مۇشە گۋان فاڭفاڭ:

حالىق ٴۇشىن ۇسىنىس بەرۋ مىندەتىمدى ٴتىپتى دە ويداعىداي اتقارامىن

شينجياڭ گازەتىنىڭ حابارى.

(ٴتىلشى گو ليڭ)

قىستاقتارعا بارىپ وتباسىلاردى ارالاپ، قىستاق تۇرعىندارىمەن اڭگىمە دۇكەن قۇرىپ، ساياساتتاردىڭ تياناقتانۋ جاعدايىن ۇعىستى، مەكتەپتەرگە كىرىپ، وقۋشىلاردىڭ ۇيلەرىنە بارىپ وقۋ - اعارتۋ جاعىنداعى تالاپ - تىلەكتەردى ۇعىستى، ٴتىپتى، كىرە كولىگىنە وتىرسا دا شوفەرلەرمەن بۇقارا كوڭىل ٴبولىپ وتىرعان ىستەر جايلى ىرىقتى تۇردە اڭگىمەلەستى... 2 - ايدىڭ 18 - كۇنى مەملەكەتتىك ساياسي كەڭەستىڭ شينجياڭدا تۇراتىن مۇشەسى، چاپچال سىبە اۆتونوميالى اۋداندىق وقۋ - اعارتۋ مەكەمەسى وقۋشى قابىلداۋ، ەمتيحان الۋ ورتالىعىنىڭ مەڭگەرۋشىسى گۋان فاڭفاڭ تىلشىلىگىمىزدى قابىلداعاندا، ”حالىق تۇرمىسىنا جىلۋ بەرۋ“ دەگەن ٴسوزدى قايتا - قايتا اۋىزعا الدى. ول: بۇقارانىڭ باقىتتى تۇرمىسى − مەملەكەتتىك ەكى ٴماجىلىس نازار اۋدارىپ وتىرعان نەگىزگى ٴتۇيىن، - دەدى.

ٴوزىنىڭ 14 - كەزەكتى مەملەكەتتىك ساياسي كەڭەستىڭ مۇشەسى بولىپ تاعى دا سايلانعاندىعىن بىلگەننەن كەيىن گۋان فاڭفاڭ ارقالاعان مىندەتىنىڭ ٴتىپتى دە اۋىرلاعاندىعىن سەزىندى. ”ۇسىنىس جوبانىڭ ساپاسىن جوعارىلاتىپ، ٴتىپتى دە ويداعىداي مىندەت اتقارىپ، جاۋاپكەرشىلىكتى ادا ەتۋدە شىنايى ىنتا - ىقىلاس بولىپ قانا قويماي، ونىڭ ۇستىنە وزىمىزگە ٴتىپتى دە قاتاڭ تالاپ قويۋىمىز كەرەك“ دەدى گۋان فاڭفاڭ.

2018 - جىلى تۇڭعىش رەت مەملەكەتتىك ەكى ماجىلىسكە قاتىناسقان كەزدە ىشكەرىلەي تەكسەرۋ - زەرتتەۋ جۇرگىزۋ ارقىلى گۋان فاڭفاڭ ”شينجياڭنىڭ جاتاقتى تۇزىمدەگى مەكتەپ قۇرىلىسىن كۇشەيتۋدى قولداۋ“ جونىندەگى ۇسىنىسىن ورتاعا قويدى. ”العاش رەت تاپسىرعان ۇسىنىسىم قاتىستى مينيسترلىك - كوميتەتتەردىڭ نازارىن اۋداردى ٴارى تەز ارادا تياناقتاندىرىلىپ، ماعان زور شابىت بولدى“ دەدى ول.

ٴار جىلى مەملەكەتتىك ەكى ماجىلىسكە الىپ باراتىن سالماقتى ۇسىنىس جوبالارى − گۋان فاڭفاڭنىڭ قاي - قاشان دا مۇشەلىك جاۋاپكەرشىلىگىن ۇمىتپاي، مىندەتىن اتقارىپ، جاۋاپكەرشىلىگىن ادا ەتۋىنىڭ شىنايى بەينەسى. 2018 - جىلدان بەرى ول جيىنى 23 ۇسىنىس تاپسىردى.

2020 - جىلى گۋان فاڭفاڭ تەكسەرۋ - زەرتتەۋ بارىسىندا، اۋىل - قىستاقتاعى ورتا، باستاۋىش مەكتەپتەردىڭ ارناۋلى مىندەتتەگى شيپاگەرلەرى قوسىنىندا قىزمەتكەر كەمشىل بولۋ سياقتى ماسەلەلەردىڭ ورىن تەۋىپ وتىرعاندىعىن بايقايدى ٴارى ”اۋىل - قىستاقتاعى ورتا - باستاۋىش مەكتەپتەرگە مەكتەپ شيپاگەرلەرىن تولىق ورنالاستىرۋ، كۇشەيتۋ“ جونىندەگى ۇسىنىس جوباسىن تاپسىرادى. ”ۇسىنىس جوباعا وقۋ - اعارتۋ مينيسترلىگى مەن مەملەكەتتىك دەنساۋلىق ساقتاۋ، سالاماتتىق كوميتەتى جاۋاپ قايتارىپ، قاتىستى ساياساتتاردى ەگجەي - تەگجەيلى ٴتۇسىندىرىپ، مەكتەپ شيپاگەرلەرىن ورنالاستىرۋ ماسەلەسىن ىشكەرىلەي شەشەتىندىكتەرىن ٴبىلدىردى“. ول: ادامدى ٴتىپتى دە قۋاندىرعانى، سول جىلى اۋداندا اشىق ەمتيحان الىپ قابىلداۋ ارقىلى بۇكىل اۋدانداعى 33 ورتا، باستاۋىش مەكتەپكە ارناۋلى مىندەتتەگى مەكتەپ شيپاگەرى ورنالاستىرىلدى، - دەدى.

”ۇسىنىس جوبانىڭ ونىمدىلىگى ماعان ەڭ زور شابىت بولدى“ دەيدى گۋان فاڭفاڭ. بيىل ول كاسىپتىك وقۋ - اعارتۋ رەفورماسىن جەدەل ىلگەرىلەتۋ، جاستار مەن وسپىرىمدەرگە ارنالعان زاڭمەن باسقارۋ تاربيەسىن كۇشەيتۋ، قۇلجادان اقسۋعا دەيىنگى تەمىر جول قۇرىلىسىن زور كۇشپەن قولداۋ سياقتى جاقتارداعى مازمۇنداردى قامتىعان 3 ۇسىنىس دايىندادى.

گۋان فاڭفاڭ تانىستىرىپ بىلاي دەدى: كاسىپتىك مەكتەپتەردىڭ دارىندىلاردى باۋلۋ قابىلەتى مەن دەڭگەيى ٴالى دە ەكونوميكالىق، قوعامدىق دامۋدىڭ قاجەتىن قاناعاتتاندىرا المايدى. بۇل ماسەلەلەر كاسىپتىك مەكتەپتەردىڭ جوبالارىنىڭ، ورنالاستىرۋلارىنىڭ ۇيلەسىمسىزدىگى، سايكەستى ساياسات - شارالاردىڭ تىڭعىلىقتى تياناقتانباۋى، وقىتۋشىلار سانىنىڭ جەتىسپەۋى، مەكتەپ - كاسىپورىن سەلبەستىك مەحانيزمىنىڭ كەمەلدى بولماۋى سياقتى جاقتاردا بەينەلەنەدى. ول ۇسىنىسىندا كاسىپتىك مەكتەپتەردىڭ وقىتۋ شارت - جاعدايىن ولشەمگە جەتكىزۋ ينجەنەرياسىن جەدەل اتقارۋ، كاسىپتىك وقۋ - اعارتۋدىڭ وقىتۋشىلار قوسىنىن باۋلۋ، تاربيەلەۋ جۇيەسىن كەمەلدەندىرۋ، كاسىپتىك وقۋ - اعارتۋدىڭ ۇيلەسىمدىلىگىن كۇشەيتۋ سياقتى جاقتاردى ارقاۋ ەتىپ، ناقتى ۇسىنىستارىن ەگجەي - تەگجەيلىلەندىردى.

بيىل جىل باسىندا گۋان فاڭفاڭ چاپچال سىبە اۆتونوميالى اۋدانى ٴتورتسۇمىن اۋىلى ٴتورتسۇمىن قىستاعىنا بارىپ ”ۇعىسۋ، تيىمدىلىك جاساۋ، توعىستىرۋ“ بويىنشا قىستاقتا تۇرۋ قىزمەتىن ورىستەتىپ، اۋىل - قىستاق نەگىزگى ساتى قىزمەتىن ٴتىپتى دە ىشكەرىلەي ٴتۇسىندى. ول: جاڭا مىندەت اتقارۋ جولىم باستالىپ كەتتى، كوپىرلىك، دانەكەرلىك رولىمدى تولىق ساۋلەلەندىرىپ، حالىق ٴۇشىن ۇسىنىس بەرۋ مىندەتىمدى ٴتىپتى دە ويداعىداي اتقارامىن، - دەدى.