□ انار بۇلت \ شينجياڭ گازەتىنىڭ ءتىلشىسى ءجازيرا نەسىپبەك، ەرىكتى ءتىلشى ۋاڭ شيڭيۇي

”بيىلعى ءتۇسىم ايتارلىقتاي بولدى، جازدىق الاقاتتىڭ مۋ باسىندىق ءتۇسىمى 200 كيلوگرام اينالاسىندا بولىپ، 200 مىڭ يۋانعا جۋىق ساتىلدى؛ كۇزدىك الاقاتتىڭ مۋ باسىندىق ءتۇسىمى 100 كيلوگرام اينالاسىندا، ونىمدىلىگى دە وتە جاقسى“، - دەدى 10 - ايدىڭ 20 - كۇنى جىڭ اۋدانى تولى قالاشىعى وشاقباي باتىس قىستاعىنداعى الاقات ەگەتىن ۋاڭ لەي.

قازىر جىڭ اۋدانىندا 100 مىڭ مۋدان استام جەردەگى كۇزدىك الاقات جينالىپ بولدى. ءونىم تۋرالى ءسوز بولعاندا، الاقات ەگەتىن ديقانداردىڭ جۇزىنەن كۇلكى ەستى. مول ءونىم شاتتىعى ەگىمشىلىك وتباسىلارىنىڭ قۇلشىنىسىنان عانا ەمەس، جىڭ اۋدانىنىڭ اۋىل شارۋاشىلىق تەحنيكتەرىنىڭ جەتەكشىلىگىنەن دە ايرىلا المايدى.

جەرگىلىكتى ورىننىڭ الاقات ەگۋدە ادام كۇشىمەن ىستەۋدىڭ وزىندىك قۇنى جوعارى، ونىمدىلىگى تومەن بولۋ ماسەلەسىن شەشۋ ءۇشىن، بىرنەشە جىلدىڭ الدىندا ەگىمشىلىك ءىرى وتباسى ۋاڭ لەي الاقاتتى ماشينالاندىرىپ ەگۋ ۇلگىسىن الدىمەن قاراستىرىپ، الاقاتتى كوشىرىپ ەگۋ ماشيناسىن ەنگىزىپ، ەگۋ، ءدارى شاشۋ، تىڭايتقىش بەرۋ، ارام ءشوپ وتاۋ سياقتى ەگىس اتىزدارىن باسقارۋ بۋىندارىندا ماشينالاندىرىپ جۇمىس جۇرگىزدى.

”اۋدان، اۋىل ەكى دارەجەلى اۋىل شارۋاشىلىق تەحنيكتەرى دە بىزگە كوپتەگەن تەحنيكالىق جەتەكشىلىك ەتتى، مىسالى، الاقات ەگۋدىڭ قاتار ارالىعىن 2 مەتردەن 3 مەترگە وزگەرتۋ، ءتۇپ ارالىعىن 0.75 مەتردەن ءبىر مەترگە وزگەرتۋ ماشينالاسقان جۇمىستى جۇزەگە اسىرۋعا ءتىپتى دە ءتيىمدى“، - دەدى ۋاڭ لەي.

ەگىمشىلىك وتباسىلارىنىڭ ونىمدىلىگىن جوعارىلاتۋ ءۇشىن، جىڭ اۋدانى مەملەكەتتىك الاقات ينجەنەرياسى تەحنيكاسىن زەرتتەۋ ورتالىعىنان 7 سورت (جۇيە)، 121 مىڭ 500 ءتۇپ الاقات مايساسىن ەنگىزىپ، 150 مۋدان استام الاقات قالامشا باقشاسىن قۇرىپ، جىڭ الاقاتىنىڭ سورت قۇرىلىمىن ساپالىلاندىرىپ، الاقات كاسىبىنىڭ باياندى، ورنىقتى دامۋىن قامتاماسىز ەتتى.

”’نيڭچي 10 - ءنومىرلىنى‘ ەككەندىگىمىزدەن، بيىل الاقاتىمىزدىڭ مۋ باسىندىق ءتۇسىمى 50 كيلوگرام مولايىپ، كىرىس بىلتىرعىدان 40 مىڭ يۋان ارتتى“، - دەدى تولى قالاشىعى وشاقباي باتىس قىستاعىنداعى الاقات ەگۋشى ما چاۋ تەبىرەنە.

”نيڭچي 10 - ءنومىرلى“ نيڭشيادان ەنگىزىلگەن ساپالى، جوعارى ءونىمدى سورت، جەرگىلىكتى ورىننىڭ ءداستۇرلى ەگىمشىلىك سورتتارىمەن سالىستىرعاندا، اعاش بۇتاقتارى مىقتى، تابيعي بۇتاقتانۋ قۋاتى كۇشتى، بۇتاقتارى جۇمساق، باپتاۋعا وڭاي بولۋ سياقتى ارتىقشىلىقتارعا يە، ەڭ ماڭىزدىسى، مۋ باسىندىق ءونىمى ادەتتەگى سورتتاردان％ 30 جوعارى بولىپ، بازاردا باسەكەلىك قۋاتقا يە. 2021 - جىلى سىناق رەتىندە ەگۋدەن باستاپ، 2022 - جىلى كەڭ كولەمدە جالپىلاستىرىلدى، قازىر ”نيڭچي 10 - ءنومىرلى“ جىڭ اۋدانىندا 40 مىڭ مۋدان استام جەرگە ەگىلدى.

”العاشىندا بۇقارا ’نيڭچي 10 - ءنومىرلىنى‘ ەگۋدى قالامادى، ءبىز الدىمەن 5 مۋ جەرگە سىناق رەتىندە ەگىپ، ناقتى جەمىس بەرۋ مولشەرى مەن ءونىم مولشەرى ارقىلى ءتۇسىندىرىپ، كوپشىلىكتىڭ بىرگە دامۋدى قالاۋىنا مۇمكىندىك جاسادىق“، - دەدى جىڭ اۋدانى تولى قالاشىعى پارتكومىنىڭ ورىنباسار شۋجيى ياڭ ۋىنحاۋ.

تاماشا ءونىم الۋ ءتىپتى دە كوپ الاقات ەگەتىن شارۋالاردىڭ اۋىل شارۋاشىلىق تەحنيكتەرىمەن بىرگە جاڭا تەحنيكانى سىناپ كورۋىنە، جاڭا سورتتاردى سەزىنۋىنە مۇمكىندىك جاسادى، جىڭ اۋدانىنىڭ الاقات كاسىپ سالاسى دا دەڭگەيىن جوعارىلاتىپ، دارەجەسىن ۇزدىكسىز ءوسىردى.

بيىل جىڭ اۋدانى 500 مۋلىق وسىزاماندانعان الاقات قالامشاسىن ءوسىرۋ ورتالىعىن (قالامشا ءوسىرۋ بازاسى) جاڭادان قۇرىپ، 300 قالامشا ءوسىرۋ قالتقىسىن قۇرىپ، 100 مىڭ مۋدان استام شوعىرلى تۇتاسقان الاقات جاسىل ولشەمدەنگەن ەگىمشىلىك بازاسىن قۇردى. الاقاتتىڭ ءونىم قۇنى جەرگىلىكتى اۋىل شارۋاشىلىعى جالپى ءونىم قۇنىنىڭ ％18.92ىن يەلەپ، الاقاتتىڭ مۋ باسىندىق تازا كىرىسى 5000 يۋاننان اسىپ، 30 مىڭنان استام ادامنىڭ جۇمىس ىستەپ كىرىسىن ارتتىرۋىنا مۇمكىندىك جاسادى، الاقات كاسىپ سالاسى جەرگىلىكتى ورىننىڭ وزىندىك ەرەكشەلىككە يە اۋىل شارۋاشىلىعىنداعى جەتەكشى كاسىپ سالاسىنا اينالدى.