لۋ جۇڭ (ٴوز ٴتىلشىمىز)

سۋرەتتە: 5 - ايدىڭ 2 - كۇنى شينۋىن كەن ونىمدەرى توبى (ىلە) تايشان ياڭگۋاڭ جاڭا تۇرپاتتى قۇرىلىس ماتەريالدارى شەكتى سەرىكتەستىگىنىڭ دارەجەگە ٴبولۋ سەحىندا تەحنيكتەر ٴونىمدى دارەجەگە ٴبولىپ ساراپتاۋدا. ليۋ چىڭگاڭ فوتوسى 

5 - ايدىڭ 2 - كۇنى، تۇسكى دەمالىس ۋاقىتىنان پايدالانعان شينۋىن كەن ىستەرى توبى (ىلە) تايشان ياڭگۋاڭ جاڭا تۇرپاتتى قۇرىلىس ماتەريالدارى شەكتى سەرىكتەستىگى (تومەندە قىسقارتىپ ياڭگۋاڭ فارفورى دەلىنەدى) وڭدەلگەن ونىمدەردى قامبالاۋ، تيەۋ، تاسۋ بانىنىڭ بانجاڭى لەۋىر عۇلام قىزمەتتەستەرىن ۇيىنە قوناققا شاقىردى. «ٴۇيىڭ وتە رەتتى ەكەن!» دەپ لەۋىردىڭ ۇيىنە تۇڭعىش رەت كەلگەن بىرنەشە قىزمەتتەسى ونى ماقتاي جونەلدى.

بىرنەشە جىل بۇرىن لەۋىر قىزمەتتەستەرىن ۇيىنە سيرەك شاقىراتىن، ويتكەنى وتباسى كەدەي بولعاندىقتان كىسى شاقىرۋدان ۇيالاتىن.

150 شارشى مەتر كەلەتىن ٴۇيىن لەۋىر 2018 - جىلى 300 نەشە مىڭ يۋان جۇمساپ سالدىرعان. «بۇرىنعى ابدەن توزىعى جەتكەن توپىراق ٴۇيىنىڭ» سۋرەتى لەۋىردىڭ قولفونىندا ٴالى ساقتاۋلى ەدى. 

ياڭگۋاڭ فارفور زاۆودىندا لەۋىر سياقتى قاراپايىم شارۋادان كاسىپتىك جۇمىسشىعا اينالعاندار 200 دەن اسادى. مۇنىڭ ىشىندە قۇلجا اۋدانى ونيار قالاشىعى بولەكەي قىستاعىنان كەلگەندەردىڭ ٴوزى 100 دەن اسادى. ولار كەدەي بەت - بەينەسىن وزگەرتىپ عانا قالماي، كوپ ساندىسى تەحنيكا شەبەرىنە اينالدى.

پارتيا مۇشەلەرىنىڭ «ۇيرەتۋى، كومەكتەسۋى، جەتەكتەۋىمەن» ديقاندار تەحنيكا شەبەرلەرىنە اينالدى

قۇلجا اۋدانى ي - دۇڭ ونەركاسىپ باقشا رايونى A رايونىنا ورنالاسقان ياڭگۋاڭ فارفورى 2007 - جىلى قۇرىلعان، بولەكەي قىستاعىنان كەلگەن لەۋىر − ياڭگۋاڭ فارفورىنىڭ تۇڭعىش توپتا قابىلداعان قىزمەتكەرى. زاۆودقا كەلۋدەن بۇرىن ەگىستىك جەرى از، ونىڭ ۇستىنە ەشقانداي تەحنيكا يگەرمەگەن لەۋىر كۇندىك جۇمىس ىستەپ وتباسىن اسىرايتىن. 

«كاسىپورىنعا كەلىپ جۇمىسقا ورنالاسۋىم وتباسىمىزدىڭ تۇرمىسىن وزگەرتتى، قازىر ايىنا 5 مىڭ يۋاننان استام ەڭبەكاقى الامىن» دەدى لەۋىر. ول 2021 - جىلى 4 - ايدا «ىلە وبلىسى بويىنشا ەڭبەك ۇلگىسى» بولىپ باعالانعان.

«ياڭگۋاڭ فارفورىندا قازىر 353 جۇمىسشى - قىزمەتكەر بار، مۇنىڭ ىشىندە از ۇلت جۇمىسشى - قىزمەتكەرى 269 ادام، ياڭگۋاڭ فارفورى قۇرىلعان العاشقى مەزگىلدەردە جۇمىسشى - قىزمەتكەرلەر قوسىنى تۇراقتى بولمادى، ويتكەنى شارۋادان كاسىپتىك جۇمىسشىعا اينالۋ وڭاي ٴىس ەمەس ەدى» دەدى ياڭگۋاڭ فارفورى پارتيا ياچەيكاسىنىڭ شۋجيى جاڭ جۋان تانىستىرا كەلىپ. 

قايتكەندە جۇمىسشى - قىزمەتكەرلەردى الىپ قالۋعا بولادى؟ دەگەن ماسەلە جونىندە سول كەزدە ياڭگۋاڭ فارفورى الدىمەن وتباسىلاردى ارالاپ جۇمىسشى - قىزمەتكەرلەرگە مىناداي ەكونوميكالىق ەسەپ جاساپ كورسەتتى: جەرگىلىكتى ورىندا ٴبىر مۋ جەر ەكسە، ەڭ جوعارى كىرىسى 700 يۋاننان اسپايدى؛ ال كاسىپورىندا جۇمىس ىستەسە، ايلىق كىرىسى كەمىندە 800 يۋان بولادى.

ەكونوميكالىق ەسەپ جاساۋدان تىس ياڭگۋاڭ فارفورى باستىسى پارتيا مۇشەلەرىنىڭ ۇيرەتۋ، كومەكتەسۋ، جەتەكتەۋ رولىن ساۋلەلەندىرۋ ارقىلى جۇمىسشى - قىزمەتكەرلەر دەربەس جۇمىس جۇرگىزگەنگە دەيىن ەرىنبەي ۇيرەتتى. «جۇمىسشىلار دەربەس ىستەي الاتىن بولعاندا عانا ولاردا سەنىم ورنادى» دەدى جاڭ جۋان.

قۇلجا اۋدانى ٴۇشون حۇيزۋ ۇلتتىق اۋىلىنان كەلگەن ليۋ جۇن − كۇيدىرۋ سەحىنىڭ قۇمدان باستىعى، قۇمداندى شارلاۋعا جاۋاپتى. شىنى كەرپىشتىڭ كۇيدىرىلۋ بارىسى تۇتاس جاساۋ بۋىنىندا توتەنشە ماڭىزدى. ال كۇيدىرۋ بارىسىندا قۇمداننىڭ تەمپەراتۋراسىن توتەنشە ٴدال مەڭگەرۋ قاجەت، تەمپەراتۋرا پارقى 3 سەلتسي گرادۋستان اسپاۋ كەرەك.

2008 - جىلى كاسىپورىنعا جۇمىسقا قابىلدانعاندا ليۋ جۇن نەبارى 18 جاستا بولاتىن، ورتالاۋدى جاڭا عانا بىتىرگەن. جاسى كىشى بولعاندىقتان ول كەنەرەلەۋ جۇمىسىن ىستەدى. 2012 - جىلى جۇمىس قاجەتىمەن ول وت جاعۋدى ۇيرەنە باستادى. 

«قايسى ۇستازدى الىپ ايتساق تا كوڭىل قويا ۇيرەتەتىن» دەدى تەرەڭ اسەرلەنگەن ليۋ جۇن.

جۋ شىلياڭنىڭ فارفورشىلىقپەن شۇعىلدانعانىنا 30 جىلعا تاياعان، بيىل جىل باسىندا ياڭگۋاڭ فارفورى ونى قۇمدان باسقارۋ جاۋاپتىسى مىندەتىنە ۇسىنىس ەتتى، ول دا ليۋ جۇننىڭ ۇستازى بولدى. «قۇمدان − شىنى كەرپىش ٴوندىرۋدىڭ  وزەگى، وت جاعۋشى بولۋ ٴۇشىن وتە مىقتى تەحنيكالىق قابىلەت قاجەت. ليۋ جۇننىڭ وقۋ تاريحى جوعارى بولماسا دا، ۇيرەنگىش، قىزمەتتە شوگەل» دەدى جۋ شىلياڭ تىلشىگە.

ياڭگۋاڭ فارفورىندا ليۋ جۇن سياقتى قاراپايىم شارۋادان تەحنيكالىق شەبەرگە اينالعاندار 100 دەن اسادى، مۇنىڭ ىشىندە بانجاڭدىق، گرۋپپا باستىعىندىق مىندەتتى ۇستىنە العاندار 20 ادامنان اسادى.

پارتيا قۇرىلىسىن جەتەكشى ەتىپ، كاسىپورىنمەن توعىسىپ، دامۋدى جەبەدى

ياڭگۋاڭ  فارفورىندا عايرات ٴومارجان اتىنداعى ٴبىر جاڭالىق اشۋ قىزمەت كەڭسەسى بار. بولەكەي قىستاعىنان كەلگەن عايرات − ياڭگۋاڭ فارفورىنا ٴبىرىنشى توپتا قابىلدانعان جۇمىسشى. 14 جىلدىق قۇلشىنىس ارقىلى ول قاراپايىم شارۋادان تەحنيكالىق شەبەرگە اينالدى، اسىرەسە ٴونىم ساپاسىن تەكسەرىپ وتكىزىپ الۋ جاعىندا «كورەگەن كوز» بولىپ جەتىلىپ، قايسى كەرپىشتىڭ قاتتىلىق دارەجەسىنىڭ بەلگىلەنگەن ولشەمگە جەتپەگەندىگىنە، بوياۋىنىڭ وشكىندەيتىندىگىنە، ورنىنىڭ اۋىسىپ كەتكەنىنە، جالعاسپاعاندىعىنا قىراعىلىقپەن تۇجىرىم جاساۋدان تىس، دىبىستى تىڭداۋ ارقىلى سىزات بار - جوقتىعىن بىلە الاتىن بولدى. ول ٴوز قىزمەتىن تىندىرىمدى ىستەۋدەن تىس، كاسىپورىننىڭ ەنەرگيانى ۇنەمدەپ، شىعىستى ازايتۋىنا، ونىمدە جاڭالىق اشۋىنا نازار اۋداردى ٴارى ۇلتتىق ەرەكشەلىككە يە ونىمدەردىڭ ٴتۇر - ٴتۇسىن زەرتتەپ اشۋ جاعىندا سىندارلى ۇسىنىس - پىكىرلەردى ورتاعا قويدى. 2009 - جىلى عايرات كوممۋنيستىك پارتيا مۇشەسى بولدى. 2020 - جىلى 11 - ايدا عايرات مەملەكەتتىك ەڭبەك ۇلگىسى داڭقتى اتاعىنا يە بولدى.

عايرات ٴومارجاننىڭ جاڭالىق اشۋ كەڭسەسى 2015 - جىلى قۇرىلعان، ياڭگۋاڭ فارفورى تەحنولوگيا ٴبولىمىنىڭ نەگىزگى باسقارۋشىسى چين حايچۋان مەن عايرات جەتەكشىلىك ەتەدى. سەرىكتەستىكتىڭ 1 - شەبىندەگى 13 تەحنيكالىق تىرەكتىدەن قۇرالعان وزەكتى قوسىن. جاڭالىق اشۋ كەڭسەسى قۇرىلعاننان قازىرگە دەيىن ٴتۇرلى تەحنيكالىق قيىندىقتاردان قامال الىپ، 30 دان استام تەحنيكالىق تىرەكتىنى تاربيەلەدى.

«كاسىپورىن قۇرىلعان كەزدە بارلىق قاجەتتى شيكىزاتتى تۇگەلدەي ىشكەرى ولكەدەن ساتىپ الاتىندىقتان، تاسىمال وزىندىك قۇنى ٴبىرشاما جوعارى ەدى. تەحنيكالىق قامال الۋ ارقىلى قازىر سەرىكتەستىككە قاجەتتى بارلىق شيكىزاتتى شينجياڭنان، مۇنىڭ %60 ىن ىلە اڭعارىنان  ساتىپ الۋدى جۇزەگە اسىردى. تەك وسى ٴبىر ٴتۇردىڭ وزىنەن كۇنىنە 20 مىڭ يۋاننان استام وزىندىك قۇندى ۇنەمدەۋگە بولادى» دەدى چين حايچۋان تىلشىگە.

  عايرات ٴومارجاننىڭ جاڭالىق اشۋ كەڭسەسىندەگى وزەكتى قوسىننىڭ 13 مۇشەسىنىڭ توعىزى پارتيا مۇشەسى. ال، ياڭگۋاڭ فارفورى العاش قۇرىلعان كەزدە نەبارى 6 پارتيا مۇشەسى بار بولاتىن ٴارى ولاردىڭ ٴبارى ىشكەرى ولكەدەن كەلگەندەر ەدى. «كاسىپورىن قۇرىلعاننان كەيىن پارتيا قۇرىلىسىن كاسىپورىندى العا ىلگەرىلەتۋدىڭ <اسىلى> ەتىپ، پارتيا قۇرىلىسى ارقىلى كاسىپورىننىڭ دامۋىنا جەتەكشىلىك ەتىپ، پارتيا قۇرىلىسىن كاسپورىننىڭ دامۋ بارىسىمەن ساباقتاستىرىپ، كاسىپورىننىڭ پارتيا مۇشەلەرى سانى العاشقى 6 ادامنان قازىرگى 37 گە جەتتى» دەدى جاڭ جۋان.

پارتيا مۇشەلەرىنىڭ ۇلگىلىك، باستاماشىلىق رولىن ساۋلەلەندىرۋ ٴۇشىن، ياڭگۋاڭ فارفورىنداعى 37 پارتيا مۇشەسى 39 جۇمىسشى - قىزمەتكەردى جۇپ قۇراپ سۇيەمەلدەدى. پارتيا مۇشەلەرى جۇمىسشى - قىزمەتكەرلەردىڭ قيىنشىلىعىن دەركەزىندە شەشۋدەن تىس، تەحنيكالىق جاقتا جەتەكشىلىك ەتىپ، ولاردىڭ تەحنيكا تەتىگىن تەز يگەرۋىنە كومەكتەستى. 

ليۋ شۋبين گانسۋ ولكەلىك مەحانيكالىق تەحنيك جۇمىسشىلار مەكتەبىن بىتىرگەن، 2014 - جىلى ياڭگۋاڭ فارفورىنا قىزمەتكە ورنالاسقاننان كەيىن تەحنولوگيا بولىمىندە  ساراپتاۋشى بولىپ، شيكزات ماتەريالىن ساراپتاۋ قىزمەتىنە جاۋاپتى بولدى. چين حايچۋاننىڭ جەتەكشىلىگىندە ليۋ شۋبين كاسىپتە تەز جەتىلدى، قازىر تەحنولوگيا بولىمىندە بانجاڭ بولدى.

«ياڭگۋاڭ فارفورىندا مەيلى تەحنيكالىق جاقتا جاڭالىق اشۋ نەمەسە كەدەيلەردى سۇيەمەلدەۋ، قيىنشىلىعى بارلارعا كومەكتەسۋدە بولسىن، بارىندە پارتيا مۇشەلەرى اتويلاپ الدا جۇرەدى، ولار ادەتتەگى جۇمىسشى - قىزمەتكەرلەردىڭ ۇيرەنۋ ۇلگىسى» دەدى ليۋ شۋبين. 

2018 - جىلى ليۋ شۋبين پارتياعا كىرۋ ٴوتىنىشىن تاپسىرعان ەدى، قازىر كوممۋنيستىك پارتيا مۇشەسى بولدى. ليۋ شۋبين بىلاي دەدى: «بۇدان بىلايعى قىزمەت بارىسىندا پارتيا مۇشەسىندىك ۇلگىلىك باستاماشىلىق رولىمدى ساۋلەلەندىرىپ، كاسىپورىننىڭ دامۋى ٴۇشىن ٴتىپتى دە كوپ ۇلەس قوسامىن».

2017 - جىلى 7 - ايدا لەۋىر دە داڭقپەن كوممۋنيستىك پارتياعا مۇشە بولىپ قابىلداندى. بيىل ول جەتەكشىلىك ەتكەن وڭدەلگەن ونىمدەردى قامبالاستىرۋ، تيەۋ، تاسۋ ٴبانى كاسىپورىنداعى باسقا سەحتار ۇيرەنەتىن ۇزدىك بانگە اينالدى.

ياڭگۋاڭ فارفورى پارتيا قۇرىلىسىن جەتەكشى، جاڭالىق اشۋدى قوزعاۋشى كۇش، دارىندىنى تۇتقا ەتىپ، كاسىپورىننىڭ قارىشتاپ دامۋىن ىلگەرىلەتتى. جاقىنعى جىلداردان بەرى، كاسىپورىن ىلگەرىندى - كەيىندى مەملەكەتتىك قۇرىلىس ماتەريالدارى سالاسىنداعى تەحنيكادان جاڭالىق اشۋدىڭ 2 - دارەجەلى سيلىعى، مەملەكەتتىك قۇرىلىس ماتەريالدارى سالاسىنداعى 100 تاڭداۋلى كاسپورىن سيلىعى، مەملەكەتتىك ۇلگىلى جۇمىسشى - قىزمەتكەرلەر  ۇيىمى، اۆتونوميالى رايوندىق ۇلتتار ىنتىماعىنداعى ۇلگىلى ورىن، اۆتونوميالى رايون بويىنشا ۇلتتىق ەرەكشەلىككە يە ونىمدەردى ٴتۇيىندى وندىرەتىن كاسىپورىن، ىلە وبلىستىق ۇزدىك نەگىزگى ساتى پارتيا ۇيىمى سياقتى داڭقتارعا يە بولىپ، پارتيا قۇرىلىسى مەن كاسىپورىننىڭ دامۋى ٴبىرىن - ٴبىرى جەبەيتىن تاماشا اينالىمدى قالىپتاستىردى. 2021 - جىلى كاسىپورىننىڭ تيجارات كىرىسى وتكەن جىلداعى سايكەس مەزگىلدەگىدەن %10، جاڭادان  ارتقان تاپسىرىس %30 جوعارىلادى. «بۇدان بىلاي كاسىپورىن پارتيا قۇرىلىسىن جەتەكشى ەتۋدە ۇزدىكسىز تاباندى بولىپ، پارتيا مۇشەلەرىنىڭ ۇلگى بولىپ جەتەكتەۋى ارقىلى باتىلدىقپەن جاڭالىق اشاتىن، ٴورىس اشا جاسامپازدىق جاراتاتىن دارىندىلار قوسىنىن قۇلشىنا قۇرىپ، كاسىپورىننىڭ دامۋى ٴۇشىن اناعۇرلىم كوپ قوزعاۋشى كۇش ۇستەيمىز» دەدى جاڭ جۋان.