انار بۇلت / شينجياڭ گازەتىنىڭ ءتىلشىسى جىڭ جو

”كەلىڭىزدەر، كەلىڭىزدەر، انارىمىزدان اۋىز تيىڭىزدەر، پيامان انارى اتىنا زاتى ساي ما، كەلىپ كورىڭىزدەر“. 9 - ايدىڭ 27 - كۇنى گۇما اۋدانى پييالما اۋىلى حۇينۇڭ انار كاسىپتىك سەلبەستىك كووپەراتيۆىنىڭ جاۋاپتىسى تۇرسۇن قاۋىز جاڭادان جاسالعان قىپ - قىزىل انار شارباتىن قولىنا الىپ، كورىنگەن جاننىڭ بارىنە تانىستىرىپ جاتتى.

گۇما اۋدانى پييالما اۋىلىنىڭ پيامان انارى شينجياڭنىڭ ءىشى - سىرتىنا ايگىلى، بىلتىر تۇرسۇن انار ەگۋدەن 270 مىڭ يۋان كىرىس كىرگىزدى. ”بيىل سەلبەستىك كووپەراتيۆىمىزدىڭ انارىنىڭ ساپاسى ءتىپتى جاقسى، ەندى ءبىر ايدان كەيىن ۇزۋگە كەلەدى، قازىر الدىن الا تاپسىرىس بەرەتىن تەلەفونداردى ۇزبەي قابىلداپ جاتىرمىز“. تۇرسۇن كەزەكتەگى جاعداي بويىنشا بولعاندا، كىرىسى بىلتىرعىدان تومەن بولمايتىندىعىن ەسەپتەپ وتىر.

تۇرسۇننىڭ اۋىلى پييالما اۋىلىندانەگىزىنەن بارلىق وتباسى انار ەگەدى. بۇرىن تاجىريبەسىزدىكتەن، اتىزدى ويداعىداي باپتاپ - باسقارا الماعاندىقتان، اناردىڭ ءونىمى تومەن، ساپاسى دا جاقسى ەمەس ەدى. تۇرسۇننىڭ اتاسى مەن اكەسى اۋىلداعى انار ەگەتىن ءىرى وتباسىلاردان اناردى بۇتاۋدى، تىڭايتقىش بەرۋدى، جەمىس قالدىرۋدى ۇيرەنىپ، ءاربىر قادامعا مۇقيات مامىلەدە بولدى. بىرتە - بىرتە تۇرسۇن وتباسىنىڭ انارىنىڭ ءونىم مولشەرى مەن ساپاسى بارىنشا جوعارىلاپ، سوعان ىلەسە كىرىسى دە ارتىپ، ەگىمشىلىك كولەمىن كەڭەيتە باستادى.

اناردىڭ ساپاسى جاقسى، ءونىمى جوعارى بولعانىمەن، ءبىراق باعاسى قىمباتتاي قويمادى. تۇرسۇن مۇنى ساتۋ كولەمىنىڭ تار بولۋىمەن بايلانىستىرادى.

ساتۋ ارناسىن كەڭەيتۋ ءۇشىن، اكەسى ورتا مەكتەپ تاۋىسقان تۇرسۇنعا ۇرىمجىگە بارىپ، پييالما اۋىلىنىڭ انار ماركاسىن ايگىلەۋ جولىن قاراستىرىپ كورۋگە جىبەرەدى. سونىمەن تۇرسۇن بۇكىل اۋىلدان سول كەزدە ءبىرىنشى بولىپ ۇرىمجىگە بارىپ انار ساتقان ادامعا اينالادى.

وسى مەزگىلدە، تۇرسۇن شاڭحايدان كەلگەن ءبىر ساۋداگەرگە جولىعىپ قالادى، ول قاشقاردىڭ انارى جايلى ەستىگەنىمەن، حوتاننان دا انار شىعاتىنىن بىلمەيتىنىن ايتادى.

تۇرسۇن دەرەۋ اۆتوموبيلدەن ءبىر ساندىق اناردى الىپ ءتۇسىپ، قىزعىندى تۇردە جولدان وتكەن جۇرگىنشىلەردىڭ تاتىپ كورۋىنە ۇسىندى. ءدامى ءتىل ۇيىرەتىن اناردان ءدام تاتقان كوپشىلىك اۋىز جاپپاي القاستى. شاڭحايلىق ساۋداگەر دەرەۋ قالعان اناردىڭ بارلىعىن ساتىپ الماقشى بولدى. سول كۇنى تۇرسۇن 11 توننا اناردى 90 مىڭ يۋانعا ساتتى. سونان كەيىن تۇرسۇن مەن قارسى جاق ۇزاق ۋاقىتتىق سەلبەستىك قارىم - قاتىناس ورناتتى، سونداي - اق سول جىلدان باستاپ، حوتان انارى بىرتىندەپ بۇكىل ەلدىڭ جەر - جەرىنە ساتىلا باستادى.

تۇرسۇن ءبىر جاعىنان انار ساتسا، ەندى ءبىر جاعىنان اناردىڭ ءونىم مولشەرى مەن ساپاسىن قايتكەندە جوعارىلاتۋعا بولاتىنىن ويلاستىرادى. 2015 - جىلى تۇرسۇن پوسكام اۋدانىنداعى شاپتول ورمانىن باپتاپ - باسقاراتىن ۋاڭ اعايمەن تانىسىپ، ونان باپتاپ - باسقارۋدىڭ تاجىريبەلەرىن ۇيرەنەدى. ۋاڭ اعاي وعان اعاشتىڭ بۇتاعىن اشۋ كەرەك، كۇن نۇرى ءتۇسىپ، اۋا الماسقاندا عانا جەمىستىڭ رەڭى اشىق، كەسەك تە تولىق بولاتىنىن ايتادى. ۇيىنە قايتىپ كەلگەن سوڭ تۇرسۇن 6 انار اعاشىن تاڭداپ الىپ سىناق ەتەدى، ءبىر جىل جەتىلدىرۋ ارقىلى وسى بىرنەشە ءتۇپ انار اعاشىنىڭ جەمىسى ءارى ۇلكەن، ءارى جاقسى بولادى. كەلەسى جىلى تۇرسۇن جەمىس باعىندا وسى ءادىستى جاپپاي قولدانادى، سول جىلى 12 مۋ جەردەگى اناردان بۇرىنعى جىلدارداعىدان 13 مىڭ يۋان ارتىق پايدا تابادى. وسىدان كەيىن تۇرسۇن شاپتول اعاشىن ەگۋدى باپتاپ - باسقارۋ تاجىريبەسىن انارمەن ۇشتاستىرىپ، ءار مۋ جەردىڭ ءونىم مولشەرىن 500 كيلوگرامنان 1700 كيلوگرامعا جەتكىزەدى.

2018 - جىلى 1 - ايدا جەرگىلىكتى ورىنداعى اۋىل شارۋاشىلىق تەحنيكاسى ارناۋلى كادرىنىڭ جەتەكشىلىگى مەن كومەگىندە تۇرسۇن 280 مىڭ يۋاننان استام قارجى قوسىپ، 8 سەرىكتەسىمەن بىرگە پييالما اۋىلى حۇينۇڭ انار سەلبەستىك كووپەراتيۆىن قۇرادى، سەلبەستىك كووپەراتيۆىنىڭ انار ەككەن جەر كولەمى 112 مۋعا جەتەدى.

سەلبەستىك كووپەراتيۆى ءونىم جانە قىزمەت وتەۋ جاعىندا ولشەمدى جوعارىلاتۋمەن بىرگە، ماركا جوبالايدى، سونداي - اق جۇيەلى باپتاپ - باسقارۋ ادىسىنەن پايدالانىپ، ءبىر تۇتاس تىڭايتقىش بەرىپ، ءبىر تۇتاس ءۇزىپ، ءبىر تۇتاس قوراپتاپ، پييالما اۋىلىنىڭ انارىن ماركالاندىردى. سەلبەستىك كووپەراتيۆى قۇرىلعان العاشقى جىلى اۋىلداعى 800 توننا اناردىڭ ساتىلۋىنا جاردەمدەسەدى.

وسىدان كەيىن تۇرسۇن ينتەرنەت جەلىسىندە ساتۋ، مەكەمە ورىندارمەن توبىمەن ساتۋ توقتامىنا قول قويۋ سياقتى كوپ ءتۇرلى ساتۋ ارناسىن اشتى. وسى شارالاردىڭ ارقاسىندا اۋىلداستاردىڭ انار ساتۋ ارناسى بارعان سايىن كەڭەيىپ، باعاسى كەپىلدى بولىپ، تۇرمىستارى بارعان سايىن جاقساردى.