汉文 ىلە اقپارات تورابىنا حوش كەلدىڭىزدەر!
اۋىل - قىستاقتا شارۋاشىلىق قۇرىپ، بايۋ ارمانىن جۇزەگە اسىردى
2022-04-13 11:47:48     كورىلىم:رەت كەلۋ قاينارى:ىلە گازەتى  جاۋاپتى رەداكتور:گۇلدەن ماقسات قىزى

لۋ جۇڭ (ٴوز ٴتىلشىمىز)


اۋىل - قىستاقتى گۇلدەندىرۋدىڭ تەتىگى دارىندىلاردا. جاڭالىق اشۋ رۋحىنا يە ستۋدەنتتەر - اۋىل شارۋاشىلىعىن وسىزامانداندىرۋدى، كاسىپ سالالاندىرۋدى، اۋىل شارۋاشىلىق ونىمدەرىنىڭ قۇن تىزبەگىن ۇزارتۋدى ىلگەرىلەتۋدەگى، اۋىل - قىستاقتىڭ مادەنيەت دەڭگەيىن جوعارىلاتۋداعى ماڭىزدى كۇش. جاقىنعى جىلداردان بەرى كۇنەس اۋدانىنداعى كوپتەگەن ستۋدەنت تىڭ ۇستانىم، اسقاق جىگەرمەن اۋىلدارىنا قايتىپ شارۋاشىلىق قۇردى. ولار اۋىل - قىستاقتىڭ بايتاق دالاسىندا ىسكەرلىك كورسەتىپ، وزدەرىنىڭ شارۋاشىلىق قۇرۋ ارماندارىن جۇزەگە اسىرىپ قانا قالماستان، اۋىلداستارىنا كومەكتەسىپ، ولاردىڭ اۋقاتتانۋ ارمانىن دا جۇزەگە اسىردى.

بيىل 33 جاستاعى ٴسالينۇر ساتىلقان ۇلى - اۋىلىنا قايتىپ شارۋاشىلىق قۇرعان ستۋدەنتتەردىڭ ٴبىرى. بىرنەشە جىلدىق قۇلشىنىس ارقىلى قازىر ول قۇرعان كۇنەس اۋدانى فۋسۋ باعىمشىلىق كاسىپتىك - سەلبەستىك كووپەراتيۆىندە باعىلعان شينجياڭ قوڭىر سيىرىنىڭ سانى 150 دەن اسىپ، جەرگىلىكتى ورىنداعى اۋقاتتانۋعا جەتەكتەۋدىڭ كوشباسشىسىنا اينالدى.

2013 - جىلى شينجياڭ قازىنا - ەكونوميكا داشۋەسىنەن وقۋ بىتىرگەننەن كەيىن ٴسالينۇر اۋىلى كۇنەس اۋدانىنىڭ المالى قالاشىعى تەلقارا الەۋمەتتىك اۋماعىنا قايتىپ كەلەدى. اكەسىنىڭ جاسىنىڭ ۇلعايۋى سەبەپتى، جالعىز اعاسىنىڭ ۇيدەگى 30 باس سيىردى باعۋى مۇمكىن ەمەس ەدى. اۋىلىنا قايتىپ جارىم جىلدان كەيىن ٴسالينۇر كومەكشى ساقشىلىق قىزمەتىنەن امالسىز بوساپ، اعاسىنا كومەكتەسىپ سيىر باعادى.

كوزدى اشىپ - جۇمعانشا 2018 - جىل كەلدى، سيىردىڭ سانى 80 گە جەتكەنىمەن، ٴبىراق، بارلىعى جەرگىلىكتى سيىر بولعاندىقتان ەكونوميكالىق ونىمدىلىگى ماردىمسىز بولدى. «باعىمشىلىق كاسىبىن دامىتۋ ٴۇشىن باعىمشىلىق كولەمىن كەڭەيتۋدەن تىس، مال تۇقىمىن اسىلداندىرۋعا دا كۇش سالۋ كەرەك» دەدى ٴسالينۇر تىلشىگە.

كاسىپتىك باعىمشىلىق سەلبەستىك كووپەراتيۆىن قۇرىپ، سەلبەسىپ دامۋ - باعىمشىلىق كولەمىن كەڭەيتۋدىڭ ەڭ ۇتىمدى ٴادىسى سانالادى. قاتىستى رەسمياتتاردى بىتىرگەننەن كەيىن باعىمشىلىق الاڭىن سالاتىن جەردى تاڭداپ، سەلبەسەتىن سەرىكتەرمەن بايلانىس جاسادى... 2019 - جىلى 3 - ايدا بىرنەشە اي دايىندىق كورۋ ارقىلى كۇنەس اۋدانى فۋسۋ باعىمشىلىق كاسىپتىك - سەلبەستىك كووپەراتيۆى رەسمي قۇرىلادى. «سەلبەستىك كووپەراتيۆى قۇرىلعان كەزدە جالپى 8 مۇشە بار بولىپ، 90 باس سيىر باعىلدى. جەرگىلىكتى ورىنداعى كەدەي وتباسىلارعا كومەكتەسۋ ٴۇشىن كووپەراتيۆىمىز تاعى 2 كەدەي وتباسىن قابىلدادى. ولار كەدەيلەردى سۇيەمەلدەۋگە بەرگەن سيىرلارىن جارنا رەتىندە قوستى ٴارى كووپەراتيۆتە ارناۋلى سيىر باعۋعا جاۋاپتى بولدى» دەدى ٴسالينۇر.

سەلبەستىك كووپەراتيۆى قۇرىلعاننان كەيىن ٴسالينۇر بار زەيىن - زەردەسىن مال تۇقىمىن اسىلداندىرۋعا شوعىرلاندىردى. سوڭىندا ول ۇيلەسىمدىلىگى جاقسى، ىندەتكە قارسىلىق قۋاتى كۇشتى شينجياڭ قوڭىر سيىرىن تاڭدادى.

2021 - جىلى سەلبەستىك كووپەراتيۆى توڭازىتىلعان سفەرمامەن ۇرىقتاندىرۋ تەحنيكاسىن قولدانۋ ارقىلى جەرگىلىكتى سيىرلاردى بىرتە - بىرتە قاتاردان قالدىردى. ٴسالينۇر مال تۇقىمىن اسىلداندىرۋدىڭ پايداسىن تەز ارادا كورە باستادى، ماسەلەن، جاس شاماسى ۇقساس بۇزاۋلاردى الىپ ايتساق، تۇقىمىن اسىلداندىرعاننان كەيىنگى بۇزاۋدىڭ باعاسى جەرگىلىكتى بۇزاۋدان ٴبىر ەسە جوعارى بولعان. سول جىلى كووپەراتيۆتىڭ جىلدىق تازا كىرىسى 400 مىڭ يۋانعا جەتكەن.

2019 - جىلى سەلبەستىك كووپەراتيۆى قۇرىلعان كەزدە جالپى اۋماعى 1100 شارشى مەترلىك 2 قورا سالىنىپ، 150 سيىر عانا باعۋعا بولاتىن ەدى. باعىمشىلىق كولەمىن كەڭەيتۋ ٴۇشىن بيىل ٴسالينۇر جاڭادان تاعى جالپى اۋماعى مىڭ شارشى مەترلىك 2 قورا سالىپ، باعىلاتىن سيىر سانىن 300 گە جەتكىزۋدى جوسپارلاپ وتىرىپتى. بۇل ونىڭ العاشقى قادامداعى نىساناسى عانا ەكەن.

«پارتيانىڭ 19 - قۇرىلتايىندا العا قويىلعان اۋىل - قىستاقتى گۇلدەندىرۋ ستراتەگياسى بىزگە بۇرىن - سوڭدى بولىپ كورىلمەگەن تاماشا دامۋ ورايىن ازىرلەپ بەردى. مەن ٴبىر دە ەكى جىل ۋاقىت ىشىندە باعىمشىلىق كولەمىن كەڭەيتۋدى جوسپارلاۋدامىن. مەنىڭ الداعى نىسانام - باعىمشىلىق، مال ٴوسىرۋ، ەت ونىمدەرىن مانەرلەۋ ٴبىر تۇلعالانعان ەگىن، مال شارۋاشىلىق كاسىپورنىن قۇرىپ، كوپتەگەن اۋىلداستارىمنىڭ اۋقاتتانۋ ارمانىن جۇزەگە اسىرۋىنا كومەكتەسۋ» دەدى ٴسالينۇر.