1 - ايدىڭ 6 - كۇنىنە دەيىن قاتىناعان پويەز 100 كەزەكتەن استى

انار بۇلت / شينجياڭ گازەتىنىڭ ءتىلشىسى چىن چياڭۋي 1 - ايدىڭ 7 - كۇنى ۇرىمجىدەن حابارلايدى. ءۇرىمجى كەدەنىنەن ۇعىسۋعا قاراعاندا، 1 - ايدىڭ 6 - كۇنى ساعات 23تە كيىم - كەشەك، ءتۇرلى بۇيىمدار، بولشەك، ويىنشىق سياقتى زاتتار تولتىرا تيەلگەن جۇڭگو - ەۆروپا كەزەكشى پويەزى الاتاۋ ساعاسى شەكارا وتكەلى ارقىلى شەكارادان شىعىپ، گەرمانيانىڭ دۇيسبۋرگىنە جول العان. ي - ۋدان اتتانعان وسى كەزەكشى پويەز 2022 - جىلى الاتاۋ ساعاسى شەكارا وتكەلىنەن وتكەن 100 - كەزەك جۇڭگو - ەۆروپا كەزەكشى پويەزى بولىپ، قاتىناۋ سانى سايكەس مەزگىلدەگىدەن ％7.53 ارتقان.

جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، ەل اتتاعان اۋە تاسىمالى، تەڭىز تاسىمالى ىقپالعا ۇشىراپ، كەزەگى ازايىپ، تاسىمال باعاسى جوعارىلاپ، جۇڭگو - ەۆروپا كەزەكشى پويەزدارى ”ءبىر بەلدەۋ، ءبىر جول“ بويىنداعى ەلدەردىڭ ۇلاسۋىن - تۇتاسۋىن ورنىقتىراتىن ماڭىزدى قاتىناس تاسىلىنە اينالدى. قازىر جۇڭگو - ەۆروپا كەزەكشى پويەزدارى يمپورت - ەكسپورت ساۋداسىن قامتاماسىز ەتەتىن، ەل ءىشى مەن حالىقارا سىندى قوس اينالىمعا قىزمەت وتەيتىن، ىندەتتەن ساقتانۋ حالىقارالىق سەلبەستىگىنە دەم بەرەتىن ماڭىزدى دانەكەرگە ءتىپتى دە اينالدى.

جۇڭگو - ەۆروپا كەزەكشى پويەزدارىنىڭ جوعارى ءونىمدى جۇمىس جۇرگىزۋىنە قىزمەت وتەۋ ءۇشىن، كەدەن تەمىر جول تاراۋىمەن بىرگە ”سيفرلى شەكارا وتكەل“ جۇيەسىن جاپپاي جالپىلاستىرىپ، ادام كۇشىمەن ءوتىنىش ەتۋ مەن قاعاز تالوندى كۇشىنەن قالدىرىپ، كاسىپورىندار تابالدىرىعىنان ارى اتتاماي - اق كەدەنگە ءوتىنىش ەتۋ، تەمىر جول باعدارىن وزگەرتۋ سياقتى راسمياتتاردى ءبىتىرىپ، يمپورت كەزەكشى پويەزدارى جۇيەنىڭ ”لەزدە جىبەرۋىن“ جۇزەگە اسىرىپ، ەكسپورت كەزەكشى پويەزدارى كەدەندىك راسميات جۇمىستارىن 20 مينۋتتا ءبىتىرىپ، ”ساندى مالىمەت قولايلىلىعىن ارتتىرىپ، كاسىپورىندى سابىلتپاۋدى“ ورىنداپ، كاسىپورىننىڭ ۋاقىتى مەن ادام كۇشى نارقى ％50تەن استام ۇنەمدەلدى. بيىل 1 - ايدىڭ 1 - كۇنى جۇڭگو - قازاقستان ”كەدەن - تەمىر جول وتكەلى“ نىسانى الاتاۋ ساعاسى شەكارا وتكەلىندە سىناق رەتىندە ىسكە قوسىلىپ، جۇڭگو مەن قازاقستان ەكى جاقتىڭ ينفورماتسيا اۋىستىرۋى ارقىلى جۇڭگو - قازاقستان كەدەندەرىنىڭ باقىلاۋ - باسقارۋدى ءوزارا مويىنداۋىن جۇزەگە اسىردى.

الاتاۋ ساعاسى كەدەنى باقىلاۋ - باسقارۋ 2 - ءبولىمىنىڭ باستىعى لي حۇڭفىڭ مىنانى ءبىلدىردى: بىلتىر الاتاۋ ساعاسى شەكارا وتكەلىنەن وتكەن جۇڭگو - ەۆروپا كەزەكشى پويەزدارىنىڭ كەزەك سانى تاعى دا تاريحتان بەرگى ەڭ جوعارى دەڭگەيدى جاراتتى ءارى كەزەكشى پويەز لەنياسىنان 28ىن جاڭادان كوبەيتتى. بيىل كەدەن فۋنكتسياسىن ۇزدىكسىز تياناق ەتىپ، باقىلاۋ - باسقارۋدى ساپالىلاندىرىپ، ”كەدەن - تەمىر جول وتكەلى“ نىسانى بويىنشا ەكسپورت ەتىلەتىن زاتتاردىڭ كەدەننەن جوعارى ءونىمدى ءوتۋىن ىلگەرىلەتىپ، جۇڭگو - ەۆروپا كەزەكشى پويەزدارىنىڭ ”ءبىر بەلدەۋ، ءبىر جول“ قۇرىلىسىندا رولىن ونان ارى ويداعىداي ساۋلەلەندىرۋدى ىلگەرىلەتەدى.

جۇڭگو تەمىر جول ءۇرىمجى مەكەمەسى توبى شەكتى سەرىكتەستىگىنىڭ الاتاۋ ساعاسى ۆوكزالى كەزەكشى پويەزداردى قابىلداۋ - جونەلتۋدى، اۆتوكولىكپەن اكەلۋ - جەتكىزۋدى، زات تيەۋ - ءتۇسىرۋدى، ۇلاسپالى تاسىمال بويىنشا تاپسىرىپ بەرۋ - وتكىزىپ الۋدى ۇزدىكسىز ساپالىلاندىرىپ، كەدەنمەن، شەكارالىق تەكسەرۋ - كارانتيندەۋ تاراۋىمەن جانە زات تاسىمال وكىلەتتىك كاسىپورىندارىمەن بايلانىستى ۇزدىكسىز كۇشەيتىپ، ەلەكتروندى ۆەكسەلدى اينالىمى، ۆەكسەل اۋدارۋ، تەكسەرۋ ۋاقىتىن جەدەلدەتىپ، زاتتىڭ كەدەننەن ءوتۋ ونىمدىلىگىن جوعارىلاتتى.