انار بۇلت \ شينجياڭ گازەتىنىڭ ءتىلشىسى گاۋ فىڭ 6 - ايدىڭ 10 - كۇنى ۇرىمجىدەن حابارلايدى. جۋىقتا اۆتونوميالى رايوندىق حالىق ۇكىمەتى «اۆتونوميالى رايوننىڭ مەملەكەتتىك كەڭەس تاراتقان〔 2022〕 12 - ءنومىرلى حۇجاتىنىڭ رۋحىن دايەكتىلەندىرىپ، تياناقتاندىرىپ، ەكونوميكانىڭ ورنىقتى ارتۋىن ىلگەرىلەتۋدىڭ ءبىر قىدىرۋ ساياسات - شارالارىن» باسىپ تاراتىپ، كەدەيلىكتەن ارىلعان حالىق سياقتى جۇمىستانۋى قيىنعا سوققان قاۋىمنىڭ جۇمىستانۋىنا قولداۋ كورسەتۋ شارالارىن شىعاردى، جۇمىسقا الۋشى ورىننىڭ كەدەيلىكتەن ارىلۋى ورنىقسىز وتباسىلارىن، كەدەيلەسۋ جيەگىندە تۇرعان، وڭاي كەدەيلەسەتىن وتباسىلارىن، توسىن اۋىر قيىنشىلىققا ۇشىراعان وتباسىلارىن جۇمىسقا العان ۋاقىتى ءۇرتىس 6 ايدان اسسا، ەڭ جوعارى بولعاندا، ءار ادامعا 1000 يۋاندىق ولشەم بويىنشا جۇمىسقا قابىلداۋ قوسىمشا قاراجاتىنا يە بولادى.

بەلگىلەمەگە ساي، ەڭبەك قۋاتى بار، جۇمىستانۋدى قالايتىن، ءالى جۇمىستانباعان، قاداعالانۋ وبيەكتىسى ەتىلگەن ەڭبەككۇشتەردى (كەدەيلىكتەن ارىلۋى ورنىقسىز وتباسىلارىن، كەدەيلەسۋ جيەگىندە تۇرعان، وڭاي كەدەيلەسەتىن وتباسىلارىن، توسىن اۋىر قيىنشىلىققا ۇشىراعان وتباسىلارىن) ”بىرگە - ءبىر“ بايلانىسى بويىنشا جۇمىستانۋعا كومەكتەسىپ - سۇيەمەلدەيدى، 2022 - جىلى قاداعالانۋ وبيەكتىسى ەتىلگەن ەڭبەككۇشتەردى جۇمىسقا العان ۋاقىتى 6 ايدان اسقان جۇمىسقا الۋشى ورىندارعا جۇمىسقا الۋشى ورىن تۇرعان جەر ءار ادامعا 1000 يۋاندىق ولشەممەن ءبىر رەتتىك جۇمىسقا قابىلداۋ قوسىمشا قاراجاتىن بەرەدى. كەدەيلىكتەن ارىلعاندار، قاداعالانۋ وبيەكتىسى سياقتى ءتۇيىندى قاۋىمدى جۇمىسقا كوپتەپ قابىلداعان، ناتيجەسى تاماشا جۇمىستانۋعا كومەكتەسىپ - سۇيەمەلدەگەن كاسىپورىندارعا ءار ادامعا 500 يۋاندىق ولشەممەن ءبىر رەتتىك سيلىق قوسىمشا قاراجاتىن بەرەدى، بۇل تۇردەگى قوسىمشا قاراجاتتى جۇمىسقا الۋشى ورىننىڭ ءبىر رەتتىك جۇمىسقا قابىلداۋ قوسىمشا قاراجاتىمەن قاباتتاپ ءوتىنىش ەتۋىنە بولمايدى.

سونىمەن بىرگە اۋىلعا ورالىپ، قازىر اۋىلدا تۇرعان كەدەيلىكتەن ارىلعان ەڭبەككۇشتەر مەن قاداعالانۋ وبيەكتىلەرىن، ىندەتتىڭ ىقپالىنان سىرتقا شىعىپ جۇمىس ىستەۋگە شاراسىز قالعانداردى اۋىل - قىستاق ۋاقىتشا الەۋمەتتىك يگىلىك سيپاتتى جۇمىس ورنىن اشىپ، وتپەلى جۇمىستاندىرۋعا بولادى، ولاردىڭ جۇمىس ورنىندا ىستەگەن ۋاقىتى 6 ايدان اسپاۋى كەرەك، وسى مەزگىلدە ءوز جەرىنىڭ اۋىل - قىستاق الەۋمەتتىك يگىلىك سيپاتتى قوسىمشا قاراجات ولشەمى بويىنشا جۇمىس ورنى قوسىمشا قاراجاتى بەرىلەدى. باعىتتامالى ەڭبەك سەلبەستىگىن جاساعان وڭىرلەردەگى ەڭبەكشىلەردى جۇمىسقا قابىلدايتىن كاسىپورىنداردىڭ اراسىندا ۇساق كاسىپورىنداردىڭ قابىلدايتىن ادام سانى 5تەن كەم بولماۋ، شاعىن كاسىپورىنداردىڭ قابىلدايتىن ادام سانى 10نان كەم بولماۋ، ورتاشا كاسىپورىنداردىڭ قابىلدايتىن ادام سانى 20دان كەم بولماۋ، ءىرى كاسىپورىنداردىڭ قابىلدايتىن ادام سانى 40تان كەم بولماۋ نەمەسە ورتا، شاعىن، ۇساق كاسىپورىنداردىڭ جۇمىسشى - قىزمەتشىلەرىندە يەلەگەن سالىستىرماسى ％15تەن تومەن بولماۋ، ءىرى كاسىپورىنداردىكى ％10تەن تومەن بولماۋ شارتىنا ۇيلەسەتىندەرى بولسا، مەملەكەتتىك وركەندەتۋ بانكەسىنىڭ شينجياڭ بولىمشە بانكەسى ەڭبەك سەلبەستىگىنە ات سالىسقان كاسىپورىندارعا قارىز اقشا بەرەدى ءارى قارىز اقشا ءوسىمى جاعىنان جەڭىلدىك جاساپ قولداۋ كورسەتەدى.