شينجياڭعا كىرىپ - شىعاتىن 3 - جوعارى جىلدامدىقتى تاس جول ۇلكەن ارناسىن قالىپتاستىرادى

انار بۇلت / شينجياڭ گازەتىنىڭ ءتىلشىسى لۋ فىڭباۋ 1 - ايدىڭ 13 - كۇنى ۇرىمجىدەن حابارلايدى. اۆتونوميالى رايوندىق قاتىناس - تاسىمال مەڭگەرمەسىنەن ۇعىسۋىمىزشا، بيىل G0612 جەلىسىنىڭ جەتىمبۇلاق - چارقىلىق جوعارى جىلدامدىقتى تاس جولى سالىنىپ بولىپ، اۆتوكولىك قاتىناپ، شينجياڭعا كىرىپ - شىعاتىن 3 - جوعارى جىلدامدىقتى تاس جول ارناسى قالىپتاسادى ەكەن.

جەتىمبۇلاق - چارقىلىق جوعارى جىلدامدىقتى تاس جولى مەملەكەت جوعارى جىلدامدىقتى تاس جولىنىڭ جان - جاققا تارتىلعان جەلىسى بەيجيڭ - شيزاڭ جوعارى جىلدامدىقتى تاس جولىنىڭ ( G6) بايلانىس جەلىسى بولعان شينيڭ - حوتان جوعارى جىلدامدىقتى تاس جولىنىڭ (G0612) ماڭىزدى قۇرامداس بولىگى، شينجياڭ مەن چيڭحاي ەكى ولكە، رايوننىڭ تۇيىلىسكەن جەرىندەگى جەتىمبۇلاق قالاشىعىنىڭ شىعىس وڭتۇستىگىندەگى 2 كيلومەتر جەردەن باستالىپ، چارقىلىق قالاشىعىنىڭ باتىسىنان تۇتاسقان G0612 چارقىلىق - نيە جوعارى جىلدامدىقتى تاس جولىنىڭ شىعا بەرىسىنەن اياقتايدى، جالپى ۇزىندىعى 293.647 كيلومەتر، 2017 - جىلى قۇرىلىس باستاعان.

جۇڭگو قاتىناس توبى شينجياڭ قاتىناس قارجى قوسۋ، دامىتۋ شەكتى سەرىكتەستىگى تەحنيكالىق ساپا ءبولىمىنىڭ ورىنباسار باستىعى لەي ي بىلاي دەدى: جەتىمبۇلاق - چارقىلىق جوعارى جىلدامدىقتى تاس جولىنىڭ ءبىر بولىگى شينجياڭ لوپنۇر كولى تۇيە كيىك مەملەكەت دارەجەلى جاراتىلىستىق قورىعىنىڭ سىرتقى اۋماعىن ەندەي وتەدى، جولدىڭ ورتاعا جاسايتىن ىقپالىن مۇمكىندىكتىڭ بارىنشا ازايتۋ ءۇشىن، قۇرىلىسشىلار جيىنى 22.78 كيلومەتر ارالىققا 176 كوپىر سالىپ، قورىق رايونىنان اتتاتىپ وتكىزۋ ارقىلى جابايى حايۋاناتتاردىڭ ورىسكە جايىلۋىنا جول اشتى.

”5 جىلعا جۋىق قۇرىلىس جۇرگىزۋ ارقىلى جەتىمبۇلاق - چارقىلىق جوعارى جىلدامدىقتى تاس جولىنىڭ تاعانى، جول بەتى، كوپىر، تۋنەل قۇرىلىسى تۇگەلدەي سالىنىپ بولدى، ءۇي قۇرىلىسى ينجەنەرياسى ％88 شاماسىندا ورىندالدى، ماشينا - ەلەكتر قاتىناس حاۋىپسىزدىگى ينجەنەرياسى ％50 شاماسىندا ورىندالدى، 6 - ايدىڭ سوڭىندا اۆتوكولىك قاتىنايدى“، - دەدى لەي ي.

وسىدان بۇرىن جەتىمبۇلاق - چارقىلىق تاس جول قاتىناسى نەگىزىنەن G315 جەلىسىنە سۇيەنەتىن، ءبىراق بۇل جەلىنىڭ جول جاعدايى ناشارلاۋ، ونىڭ ۇستىنە قاتىناس جاعدايى كۇردەلى بولعاندىقتان، ەكى جەردىڭ بارىس - كەلىسىنە قولايسىز بولعان ەدى. جەتىمبۇلاق - چارقىلىق جوعارى جىلدامدىقتى تاس جولىندا اۆتوكولىك قاتىناعاننان كەيىن، ەكى جەر اراسىنداعى اۆتوكولىك قاتىناۋ ۋاقىتى 2 جارىم ساعاتقا قىسقارادى.

”جەتىمبۇلاق - چارقىلىق جوعارى جىلدامدىقتى تاس جولى شينجياڭنىڭ قاتىناس - تاسىمالىن دامىتۋ جوباسىنىڭ ماڭىزدى قۇرامداس بولىگى، سالىنىپ، اۆتوكولىك قاتىناعاننان كەيىن، G7 جەلىسى بەيجيڭ - شينجياڭ جوعارى جىلدامدىقتى تاس جولىنان، G30 جەلىسى ليانيۇنگاڭ - قورعاس جوعارى جىلدامدىقتى تاس جولىنان كەيىنگى شينجياڭعا كىرىپ - شىعاتىن 3 - جوعارى جىلدامدىقتى تاس جول ۇلكەن ارناسىنا اينالادى، بۇل شينجياڭعا كىرىپ - شىعۋ ارناسىنىڭ تاسىمال قابىلەتىن جوعارىلاتۋ، جىبەك جولى ەكونوميكالىق بەلدەۋى وزەكتى رايونىن قۇرۋ، ەلىمىز بەن ورتا ازيا، وڭتۇستىك ازيا اراسىنداعى جوعارى ءونىمدى، قولايلى قۇرلىق جولىن تۇتاستىرۋ قابىلەتىن كۇشەيتۋ، شينجياڭنىڭ ەكونوميكالىق، قوعامدىق دامۋىنا دەم بەرۋ سياقتى جاقتاردا توتەنشە ماڭىزدى ىلگەرىلەتۋ رولىن اتقارادى“، - دەدى اۆتونوميالى رايوندىق قاتىناس - تاسىمال مەڭگەرمەسى پارتكومىنىڭ ورىنباسار شۋجيى، مەڭگەرمە باستىعى اسەنجان احمەت.