ٴتىلشىمىز لۋ جۇڭ، ۋاڭ ليلي حابارلايدى. كوكتەم مەرەكەسى قارساڭىندا  شاتتىققا تولى ”قىستاق كەشى“ قۇلجا قالاسى بايانداي قالاشىعى گانگوۋ قىستاعىندا سالتاناتپەن باستالدى.

قىستاقتىڭ ”ەكى كوميتەتى“ مەن ىلە وبلىستىق بازاردى باقىلاۋ ـ باسقارۋ مەكەمەسىنىڭ گانگۋ قىستاعىندا تۇراتىن قىزمەت اترەتىنىڭ بىرگە قۇلشىنۋىندا، 2023 ـ جىلى گانگۋ قىستاعىنىڭ كوللەكتيۆ كىرىسى 2 ميلليون 860 مىڭ يۋانعا جەتتى، سونداي ـ اق بايانداي قالاشىعىندا قىستاق كوللەكتيۆى پايدا ٴبولىسىن الدىمەن جۇزەگە اسىردى.

”قىستاق كەشى“ ساحناسى ادەمى بولماعانىمەن كونسەرت نومىرلەرى تارتىمدى، مەرەكەلىك تۇسكە جانە اۋىل تىنىسىنا تولى بولدى. ”قىستاق كەشىندەگى“ ٴدامدى تاعامدار باسەكەسىنە 30 وتباسى قاتىناستى. ٴيىسى بۇرقىراعان پالاۋ، ٴدامى ٴتىل ۇيىرەتىن بال كۇلشە، اشتى - تۇشتى جاسالعان تاۋىق ەتى سياقتى داستارحان تولى ٴدامدى تاعامداردى قىستاق تۇرعىندارى اۋىز جاپپاي القادى.

ارقالارىنا شار قىستىرىپ جارۋ، تەلەفوندا شاشۋعا تالاسۋ، قاعاز ستاكان جوتكەۋ سياقتى ويىندار قىستاق تۇرعىندارىن اۋىق - اۋىق شات كۇلكىگە بولەدى. ”بۇل گانگۋ قىستاعىنىڭ تۇڭعىش رەت وتكىزگەن كولەمدى بىرلەسكەن ساۋىق كەشى قيمىلى، كوپشىلىك ەرەكشە كوڭىلدى بولدى، بۇدان كەيىن جىل سايىن وسىنداي قيمىلداردىڭ وتكىزىلىپ تۇرۋىن ٴۇمىت ەتەمىن“ دەدى قىستاق تۇرعىنى مۇيەسار تۇرداحۇن.

”’قىستاق كەشى قيمىلىن‘ وتكىزۋ قىستاق تۇرعىندارىنا شاتتىق باعىشتاۋ ٴۇشىن بولدى. 2024 ـ جىلى گانگۋ قىستاعى قىستاقتىڭ ٴىس جۇزىندىك جاعدايىن تياناق ەتىپ، قىستاقتىڭ كوللەكتيۆ شارۋاشىلىعىن دامىتۋ جوباسىن اقىلداسىپ جاساپ، قىستاق كوللەكتيۆى كاسىپورنىن قۇرۋ سياقتىلار ارقىلى قىستاقتىڭ كوللەكتيۆ شارۋاشىلىعىن ونان ارى زورايتىپ، اۋىل ـ قىستاقتىڭ جاپپاي گۇلدەنۋىن ىلگەرىلەتىپ، گانگۋ قىستاعىنداعى تۇرعىنداردىڭ تۇرمىسىنىڭ اناعۇرلىم باقىتتى، اناعۇرلىم تاماشا بولۋىنا مۇمكىندىك جاسايدى“ دەدى ىلە وبلىستىق بازاردى باقىلاۋ ـ باسقارۋ مەكەمەسىنىڭ بايانداي قالاشىعى گانگۋ قىستاعىندا تۇراتىن ٴبىرىنشى شۋجيى، قىزمەت اترەتىنىڭ باستىعى چىن دۇڭمەي.

قىستاق تۇرعىندارى شاعىن ويىن ويناۋدا.         سۋرەتتى لۋ جۇڭ تۇسىرگەن