汉文 ىلە اقپارات تورابىنا حوش كەلدىڭىزدەر!
ميلان قىسقى وليمپيادا سپورت جارىسىندا مەملەكەتكە داڭق اپەرسەم دەگەن ۇمىتتەمىن
2022-06-13 16:34:06     كورىلىم:رەت كەلۋ قاينارى:تيانشان تورى  جاۋاپتى رەداكتور:گۇلدەن ماقسات قىزى

دىلنيگار يىلھامجان:

ميلان قىسقى وليمپيادا سپورت جارىسىندا مەملەكەتكە داڭق اپەرسەم دەگەن ۇمىتتەمىن

 انار بۇلت \ شينجياڭ گازەتىنىڭ ءتىلشىسى ۋاڭ جيڭجيڭ


”قىزىم، كۇنىنە 60 كيلومەترگە سىرعانايسىڭ، وسىنشا شارشاعاندا، سپورتشى بولعانىڭا وكىنەسىڭ بە“؟

”وكىنبەيمىن، بەيجيڭ قىسقى وليمپيادا سپورت جارىسىنان كەيىن بويىمدى كۇش كەرنەدى، ميلان قىسقى وليمپيادا سپورت جارىسىندا، ءسوزسىز، مەملەكەتكە داڭق اپەرەمىن“.

5 - ايدىڭ 25 - كۇنى تۇستە اكەسى مەن قىزى 6 ساعاتتىق ۋاقىت پارقىن قايىرىپ قويىپ، ۋيچاتتا اڭگىمەلەسىپ كەتتى. اكەسى يىلھامجان جۇڭگونىڭ شينجياڭىندا، قىزى دىلنيگار يىلھامجان بولسا فينلانديادا ەدى.

بەيجيڭ قىسقى وليمپيادا سپورت جارىسى اياقتالعاننىڭ ەكىنشى كۇنى، دىلنيگار مەملەكەتتىك دالالىق قار شاڭعى قۇراماسىمەن بىرگە فينلاندياعا بارىپ، توپتىق جاتتىعۋعا قاتىناستى. وسى ۋاقىتتاردا جاتتىعۋ كۇشەمەلىلىگى ۇزدىكسىز ارتتى، ”ول ماعان جۋىقتان بەرى كۇنىنە 60 كيلومەترگە سىرعانايتىندىعىن ايتتى، ءار كۇنى دەرلىك ەڭ جوعارى شەكتەن اسۋىمىز كەرەك، قاتتى شارشايمىز، وتە جاپالى دەيدى“، - دەدى يىلھامجان جانى اشىپ.

اكەسىنىڭ قار شاڭعىسىنا سۇيەنىپ اپىل - تاپىل ءجۇرۋدى ۇيرەنگەن دىلنيگار كىشكەنتايىنان تارتىپ شاڭعى تەبۋگە اۋەستەندى، الايدا اكەسى قار شاڭعى سپورتشىسى بولعاندىقتان، كاسىپتىك سپورتشى بولۋدىڭ قانشالىقتى ازاپ - توزابى بارىن ابدەن بىلەتىن، سوندىقتان ول قىزىن سكريپكا ۇيرەنۋگە باۋلىدى.

دىلنيگار 6 جاسىنان باستاپ سكريپكا ۇيرەندى، 10 جاسىندا التايداعى مەكتەپتەر دەنە تاربيە ساباعىن مۇز ايدىنىنا، شاڭعى الاڭدارىنا ”كوشىردى“ دە، ول شاڭعى تەبۋگە ارالاستى. ”اكەمنىڭ سپورتشىلىق قاسيەتى دارىعان بولۋى كەرەك، مەن تەز ۇيرەنىپ، جاقسى سىرعانايتىن بولدىم، سول كەزدەن باستاپ سكريپكا تارتقىم كەلمەي قالدى، تەك شاڭعى تەبە بەرگىم كەلىپ تۇراتىن بولدى“. ول شەشەسىنىڭ ارەڭ دەگەندە ماقۇلدىق بەرگەنىن، ال اكەسىنىڭ مۇلدە قارسى بولعانىن ايتتى.

”قىستىگۇنى قاتتى اياز، جازدا قاپىرىق ىستىق، ءبىر قىز بالانىڭ مۇنداي جاپا شەگۋىنىڭ نە قاجەتى بار؟ ءبىراق، قىزىمنىڭ شاڭعى تەبۋگە قۇمارتىپ قالارىن كىم بىلگەن. وعان ويلانۋعا 3 كۇن ۋاقىت بەردىم، ەگەر شىن ۇيرەنگىڭ كەلسە، وندا رەسمي جاتتىقتىرامىن، بۇل جولعا تۇسكەن ەكەنسىڭ، كەيىن تايساقتاۋىڭا استە قوسىلمايمىن دەدىم“، - دەيدى يىلھامجان.

وسىدان سوڭ دىلنيگار اكەسىنىڭ جەتەكشىلىگىندە شاڭعى تەبۋگە جۇيەلى جاتتىعا باستادى، ءتوزىمدى بولۋى دىلنيگاردىڭ ەڭ ۇلكەن ارتىقشىلىعى ءارى دالالىق قار شاڭعى سپورتشىسىندا بولۋعا ءتيىستى وتە ماڭىزدى ساپا. ”اكەم مەنى ەرتىپ الىپ مەملەكەتتىك 12 - كەزەكتى قىسقى سپورت جينالىسىنا، 13 - كەزەكتى قىسقى سپورت جينالىسىنا قاتىناستىرىپ، كوز ايامدى اشتى، مەن دە ءوزىمنىڭ سپورتشى بولۋداعى نىسانامدى اناعۇرلىم ايقىندادىم“، - دەدى دىلنيگار.

2017 - جىلى دىلنيگار ىرىكتەۋدەن ءوتىپ، دالالىق شاڭعى مەملەكەتتىك توپتىق جاتتىعۋ قۇراماسىنا قابىلداندى. 2018 - جىلى 1 - ايدا دالالىق شاڭعى مەملەكەتتىك توپتىق جاتتىعۋ قۇراماسىنىڭ شينجياڭ گرۋپپاسى نورۆەگياعا بارىپ، شەتەلدەگى 3 جىلدىق جاتتىعۋدى باستادى. ”الدىڭعى 2 جىلدا ارناۋلى اۋدارماشى بار بولاتىن، ءۇشىنشى جىلدان باستاپ تاربيەشىمەن اعىلشىن تىلىندە سويلەسە الاتىن بولدى، بۇل دا ونىڭ سپورتتان سىرتقى تابىسى بولدى“، - دەدى يىلھامجان.

وسى جىلدارى دىلنيگاردىڭ ۇيىندە بولعان جالپى ۋاقىتى 10 كۇننەن اسپايدى، اكە - شەشەسىمەن تەك 3 − 4 رەت عانا جۇزدەستى. قيىن ءىس جوق جاھاندا، ىقىلاس قويعان ادامعا دەگەندەي، 2019 - جىلى حالىقارالىق شاڭعى بىرلەستىگىنىڭ دالالىق شاڭعى ۇپاي جيناۋ جارىسىنىڭ قۇس ۇياسى بەكەتىندە، 18 جاستاعى دىلنيگار ايەلدەر گرۋپپاسىندا ەكىنشىلىكتى يەلەپ، جۇڭگو قۇراماسىنىڭ وسى تۇردەن تاريحتاعى ەڭ جاقسى ناتيجەسىن جاراتتى؛ 2022 - جىلى ول بەيجيڭ قىسقى وليمپيادا سپورت جارىسى جۇڭگو دەنە تاربيە ۋاكىلدەر ۇيىرمەسىنە قابىلداندى؛ سونان كەيىن، ادامزات قار شاڭعىسىنىڭ باستالعان جەرىنەن كەلگەن ول قىسقى وليمپيادا سپورت جارىسىنىڭ اشىلۋ سالتىندا ۇلكەن قارگۇلىن ”تۇتاندىرعان“ نەگىزگى الاۋگەرگە اينالدى. ”ميلان قىسقى وليمپيادا سپورت جارىسىندا مەملەكەتكە داڭق اپەرىپ، جۇڭگولىقتاردىڭ دالالىق شاڭعى تۇرىندە سەرپىلىسىن جۇزەگە اسىرۋ − مەنىڭ قازىرگى نىسانام“، - دەدى ول.