جاق قامدادى)