ەرىكتى ٴتىلشى شياۋ حۋا حابارلايدى. ”وتباسىمىز 10.5 مۋ جەرگە قارا ورىك ەككەن، ەكونوميكالىق ونىمدىلىگى جاقسى، كىرىسى جوعارى، بىلتىر 220 مىڭ يۋان تازا كىرىس كىرگىزدىك، بۇل باسقا داقىلداردى ەگۋدەن كىرەتىن كىرىستىڭ نەشە ەسەسىندەي. قازىر مەملەكەتتىڭ ساياساتى جاقسى، قاتىناس قولايلى، ساتۋدان ۋايىمدامايمىز“ دەدى 4 ـ ايدىڭ 12 ـ كۇنى باقتا  جۇمىس ىستەپ جۇرگەن شىن جۇنحۋانىڭ قۋانىشى قوينىنا سيماي.

شىن جۇنحۋا قورعاس اۋدانى چيڭشۇيحى قالاشىعى قوسارىق 1 ـ قىستاعىنىڭ تۇرعىنى، قارا ورىكتى 2016 ـ جىلدان باستاپ ەگە باستاعان، وسىندا تۇڭعىش توپتا قارا ورىك ەككەن قىستاق تۇرعىنى. ”بيىل تىڭايتقىشتى ۇستەمەلەپ بەرىپ، باپتاۋدى كۇشەيتتىم، تازا كىرىسىمدى 300 مىڭ يۋاننان اسىرۋعا قۇلشىنامىن“ دەدى ول ٴۇمىتتى بەينەدە جۇزىنەن قۋانىش كۇلكىسى ەسىپ.

ۇعىسۋعا قاراعاندا، قارا ورىك سوڭعى جىلدارى ىشكى ولكەدەن شينجياڭعا ەنگىزىلگەن سورت بولىپ، تۇتىنۋشىلاردىڭ قارسى الۋىنا يە بولعان.

2015 - جىلى بيڭتۋان 4 - شىسى 62 - تۋاننىڭ ٴىشىنارا تۇرعىندارى قارا ورىك سياقتى جاڭا جەمىس سورتتارىن ەنگىزدى. قوسارىق 1 ـ قىستاعىنىڭ سول كەزدەگى اماندىق قورعاۋ مەڭگەرۋشىسى يوۋ زىڭبين ەگىنشى تيان سۇنحۋانىڭ شابىتتاندىرۋىندا، 2016 ـ جىلى 16 مۋ جەرىنە قارا ورىك ەگەدى، سونداي ـ اق شىن جۇنحۋا، ۋ ۋانفىڭ، ۋ ۋانچۋان، گى فىڭ قاتارلى قىستاق تۇرعىندارىن 200 مۋدان استام جەرىنە قارا ورىك ەگۋگە اتتانىسقا كەلتىرەدى. گى فىڭ 120 مۋ جەردى كوتەرمەگە الىپ، تۇگەلدەي قارا ورىك ەگىپ، جىلىنا  ٴبىر ميلليون يۋاننان استام تازا كىرىس كىرگىزەدى. ۋ ۋانفىڭ 16 مۋ جەرىنە قارا ورىك ەگىپ، جىلدىق كىرىسىن 250 مىڭ يۋانعا جەتكىزەدى. كىرىستىڭ جوعارى، ونىمدىلىگىنىڭ جاقسى ەكەنىن كورگەن باسقا قىستاق تۇرعىندارى دا ىركەس ـ تىركەس قارا ورىك ەگۋگە كىرىسەدى، قازىر ەگىلگەن جەر كولەمى 1000 مۋدان استى.

سوڭعى جىلداردان بەرى قىستاق تۇرعىندارىنىڭ كىرىسىن ارتتىرۋ ٴۇشىن، بۇل قىستاق جەمىس ورمان شارۋاشىلىعىن بار كۇشپەن دامىتىپ، ىلگەرىندى ـ كەيىندى جاڭا سورتتى تاس الما، اعاش باسىندا قۇرعايتىن ورىك، قىشقىل تاس الما سياقتى ساپالى جەمىس سورتى تۇرلەرىن ەنگىزدى. قىستاقتىڭ 3695 مۋ جەرىنىڭ 2227 مۋىنا جەمىس ورمانى ەگىلىپ، %60.27 ىن ۇستادى. 2022 - جىلى بۇكىل قىستاقتاعى ديقانداردىڭ كىسى باسىندىق ورتاشا تازا كىرىسى 16 مىڭ 320 يۋانعا جەتتى، %75 تەن جوعارى بولدى. قىستاق تۇرعىندارى جەمىس ورمانى ەگىمشىلىگى ارقىلى قالانىڭ ”جەمىس - جيدەك قاجەتىن“ قاناعاتتاندىرىپ قالماستان، وزدەرىنىڭ قالتاسىن دا قامپايتتى.

قازىر جەمىس ورمان شارۋاشىلىعى قوسارىق 1 ـ قىستاعىنداعى تۇرعىنداردىڭ كىرىسىن ارتتىرۋ تۇيىنىنە اينالدى، بۇل قىستاق اۋىل شارۋاشىلىق كاسىپ قۇرىلىمىن رەتتەۋ بارىسىندا چيڭشۇيحى قالاشىعىنىڭ الدىڭعى لەگىندە ٴجۇردى.

قوسارىق 1 - قىستاعى تۇرعىندار كوميتەتىنىڭ مەڭگەرۋشىسى ران حۇڭشي بىلاي دەدى: ”سوڭعى جىلدارى قىستاعىمىز اۋىل شارۋاشىلىعىنىڭ كاسىپ قۇرىلىمىن ۇزدىكسىز رەتتەپ، ەرەكشە جەمىس ورمانى شارۋاشىلىعىن زور كۇشپەن دامىتىپ، ٴبىرشاما جاقسى ەكونوميكالىق ونىمدىلىككە قول جەتكىزدى. قىستاق تۇرعىندارىنىڭ جەمىس اعاشتارىن ەگۋ بەلسەندىلىگى جوعارىلادى، سوڭعى جىلدارى ەگىلگەن جەر كولەمى ۇزدىكسىز ارتتى، بيىل تاعى 20 قىستاق تۇرعىنى 300 مۋ جەرگە جاڭادان جەمىس اعاشىن ەكتى. قىستاق ’ەكى كوميتەتى‘ قىستاق تۇرعىندارىن جەمىس اعاشتارىن باپتاپ - باسقارۋ تەحنيكاسىنا باۋلۋ تەبىنىن ۇزدىكسىز ارتتىرىپ، قىستاق تۇرعىندارىن جاقسى جەمىس اعاشتارىن ەگۋگە جەتەكتەۋمەن بىرگە، جەمىس اعاشتارىن ويداعىداي باپتاپ، قىستاق ەكونوميكاسى دامۋىنىڭ ساپاسىن جوعارىلاتىپ، ونىمدىلىگىن ارتتىرۋدى، جوعارى ساپالى دامۋدى جۇزەگە اسىردى“.