انار بۇلت / شينجياڭ گازەتىنىڭ ءتىلشىسى ليۋ ي

جۋىقتان بەرى، اۋات اۋدانى شينحۇيچىڭ اۋىل شارۋاشىلىق ماشينالارى قىزمەت وتەۋ شارۋالار كاسىپتىك سەلبەستىك بىرىككەن كووپەراتيۆىنىڭ القا باستىعى لەي يانگاڭ توتەنشە قاربالاستىققا ءتۇستى، ماقتا تەرۋ باستالعاندىقتان، سەلبەستىك كووپەراتيۆ ءبىر جىل ىشىندەگى ەڭ قاربالاس مەزگىلگە ءوتتى.

10 - ايدىڭ 5 - كۇنى سەلبەستىك كووپەراتيۆى بيىل جاڭادان ساتىپ العان 15 ءىرى تۇرپاتتى، تايلاۋىشتى ماقتا تەرۋ ماشيناسىنا قاراپ تۇرىپ، اۋىل شارۋاشىلىق ماشينالار كاسىبىمەن اينالىسقانىنا 10 نەشە جىل بولعان لەي يانگاڭ ىشتەي قاتتى قۋاندى. ول جەردىڭ تىلكىمدەلۋ ماسەلەسى سالىستىرمالى كورنەكتى بولعان وڭتۇستىك شينجياڭدا اۋىل شارۋاشىلىعىن ماشينالاندىرۋدىڭ جالپىلاسۋى مۇنشاما تەز بولادى دەپ ويلاماعان ەدى. قىسقا عانا نەشە جىل ىشىندە اۋات اۋدانى ماقتا ءوندىرىسىنىڭ تۇتاس بارىستىق ماشينالانۋىن نەگىزىنەن جۇزەگە اسىردى. ول جاۋاپتى بولىپ باسقارىپ وتىرعان سەلبەستىك كووپەراتيۆى دە ماقتانى تۇتاس بارىستىق ماشينالاندىرىپ ءوندىرۋ قۋاتىن ازىرلەپ، قىزمەت وتەۋ ورەسىن بارىنشا جوعارىلاتتى.

شينحۇيچىڭ اۋىل شارۋاشىلىق ماشينالارى قىزمەت وتەۋ شارۋالار كاسىپتىك سەلبەستىك بىرىككەن كووپەراتيۆى اۋات اۋدانىنداعى 10 نەشە شاعىن تيپتەگى سەلبەستىك كووپەراتيۆتەردەن بىرىكتىرىلىپ قۇرىلعان. قۇرىلعان 2 جىلدان بەرى سەلبەستىك كووپەراتيۆى اۋىل شارۋاشىلىق ماشينا - جابدىقتارىن ۇزدىكسىز جاڭالادى، كەزەكتە ءتۇرلى اۋىل شارۋاشىلىق ماشينا - جابدىقتارىنان 1300دەن استامى بار، قۇرىلعان العاشقى كەزدەگىدەن ءبىر ەسەلەندى. سەلبەستىك كووپەراتيۆتىڭ اۋىل شارۋاشىلىق ماشينالار قىزمەت وتەۋى ماقتا، ءبيداي سياقتى كوپتەگەن ءوندىرىس سالاسىنا سايادى، اۋىل شارۋاشىلىق ماشينالار قىزمەت وتەۋى بۇرىنعى جەكە ءبىر بۋىنعا عانا دەن قويۋدان جەر جىرتۋ، تۇقىم ءسىڭىرۋ، ءونىم جيناۋ جالپى بۋىنىنا، جالپى بارىسىنا بىرتىندەپ دامىدى.

”سەلبەستىك كووپەراتيۆىنىڭ جىلدام دامۋىن اۋىل شارۋاشىلىق ماشينالارىن ساتىپ الۋ قوسىمشا قاراجاتىن بەرۋ ساياساتىنان بولە قاراۋعا بولمايدى، قوسىمشا قاراجات بەرۋ ساياساتى ءبىزدىڭ اۋىل شارۋاشىلىق ماشينالارىن ساتىپ الۋداعى قارجى قىسىمىمىزدى جەڭىلدەتىپ، ءبىزدىڭ وزىق اۋىل شارۋاشىلىق ماشينا - جابدىقتارىن جىلدام جالپىلاستىرۋىمىزعا كومەكتەستى“، - دەدى لەي يانگاڭ. سەلبەستىك كووپەراتيۆى قۇرىلعاننان بەرى 15 ميلليون يۋاننان استام قارجى قوسىپ جاڭا تۇرپاتتى اۋىل شارۋاشىلىق ماشينا - جابدىقتارىن ساتىپ العان، اۋىل شارۋاشىلىق ماشينالارىن ساتىپ الۋ قوسىمشا قاراجاتى سەلبەستىك كووپەراتيۆىنىڭ مولشەرمەن ％30تەي ساتىپ الۋ قارجىسىن ۇنەمدەپ قالعان.

وزىق اۋىل شارۋاشىلىق ماشينا - جابدىقتارىن جالپىلاستىرۋ جانە جەردى اينالىمعا سالۋ قىزمەتىنىڭ ىشكەرىلەي ىلگەرىلەتىلۋىنىڭ يگىلىگىن كورگەن اۋات اۋدانىنىڭ اۋىل شارۋاشىلىق ءوندىرىس ورەسى كورنەكتى تۇردە جوعارىلادى. لەي يانگاڭ تانىستىرىپ بىلاي دەدى: سوڭعى جىلدارى سەلبەستىك كووپەراتيۆىنىڭ اۋىل شارۋاشىلىق ماشينالارى قىزمەت وتەگەن جەر اۋدانى 250 مىڭ مۋدان ارتىپ 830 مىڭ مۋعا جەتىپ، اۋىل شارۋاشىلىق ماشينالار قىزمەت وتەۋى ماقتا، ءبيداي سياقتى اۋىل شارۋاشىلىق داقىلدارىنىڭ جەر جىرتۋ، تۇقىم ءسىڭىرۋ، ءونىم جيناۋ جالپى بۋىنىن تۇگەلدەي قامتىپ، اۋىل شارۋاشىلىق ءوندىرىسىنىڭ وزىندىك قۇنىن ۇنەمدەپ، ونىمدىلىگىن ارتتىردى. مەجەلەۋگە قاراعاندا، سەلبەستىك كووپەراتيۆى ماقتانى كولەمدەندىرىپ، شوعىرلاندىرىپ، ولشەمدەندىرىپ وندىرگەننەن كەيىن، مۋ باسىندىق ورتاشا ءوندىرىس وزىندىك قۇنى 300 يۋان تومەندەپ، مۋ باسىندىق ءونىم 100 كيلوگرامنان استام ارتىپ، ونىمدىلىك كورنەكتى جوعارىلاعان.

سوڭعى جىلدارى بۇكىل رايوندا اۋىل شارۋاشىلىق ماشينالارىن ساتىپ الۋ قوسىمشا قاراجاتى ساياساتى ۇزدىكسىز اتقارىلىپ، اۋىل شارۋاشىلىق وندىرىسىمەن شۇعىلداناتىن جەكەلەردىڭ جانە اۋىل شارۋاشىلىق ءوندىرىسى تيجارات ۇيىمدارىنا ساتىپ الۋ قوسىمشا قاراجاتىن بەرۋ كولەمىندەگى ماشينا - جابدىقتارىنىڭ قوسىمشا قاراجات بەرۋگە تيىستىلەرىنىڭ بارىنە قوسىمشا قاراجات بەرىلدى، سونىمەن بىرگە بۇكىل رايوندا ساياساتتىڭ جەتەكشىلىك تەبىنىن بارىنشا كۇشەيتىپ، پلازمالىق ءدارى شاشۋ ماشيناسى، زەردەلى دالمە - ءدال تىڭايتقىش سايكەستىرۋ ماشيناسى، جاساندى سەرىك ارقىلى جول سىلتەلەتىن اۆتوماتتى جۇرگىزۋ جۇيەسى، وسىمدىك باپتاۋ ۇشقىش اپپاراتى سياقتى وزىق، زەردەلى اۋىل شارۋاشىلىق ماشينا - جابدىقتارىن ەنگىزىپ، ۇلگى كورسەتىپ جالپىلاستىرىپ، تۇقىمدى، سۋدى، تىڭايتقىشتى، ءدارىنى، ەڭبەككۇشتى ۇنەمدەيتىن ءبىر توپ جاسىل تەحنيكالىق جابدىق كەڭىنەن قولدانىسقا ءتۇستى.

”بيىل سەلبەستىك كووپەراتيۆى ءبىر توپ وسىمدىك باپتاۋ ۇشقىش اپپاراتىن ەنگىزىپ، ءبيداي اتىزىنا ۇشقىش اپپاراتپەن تىڭايتقىش بەردى. سەلبەستىك كووپەراتيۆى قامدايتىن اۋىل شارۋاشىلىق ماشينالار قىزمەت وتەۋىنە تاعى ءبىر ءتۇر قوسىلدى“. لەي يانگاڭ بىلاي دەدى: بۇرىن ساباعى بويلاپ وسكەن ءبيدايعا تىڭايتقىش بەرۋ قيىن جۇمىس بولاتىن، اسىرەسە، بىتىك وسكەن جەرلەردە مەيلى ادام كۇشىمەن، الدە ماشينامەن بولسىن، اتىزعا دەندەپ كىرىپ تىڭايتقىشتى بىركەلكى بەرۋ وتە قيىن بولاتىن، بۇگىنگى كۇندە بۇل قيىن ماسەلەنى ۇشقىش اپپارات ارقىلى اۋەدەن ءبىر جاقتى ەتىپ، ءبيدايدىڭ ءونىم مولشەرىن ارتتىرۋعا مۇمكىندىك تۋىلدى.

جىل باسىنان بەرى بۇكىل رايون ەگىنشىلەردىڭ اۋىل شارۋاشىلىق ماشينالارىن ساتىپ الۋىنا، قولدانۋىنا قولايلىلىق جاراتۋ ءۇشىن، جۇمىس ءتارتىبىن اناعۇرلىم وڭايلاستىردى. ەگىنشى وتباسىلارىن قول تەلەفون APPى سياقتىلارمەن ناق جۇمىس باسىنا بارماۋ ءتاسىلى ارقىلى قوسىمشا قاراجاتقا ءوتىنىش بەرۋ جۇمىسىن بىتىرۋگە شابىتتاندىرىپ، قوسىمشا قاراجات بەرىلەتىن ماشينا - جابدىقتاردى تەكسەرۋدى الدىن الا كەلىسۋ سياقتى قىزمەت وتەۋلەردى ورىستەتىپ، قوسىمشا قاراجات ءبىتىرۋ ۋاقىت شەگىن 100 قىزمەت كۇنىنەن 35 قىزمەت كۇنىنە قىسقارتتى. بۇكىل رايوندا اۋىل شارۋاشىلىق ماشينالارىن ساتىپ الۋ قوسىمشا قاراجاتىنا ناق اقشا تولەۋ قىزمەتى ءساتتى ءجۇرىلىپ، قازىرگە دەيىن، ناق اقشامەن تولەنگەن اۋىل شارۋاشىلىق ماشينالارىن ساتىپ الۋ قوسىمشا قاراجاتى سوماسى 909 ميلليون يۋانعا جەتىپ، ناق اقشا تولەۋ مولشەرى ％84.87كە، يگىلىكتەنگەن ەگىنشى وتباسىلارى 39مىڭ 833كە، قوسىمشا قاراجات بەرىلگەن ماشينا - جابدىق 43 مىڭ 93كە جەتتى.