شينتيان كومىر حيميا ونەركاسىبى:

　　تازا ءوندىرىس ارقىلى ونىمدىلىككە قول جەتكىزدى

　انار بۇلت / شينجياڭ گازەتىنىڭ ءتىلشىسى ءجازيرا نەسىپبەك

”بىلتىر سەرىكتەستىكتىڭ تابيعي گاز ءونىم مولشەرى ءبىر ميلليارد 910 ميلليون تەكشەمەتردەن، ءونىم قۇنى 5 ميلليارد يۋاننان استى، پايداسى 20 نەشە ميلليون يۋان بولدى“، - دەدى ىلە شينتيان كومىر حيميا ونەركاسىبى شەكتى جاۋاپكەرشىلىك سەرىكتەستىگىنىڭ (تومەندە قىسقاشا ”شينتيان كومىر حيميا ونەركاسىبى“) القا باستىعى ۋاڭ ي.

1 - ايدىڭ 2 - كۇنى ءتىلشى ىلە قازاق اۆتونوميالى وبلىسى قۇلجا قالاسى بايانداي قالاشىعىنا ورنالاسقان شينتيان كومىر حيميا ونەركاسىبىنىڭ رەتتى دە تازا زاۆود رايونىنا كىرگەندە بىرنەشە جۇمىسشىنىڭ ماشينالاردى ارالاپ تەكسەرىپ جاتقاندىعىن كوردى، اۋادا وزگەشە ءيىس جوق ەكەندىگىن بايقادى.

ۋاڭ ي تانىستىرىپ بىلاي دەدى: تابيعي گاز بازارى كاسىپ جاعدايىنىڭ ءبىرشاما جاقسى بولۋىنىڭ ءارى وسى جىلدارى شينتيان كومىر حيميا ونەركاسىبىنىڭ عىلمي زەرتتەۋ ۇسىنىلىمىن ءۇرتىس ارتتىرۋىنىڭ ارقاسىندا سەرىكتەستىك ءوندىرىس قۋاتىنا كەپىلدىك ەتىپ، ونىمدەردىڭ قوسىمشا قۇنىن ارتتىرىپ قانا قويماي، تازا ءوندىرىستى دە جۇزەگە اسىردى.

2010 - جىلى جىجياڭ ولكەسىنىڭ ەنەرگيا توبى شەكتى سەرىكتەستىگى، شاندۇڭنىڭ شينكۋاڭ توبى قارجى قوسىپ، شينتيان كومىر حيميا ونەركاسىبىن قۇردى. سول جىلى شينتيان كومىر حيميا ونەركاسىبىنىڭ كومىردەن جىلىنا 2 ميلليارد تەكشەمەتر تابيعي گاز الۋ نىسانى جۇمىس باستاپ قۇرىلىس جۇرگىزدى، 2017 - جىلى قاتىستى تاراۋلاردىڭ قورشاعان ورتا بويىنشا قاتاڭ ساراپتاۋىنان ءوتىپ رەسمي وندىرىسكە قوسىلدى. 2021 - جىلى بۇل نىسان مەملەكەتتىك ساپالى ينجەنەريا التىن سيلىعىن الدى.

وندىرىسكە قوسىلعان 5 جىلدا ءوندىرىس قۋاتى تولىق ءوندىرۋ ورەسىنە تاياپ، شينتيان كومىر حيميا ونەركاسىبىنىڭ كومىر بايلىعىن ءتارتىپتى اشۋىن جانە كادەگە جاراتىپ، پايدالانۋىن ايگىلەدى. بار كۇشىن سالا وتىرىپ وندىرىسكە كىرىسۋمەن بىرگە، تازا ەنەرگيا وندىرەتىن كاسىپورىن رەتىندە، شينتيان كومىر حيميا ونەركاسىبى ءوندىرىس بارىسىنىڭ تازا بولۋىنا دا ەرەكشە ءمان بەردى.

”بۇگىنگى تاڭدا ەنەرگيا كاسىپورىندارى جوعارى ساپالى دامۋدى جۇزەگە اسىرۋدا تەحنيكادا ءۇرتىس جاڭالىق اشۋدان جانە قامال الۋدان قول ۇزە المايدى. 2021 - جىلى شينتيان كومىر حيميا ونەركاسىبىنىڭ عىلمي زەرتتەۋگە قوسقان قارجىسى 165 ميلليون يۋان بولىپ، بىلتىرعىدان ％23 ارتتى“، - دەدى شينتيان كومىر حيميا ونەركاسىبىنىڭ ورىنباسار باس ينجەنەرى ساۋ ۋيدۇڭ.

شينتيان كومىر حيميا ونەركاسىبى تابيعي گاز وندىرگەن العاشقى تۇستا شەتەلدىڭ بازاردا ءبىرشاما جوعارى دەڭگەيدە مويىندالعان ءوندىرىس قۇرىلعىلارىن پايدالانعانىمەن، كۇكىرتتى تولىق جيناي الماۋ، كۇكىرتتىڭ شىعارىلۋى ولشەمگە جەتپەۋ جاعدايى جارىققا شىقتى. تەحنيكالىق وسال تۇستاردان قامال الىپ، جاسىل ءوندىرىستى شىنايى جۇزەگە اسىرۋ ءۇشىن شينتيان كومىر حيميا ونەركاسىبى وسى قۇرىلعىنى تاستاپ، 20 نەشە ميلليون يۋان قوسىپ، ”قىشقىل گازدى جىلۋلىق ەلەكتر پار قازانىنا ەنگىزۋ + امياكتاۋ ادىسىمەن كۇكىرتسىزدەندىرۋ“ جاڭا تەحنيكاسىن زەرتتەپ اشىپ، حيميا ونەركاسىبى جۇيەسىندەگى قىشقىل گازدى ءبىر جاقتى ەتۋ ماسەلەسىن ءساتتى شەشتى، سونىمەن بىرگە، قوسالقى ءونىم كۇكىرت قىشقىلدى اممونيدىڭ ءونىم مولشەرىن جوعارىلاتتى. بۇل تەحنيكا جىجياڭنىڭ ەلەكتر عىلىم - تەحنيكا سيلىعىنىڭ 1 - دارەجەلى سيلىعىن ەنشىلەدى.

ءوندىرىس بارىسىندا تۋىلعان سۋدا ەرىگىش قوسالقى ونىمدەردى زارارسىزداندىرىپ ءبىر جاقتى ەتۋ ماسەلەسىن ويداعىداي شەشۋ ءۇشىن، شينتيان كومىر حيميا ونەركاسىبى 2015 - جىلدان باستاپ، 10 ميلليون يۋاننان استام قارجى قوسىپ، تەحنولوگيا ورامىن ەكستراكتسيالاپ جانە قايتالاي پايدالانىپ، ءبىر جاقتى ەتۋ تەحنيكاسىن زەرتتەپ اشتى. بۇل تەحنيكا 2019 - جىلى مەملەكەت جاعىنان تەكسەرىپ وتكىزىلىپ الىندى.

كەزەكتە شينتيان كومىر حيميا ونەركاسىبى زاۆودى بىلعانىش گاز، بىلعانىش سۋ، قوقىر - قوقسىق شىعارماۋدى جۇزەگە اسىردى. بۇل عانا ەمەس، قويىلتۋ تەحنيكاسى ارقىلى بىلعانىش سۋدى قاتتى تۇزعا اينالدىرىپ، تۇزدان ءبولىنىپ شىققان حلورلى ناتريدى، كۇكىرتتى قىشقىل ناتريدى تابيعي گاز وندىرەتىن شيكىزات ەتۋگە بولادى.

10 نەشە جىلدان بەرى، شينتيان كومىر حيميا ونەركاسىبىنىڭ قورشاعان ورتانى قورعاۋ قۇرىلعىلارىنا قوسقان قارجىسى 3 ميلليارد يۋانعا جەتىپ، جالپى قوسىلعان قارجىنىڭ التىدان ءبىرىن ۇستادى، بۋلانعىش ورگانيكالى قوسىلىستاردى ءبىر جاقتى ەتۋ قوندىرعىلارى، ءوزى دايىنداعان ەلەكتر ستانسياسىنىڭ لاستاۋشى زاتتاردى توتەنشە از شىعارۋ، قويۋ بالشىقتى قۇرعاتۋ سياقتى قورشاعان ورتانى قورعاۋ نىساندارىن سالدى. 2020 - جىلى شينتيان كومىر حيميا ونەركاسىبى مەملەكەتتىك عىلىم - تەحنيكا مينيسترلىگى جاعىنان مەملەكەتتىڭ جوعارى، جاڭا تەحنيكا كاسىپورنى بولىپ باعالاندى.

”بىلتىر ءبىز تاعى زاۆود رايونىنىڭ سىرتىنداعى 6000 نەشە مۋ جەرگە اعاش باسىندا قۇرعايتىن ورىك ەكتىك، وسى قالامشالار دا سەرىكتەستىكتىڭ دامۋىنا، زورايۋىنا ىلەسە جايقالا ءوسىپ - ونۋدە“، - دەدى ساۋ ۋيدۇڭ اناداي جەردەگى قالامشالاردى كورسەتىپ تىلشىگە.

تەحنيكانى زەرتتەپ - اشۋعا باسا ءمان بەرۋ شينتيان كومىر حيميا ونەركاسىبىنىڭ ءوندىرىس بارىسىنىڭ تازا بولۋىن جۇزەگە اسىرۋىنا مۇمكىندىك جاساۋمەن بىرگە، سەرىكتەستىككە تىكە ەكونوميكالىق ونىمدىلىك اكەلدى. امياكتاۋ ادىسىمەن كۇكىرتسىزدەندىرۋ تەحنيكاسى 2018 - جىلى پايدالانۋعا بەرىلگەننەن بەرى، شينتيان كومىر حيميا ونەركاسىبى ءار جىلى جيناپ العان كۇكىرتتەن پايدالانىپ، كۇكىرت قىشقىلدى امموني حيميالىق تىڭعايتقىشىن ءوندىرىپ، 40 − 50 ميلليون يۋان كىرىس تاپتى؛ تەحنولوگيا ورامىن ەكستراكتسيالاپ جانە قايتالاي پايدالانىپ، ءبىر جاقتى ەتۋ تەحنيكاسى سەرىكتەستىكتىڭ جىلىنا ارالاسپالى فەنولدان 30 نەشە مىڭ توننا ءوندىرىپ، 60 ميلليون يۋاننان استام كىرىس كىرگىزۋىنە مۇمكىندىك جاسادى.

”كەلەسى قادامدا ءبىز قوسالقى ونىمدەردىڭ پايدالانىلۋ قۇنىن ۇزدىكسىز اشامىز، مىسالى، قوسىمشا قۇنى اناعۇرلىم جوعارى كومىر كۇيەسى سياقتى ونىمدەردى ءوندىرۋ، بۇل سەرىكتەستىكتىڭ تاعى دا 100 − 200 ميلليون يۋان تابىس تابۋىنا كومەكتەسەتىن بولادى“، - دەدى شينتيان كومىر حيميا ونەركاسىبىنىڭ باس ينجەنەرى شۇي شيجىڭ.