سۇيىسپەنشىلىككە تولى كۇش جالعاۋ ەس - ءتۇسسىز جاتقان قامارحاندى وياتتى

　　انار بۇلت / شينجياڭ گازەتىنىڭ ءتىلشىسى يۇي جياڭيان

”سالەمەتسىز بە! كارانتيندىك سالاماتتىق كودىڭىزدى كورسەتىڭىز“. 9 - ايدىڭ 5 - كۇنى جۇڭگو مۇنايى شينجياڭ ساتۋ شەكتى سەرىكتەستىگىنىڭ چەرچەندەگى شۋاڭچياۋ جانار ماي پۋنكتىندە، قامارحان تۇرسۇن جانار ماي قۇيعىزۋعا كەلگەن شوفەرلەردىڭ الدىن ادەپپەن توسىپ، ىندەتتەن ساقتانۋ - تىزگىندەۋ تەكسەرۋىن ويداعىداي ىستەۋمەن بىرگە، شوفەرلەرگە كولىكتى حاۋىپسىز جۇرگىزۋدى ۇمىتپاي ەسكەرتىپ جاتتى.

كۇزەتشى بولىپ ىستەيتىن قامارحاننىڭ جۇزىنە قاشاندا كۇلكى ءۇيىرىلىپ تۇرادى. 2 ساعاتتان كەيىن قامارحاننىڭ شارشاي باستاعانىن بايقاپ، ەندى عانا قولى بوساعان قىزمەتتەسى ىرىقتى تۇردە ونىمەن اۋىسىپ، ونى وتىرىپ ءبىراز دەمالىپ الۋعا جىبەردى.

”شارشاپ قالماسىن دەپ قىزمەتتەستەرىم ماعان قاتتى قارايلاسادى“، - دەيدى قامارحان، ال ونى اجال اۋزىنان جانار ماي پۋنكتىندەگى اعا - باۋىر، اپەكە - سىڭلىلەرى قۇتقارىپ قالعان ەدى.

قىزمەتتەستەرى قامارحاندى شۇعىل قۇتقارعان وقيعانى 2016 - جىلى 4 - ايدىڭ 11 - كۇنىنەن باستاپ ايتۋعا تۋرا كەلەدى. سول كۇنى بوسانۋعا تاياعان ول چەرچەن اۋدانىنداعى ءبىر شيپاحاناعا جاتادى، ءىشىن جارىپ بوساندىرۋ وپەراتسياسى ارقىلى قىزى امان - ەسەن دۇنيەگە كەلگەنىمەن، قامارحاننىڭ دەنە مۇشەلەرىنىڭ قىزمەتى كەزدەيسوق السىرەپ، ەس - ءتۇسسىز جاتىپ قالادى. شيپاحاناداعىلار ونىڭ وتباسىنداعىلارعا ناۋقاستىڭ حال ۇستىندە جاتقاندىعىن حابارلاندىرادى. كۇيەۋى اسەنجان ايسا اۋىر سوققىدان ەسەڭگىرەپ ءجۇرىپ ”ەمدەۋدەن باس تارتۋ“ تۋرالى حابارلاماعا قول قويىپ جىبەرەدى.

ءدال وسى ساتتە، شۋاڭچياۋ جانار ماي پۋنكتىنىڭ بۇرىنعى باستىعى ۋاڭ يانحۋا مەن قىزمەتتەستەرى شيپاحاناعا جەتىپ كەلەدى. اۋرۋ توسەگىندە جاتقان قامارحاندى كورگەن ولار ارتقى جۇمىستارىن ىڭعايلاۋدىڭ دايىندىعىن جاساۋ ءۇشىن ۇيىنە قايتقالى تۇرعان اسەنجاندى توقتاتىپ، ”اسەنجان، ءبىز ونى كورلاداعى ۇلكەن شيپاحاناعا اپارايىق، قالايدا ءۇمىت بار ەكەندىگىنە سەن!“، - دەيدى كەسەتە.

ۋاقىت دەگەنىمىز ءومىر، ۋاڭ يانحۋا مەن قىزمەتتەستەرى دەرەۋ بارلىق كۇشتەردى جۇمىلدىرىپ، شيپاحانا اۋىستىرۋ راسمياتىن سۋىت ءبىتىرىپ، قامارحاندى بايىنعولين موڭعۇل اۆتونوميالى وبلىستىق حالىق شيپاحاناسىنا ەمدەۋگە الىپ بارادى. كوپ وتپەي، ەمدەۋ اقىسى قامارحان وتباسىن تاعى دا مۇشكىل جاعدايعا قالدىرادى. حال ۇستىندە جاتقان قامارحاندى قۇتقارۋ ءۇشىن، ۋاڭ يانحۋا مەن قىزمەتتەستەرى تاباندا 6500 يۋان جىلۋ اتايدى؛ ىلە - شالا جۇڭگو مۇنايى شينجياڭ ساتۋ شەكتى سەرىكتەستىگى بايىنعولين وبلىسى بولىمشە سەرىكتەستىگىنىڭ كادر - قىزمەتشىلەرى دە جومارتتىقپەن كومەك كورسەتىپ، مەيىرباندىقپەن 65 مىڭ يۋان جىلۋ اتايدى.

شۋاڭچياۋ جانار ماي پۋنكتىندە 8 قىزمەتشى بار ەدى، جۇمىستاعى قىزمەتشىلەر ۇدايى ۇستەمە جۇمىس ىستەپ، ۋاقىت اجىراتىپ، كەزەكتەسىپ قامارحانعا قارايلاستى.

قىزمەتتەستەرى مەن وتباسىنداعىلاردىڭ مەيىر - سۇيىسپەنشىلىك ءۇنىنىڭ ارقاسىندا، 5 - ايدىڭ 26 - كۇنى، 46 كۇن ەس - ءتۇسسىز جاتقان قامارحان ويلاماعان جەردەن كوزىن اشتى...

”ەسىن جيدى! قامارحان ەسىن جيدى!“. ۋاڭ يانحۋا قۋانىشتان جىلاپ جىبەرىپ، دەرەۋ تەلەفون سوعىپ قۋانىشتى حاباردى قامارحاننىڭ جان اشىرلارىنا جەتكىزەدى. بىرنەشە مينۋتتان كەيىن، ”قامارحان ەسىن جيدى“ دەگەن حابار بايىنعولين وبلىسى بولىمشە سەرىكتەستىگىنىڭ ءارقايسى ۋيچات توپتارىن شارلاپ، ينتەرنەتتە الاقايلاعان ىستىق اعىن بولىپ قۇيىلادى.

2018 - جىلى، قامارحان جانار ماي پۋنكتىنە قايتا ورالىپ، شات كۇلكى، شادىمان ءۇن وسىناۋ ۇلكەن شاڭىراقتا قايتا جاڭعىردى.

قازىرگى تاڭدا، قامارحان ءتۇرلى ورىنداردا جانار ماي پۋنكتىندەگى اسەرلى اڭگىمەنى ۇنەمى وزگەلەرمەن بولىسەتىن بولدى. شۋاڭچياۋ جانار ماي پۋنكتىندەگى قىزمەتتەستەردىڭ مەيىرگە مەيىر جالعاپ 46 كۇن ەس - ءتۇسسىز جاتقان قامارحاندى وياتقان اڭگىمەسى سول توڭىرەككە ونەگەلى ءىس بولىپ تارادى.