سۋ ارقىلى قىستاقتاردى كوركەيتىپ، شارۋاشىلىقتى شالقىتىپ، حالىقتى اۋقاتتاندىردى

سۋ جۇيەسىنىڭ تۇتاستىرىلۋى كەڭسۋ قالاشىعىنىڭ جوعارى ساپالى دامۋىنداعى ”قاينار بۇلاققا“ اينالدى

كوركەم ورتادا سەيىلدەپ جۇرگەن تۇرعىندار.  (ماتەريال سۋرەت)

تىلشىلەرىمىز گۇلناز مەدەلقان قىزى، گۋ شۋە حابارلايدى. كۇنەس اۋدانى كەڭسۋ قالاشىعى دۇڭفاڭحۇڭ اۋىل شارۋاشىلىق سەلبەستىك كووپەراتيۆىنىڭ داۋالىنداعى 26 مەتر كەلەتىن سىزبا سۋرەت الىستان كوز تارتادى. سىزبادا اشىق اسپان، تۇنىق سۋ، قۇنارلى توپىراق، كول جاعاسىنداعى سامالدىق، سۋدا جۇزگەن ۇيرەك - قاز، شورشىعان بالىق، الاڭقىدا دەنە شىنىقتىرعان، شۇيىركەلەسكەن ادامدار شوعىرى ادەمى كەسكىندەلگەن. بيىل جىل سوڭىندا سۋ جۇيەسىن تۇتاستىرۋ، سۋ ارقىلى اۋىل - قىستاقتى گۇلدەندىرۋ نىسانىنىڭ جۇزەگە اسۋىمەن بۇل سىزبا سۋرەتتەگى كوركەم كورىنىس رەالدىققا اينالىپ، كەڭسۋ قالاشىعىنداعى قازاق ٴمالى قىستاعى، كوكتوبە قىستاعى، قۇروزەك قىستاعى، كەڭسۋ قىستاقتارىنا كەرەمەت كورىك سيلاپ، ونداعى حالىقتىڭ تىرشىلىك سيمفونياسىنا وزگەشە اۋەن قوستى. 

كۇنەس اۋدانى كاڭچۋان ساۋساقشا تاڭقۋراي مانەرلەۋ سەلبەستىك كووپەراتيۆى سۋ جۇيەسىن تۇتاستىرۋ، سۋ ارقىلى اۋىل - قىستاقتى گۇلدەندىرۋ نىسانىنىڭ يگىلىگىن كورۋشىلەردىڭ ٴبىرى. سەلبەستىك كووپەراتيۆىنىڭ باس جوراسى، پارتيا ياچەيكاسىنىڭ شۋجيى جاڭ گاۋشيا: ”بيىلعى كىرىسىمىز 3 ميلليون 500 مىڭ يۋان بولىپ، بىلتىرعىدان ٴبىر ەسەلەندى، قازىر قالاشىعىمىزعا ات باسىن بۇرار ساياحاتشىلاردىڭ قاتارى بارعان سايىن كوبەيۋدە“ دەدى. 

جازيرا بەردىقوجا قىزى وسى كووپەراتيۆتىڭ جۇمىسشىسى، ول قۋانا بىلاي دەدى: ”وتباسىمنان ۇزاپ شىقپاي - اق جۇمىسقا ورنالاستىم، قازىر ەڭبەكاقىم 4 مىڭ 500 يۋانعا جوعارىلادى، جوعارى مەكتەپتە وقيتىن ەكى بالامنىڭ تۇرمىس قاراجاتىنان الاڭدامايتىن بولدىم“.ٴتىلشىنىڭ 12 - ايدىڭ 26 - كۇنى قاتىستى ورىنداردان ۇعىسۋىنشا، 2021 - جىلى بۇكىل ەل كولەمىندە سۋ جۇيەسىن تۇتاستىرۋ، سۋ ارقىلى اۋىل - قىستاقتى گۇلدەندىرۋ بويىنشا 30 نىسان جۇمىس باستاعان. كۇنەس اۋدانى شينجياڭ بويىنشا بىردەن ٴبىر سۋ جۇيەسىن تۇتاستىرۋ، سۋ ارقىلى اۋىل - قىستاقتى گۇلدەندىرۋ نىسانىنا قول جەتكىزگەن اۋدان بولىپ، نىساندى كەڭسۋ قالاشىعىنىڭ اتالعان ٴتورت قىستاعىندا تياناقتاندىرۋدى ۇيعارادى. نىسانعا جالپى 301 ميلليون يۋان قارجى قوسىلىپ، 2021 - جىلى 11 - ايدىڭ 24 - كۇنى جۇمىس باستاعان، ەكى جىلدا قۇرىلىستى اياقتاتۋ جوسپارى بويىنشا بيىل جىل سوڭىندا قۇرىلىس جۇمىستارى اياقتاپ، كەڭسۋ قالاشىعىنىڭ ەكونوميكاسىنىڭ دامۋىندا، حالىق تۇرمىسىنا تيىمدىلىك جاساۋدا ماڭىزدى رول اتقارعان. سۋ جۇيەسىن تۇتاستىرۋ، سۋ ارقىلى اۋىل - قىستاقتى گۇلدەندىرۋ نىسانى − 100 كيلومەتر وزەن ارناسىن، 20 كيلومەتر اۋىل - قىستاق جولىن جوندەۋدى، 3 جەردەن سۋ كورىنىسىن تاماشالاۋ ورنىن، 5 جەردەن يقۋاتتى سەيىل - سەرۋەن باقشاسىن، 15 جەردەن شاعىن كورىنىس تاماشالاۋ ورنىن، 10 كيلومەتر راشەتكا، 6 كيلومەتر كورىنىس تاماشالاۋ جولىن، 2 مىڭ تەكشە مەترلىك حالىققا قولايلى ماشينا توقتاتۋ الاڭىن سالۋدى قامتيدى. 

كەڭسۋ قالاشىق پارتكومنىڭ مۇشەسى، ۇيىمداستىرۋ، ۇگىت القاسى حاۋ شىڭچۋان: ”قىستاقتاعى كورىنىس تاماشالاۋ ورنى بيىل 5 - ايدا سالىنىپ بولعاننان بەرى جاستاردىڭ ۇيلەنگەندە سۋرەتكە ٴتۇسىپ، ەستەلىك قالدىراتىن كوزەۋلى جەرىنە اينالدى. سىرت جەردەن كەلگەن ساياحاتشىلار كوركەم كورىنىس تاماشالاۋمەن بىرگە، جەرگىلىكتى ورىنداعى از ۇلتتاردىڭ ۇيلەنۋ تويىن تاماشالاپ، سۋرەتكە ٴتۇسىرىپ، وزگەشە رۋحاني ٴلاززات الادى“ دەدى. 

كەڭسۋ قالاشىق پارتكومنىڭ مۇشەسى، ورىنباسار قالاشىق باستىعى چاۋ حۇڭحۇي بىلاي دەپ تانىستىردى: ”قالاشىعىمىز دا، قىستاعىمىز دا شىت جاڭا بەينەگە ەنىپ، تۇرعىنداردىڭ قونىستانۋ ورتاسى بارىنشا جاقساردى، ينتەرنەتتەگى تانىمالدىلىعى ارتىپ، ماڭايداعى بۇقارانىڭ تۇسەلحانا اشۋ سەنىمدەرى كۇشەيە ٴتۇستى. قازىرگە دەيىن قالاشىعىمىزدا 26 قوناق ٴۇي جانە حالىقتىق تۇسەلحانا تيجارات جۇرگىزۋدە، 8 حالىقتىق تۇسەلحانا جابدىقتالۋ ۇستىندە. كۇنىنە مىڭ ساياحاتشى قابىلداي الادى. بۇل قالاشىعىمىزداعى 2 مىڭ 350 دەن استام بۇقارانىڭ جۇمىستانۋ ماسەلەسىن شەشىم ەتتى“.

كەڭسۋ قالاشىعى كوركەم تابيعات كورىنىسى مەن مول سۋ بايلىعىنان پايدالانىپ، ”تۇنىق سۋ، جاسىل تاۋ − باعالى بايلىق“ ۇستانىمىن امالياتتا ايگىلەۋمەن بىرگە، ساياحاتتىڭ جاڭا كاسىپ كۇيىن دامىتۋعا كۇش سالىپ، حالىقتى بايۋ جولىنا باستادى. بۇل تەك العاشقى قادام عانا، كەڭسۋ قالاشىعى جاڭا دامۋ كوزقاراسىنا تاباندى بولىپ، جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدىڭ ىلە امالياتىن ايگىلەۋگە كۇش سالۋدا.