توعىزتاراۋ اۋدانىنداعى حالىقتىق تۇسەلحانا اۋلاسىنان كورىنىس.     مۇزاپپار فوتوسى

ەرىكتى تىلشىلەر مۇزاپپار، لۇي جياچي حابارلايدى. تاياۋ جىلداردان بەرى توعىزتاراۋ اۋدانىندا وزگەشە حالىقتىق تۇسەلحانا كاسىبى قاۋىرت گۇلدەندى. مۇنداي حالىقتىق تۇسەلحانالاردىڭ كوبى تۇرعىندار ٴوز اۋلاسىنا قاراپايىم وزگەرىس ەنگىزگەننەن كەيىن تيجارات جۇرگىزىپ، ساياحاتشىلارعا بايىرعى ۇلتتىق سالت ـ سانانى سەزىندىرىپ، تۇتىنۋشىلاردىڭ قارسى الۋىنا يە بولدى. كوپتەگەن بۇقارا اۋىل - قىستاقتاعى شاعىن اۋلاسىنا سۇيەنىپ ”تيجاراتشىعا اينالىپ“، اۋقاتتانۋ جولىنا ٴتۇستى.

جىرعالاڭ اۋىلى كوگەرسىن قىستاعىنىڭ ماڭىندا شاشى، ٴتالىم، ۇلكەن مۇقىر سياقتى كورىنىس رايوندارى بار. 8 ـ ايدىڭ 13 ـ كۇنى ٴتىلشى كوگەرسىن قىستاعىنداعى ٴبىر حالىقتىق تۇسەلحاناعا كىرىپ، تازا، رەتتى شاعىن اۋلادا جاتىن ٴۇي، قوناق ٴۇي، تازالىق بولمەسى سياقتى قۇرىلعىلاردىڭ تولىق ەكەنىن، بۇرىنعى قاراپايىم اشەكەيلەۋ ستيلىمەن اشەكەيلەنگەن ٴۇيدىڭ ايرىقشا اسەم ٴتۇس العاندىعىن كوردى. شاعىن اۋلاعا تاعى سامالدىق سالىنىپ، ۇستەل، ورىندىق قويىلعان، ساياحاتشىلار وسى ارادا شاي ٴىشىپ، الىسقا كوز تاستاپ، تابيعات كورىنىسىنەن ٴلاززات الادى. ٴۇرىمجى قالاسىنان كەلگەن ساياحاتشى سۋ ۋىنبونى دوۋيىن پاراقشاسىنداعى سۋرەتتەي كوركەم توعىزتاراۋدىڭ كورىنىس ٴوڭىرى بىردەن باۋرايدى دا، دوستارىمەن بىرگە توعىزتاراۋعا ساياحاتتاپ، اسەم كورىنىستى تاماشالاپ، اۋىل ـ قىستاقتىڭ ”قاراپايىم تىرلىگىن“ سەزىنۋگە كەلەدى.

سۋ ۋىنبو بىلاي دەدى: ”دوستارىممەن بىرگە شاشى، كولدەنەڭ سياقتى كورىنىس رايوندارىنا بارىپ ساياحاتتادىم، توعىزتاراۋدىڭ كورىنىسى ينتەرنەتتە تانىستىرىلعاننان دا كوركەم ەكەن. تاڭداۋىمىز وسى حالىقتىق تۇسەلحاناعا ٴتۇستى، ويتكەنى بۇل جەر كورىنىس رايونىنا جاقىن، ورتاسى وتە ٴجايلى، تاماعى دا ٴدامدى ەكەن“.

تۇتاس وڭىرلىك ساياحاتتىڭ ماڭىزدى دانەكەرى بولعان حالىقتىق تۇسەلحانا − بەكەر تۇرعان بايلىقتى كادەگە جاراتۋ، مول ساياحات ونىمدەرىمەن قامداۋ، ەگىنشى - مالشىلاردى كىرىستەرىن ارتتىرىپ بايۋعا جەتەكتەۋ سياقتى كوپ ٴتۇرلى رولىن ساۋلەلەندىرىپ، ساياحاتشىلارعا ”شالعايدان قونالقى“ ازىرلەپ بەرۋمەن بىرگە، اۋىل - قىستاقتى گۇلدەندىرۋگە دە قوزعاۋشى قۋات ۇستەدى.

ديشۇي دانپيڭ حالىقتىق تۇسەلحاناسىنىڭ جاۋاپتىسى قاھار كوگەرسىن قىستاعىنىڭ تۇرعىنى، بيىل قىستاق ”ەكى كوميتەتى“ مەن قىستاقتا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ قولداۋىندا جانە جول كورسەتۋىندە ول ٴوزىنىڭ بوس تۇرعان ۇيلەرىن حالىقتىق تۇسەلحانا ەتىپ وزگەرتتى ٴارى حالىقتىق تۇسەلحانانى باسقارۋ ـ باۋلۋ كۋرسىنا قاتىناسۋ ارقىلى حالىقتىق تۇسەلحانا تيجاراتشىلارىنىڭ قاتارىنا قوسىلدى. قاھار بىلاي دەدى: ٴبىزدىڭ بۇل تۇسەلحانادا جالپى 14 بولمە قوناق ٴۇي بار، شاشى ورمان باقشاسىنا، ٴتالىم كورىنىس رايونىنا ٴبىرشاما جاقىن ورنالاسقان. وسى ٴبىر مەزگىلدە سىرت جەرلەردەن كەلگەن ساياحاتشىلار ەرەكشە كوپ بولدى، تۇسەلحانامىز ٴار كۇنى لىق تولادى، ساياحاتشىلار توراپ تەكشەسىندە الدىن الا تاپسىرىس بەرەدى.

كەلەسى قادامدا توعىزتاراۋ اۋدانى حالىقتىق تۇسەلحانانىڭ ۇستەمە قۇنىن ارتتىرۋدى ارقاۋ ەتىپ، باسەكەلىك قۋاتىن جوعارىلاتىپ، ”حالىقتىق تۇسەلحانا + ۇلتتىق سالت ـ سانا“، ”حالىقتىق تۇسەلحانا + ويىن ـ ساۋىق نومىرلەرى“، ”حالىقتىق تۇسەلحانا + بەيزاتتىق مادەني مۇرا“، ”حالىقتىق تۇسەلحانا + دوستاسۋ“ سياقتى توعىستىرۋ تاسىلدەرى جونىندە ۇزدىكسىز ىزدەنىس جاساپ، ”حالىقتىق تۇسەلحانا +“ جاڭا كاسىپ كۇيىن قالىپتاستىرىپ، ساياحاتشىلارعا اناعۇرلىم مول ساياحات اسەرىن سيلاماق.