انار بۇلت/شينجياڭ گازەتىنىڭ ءتىلشىسى چىن چياڭۋي 1 - ايدىڭ 12 - كۇنى ۇرىمجىدەن حابارلايدى. ءۇرىمجى كەدەنىنەن ۇعىسۋىمىزشا، كوكتەم مەرەكەسى الدىنداعى زات قاجەتى مولشەرىنىڭ ارتۋى، سونداي - اق قاشقار ايماعىنىڭ ىندەتتەن ساقتانۋ ساياساتىنىڭ ءتىپتى دە دالمە - ءدال، جوعارى ءونىمدى بولۋى سىندى فاكتورلاردىڭ ىقپالىنا ۇشىراسا دا، جۋىقتا قاشقار كەشەندى قورعامالى باجى اۋماعىنان شەكارادان شىعاتىن زاتتاردا زور مولشەردە ارتۋ اۋقىمى جارىققا شىققان. 1 - ايدىڭ 1 - كۇنىنەن 11 - كۇنىنە دەيىن قاشقار كەدەنى جالپى 1806 تيەۋىش قورابىن تەكسەرىپ وتكىزىپ، زات تاسىمالداۋ مولشەرى 20 مىڭ 400 تونناعا جەتىپ، زاتتىڭ قۇنى ءبىر ميلليارد 13 ميلليون يۋان بولىپ، كۇندىك ورتاشا تەكسەرىپ وتكىزىلگەن تيەۋىش قوراپتىڭ سانى 2021 - جىلعى تۇتاس جىلداعى كۇندىك ورتاشا تەكسەرىپ وتكىزىلۋ مولشەرىنەن 4.7 ەسە ارتقان.

قاشقار كەشەندى قورعامالى باجى اۋماعىنان وتەتىن زاتتار، نەگىزىنەن، ي - ۋ، جينحۋا، حاڭجوۋ سياقتى قالالاردىڭ توقىما كيىم - كەشەكتەرى، اياق كيىمدەر، باس كيىمدەر، شاعىن وتباسى ەلەكتر جابدىقتارى سياقتى كۇندەلىكتى تۇتىنۋ بۇيىمدارى بولىپ، اۋماقتان وتكەننەن كەيىن ەركەشتام، تورعات، قاراسۋ شەكارا وتكەلدەرى ارقىلى شەكارادان شىعىپ قىرعىزستان جانە تاجىكستان سياقتى ەلدەرگە جەتكىزىلەدى.

زاتتاردىڭ كەدەننەن ءوتۋىن بار كۇشپەن قامتاماسىزداندىرۋ ءۇشىن، قاشقار كەدەنى ءبىرىنشى شەپتەگى زاڭ اتقارۋ قىزمەتكەرلەرىن تولىقتىرىپ، قىزمەت شاعىن بولىمشە اترەتىن قۇرىپ، كۇنى - ءتۇنى ۇستەمەلەپ كەزەكتەن تىس ىستەپ، اۆتوموبيلدەردى وتكىزدى. كەدەن قىزمەتكەرلەرى جولدا قاتىناۋ جوسپارىن عىلمي، ۇيلەسىمدى جاساپ، قاشقار كەشەندى قورعامالى باجى اۋماعىنان كىرىپ - شىعاتىن اۆتوموبيلدەر مەن تيەۋىش قورابىن وتكىزۋگە جەتەكشىلىك ىستەدى. كەدەننەن ءوتۋ بارىسىن ساپالىلاندىرۋدا تاسىمال قۇرال - جابدىقتارىنىڭ اۋماققا كىرۋ، اۋماقتان شىعۋ جىلدامدىعىن ەڭ جوعارى شەكتە جوعارىلاتىپ، قاراسۋ، تورعات، ەركەشتام شەكارا وتكەلدەرىمەن بايلانىس جاساۋدى، سايكەسۋدى بەلسەنە كۇشەيتىپ، قاشقار كەشەندى قورعامالى باجى اۋماعىنداعى اۆتوموبيلدەردىڭ قاتىناۋ جاعدايىن جانە شەكارا وتكەلدەرىنىڭ كەدەننەن وتكىزۋ جاعدايىن دەر كەزىندە حابارلاندىرىپ، ءارقايسى كەدەننەن ءوتۋ بۋىنىنىڭ ۇشتاسۋىنا، ىركىلىسسىز بولۋىنا شىنايى كەپىلدىك ەتتى.

سونىمەن بىرگە شەكارادان شىعاتىن زاتتاردىڭ زور مولشەردە ارتۋ جاعدايىنا قاراتا قاشقار كەدەنى تاعى كەدەن قىزمەتكەرلەرىن ۇيىمداستىرىپ ”مەيىر جەتكىزۋ شاعىن بولىمشە اترەتىن“ قۇرىپ، كاسىپورىن مەن تاسىمالداۋعا قىزمەت وتەۋ قىزمەتكەرلەرىنە قاراتا ءتۇسىندىرۋ، الاڭسىزداندىرۋ قىزمەتىن جۇرگىزىپ، زات تۇسىرمەگەن جانە اۋماق سىرتىندا كۇتىپ تۇرعان اۆتوموبيل شوفەرلارىن ىستىق سۋ، ازىق - تۇلىك سياقتىلارمەن قامدادى.

قاشقار كەدەنى زات تاسىمالىن باقىلاۋ - مەڭگەرۋ باسقارماسىنىڭ ورىنباسار باستىعى جاڭ لي مىنالاردى ءبىلدىردى: قاشقار كەدەنى شەكارادان شىعاتىن زاتتاردىڭ قاۋىرت مولايۋىن وراي ەتىپ، كەشەندى قورعامالى باجى اۋماعىنىڭ زات تاسىمالداۋ، تيەۋ - ءتۇسىرۋ، قويمادا ساقتاۋ، كەدەنگە مالىمدەۋ سىندى قىزمەت وتەۋ قامتاماسىزدىعى قابىلەتىن كۇش سالا جوعارىلاتىپ، كاسىپورىندارعا ساپالى، جوعارى ءونىمدى قىزمەت وتەيدى. قاشقاردىڭ وڭىرلىك باسىمدىعىن تولىق ساۋلەلەندىرىپ، يمپورت - ەكسپورت ساۋداسىن جانداندىرىپ، قاشقاردىڭ ىرىقتى تۇردە توعىسۋىنا ءارى وڭىرلىك ەكونوميكانىڭ دامۋىنا باستاماشى بولۋىنا قىزمەت وتەيدى.