انار بۇلت / شينجياڭ گازەتىنىڭ ءتىلشىسى گان شيڭحۋا 1 - ايدىڭ 8 - كۇنى ۇرىمجىدەن حابارلايدى. ءبىر ۋادەسى ارقىلى شينجياڭدىق جىگىتتەر ءمانسۇر پاتتار مەن مامەت نۇردىن ۇزاق جولدا ”وكىلەتتى كولىك جۇرگىزۋشى“ بولىپ، 8 كۇن 8 تۇندە 4700 كيلومەتر جول باسىپ، جياڭسۋ شۇيجوۋلىق شوفەر جاۋ شۇيلەيدىڭ جۇك اۆتوموبيلىن تەگىن جۇرگىزىپ ۇيىنە جەتكىزىپ بەرەدى. بۇل سۇيىسپەنشىلىككە تولى دوستىق مىڭداعان ينتەرنەت تۇتىنۋشىلاردى تەبىرەنتەدى، اليبابا ”تيانتيان وڭ ەنەرگيا“ انار بۇلت / شينجياڭ گازەتىمەن، ياڭزى كەشكى گازەتى زىنيۋ اقپاراتىمەن بىرلەسىپ ءمانسۇر پاتتار مەن مامەت نۇردىنعا ”تيانتيان وڭ ەنەرگيا ەرەكشە سيلىعىن“ بەردى، سيلىق سوماسى 10 مىڭ يۋان.

ءبىر ايدىڭ الدىندا 40 جاستاعى جياڭسۋلىق ۇلكەن جۇك اۆتوموبيلىنىڭ شوفەرى جاۋ شۇيلەي كورلا قالاسىندا ماقتا تاسىپ جۇرگەن كەزدە، ءبىر رەتكى ابايسىزدىقتان سول كوزى جاراقاتتانىپ، بەيجيڭگە بارىپ ەمدەلۋىنە تۋرا كەلەدى، شينجياڭدىق جىگىتتەر ءمانسۇر پاتتار مەن مامەت نۇردىن جاۋ شۇيلەيدىڭ جۇك اۆتوموبيلىن تەگىن جۇرگىزىپ، ونىڭ جياڭسۋ شۇيجوۋداعى اۋىلىنا اپارىپ بەرەدى.

1 - ايدىڭ 6 - كۇنى تۇستەن بۇرىن ۇيىندە كۇتىمدەلىپ جاتقان جاۋ شۇيلەي جاقسى باۋىرلاستارىنىڭ ”تيانتيان وڭ ەنەرگيا ەرەكشە سيلىعىنا“ يە بولعانىن بىلگەننەن كەيىن ەرەكشە تەبىرەندى. ول بىلاي دەدى: ”سول رەت جانار ماي اقىسىن، جول اقىسىن قوسقاندا از دەگەندە 10 مىڭ يۋاننان استام قاراجات كەتەدى، ءبىراق ولار ماعان ءبىر تيىن اقشا تولەتكەن جوق. مۇنداي قيىنشىلىققا ۇشىراعاندا قول ۇشىن بەرۋ مەنى قاتتى اسەرلەندىردى، ولار مەنىڭ ومىرلىك باۋىرلاستارىم“. ءمانسۇر مەن مامەت بىلاي دەدى: ”ءبىزدىڭ بولماشى ءىسىمىزدى كوپتەگەن ادام قۇپتاپ وتىر، مۇنان كەيىن ءبىز ءتىپتى دە كوپ كومەككە مۇقتاج ادامعا كومەكتەسەمىز“.

تيانتيان وڭ ەنەرگيا اليبابا توبىنىڭ بۇكىل ەلدەگى 100دەن استام نەگىزگى اقپارات قۇرالىمەن سەلبەسىپ قۇرعان ايگىلى الەۋمەتتىك يگىلىك نىسانى. نىسان قۇرىلعان 2013 - جىلدان بەرى ”شىنايىلىقتى، ىزگىلىكتى، كوركەمدىكتى تاراتىپ، وڭ ەنەرگيانى اسقاقتاتۋدى“ باس ماقسات ەتىپ، قاراپايىم ادامداردىڭ بولماشى ءارى ىزگىلىكتى ىستەرى ارقىلى جۇرت كوڭىلىن وياتىپ، ىزگى ىستەرگە شابىت بەرىپ، قوعامدىق ىزگىلىكتى، مەيىرىمدىلىكتى ىلگەرىلەتىپ كەلەدى، بۇگىنگە دەيىن 90 ميلليون يۋاننان استام سيلىق تاراتتى.