شينجياڭ ۇيعۇر اۆتونوميالى رايونى سانجى حۇيزۋ اۆتونوميالى وبلىسىندا ارناۋلى اقپار جاريالاۋ ءماجىلىسىن اشتى

　　تىنىش تا بەرەكەلى سانجى شار تاراپتان كەلگەن قوناقتاردى قارسى الادى

انار بۇلت / شينجياڭ گازەتىنىڭ ءتىلشىسى جىڭ جو 10 - ايدىڭ 1 - كۇنى سانجىدان حابارلايدى. 9 - ايدىڭ 30 - كۇنى شينجياڭ ۇيعۇر اۆتونوميالى رايونى سانجى قالاسىندا سانجى حۇيزۋ اۆتونوميالى وبلىسىنىڭ ارناۋلى اقپار جاريالاۋ ءماجىلىسىن وتكىزدى. سانجى وبلىسىنان كەلگەن 10 قاراپايىم بۇقارا ۋاكىلى وزدەرىنىڭ كەشىرمەلەرى ارقىلى جەرگىلىكتى ورىننىڭ مادەنيەتتى جالعاستىرۋ، قورعاۋ، قونىس ورتاسىن جاقسارتۋ، حالىققا تيىمدىلىك جاساۋ ينجەنەرياسى، ءدىني سەنىم ەركىندىگى سياقتى جاقتارداعى جاعدايلاردى تانىستىردى.

”بۇرىن مالشى ەدىك، قازىر ءبىز تيانشان بوعدا كولى كورىنىس ءوڭىرىن تايانىش ەتكەن ساياحات كاسىبى تيجاراتشىسىنا اينالدىق“. اقپار جاريالاۋ ماجىلىسىندە جالعانىمعا شىققان فۋكاڭ قالاسى تيانشان بوعدا كولى قازاق سالت - سانا باقشاسىنداعى ساياحات جول باستاۋشىسى عاني باياتقان اپپارات كوزى ارقىلى سالت - سانا باقشاسىنىڭ دىر - دۋمانعا شومعان كورىنىسىن كورسەتتى. عاني بىلاي دەدى: توڭىرەگىمىزدەگى 102 وتباسى اۋىلداسىمىز فۋكاڭ قالاسى ياۋچى ساياحات كاسىپتىك سەلبەستىك كووپەراتيۆىن قۇرىپ، ”سەرىكتەستىك + سەلبەستىك كووپەراتيۆى“ تيجارات ۇلگىسىن قولدانىپ، قازاق ۇلتتىق سالت - ساناسىن ايگىلەۋ، سالت - سانانى سەزىنۋ، ەرەكشە اس - سۋ ءبىر تۇلعالانعان جالپىلىق ساياحات نىسانىن ورىستەتتى.

جالعانىم بارىسىندا اقىندار ايتىسى ءوتىپ جاتقانى، ايەلدەردىڭ قورالاي وتىرىپ كيىزگە ويۋ - ورنەك سالىپ جاتقانى، ساياحاتشىلار ءدامدى - تاعامداردان قۇشىرلانا ءدام تاتىپ جاتقانى كورسەتىلدى. عاني بىلاي دەدى: ”2020 - جىلى سالت - سانا باقشاسى 700 مىڭنان استام ساياحاتشى قابىلدادى، ءبىر توپ ەگىنشى - مالشى ساياحات كاسىبىنە سۇيەنىپ، باقىتتى تۇرمىس وتكىزۋدە“.

سانجى وبلىسىنىڭ جاراتىلىستىق بايلىعى مول، كوپ جىلداردان بەرى جەرگىلىكتى ورىن جاڭا دامۋ ۇستانىمىن دايەكتىلەندىرىپ، قونىس ورتاسىنىڭ جاقسارۋىنا كوڭىل ءبولىپ، ءار ۇلت بۇقاراسىنىڭ ەكولوگيانىڭ پايداسىنان يگىلىكتەنۋىنە مۇمكىندىك جاسادى. ءۇيى توۋتۇنحى فيسۇييۋان شاعىن اۋماعىندا تۇراتىن شيا جۋانجۋان توۋتۇنحى وزەنىن جونگە سالۋدىڭ الدى - ارتىنداعى وزگەرىستەردى اڭگىمەلەدى، ”توڭىرەكتەگى ەلەكتر ستانسيالارى جابىلدى، كونە زاۆودتىڭ ورنىنا باقشا سالىندى، توڭىرەكتەگى بۇقارا بۇل جەردە سەيىل - سەرۋەن قۇرىپ، دەنە شىنىقتىرادى“، - دەدى شيا جۋانجۋان.

سانجى قالاسى باتىس كوشەسى جەرگىلىكتى ورىنداعى ءتۇيىندى ەسكىرگەن، كونە شاعىن اۋماقتاردى جاڭالاۋ نىسانى سانالادى، وسى جەردە 60 نەشە جىل تۇرعان كەرىمحان شايدا ەسكىرگەن، كونە شاعىن اۋماقتاردىڭ وزگەرىسىن اسەرلەنە اڭگىمەلەدى. ”جاڭالانعاننان كەيىن، كونە ۇيلەردىڭ بۇرىنعى ورنىنان قاتار - قاتار اسەم عيماراتتار بوي كوتەردى، بۇرىنعى قوقسىپ جاتاتىن كوشەلەر تازا دا رەتتى بولدى. توپىراق ءۇيىمىزدى 2 عيمارات ۇيگە اۋىستىرىپ بەردى، نىسان قۇرىلىسى اياقتالعاننان كەيىن، ءبىز بۇرىن تۇرعان شاعىن اۋماققا قايتا كوشىپ كەلىپ، بۇرىنعى كونە كورشىلەرمەن تاعى بىرگە تۇردىق“. كەرىمحان بىلاي دەدى: مەنىڭ بارلىق ەستەمەم وسى باتىس كوشەسىندە جاتىر، جاڭالاۋ ينجەنەرياسى وسى ەستەمەنى ونان ارى ارلەي ءتۇستى.

اقپار جاريالاۋ ماجىلىسىندە شونجى اۋدانىنداعى ۇيعۇر مۇعالىم ءسانام يبىرايىم، قۇتىبي اۋدانى ارشىليدان قالاشىعى ارشىليدان قىستاعى مەشتىنىڭ يمامى الىم راقىمەتوللا وقۋ - اعارتۋ جانە ءدىني سەنىم ەركىندىگى سياقتى جاقتارداعى جاعدايلاردى تانىستىردى؛ جەمسارى اۋدانى جەمسارى قالاشىعى ماجياساۋزى قىستاعى مادەنيەت اۋلاسىنىڭ جاۋاپتىسى ءابدۋالي حالىق سول جەردىڭ وزىندە ۇيعۇر ۇلتىنىڭ ءداستۇرلى ءان - كۇيىن ورىنداپ، جەرگىلىكتى ورىننىڭ از ۇلتتاردىڭ ءداستۇرلى مادەنيەتىن اشۋ، جالعاستىرۋ جانە قورعاۋ بارىسىن باياندادى.

سانجى حۇيزۋ اۆتونوميالى وبلىسىنىڭ باستىعى جين جىجىن مىنالاردى ءبىلدىردى: سانجى وبلىسىنىڭ ۇلتتارى بەرەكەلى، مادەنيەتى گۇلدەنگەن، كاسىپ سالاسى كوركەيگەن، بيىل جىل باسىنان بەرى جيىنى 30 ميلليون 471 مىڭ ادام - رەت ساياحاتشى قابىلدادىق، وبلىس بويىنشا 10 ميللياردتىق 3 كاسىپ باقشاسىن، 10 ميللياردتىق 6 كاسىپ سالاسىن جەتىلدىردىك، 420 كولەمنەن جوعارى ونەركاسىپ كاسىپورنى بار. بۇكىل دۇنيە جۇزىندەگى دوستاردىڭ كەلىپ ارالاپ كورۋىن، دامۋ وزگەرىستەرىن سەزىنۋىن، جەرگىلىكتى ورىنداعى حالىقتىڭ باقىتتى تۇرمىسىن سەزىنۋىن شىن جۇرەكتەن قارسى الامىز.

اقپار جاريالاۋ ماجىلىسىندە سانجى وبلىستىق تۇرعىن ءۇي جانە قالا، اۋىل قۇرىلىسى مەكەمەسىنىڭ، وقۋ - اعارتۋ مەكەمەسىنىڭ قاتىستى جاۋاپتىلارى تۇرعىن ءۇيدى قامتاماسىز ەتۋ، وقۋ - اعارتۋ ارقىلى حالىققا تيىمدىلىك جەتكىزۋ سياقتى جاقتاردا تىلشىلەردىڭ سۇراۋلارىنا جاۋاپ بەردى.