汉文 ىلە اقپارات تورابىنا حوش كەلدىڭىزدەر!
جازداعى سالتاناتتى كەڭەس، ونان دا ماڭىزدىسى، كوكتەمگى ساپارعا اتتانۋ
2022-06-29 17:22:00     كورىلىم:رەت كەلۋ قاينارى:تيانشان تورى  جاۋاپتى رەداكتور:جازيرا بولاتباي قىزى

− اۆتونوميالى رايوننىڭ ساياحاتتى دامىتۋ جينالىسىنا شولۋ

 انار بۇلت \ شينجياڭ گازەتىنىڭ ءتىلشىسى رىن جياڭ


6 - اي شينجياڭ جازىنىڭ ەڭ كوركەم كەزى. ىلە وزەنى اڭعارىندا اعاشتار بۇرلەپ، كوكوراي شالعىن جايقالىپ، نەشە 10 مىڭ مۋ جەردەگى لاۆاندا گۇلى قۇلپىرىپ، حوش ءيىسى اڭقيدى. 6 - ايدىڭ 27 - كۇنى اۆتونوميالى رايوننىڭ ساياحاتتى دامىتۋ جينالىسى قۇلجا قالاسىندا اشىلدى.

ءماجىلىس اشىلۋعا ءالى جارىم ساعاتتان استام ۋاقىت بار بولسا دا، ماجىلىسكە قاتىناساتىن ۋاكىلدەر ءماجىلىس الاڭىنا ىركەس - تىركەس كەلىپ ۇلگىردى، امان - سالەم جاساسقاننان سىرت، ساياحات كاسىبىن دامىتۋعا قاتىستى جاعدايلار جونىندە كوبىرەك پىكىر اۋىستىردى.

شينجياڭنىڭ ساياحات كاسىبى دامۋدىڭ شەشۋشى مەزگىلىندە تۇر، وسى ساتتە اشىلعان اۆتونوميالى رايوننىڭ ساياحاتتى دامىتۋ جينالىسىنىڭ ءمانى ايرىقشا.

”مادەنيەت، ساياحات كاسىبى ىندەتتىڭ ىقپالىنان بىرتىندەپ ارىلۋدا، قايتا جاندانۋ مەزگىلىندە تۇر. ءدال وسى ساتتە اشىلعان اۆتونوميالى رايوننىڭ ساياحاتتى دامىتۋ جينالىسى شينجياڭ ساياحاتىنىڭ جوعارى ساپالى دامۋىنا ايقىن بەتالىس كورسەتىپ بەرۋمەن بىرگە، ساياحات ارقىلى شينجياڭدى گۇلدەندىرۋ ستراتەگياسىن اتقارۋ سەنىمى مەن بەكىمىن ونان ارى بەكەمدەدى“، - دەدى شينجياڭ ساياحات كووپەراتيۆى قوعامىنىڭ باستىعى ۋ فىڭ.

ساعات 10دا ءماجىلىس باستالدى. شينجياڭ ساياحاتىنىڭ وزگەشە، مول بايلىق باسىمدىعى، نۇرلى بولاشاعى، دامۋ ۇستانىمى، بايلىق اشۋ، ماركا تۇلعالاۋ، قىزمەت وتەۋ ساپاسى سياقتى جاقتارداعى جەتەرسىزدىكتەر، ساياحاتتىڭ جوعارى ساپالى دامۋىنىڭ ءتۇيىندى قىزمەتتەرى... ەگجەي - تەگجەيلى زەرتتەپ، تۇجىرىمدادى، ورنالاستىرۋلار ادامدى جەلپىندىرەدى. ماجىلىسكە قاتىناسقان ۋاكىلدەر قالامدارىن قاعاز بەتىندە جىتىرمەلەتە جورعالاتىپ، بار زەيىنمەن تىڭداي وتىرىپ ەستەلىككە الىپ جاتىر، ءماجىلىس الاڭىنان ءالسىن - ءالى شاپالاق ءۇنى كوتەرىلدى.

بۇل جازداعى سالتاناتتى كەڭەس، ونان دا ماڭىزدىسى، ءبىر رەتكى كوكتەمگى ساپارعا اتتانۋ. وسىلاردى ەت قۇلاعىمەن ەستىگەن ماجىلىسكە قاتىناسقان ۋاكىلدەردىڭ كوڭىلدەرى تولقىپ، بولاشاق جونىندەگى اڭساعان ارماندارىمەن توعىسا تۇسكەندەي بولدى.

جينالىس دامۋ سەنىمىن بەكەمدەدى. ”ءبىز ساياحاتپەن شۇعىلدانۋشىلار شينجياڭ ساياحاتىنىڭ بولاشاعىنا، اۆتونوميالى رايوننىڭ ساياحات كاسىبىنىڭ جوعارى ساپالى دامۋىن ىلگەرىلەتۋىنە تولىق سەنىم ارتامىز!“، - دەدى شينجياڭ ساياحات قوعامىنىڭ ورىنباسار باستىعى، باس حاتشى جاڭ شياۋيۇي. ءماجىلىس اياقتاي سالا ول قول تەلەفونىن اشىپ، اقپارات قۇرالدارىنىڭ جينالىس جونىندەگى حابارلارىنا نازار سالدى، ”قوعام كوپىرلىك جانە دانەكەرلىك رولىن ويداعىداي ساۋلەلەندىرۋدە الدىمەن ءماجىلىس رۋحىن ويداعىداي ۇيرەنىپ، ويداعىداي دايەكتىلەندىرۋى، مۇنان دا ماڭىزدىسى، ساياحاتشىلاردى شينجياڭعا كەلۋگە باۋراۋى، ساياحات ماركاسى قۇرىلىسى، ساياحات جوسپارلاۋ - ساتۋ، ۇگىتتەۋ، جالپىلاستىرۋ سياقتى جاقتاردا تىڭ ىسكەرلىك كورسەتىپ، شينجياڭ ساياحاتىنىڭ جاڭا جورىعىنا مىعىم سەنىممەن كىرىسۋى كەرەك.

جينالىس ناقتى ىستەۋدىڭ وكتەم ءۇنىن شارىقتاتتى. ”تۇرپاننىڭ تاريح، مادەنيەت مايەگى قالىڭ، مادەنيەت پەن ساياحاتتى توعىستىرۋدى ىشكەرىلەي ىلگەرىلەتۋ جاعىندا بولاشاعى جارقىن“، - دەدى تۇرپان قالالىق مادەنيەت، دەنە تاربيە جانە ساياحات مەكەمەسى پارتيا باسشىلىق گرۋپپاسىنىڭ شۋجيى ان جينچياڭ، - ”جينالىستا مادەنيەت ءمانىن تەرەڭ اشىپ، مادەنيەت پەن ساياحاتتىڭ توعىسپالى دامۋىن ىلگەرىلەتۋ اتاپ كورسەتىلدى. ءبىز ءماجىلىستىڭ تالاپتارىنا ساي ىرىقتى تۇردە جاۋاپكەرشىلىك ارقالاپ، ىسكەرلىك كورسەتىپ، مۇنان دا كوپ ساياحات باستاماشى كاسىپورىندارىن تۇرپانعا كەلىپ قارجى قوسۋعا باۋراپ، بازار تۇلعالارىن زورايتىپ، بازار ورتاسىن ساپالىلاندىرىپ، تاريحي، مادەنيەت بايلىعى مول بولۋداي باسىمدىعىن تولىق ساۋلەلەندىرىپ، ساياحات كاسىبىن مۇنان دا زورايتىپ، مۇنان دا الۋەتتەندىرەمىز“.

جينالىس العا باسۋ كۇشىن ۇيىستىردى. 6 - ايدىڭ باسىنان باستاپ ۇيىرمەلەردىڭ ولكە اتتاپ ساياحاتتاۋىن قالپىنا كەلتىرگەننەن كەيىن، نارات كورىنىس ءوڭىرىنىڭ ساياحاتشى قابىلداۋ مولشەرى مەن كىرىسى جىلدام ارتتى. 6 - ايدىڭ 21 - كۇنىنەن باستاپ اتالعان كورىنىس ءوڭىرىنىڭ كۇنىنە قابىلداعان ساياحاتشى مولشەرى 10 مىڭ ادام - رەتتەن اسىپ، بىلتىرعى سول تۇستاعىنىڭ %90ىنە دەيىن قالپىنا كەلدى. ”ساياحاتتى دامىتۋ جينالىسىنىڭ اشىلۋى شينجياڭنىڭ ساياحات كاسىبىنە اسا زور پايدا اكەلەدى. ءبىز دامۋ ورايىن مىقتى يگەرىپ، جينالىس رۋحىن ىشكەرىلەي دايەكتىلەندىرىپ، تياناقتاندىرىپ، نەگىزدىك قۇرىلعىلار قۇرىلىسى سەرپىنىن ۇزدىكسىز ارتتىرىپ، دالمە - ءدال جوسپارلاۋ - ساتۋدى ىلگەرىلەتىپ، ءتۇزىلىس - مەحانيزم رەفورماسىن تەرەڭدەتىپ، ساياحات كاسىبىنىڭ زور دامۋىن ىلگەرىلەتەمىز“، - دەدى نارات كورىنىس ءوڭىرى پارتكومىنىڭ ورىنباسار شۋجيى، باسقارۋ كوميتەتىنىڭ مەڭگەرۋشىسى شى نيڭ.

ءماجىلىس الاڭىنان شىققاندا اسپان شايداي اشىق، كۇن شۇلەن شۇعىلاسىن توگىپ تۇر، ماجىلىسكە قاتىناسقان ۋاكىلدەر اسىعا باسىپ كەتىپ بارادى. ”جوبا جاسالىپ بولدى، تەتىگى − تياناقتاندىرۋدا. ءبىز شينجياڭدى ساياحات ارقىلى گۇلدەندىرۋ ستراتەگياسىن بار كۇشپەن امالياتتا ايگىلەپ، بايلىق باسىمدىعىن ۇزدىكسىز ۇلعايتىپ، مادەنيەت پەن ساياحاتتى توعىستىرۋدى ىلگەرىلەتىپ، قىسقى ’ءتورت رايون، ءبىر باقشا‘ قار - مۇز وزەكتى رايونى، جازعى مىڭ شاقىرىمدىق سۋرەت ءدالىزى سارا جەلىسى قۇرىلىسىن جاپپاي جەدەلدەتىپ، التايدىڭ ساياحات كاسىپ سالاسىنىڭ دامۋدىڭ داڭعىل جولىنا كىرۋىن ىلگەرىلەتىپ، شينجياڭنىڭ ساياحات كاسىبىنىڭ جوعارى ساپالى دامۋىن ىلگەرىلەتۋدىڭ داڭقىن اسىرامىز“، - دەدى التاي ايماقتىق پارتكومنىڭ شۋجيى جاڭ يان.