انار بۇلت / شينجياڭ گازەتىنىڭ ءتىلشىسى ما ينيڭ 1 - ايدىڭ 8 - كۇنى ۇرىمجىدەن حابارلايدى. ءتىلشىنىڭ اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسىنەن ۇعىسۋىنشا، جۋىقتا ونەركاسىپ جانە ينفورماتسيالاندىرۋ مينيسترلىگى 2021 - جىلعى جاسىل جاساۋ ءتىزىمىن جاريالادى، شينجياڭنان 19 كاسىپورىن مەملەكەت دارەجەلى جاسىل زاۆود بولىپ تاڭدالدى، كۇيتۇن - مايتاۋ ەكونوميكالىق، تەحنيكالىق اشۋ رايونى مەملەكەت دارەجەلى جاسىل باقشا رايونى بولىپ تاڭدالدى، شينجياڭنان 14 ءتۇرلى ءونىم مەملەكەت دارەجەلى جاسىل جوبالاۋ ءونىمى بولىپ تاڭدالدى.

جاسىل جاساۋ جۇيەسى جاسىل زاۆودتى، جاسىل جوبالاۋ ونىمدەرىن، جاسىل باقشا رايونىن جانە جاسىل قامداۋ تىزبەگى قۇرىلىسىن قامتيدى. سوڭعى جىلدارى شينجياڭ ونەركاسىپ سالاسىنداعى ءداستۇرلى ونەركاسىپتى جاسىلداندىرىپ وزگەرتۋدى ءتۇيىن، جاسىل عىلىم - تەحنيكادا جاڭالىق اشۋدى تىرەك ەتىپ، جاسىل جاساۋ ينجەنەرياسىن زور كۇشپەن اتقارىپ، ونەركاسىپتىڭ جاسىل دامۋىندا كورنەكتى ناتيجەگە قول جەتكىزدى.

اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسىنىڭ ساندى مالىمەتتەرىنە قاراعاندا، بىلتىر 8 - ايعا دەيىن شينجياڭ 120 اۆتونوميالى رايون دارەجەلى جاسىل زاۆود جەتىلدىرىپ، 8 باقشا رايونىن قۇرىپ، 7 جاسىل قامداۋ تىزبەگىن باسقارۋ كاسىپورنىن تۇلعالاپ، 29 اۆتونوميالى رايوننىڭ جاسىل ءونىمىن اشىپ، 21 اينالمالى ەكونوميكا سىناق ءتۇيىنى ورنىن قۇرىپ، شينجياڭ ونەركاسىبى دامۋىنىڭ ءىس جۇزىندىگىنە ۇيلەسەتىن جاسىل جاساۋ جۇيەسىن العاشقى قادامدا قۇردى.

كەلەسى قادامدا شينجياڭ كومىر قىشقىل گازىنىڭ شىعارىلۋىن ەڭ جوعارى ماننەن اسىرماۋ، كومىر قىشقىل گازىن بەيتاراپتاندىرۋ نىساناسىن ارقاۋ ەتىپ، لاستانۋدى ازايتۋ، كومىردى پايدالانۋ مولشەرىن تومەندەتۋ، ونىمدىلىگىن ارتتىرۋدى باس تۇتقا ەتىپ، ونەركاسىپتىڭ ەنەرگيا ۇنەمدەۋىن، كومىردەن پايدالانۋدى ازايتۋىن زور كۇشپەن ىگەرىلەتىپ، بايلىقتان امبەباپ پايدالانۋ ونىمدىلىگى مەن ورەسىن ۇزدىكسىز جوعارىلاتادى.