ۋاڭ جيانجۇن: اۋقاتتانعاندا اۋىلداستارىن ۇمىتپادى

حان شاشا (ٴوز ٴتىلشىمىز) جاڭ ۋىنتيڭ (ەرىكتى ٴتىلشى)

”ۋاڭ اعايعا ىلەسىپ ىستەگەنىم وتە دۇرىس بولىپتى“ دەدى 4 - ايدىڭ 27 - كۇنى كۇنەس اۋدانى المالى قالاشىعى تاقىربۇلاق قىستاعىنىڭ تۇرعىنى فاڭ شيڭساي.  ايتسا ايتقانداي ”ۋاڭ اعايدىڭ“ كومەگىندە وسى قىستاقتاعى كوپتەگەن تۇرعىن ەگىنشىلىكپەن اۋقاتتانعان - دى، 2019 - جىلى كۇنەس اۋدانى شيڭنۇڭ اۋىل شارۋاشىلىق ماشينالارى شارۋالار كاسىپتىك سەلبەستىك كووپەراتيۆىنە مۇشە بولعان فاڭ شيڭساي انە سولاردىڭ ٴبىرى.

فاڭ شيڭساي تىلگە تيەك ەتىپ وتىرعان ”ۋاڭ اعاي“ وسى سەلبەستىك كووپەراتيۆىنىڭ القا باستىعى، كەزىندە مەملەكەتتىك ەڭبەك وزاتى اتاعىن ەنشىلەگەن ۋاڭ جيانجۇن بولاتىن. ٴتىلشى ۋاڭ جيانجۇنمەن كەزدەسكەندە ول سەلبەستىك كووپەراتيۆىندەگى شارۋالاردىڭ جۇگەرى اتىزىندا سول كۇنگى تۇقىم ٴسىڭىرۋ جاعدايىن ۇعىسىپ جاتىپتى. 

بيىل 53 جاستاعى ۋاڭ جيانجۇن تاقىربۇلاق قىستاعىندا تۋىپ - وسكەن، ول 18 جاسىندا شەشەسىنە ىلەسىپ ەگىن ەگىپ، ٴىنىسى مەن قارىنداسىنا قارايلاسادى. 1988 - جىلى ول شاعىن ٴتورت دوڭگەلەكتى تراكتوردان پايدالانىپ تاسىمال جۇمىسىمەن شۇعىلدانعاننان باستاپ، قاجىماي - تالماي قۇلشىنۋدىڭ ارقاسىندا 2010 - جىلى شيڭنۇڭ اۋىل شارۋاشىلىق ماشينالارى شارۋالار كاسىپتىك سەلبەستىك كووپەراتيۆىن قۇردى ٴارى ونىڭ القا باستىعى بولدى. اۋىل شارۋاشىلىق ماشينالارىمەن جۇمىس جۇرگىزۋ بارىسىندا ۋاڭ جيانجۇن جاڭا تەحنيكالاردى ۇزدىكسىز ۇيرەنىپ، وزىق اۋىل شارۋاشىلىعى ماشينا - جابدىقتارىن ساتىپ الىپ، تيجارات كولەمىن بىرتىندەپ كەڭەيتتى. 2016 - جىلى وسى سەلبەستىك كووپەراتيۆى ”مەملەكەت بويىنشا اۋىل شارۋاشىلىق ماشينالارى سەلبەستىك كووپەراتيۆىنىڭ ۇلگىسى“ بولىپ باعالانىپ، الىس - جاقىنعا تانىمالى ”اۋقاتتانعان كووپەراتيۆكە“ اينالادى. 

”سەلبەستىك كووپەراتيۆىنە مۇشە بولماعاندا مەن 30 مۋ جەرگە ەگىن ەگەتىنمىن، سەلبەستىك كووپەراتيۆىنە مۇشە بولعاننان كەيىن 300 مۋعا كوبەيتىپ، جىلىنا 100 نەشە مىڭ يۋان كىرىس كىرگىزەتىن بولدىم“ دەدى فاڭ شيڭساي قۋانىشتى بەينەدە. بىرتىندەپ اۋقاتتانعان ۋاڭ جيانجۇن اۋقاتتانعاندا اۋىلداستارىن ەستەن شىعارماي، ماڭايىنداعى قيىنشىلىعى بار بۇقاراعا بەلسەنە كومەكتەستى. ول قيىنشىلىعى بار وتباسىلارىن وزىمەن ىلەسىپ اۋىل شارۋاشىلىق ماشينالارىن جۇرگىزۋگە ىرىقتىلىقپەن باستادى، ولارعا جەر جىرتۋدى، تۇقىم ٴسىڭىرۋدى، ٴدارى شاشۋدى قولما - قول ۇيرەتتى... ۋاڭ جيانجۇننىڭ ىقىلاستى كومەگىندە 10 نەشە كەدەي وتباسى بىرتىندەپ اۋقاتتانۋ جولىنا ٴتۇستى.

 ”2017 - جىلى مەن سەلبەستىك كووپەراتيۆىنە كەلىپ، تراكتور جۇرگىزۋدى ۇيرەنىپ قانا قويماي، ەلەكترمەن دانەكەرلەۋدى دە ۇيرەندىم. قازىر مەن دە تەحنيكاعا جەتىلدىم“ دەدى وسى سەلبەستىك كووپەراتيۆىنىڭ مۇشەسى ەلنۇر جۇنىسقان ۇلى قۋانىشتى بەينەدە.

سەلبەستىك كووپەراتيۆى قارجى، ماشينا - جابدىقتارى، تەحنيكا جانە ينفورماتسيا سياقتى بايلىق باسىمدىعىنا سۇيەنىپ، ىرىقتىلىقپەن بۇرىلىس جاساپ، ديقانداردىڭ قولىنداعى بىتىراندى جەرلەردى اينالىمعا سالىپ، سەلبەستىك كووپەراتيۆى تۇقىم، حيميالىق تىڭايتقىش، اۋىل شارۋاشىلىق دارىلەرىمەن ٴبىر تۇتاس قامداپ، ٴبىر تۇتاس ەگىن ەگىپ، جيناپ، ەگىنجايدى ٴبىر تۇتاس باسقارىپ، ەگىمشىلىكتىڭ وزىندىك قۇنىن تومەندەتۋمەن بىرگە، ديقانداردىڭ كىرىسىن ارتتىرۋدىڭ ٴونىمدى جولىن تاپتى. 

قىستاق تۇرعىنى چىن كايدۇڭ ٴار جىلى جەردى اينالىمعا سالۋ ارقىلى مىڭ مۋ جەردى كوتەرمەگە الىپ، ٴبيداي، قانت قىزىلشاسى سياقتى ەگىس داقىلدارىن ەگىپ، جىلىنا 300 دە 400 مىڭ يۋان كىرىس كىرگىزەدى. ”ٴار جىلى الدىمەن اتىزعا تىڭايتقىش بەرىپ، كۇزگى جيىن - تەرىننەن كەيىن ەسەپ جاسايمىز، وسىلاي ىستەگەندە قارجىنى اينالىمعا سالۋعا، جەردى باتىلدىقپەن كوتەرمەگە الۋعا بولادى“ دەدى چىن كايدۇڭ. 

ۋاڭ جيانجۇننىڭ دەن قويا تيجارات جۇرگىزۋىندە سەلبەستىك كووپەراتيۆى جاڭادان قۇرىلعان كەزدەگى 10 ادام، 5 اۋىل شارۋاشىلىق ماشينا - جابدىعىنان قازىر دامىپ 56 مۇشەسى، 80 نەن استام اۋىل شارۋاشىلىق ماشينا - جابدىعى، 20 دان استام جۇمىسشىسى بار، جالپى 5 مىڭ مۋدان استام جەردى اينالىمعا سالاتىن بولدى. جۋىقتا سەلبەستىك كووپەراتيۆىنىڭ بارلىق اۋىل شارۋاشىلىق ماشينا - جابدىقتارى تۇتاس وبلىستىڭ جەر - جەرىندە كوكتەمگى ەگىس جۇمىسىن ٴبىر ۋاقىتتا ورىستەتىپ، قازىرگە دەيىن 4 مىڭ مۋدان استام جەرگە تۇقىم ٴسىڭىرىپ بولدى.

”مۇنان بىلاي ٴبىز اناعۇرلىم كوپ وسىزاماندانعان جوعارى عىلىم - تەحنيكالىق اۋىل شارۋاشىلىق ماشينالارىن ەنگىزىپ، اناعۇرلىم كوپ ادامنىڭ سەلبەستىك كووپەراتيۆىنە مۇشە بولۋىن ٴۇمىت ەتەمىز، ولاردىڭ سەلبەستىك كووپەراتيۆىن ۇلعايتىپ، الۋەتتەندىرۋ ارقىلى كوپشىلىكتى بىرگە اۋقاتتانۋعا باستايمىز“ دەدى ۋاڭ جيانجۇن. 

سۋرەتتە: ۋاڭ جيانجۇن (وڭدا) ديقاندارمەن پىكىر اۋىستىرۋدا. 

سۋرەتتى جاڭ ۋىنتيڭ تارتقان